Akwa Ndomoidem Mbufo
Andinyanga okot nnyin, ofuri usen, ete iyak inemesit ye ukpeme inim enyung idiana ye Enye ke isang owo-mbet.
Eke Hobbits
Inem okokot nwed ndito-nwong kiet emi ekewetde ke ediwak isua emi ekebede otongo ye udim-iko emi “Hobbit odung ke odu ke esit isong.”
Mbuk eke Bilbo Baggins abanga ata eti ye anana-uyai hobbit emi ewutde ye ata ediye ifet—eti ufang ndidomo idem ye enwongo eke akwa udori kiet.
Mfina edi ke mme ata okpono-idem hobbit inyeneke mbubehe ye ndomoidem. Uwem mmo kpukpru abanga inemesit. Mmo ema ndidia udia akang itiokiet ke usen ke mmo ekemede ndikut udia enyung edu ke inwang mmo kpukpru usen, emia isim ye isenowo, ekwo-ikwo, ebre nkukwak ikwo, ndien eyuho ke ekpri inem uwem.
Nte ededi, ini emi eyakde ewutde ufang akwa ndomoidem eno Bilbo, ekikere nkpo kiet ediduk esit esie. Enye ofiok tongo oro ete ke isang oro eyefina. Afainikong ekeme ndidu. Ekemendidi imo idikemeke ndifiak nnyong ndi aba.
Ke ntre, ikoot ndomoidem ama oduk ata isong esit esie. Ke ntre, anana-uyai hobbit emi adaha-okpong inemesit onyung otongo isang akwa ndomoidem emi edinamde enye aka anyan isang ekesim “do onyung afiak edem.”
Ndomoidem eke Mbufo
Ndusuk kiet kotu ntak emi mbuk emi afiakde etibe ye ediwak nnyin edi koro edi mbuk nnyin nko.
Ata, ata, anyan ini ko, mbemiso nyin ikedimana, ke mme isua emi ini ye ekikere mitighe, ema ekot nnyin nko ete itongo isang ndomoidem. Edi Abasi, Ete nnyin ke Heaven okowut uduak oro. Ndinyime ndomoidem emi oworo ndikpong inemesit ye ukpeme eke ata iso Esie. Ediworo ndinam isang nka isong emi oyohode ye afanikong ye idomo eminnyin mifiokke.
Nnyin ima idiongo ke nkpo oro idimemke.
Edi nnyin nko ima idiongo ete ke nnyin iyebo nsongurua eno, emi edide eno ikpokidem ye ndifiok akwa idara ye ndutuho eke uwem. Nnyin iyekpeb ndidomo idem, ndiyom, ye ndinwana-nkpo. Nnyin iyefiok akpaniko kabanga Abasi ye idem nnyin.
Nte ededi, nnyin ima idiongo ite ke nnyin iyenam ediwak ndudue ke usung-isang oro. Edi nnyin nko ima ibo enwongo: otode ke akwa nwaidem Jesus Christ, ekeme ndiyet nnyin isana ke nam-due nnyin, efiak enam spirit nnyin ofon onyung asana, ndien ke usen kiet iyeset ifiak-isobo ye mbon emi nnyin imade.
Nnyinima ikpeb adanga nte Abasi amade nnyin eketre. Enye ono nnyin uwem, ndien Enye oyom nnyin ikut unen. Ke ntre, Enye ebenge Andinyanga ono nnyin. Ete nnyin ke Heaven odoho ete, “Nte ededi,” “mbufo enyene ndimek nno idem mbufo, koro ema eno mbufo unen oro.”
Ekeme ndi-di ubak ndaha ke ndomoidem uwemisong ama odu emi ekefinade onyung edighe ndito Abasi, sia ediwak ibat ndito-eka iren ye iban nnyin eke spirit ikenyimeke uduak oro.
Otode ke eno ye odudu unen-edimek, nnyin ibiere ke ndaha nkpo se nnyin idikpeb inyung ikabare idi ke nsinsi ama ekem ye ndinam ndomoidem oro.
Kentre, ndinim ke mme enwongo ye odudu Abasi ye Edima Eyen Esie, nnyin inyime ndomoidem oro.
Ami mma nyime.
Ndien mbufo ema enyime.
Nnyin inyime ndikpong ukpeme eke akpa ebietidung nnyin inyung itongo akwa ndomoidem eke nnyin ndika “do nyung mfiak nnyong ndi.”
Ikoot man Odomoidem
Edi, uwem isong enyene usung nte etimede nnyin, idighe ntre? Nnyin iyom ndifep enyin ke akwa udong nnyin, iyom inemesit ye emem ke nde editot ye nkori.
Edi, odu nkpo kiet emi nnyin mikemeke ndifanga, ke ataisng esit nnyin, emi oyomde edikong ye eti ntak. Udong emi edi ntak kiet emi edade mme owo esin ke gospel ye Ufok Abasi Jesus Christ. Gospelemi efiakde-eda-edi, ke ekikere kiet, edi ikoot nditi nnyin mbanga ndomoidem emi nnyin ikenyimede ke anyan ini ko. Andinyanga okot mbufo, ofuri usen, ete eyak inemesit ye ukpeme enim enyung ediana ye Enye ke isang owo-mbet.
Ediwak mfina odu ke usung emi. Odu mme obot, una-isong, ye ubiongore. Ekeme ndidi ikpo utue-ekpe, ndioi-unam, ye dragon kiet mme iba ndidu odu do. Edi edieke mbufo edude ke usung oro enyung ebuotidem ke Abasi, ke akpatre mbufo eyekut usung ekesim akanga ubong mbufo enyung efiak eka ufok heaven mbufo.
Ntem didie ke mbufo editongo?
Edi ata mmem-mmem.
Eyak Esit Mbufo eno Abasi
Akpa, ana mbufo emek ndiyak esit mbufo nno Abasi. Enwana kpukpru usen ndiyom Enye. Ekpeb ndima Enye. Ndien ekem eyak ima oro anam mbufo ebo ukpeb, efiok, etiene ukpebnkpo Esie enyung ekpeb ndinim mbet Abasi. Eno nnyin mfiak-nda-ndi gospel Jesus Christ ke anwanga ye ndimem usung emi ekpri eyen ekemede ndifiok. Edi, gospel Jesus Christ enyene iboro ono ata ikpo mbume eke uwem onyung enyene oruk nti nkpo ye mbuaha emi ekpedide ida ukpeb ye ekikere-esit ofuri isua-uwem, nnyin idikemeke ndifiok ata esisit ubak nkpo oro.
Edieke mbufo ebiate-ini ke ndomoidem emi otoke eyighe ye ukeme mbufo, eti ete ndi-di owo-mbet idighe ke ndinam nkpo ofon-ama, edi edi ndinam nkpo ye ekikere. Edi mbumek mbufo ediwut se mbufo enehede edi, emi akande ukeme mbufo.
Kpa ke eduede, mbufo emekeme ndimek ntre ndikpa-mba mme ndikpong idem, edi ebo odudu mbufo, eka-iso esin-ifik, enyung edemere. Oro edi akwa udomo nnyin ke uwem emi.
Abasi odiongo ke mbufo ifonke-ima,ke mbufo eyeduo ke ubak ini. Abasi ama mbufo akan kini edomode akan kini mbufo ekande.
Nte edima ete ye eka, Enye oyom mbufo edomo enam esisit ekikere eka iso. Owo-mbet ebiet ndikpeb nte ebrede piano. Ndusuk ofuri se mbufo ekemede ndinam ke akpa-ini edi esisit edifiok uyio “Eto-ndido.” Edi edieke ekade-iso ndikpeb, mmem-mmem uyio emi mbufo mikemeke ndifik nsio idahaemi ke usen kiet eyeworo inem uyio, ekikere, ye ndise.
Idahaemi, ekeme ndi-di usen oro ke uwem emi, edi eyedi. Ofuri se Abasi oyom edi mbufo nditing-enyin nnwana nka iso.
Enwam Kiet-eken ke Ima
Odu nkpo kiet emi eyede, ke ata ndaha iba,kabanga usung emi mbufo ekemekde: nkokure usung mbufo ekori ke ndomoidem iko-Abasi mbufo edi ndinwam mbon efen ke ndikori nko.
Ndinwam mbon efen edi usung eke owo-mbet. Mbuotidem, idorenyin, ima, esit-mbom, ye utom-unwam owut nnyin nte mbet.
Otode ke ukeme mbufo man enwam ubuene ye mbon-unana, man enwam mbon emi edude ke mfina, edu uwem mbufo asana onyung osongo, spirit mbufo okpon, ndien mbufo ekop inemesit.
Edi ima emi ikemeke ndi-di kini eyomde udori. Ikemeke ndi-di oruk unwam oro emi oyomde ediongo, etoro, mme ema-ma.
Ntimbet Jesus Christ ema Abasi ye ndito Esie ndien iyomke usiene. Nnyin imema mbon emi enamde nnyin ifuho, ye mbon emi mimaha nnyin. Kpa ye mmo oro esuenede, ebiatde, enyung eyomde ndinam ibak ye nnyin.
Ini emi edisana ima Christ oyohode esit mbufo, mbufo inyeneke ufang ino enwan, ikpe, ye obut. Mbufo enim ibet Abasi koro emema Enye. Ntem, sung-sung mbufo ekabare ebiet Christ ke ekikere ye edinam mbufo. Ndien ewe ndomoidem okpon akan emi?
Ebuana Mbuk Mbufo
Oyoho nkpo ita emi nnyin inwanade ndinam ke uwem emi edi ndida enying Jesus Christ ndori ke idem nnyin ndien ikopde buut ndidi owo Ufok Abasi Jesus Christ.
Nnyin idipke-dip mbuotidem nnyin.
Nnyin ibuk-ke mbuotidem ke isong.
ke usung efen, nnyin ineme ibanga isang nnyin ye mbon efen ke eti ye anwanga usung. Se mme ufan esinamde edi oro—mmo eting ebanga nkpo emi enyenede ufon ono mmo. Nkpo emi odude ke esit mmo onyung anamde ukpuhore ono mmo.
Se mbufo enamde edi oro. Mbufo eting mbuk ye ifiok-ukpeb mbufo nte mbon Ufok Abasi Jesus Christ eke Latter-day Saints.
Usukini mbuk mbufo esinam mme owo esak imam. Usukini anam mmo etua. Usukini mbuk mbufo anwam mme owo ndika-iso ke ime, eyire, enyung esongo eyo ini-kiet efen, ke usen kiet efen ndien esik esisit ekpere Abasi.
Ebuana ifiok-ukpeb m ke idem mbufo, social media, eboho, ke ofuri ebiet.
Kiet kotu akpatre nkpo Jesus Christ eketingde ono mbet Esie ekedi yak mmo eka ke ofuri ererimbot enyung ebuana mbuk Christ emi ekesetde. Mfin emi nnyin imedara inyime akwa ubiong oro.
Inem etop eke nnyin inyeneke ndibuana edi emi: oto ke Jesus Christ, ofuri erenowo, nnwan, ye eyenowong ekeme ndifiak nnyong nka ufok heaven mmo ke ifure ndien, do, edung ke ubong ye edinen-ido!
Odu ediwak nti mbuk anade ibuana.
Abasi ama owut owo ke eyo nnyin emi! Nnyin imenyene odu-uwem prophet.
Yak nti mbufo ke Abasi iyomke ete mbufo “enyam” mfiak-nda-ndi iko-Abasi ye Ufok Abasi Jesus Christ.
Enye iyomke mbufo edip iko-Abasi ke idak abang.
Ndien edieke mme owo ebierede ke Ufok Abas idige ino mmo, ubiere mmo edi oro.
Oro iworoke ke mbufo inamke ofon. Ana mbufo eka-iso efonido ye mmo. Ndien itreke ke mbufo idifiake ikoot mmo ete edi aba.
Ukpuhode ke ufot iyokho edisobo ye uko, esit-mbom eke owo-mbet edi—ikoot!
Nnyinn imema inyung ikpono ofuri ndito Abasi, isehe ndaha mmo ke uwem, isehe oruk mme edu-ukpono, isehe ubiere eke uwem mmo.
Nte utom nnyin, nnyin iyedoho ite, “Edi edikut! Ekut eno idem mbufo udoriyenti-nkpo emi odude ke ndisanga ke usung owo-mbet.”
Nnyinnikoot mme owo ete “edi enyung enwam, kente nnyin inwanade ndinam ererimbot edi eti ebiet.”
Ndien nnyin iting ite, “Edi enyung edu mi! Nnyin idi ndito-eka mbufo irenye iban. Nnyin ifonke-ima. Nnyin imenim Abasi ke akpaniko inyung iyom ndinim ibet Esie.
“Ediana ye nnyin, ndien mbufo eyenam nnyin ifon. Ndien, ke usung ntem, mbufo eyekabare efon nko. Yak nnyin inam ndomoidem emi otokiet.”
Ewe-ini Ke Ami Nditongo?
Ini emi ufan nnyin Bilbo Baggins okopde koot man ndomoidem odukde esit esie, enye ebiere ndinyene inem okoneyo nduok-odudu kiet, adia edinem udia usenubok, onyung otongo isang ke usenubok.
Ini emi Bilbo edemede, enye okut ufok esie nte edehede, ndien ayak esisit oro akpabiat eti uduak esie.
Edi kini ufan esie Gandalf edide onyung obupde ete, “Ewe ini ke afo oyom ndidi?” Mna asanga ye ufan esie, ana Bilbo ebiere ono idemesie se anade anam.
Ke ntre, ata eti ye anana-uyai hobbit okut idemesie nte osopde efehe oworo ke enyin-usung esie aka usung ndomoidem anam enye efre itam, eto-isang, ye ofong ukwohode-inua esie. Enye ndien ikekureke udia uwemeyo esie kini okpongde.
Ndusuk odu ukpeb mi anade ono nnyin nko.
Edieke ami ye mbufo ikopde inemesit ke ndibuana ke akwa ndomoidem eke ndidu nyung mbuana ke se edima Ete ke Heaven ebengeke enim ono nnyin ke anyan ini ko, ami nsongo nno mbufo nte ke, mfin emi edi usen nditiene Eyen Abasi ye Andinyanga nnyin ke usung utom-unwam ye owo-mbet Esie.
Nnyin imekeme ndida ini uwem nnyin mbet ndaha ini emi ofuri nkpo ofonde ama. Idahaemi edi ini ndinehede nsinifik nyom Abasi, ndisin-unwam nno mbon efen, nyung mbuana ifiok-ukpeb nnyin ye mbon efen.
Eyak itam, eto-isang, ukwohode-inua, ye ndedehe ufok mbufo enim ke edem.
Eke mbon emi ema ekebem iso esanga ke usung oro, eda uko, ndinyene esit-mbom, enyene mbuotidem, ndien eka iso!
Eke mbon emi ema ekekpong usung emi, mbok efiak edi, efiak ediana ye nnyin, enam nnyin inehede isongo-ida.
Ndien eke mbon emi mitongoke kanga, nsidi ntak emi ebiatde ini? Edieke eyomde ndinyene ifiok-ukpeb eke nti-nkpo akwa usung nkpo Abasi emi, etongo isang akwa ndomoidem eke mbufo! Eneme ye mme missionaries. Eneme ye mbon Latter-day Saints emi edide ufan mbufo. Eneme ye mmo kabanga utibe utomye inem-nkpo emi.
Ini eke nditongo!
Di, Buana ye Nnyin!
Edieke mbufo esede ke uwem mbufo ekeme ndinyene se oworode, akwa ntak, osongo ebuana ufokemana, ye eti ebuana ye Abasi, mbok, di, buana ye nnyin.
Edeike eyomde eboho owo emi enamde utom man ekabare edi nti owo ke idem mmo, enwam mbon unana, enyung enam ereriimbot edi eti ebiet, mbok di, buana ye nnyin!
Edi enyung edikut se utibe, inem, ye isang ndomoidem emi adade ono.
Mbufo eyefiok idem mbufo keusung-isang emi.
Mbufo eyefiok se oworode.
Mbufo eyefiok Abasi.
Mbufo eyefiok ata ndomoidem ye ubongusung-isang eke uwem mbufo.
K’emi ke ami nting-iko ntiense mbanga ke enying Andifak ye Andinyaga nnyin, Jesus Christ, amen.