Kubianga Mi
Nte nnyin ikopde item Esie, eyeda nnyin usung ke eti usung ndien owo idibiangake nnyin.
Mfin emi, ami nyeno ofuri owo iko item, edi akpan-akpan nno mbufo eke obufa emana emi—ndito Primary, mkparawa iren, ye nkaiferi iban. Afo emenehede enyene ntotungo ima oto Prophet Abasi eke ini nnyin, President Russell M. Nelson—amanehede eting ono ediwak mbufo ke asanga-asanga usuanetop eke iwaad eke isua oko ye ibuot-iko edide “Idorenyin eke Israel.” Nnyin imesiwak ndikop nte President Nelson enehede okot fi ete—ke, “idorenyin eke Israel,” obufa emana ye ini-iso eke mfiak-nda-ndi Ufok Abasi Jesus Christ.
Mme mkpri ufan mi, ami nyema nditongo ke ndibuana mme mbuk ufokemana iba.
Eke 102nd Dalmatian
Ediwak isua ekebede, ami nnyongutom ndisim ufok nyung ndu-ke-mkpaidem ndikut nte eduokde afia benti ke ofuri ebiet—ke isong, usung garage, ye ke ndat-ndat itiat ufok nnyin. Ami mma nse nkpo emi ofon nyung nkut nte ke benti emi osuk edi mbit-mbit. Ntoi usung benti emi ada aka ke edemesa ndien ami ntiene enye. Do, ami nkut eyeneren isua ition mi ye ifiet-benti ufok ke ubok esie, nte ebinede ebua nnyin. Ema edebi ediye ndiwen Labrador nnyin afia ke ubak-idem!
“Nso ke afo anam?” Ami mbup ke sung-sung uyio.
Eyeneren mi etre, ese mi, ese ebua, ese ifiet-benti emi oyohode ye benti, ndien odoho ete, “Ami nyom enye ebiet mme obubit-nkem ebua emi odude ke movie—afo omofiok, eke 101 Dalmatians.”
Ami mmema ebua nnyin. Ami nkere enye ama ofon, edi ke usen oro eyeneren mi ekenyene isio-isio ekikere.
Enyene Mbuwid Anwa-mbana
Udiana mbuk mi edi abanga akamba-uncle Grover, emi odungde ke anyan ebiet, oyom-usung okpong obio. Uncle Grover ama enehede osong. Nnyin nikikere ke akpana ndito iren nnyin esobo ye enye mbemiso enye akpa. Ntre, uwemeyo kiet, nnyin iwat ke ekpri ufok esie. Nnyin iketie otokiet man ikese enye inyung inam enye ofiok ndito iren nnyin. Ikebighike ke ufot nneme nnyin, mkpri ndito iren nnyin iba, emi edide isua ition ye itiokiet, ema eyom ndiworo anwa nyung mbre-mbre.
Uncle Grover, ke okopde ebenge mmo, osuhode iso esie ese iso mmo. Iso eise ama eneghede osong oyung edi esen esen tutu mkpri eren emi enyene ndik ebanga enye. Enye odoho mmo ete, ke uyo mkpa esie, “Ekpeme idem—ediwak ndioi anwa-mbana odu ke anwa oro.” Ndikop emi, Lesa ye ami inehede ikop mkpaidem; amafina nnyin ke ekeme ndifuri nnyin ye anwa-mbana! Ndito iren oro eworo eka mbre ke anwa kini nnyin ikade iso ndineme nneme.
Ekem, ini emi nnyin idukde moto man inyong ufok, ami mbup ndito iren oro nte, “Nte mbufo ema ekut idiok anwa-mbana?” Owo mmo kiet oboro, “Ihn-ihn, nnyin ikekutke idiok anwa-mbana, edi nnyin ima ikut ndiwen anwa-mbana kiet ye ubak-afia ke edem esie!”
Akamba Andibianga
Mbuk emi kabanga mkpri ndito-owong emi emi efiokde nkpo ebanga uwem ye akpaniko ekeme ndinam nnyin owokiet-kiet isak-imam, edi mmo ewut ata akpan ukpeb nko.
Ke akpa mbuk, ekpri eyen nnyin ekeyene ediye ebua nte mkpo mbre;kemisehe, enye emen iko benti oyung, eyime ndinam ke ekikere esie.
Ke udian mbuk oro, ndito iren oro iketimke ifiok ndik emi edimumde mmo oto ke ndikut idiok anwa-mbana. Sia mmo mikemeke ndikut se ikesimde mmo, mmo ekeme ndibo ufen ke akpatre. Emi edi mbuk kabanga se minyeneke ebuana—ndida akpan nkpo ndi-di nte nkpo efen. Ke mbuk kiet-kiet, ufen ikekponke.
Edi, ediwak mfin emi emum ke ukem mme mkpo emi ke akamba udomo nkpo. Mmo ndusuk ikemeke ndikut mme nkpo nte mmo edide ndusuk iyuhoke ye akpaniko. Nko, Mme odudu odu mfin emi etimde enam man ada nnyin okpong nsinsi akpaniko. Mme abianga ye nsu oyom usung akan nti owo ndifiok ndien ediwak ndinyene ata idiok utit.
Satan, ete nsu ye akamba andibianga, oyom nnyin ibup ibanga nte nkpo enehede edi ndien isin nsi nsi akpaniko mme ndikpuho mmo nsin ke nkpo enemde nnyin. “Enye anam ekong ye mme ndito Abasi” ndien abiat thosin isua abat oyung ekpep ukeme ndikpek ndito Abasi ete enim kakpan ete eti edi idiok ndien idiok edi eti.
Enye owut idem esie ke ndinam mme owo enim ete ke idiok anwa-mbana edi ufene mme ke, ndida benti ndebi, ke mbufo emekeme ndikpuho Labrador nsin ke enyene-nkem Dalmatian!
Idahaemi yak iwongore ika uwutnkpo eke akpan ukpebnkpo emi odude ke nwed Abasi, kini prophet Abasi Moses ekesobode ye ukem edinam emi iso ye iso. “Ema eda Moses edok ke ata enyong obot[;] … enye okut Abasi iso ye iso, onyung eneme-nneme ye enye.” Abasi ekpeb Moses abanga nsinsi uduot esie. Okposuk edi nte Moses edide owo ye misanake, Abasi ekpep ete Moses ekedi “ke mbiet Ikpong-ikpong Eyen Esie … edi-di Andinyanga.”
Ke ibio-ibio, Moses, ke mkpaidem nkukut emi, amaokut Abasi, ndien enye nko ekpep akpan nkpo abanga idem esie: enye ekedi eyen Abasi
Enehede ekpang-utong eno se iketibede kini inem nkukut emi okurede. Ndien ekedikem ete … Satan edidomo enye,” ete, “Moses, eyen owo, tuak ibuot nno mi!” Moses enehede oboro ete: “Afo edi anie? Koro sese, ami ndi eyen Abasi, ke mbiet Ikpong-ikpong Eyen Esie; ndien ewe edi ubong fo man ami mkpetuak-ibot nno fi
Ke iko efen, Moses ete, “Afo ukemeke ndibianga mi, koro mmofiok se ami ndide. Ekebot ke mbiet Abasi. Afo unyeneke unwana ye ubong Esie. Ntre ewe ntak ke ami mkpetuak-ibout nno fi mme ndiduo nduk abianga fo?”
Kpang-utong idahaemi kop nte Moses akakade iso ndiboro. Enye odoho ete, ”Satan, daha mi ko; kubianga mi.
Ediwak odu se nnyin ikeme ndikpeb nto nti iboro Moses kabanga idomo eketode andidiok. Ami nyom mbufo eboro ntre kin emi mbufo edukde idomo. Ebuat asua ukpong mbufo ke ndidoho ete, “Woro mi! Afo unyeneke ubong ndomokiet . Ku domo mi mme kuyung usu-nsu uno mi! Koro ami mmediongo ke ami ndi eyen Abasi. Ndien kpukpru ini ami nyekot Abasi nyom unwam Esie.”
Nte ededi, Satan, isiyakke udong mbiara esie iduok man abianga onyung etek nnyin. Enye ikenamke ntre ye Moses, oyom ndinam enye efre se enye ekedide ke nsinsi.
Nte ke enye akanam nkpo mbre eke ekpri eyen, “Satan ofiori ke okposong uyio, onyung abuari ke iso isong, ndien eteme, ete: Ami ndi Ikpong-ikpong Eyen emi Ebonde, tuak-ibuot nno mi.”
Yak ifiak-ise. Ndi mbufo emekop se Satan etingde? “Ami ndi Ikpong-ikpong Eyen emi Ebonde. Tuak-ibuot nno mi!”
Akwa andibianga odoho ete, ye odudu, “Kufina idem; ndinamke fi idiok—ami ndighe idiok anwa-mbana, ami ndi eti ndiwen-ye-afia anwa.”
Ndien Moses okot Abasi onyung obo edisana odudu Esie. Okposuk nte andidiok ekedigede ndien isong enyek, Moses ikenyimeke. Uyio esie ama okpon onyung anwanga. Enye ofiori ete, “Satan, woro kpong mi, koro Abasi kiet emi kpot ke ndituak-ibuot nno, emi edide Abasi ubong.”
Ke akpatre “Satan … oworo … okpong iso Moses.”
Ekem Abasi obiongore onyung odiong Moses ke nkopitem esie, Abasi odoho ete:
“Ofofon ono fi, Moses, ke … eyenam fi enyene odudu akan ediwak mmong. …
“Sese, Ami ndo-du ye afo, tutu ekesim akpatre usen.”
Moses ndisin Satan edi eti ye akpan ye eti uwutnkpo ono nnyin owo kiet-kiet, ke ndaha ekededi ke uwem nnyin. Edi etop osongo ono mbufo owo kiet kiet—man ediongo se ekpenamde kini enye odomode ndibianga mbufo. Nte Moses, mbufo emefon iso ke ndinyene eno unwam eke heaven.
Ibet ye Edidiong
Didie ke mbufo ekeme ndikut unwam heaven emi, kpa nte Moses akanamde, ndien idukke abianga mme ndiduk ke idomo? Abasi ke Idemesie akafiak osongo anwanga usung eke edisana unwam ke emana emi kini Enye odohode ete: “Ke ntre, Ami Abasi, mmofiok nsobo emi edisimde mme owo ke isong, nkot isungutom mi, Joseph Smith, Jun., nyung nting-iko nno enye ke heaven, nyung nno enye ibet.” Ndinam emem nditing, nnyin imekeme nditing ete ke Abasi, emi ofiokde “utit nkpo tongo ke editongo,” odiongo ata nsongo-nkpo eke eyo nnyin emi. Ntre, Enye ama ono usung man ikan mfina ye idomo, ediwak eke edide nte ata iboro eketode odudu abianga eke andidiok ye eke enwan esie.
Usung edi mmem-mmem. Otode isungutom Esie, Abasi eting-iko ono nnyin, ndito Esie, onyung ono nnyin mbet. Nnyin imekeme ndisin ufang iko eke ami ntingde, “Ami, Abasi … nkot isungutom mi [President Russell M.Nelson], nyung nting-iko nno enye nto heaven, nyung nno enye ibet.” Nte idige akpaniko edi oro?
Ami mmetie ntiense nte ke Abasi ama eting kakpan ono Joseph Smith oto ke heaven, otongode ke Akpa Nkukut. Abasi nko eting-iko ono President Nelson kie eyo nnyin emi. Ami nno iko ntiense ke Abasi eneme-nneme ye mme prophet ke emana emi ekebede onyung ono mmo ibet emi enamde man ada ndito Esie usung akainemesit ke uwem emi ye ubong ke uwem efen.
Abasi aka iso ndino odu-uwem prophet nnyin ibet mfin emi. Mmen nwut odu—ediwak nkpo-ufokemana, Ufokabasi-awamde ukeukem ntot ikoabasi; adaitie ukpep ye ndisobo ye ufokemana ye utom uwam; ndisik ke obuno nkpo eke temple ye mme ndutum; ye obufa nkpo Mkpri-ndito ye iwaat. Enem mi kabanga mfonido ye esit-mbom eke edima Ete ke Heaven ye Eyen Esie, Jesus Christ, emi ekefiakde-eyak Ufok Abasi Andiyanga ono edi isong inikiet efen nnyung nkot prophet ke eyo nnyin emi. Mfiak-nda-ndi iko-Abasi Jesus Christ edikpuho ini afanikong esin ke uyuho ini.
Akananam Idioknkpo Idige Inemesit
Nkopitem nno mbet emi enode prophet nnyin idige usung ke ndisin odudu ye abianga eke andidiok kpot edi edi usung ke edinyene nsinsi idara ye inemesit. Edisana nkpo emi edi mfefere: edinenido, mme nkopitem to ke mme mbet, emen edidiong, ndien edidiong emen inemesit, idara, ono uwem nnyin.
Nte ededi, ke ukem usung emi andidiok okodomode ndibianga Moses, enye oyom ndibianga mbufo. Kpukpru ini enye oyom ndi-di nkpo emi enye midighe. Ofuri ini enye odomo ndidedip owo emi enye enehede edi. Enye odoho ke nkopitem eyenam uwem mbufo abiara ndien ke oro eyenem mbufo enana inemesit.
Nte mbufo emekeme ndikere mbanga ubak usung abianga esie? Nte uwutnkpo, enye okpuho ke idiok iduhe ke idiok ibok ye ndiwong min edi odoho ete ke min eyeda inemesit edi. Enye esin nnyin ke ediwak ndioi nkpo emi ekemede ndidu ke nkpo use nkpo odongode memidem menwut ye ata uwutnkpo. Ke ndidian do, enye osoro nnyin ono nkpo emi odude ke ekim emi ekemede ndida ubiak ndi, nte ndise ifet, idiok ubine nno mbon efen otode nkpo internet, ye ndisuan nsu nsu etop man ono eyihe ye nyikesit ye ekikere. Nkari-nkari enye eting sung sung ete, “Ekam etiene mi, ndien mbufo eyekop inemesit.”
Mme iko emi prophet Nwed Mormon ekewetde ke ata ediwak-isua ke edem enehede enyene-ufon ono ini nnyin emi: Idioknkpo akananam idige inemesit.” Mbenge ya nnyin ifiok abianga Satan ke se mmo edide. Mbenge yak nnyin ituak-ida inyung ikut nsu-nsu ye utenge enye emi oyomde ndibiat ukpong nnyin nyung nyip nnyin nsio ke idara ini emi ye ubong eke ini iso.
Ndima ndito-eka mi iren ye iban, ana nnyin ika iso ke mbuotidem ye ntingenyin, koro nkokure usung edi orokendifiok akpaniko nyung nkop uyio Abasi otode ke isungutom Esie. “Koro Spirit etingde akpaniko inyung isuho-nsu. … Mme nkpo emi oworo osu ono nnyin anwa anwa, kabanga eriyanga-ukpong nnyin. … Koro Abasi nko ama esiting iko ono mme prophet eset.” Nnyin idi Ndisana-owo eke Abasi Andikpon-nkan, idorenyin Israel! Nte nnyin iyeduo? “Nte nnyin iynenyek inyung isin enwan oro? Ihn-ihn! … Iyenem ibet Abasi, ke ukpong, esit, ye ke ubok, ke mbuotidem ye akpaniko nnyin iyetuak ida.”
Ami nno iko ntiense mi kabanga Edisana Owo Israel—kpa enying Jesus Christ. Ami nting iko-ntiense kabanga edibighe ima Esie, akpaniko, ye idara emi edide oto ke anana-adanga nsinsi nwaidem Esie. Nte nnyin ikopde mme item Esie, eyeda nnyin usung ke eti usung ndien owo idibiangake nnyin. Ke edisana enying Andinyanga nnyin, Jesus Chrst, amen.