Integridad: Isa ka Cristohanon nga Kinaiya
Ang pagpangabuhi nga may integridad nagakahulugan nga tampad kita sa Dios, sa kada isa, kag sa aton diosnon nga pagkatawo.
Sa katapusan nga inoras sang pag-alagad sang Manluluwas, nagkadto sia sa Bukid sang mga Olivo sa hardin nga gintawag Getsemani kag ginhagad ang Iya mga disipulo nga maghulat. Nga nagaisahanon, nag-ampo Sia sa Iya Amay, “Kon buot mo, ipahilayo sa akon ining tagayan.” Sa sobra nga kasakit, ang Iya pag-antos “nagpakurog sa [Iya] bangod sa kasakit, bisan pa nga Dios, nga pinakagamhanan sa tanan, kag nagwa ang dugo halin sa tagsa ka buho-buho sang panit, … kag luyag kuntani nga indi na [Niya] pag-imnon pa ang mapait nga ilimnan, kag mag-isol.” Pero sa tiyempo sang dako nga kasubo, ang Manluluwas wala mag-isol “apang nag-ambit kag [gintapos ang Iya] mga pagpanghanda para sa mga anak sang katawhan.”
Bilang Bugtong nga Anak sang Amay, may gahum si Jesucristo sa kamatayon, kasakit, kag pag-antos pero wala Sia mag-isol. Gintuman Niya ang kasugtanan Niya sa Iya Amay kag, gani, nagpakita sang Cristohanon nga kinaiya nga mas nagaimportante sa kalibutan naton karon—ang kinaiya sang integridad. Nangin tampad Sia sa Dios, sa tagsa sa aton, kag sa Iya diosnon nga pagkatawo.
Integridad
Si Jesucristo amo ang aton Ehemplo. Ang pagpangabuhi nga may integridad nagapangayo nga mangin tampad kita sa Dios, sa kada isa, kag sa aton diosnon nga pagkatawo. Ang integridad nagailig halin sa una nga dako nga kasuguan nga higugmaon ang Dios. Tungod palangga mo ang Dios, tampad ka sa Iya sa tanan nga oras. Naintiendihan mo nga may husto kag sala kag may bug-os nga kamatuoran—ang kamatuoran sang Dios. Ang integridad wala nagakahulugan nga panuboan naton ang aton mga talaksan ukon pamatasan para dayawon ukon para batunon sang iban. “Himuon [mo] ang husto” kag “paabta ang mga konsikwensya.” Ang bag-o nga mga rebisyon sa Iwali ang Akon Ebanghelyo nga manwal sang mga misyonero nagdugang sang integridad bilang Cristohanon nga pamatasan.
Pila ka tuig ang nagligad, gin-asayn si Elder Uchtdorf para i-reorganize ang amon stake. Sa amon interbyu, may ginpamangkot sia nga indi ko gid malimtan: “May ara bala sa imo kabuhi nga, kon mabal-an sang publiko, mangin kahuy-anan sa imo ukon sa Simbahan?” Nasorpresa, gulpi ko nga ginpamensar ang akon bilog nga kabuhi, nga ginadumdom ang mga tinion nga basi nagkulang ako kag ginpamangkot ang akon kaugalingon, “Kon mahibal-an sang iban ang tanan ko nga ginhimo, ano ang ila pensaron sa akon ukon sa Simbahan?”
Sina nga tion, abi ko nagapamangkot lang si Elder Uchtdorf sang parte sa katakos, pero natun-an ko nga pamangkot ato parte sa integridad. Tampad bala ako sa akon ginahambal? Makita bala sang kalibutan nga pareho ang akon hinambalan kag akon binuhatan? Makita bala sang iban ang Dios sa akon pangginawi?
Gintudlo ni Pangulong Spencer W. Kimball, “Ang integridad” amo ang aton “kabubut-on kag ikasarang sa paggawi suno sa aton mga ginapatihan kag mga sulundan.”
Tampad sa Dios
Ang pagpangabuhi nga may integridad nagapangayo sa aton nga una sa tanan mangin tampad sa Dios.
Halin sa aton pagkabata, natun-an naton ang istorya ni Daniel sa kuweba sang mga leon. Si Daniel tampad pirme sa Dios. Ang imonan niya nga mga abyan “nagpangita sing kahigayonan batok [sa iya]” kag naghimo-himo sang layi nga magpangamuyo lamang sa ila mga dios-dios. Nahibal-an ni Daniel ang parte sa layi pero nagpauli sia kag—“bukas ang mga bintana”—nagluhod kag nagpangamuyo sing tatlo ka beses kada adlaw sa Dios sang Israel. Bilang resulta, ginhaboy si Daniel sa kuweba sang mga leon. Sang aga, nakita sang hari nga ginluwas si Daniel sang iya Dios kag naghimo sang bag-o nga layi nga nagasugo nga ang tanan dapat “magkahadlok kag magtahod sa Dios ni Daniel: kay sia ang buhi nga Dios.”
Nakilal-an sang hari ang Dios tungod sa integridad ni Daniel. Makita sang iban ang Dios paagi sa aton—sa hinambalan kag binuhatan. Pareho kay Daniel, ang katampad sa Dios padayon nga magapain sa aton sa kalibutan.
Ang Manluluwas nagapadumdom sa aton, “Ang kalibutan magapaantos sa inyo, pero magpakaisog kamo! Gindaog ko na ang kalibutan!” Naglaygay si Pangulong Russell M. Nelson: “[Ang pagdaog sang kalibutan] nagakahulugan sang pagbato sa tentasyon nga mag-ulikid sa mga butang sining kalibutan sangsa mga butang sang Dios. Nagakahulugan ini sang pagsalig sa doktrina ni Cristo sangsa mga pilosopiya sang tawo.” Amo man, kinahanglan naton batoan ang tentasyon nga maglakat “sa [aton] kaugalingon nga dalanon, kag nagasunod sa [aton] kaugalingon nga dios-dios nga ang imahen sini pareho sinang sa kalibutan.”
Ang butong sang oposisyon sining kalibutan importante nga bahin sang plano sang kaluwasan sang Dios. Kon paano kita mag-akto sa pagbutong amo ang sumada sang kon sin-o kita—ang takos sang aton integridad. Ang pagbutong sang kalibutan pwede nga mangin direkta para maguba ang katampad sa pag-asawahay ukon indi hilmunon pareho sang pag-post sang mga komento nga nagakontra sa doktrina ukon kultura sang Simbahan nga wala nagapakilala. Ang pagpakita sang integridad sa aton mga pagpili amo ang panggwa nga pagpahayag sang personal nga pangako nga sundon ang Manluluwas nga si Jesucristo.
Tampad sa Iban
Pareho sang pag-ilig sang integridad halin sa una nga dako nga kasuguan nga higugmaon ang Dios, ang katampad sa kada isa nagailig halin sa ikaduha, nga palanggaon ang aton isigkatawo pareho sang aton mga kaugalingon. Ang kabuhi nga may integridad indi kabuhi nga perpekto; kabuhi ini kon diin ginatinguhaan naton adlaw-adlaw nga mangin tampad una sa Dios kag sa sina nga konteksto mangin tampad sa iban. Si Pangulong Oaks nagapadumdom sa aton, “Ang aton katutom sa pagtuman [sang] ikaduha nga kasuguan indi dapat magpalipat sa aton sang una nga kasuguan.”
Ang kalibutan mas ginabudlayan sa integridad paagi sa pagpatuman sang mga pagsulundan sang gawi ukon mga layi sa panggawi nga nagadominar sang mga relasyon sang tawo kag mga institusyon. Bisan maayo, indi tanan sining mga patakaran naangkla sa kamatuoran kag masami nagaliwat base sa pagbaton sang mga tawo. Pareho sa pamangkot ni Elder Uchtdorf, may mga organisasyon nga nagahanas sang mga empleyado nga pamensaron kon ano ang resulta sang ila mga desisyon ukon proseso sa pagdesisyon kon ginpublikar ini online ukon sa front page sang dako nga pahayagan. Samtang nagagwa ang Simbahan halin sa kaguom kag kadulom, kinahanglan naton, pareho kay Daniel, nga manindugan sing mataas sa ginapaabot sang kalibutan kag mangin nawong sang matuod kag buhi nga Dios sa tanan nga tion kag tanan nga lugar.
Ang paghambal nga may integridad kita indi bastante kon ang aton mga aksyon lain sa aton mga pulong. Sa amo man, ang Cristohanon nga kaayo indi pangbulos sa integridad. Bilang katawhan sang kasugtanan, kag bilang mga lider sang Iya Simbahan, kinahanglan indi kita salawayon kag nagasunod sa mga talaksan nga ginbutang sang Ginuo.
Ang paggiho nga may integridad nagapatubo sang pagtuo kag pagsalig kag masami nagapasalig sa iban nga ginasunod lamang naton ang pagbuot sang Ginuo. Sa aton mga konseho, ginabatuan naton ang impluwensya sa gwa kag ginasunod ang ginpahayag nga proseso sang Ginuo, nga nagapangayo sang mga ideya sa tagsa ka babayi ukon lalaki kag pag-akto suno sa inspirado nga laygay nga nabaton.
Ang aton tutok ara sa Manluluwas, kag nagahalong kita nga likawan ang mga aksyon nga basi hangpon nga nagaserbe lang sa aton mga interes, nagabenepisyo sa aton pamilya, ukon nagapabor sang iban sa baylo sang iban. Ginatinguhaan naton nga likawan ang bisan ano nga panan-aw nga ang aton mga aksyon ginaimpluwensyahan sang pagdayaw sang tawo, sa pagbaton sang personal nga pagkilala, makakuha sang mas madamo nga likes, para mitlangon, ukon mapublikar.
Tampad sa Aton Diosnon nga Pagkatawo
Sa katapusan, ang kabuhi nga may integridad nagapangayo sa aton nga mangin tampad kita sa aton diosnon nga pagkatawo.
May mga kilala kita nga indi tampad. Ang kilala gid amo ang anti-Cristo nga si Korihor, nga nagdala sang mga tagipusuon sang madamo, nga nagganyat sang ila “tawhanon nga kinaugali.” Pero, sa katapusan nga tinion sang iya kabuhi, nag-ako sia, “Nahibal-an ko nga may Dios ang duta.” Si Pangulong Henry B. Eyring nagtudlo nga ang pagbinutig “kontra sa kinaugali sang aton mga espiritu,” sa aton diosnon nga pagkatawo. Gin-into ni Korihor ang iya kaugalingon, kag ang kamatuoran wala sa iya.
Sa pihak nga bahin, si Propetang Joseph Smith maisog nga nagdeklarar, “Nahibaloan ko ini, kag nahibaloan ko nga nahibaloan ini sang Dios, kag indi ko ini mapanginwala.”
Ang utod ni Joseph nga si Hyrum ginpalangga sang Dios “bangod sang integridad sang iya tagipusuon.” Sila ni Joseph nagpabilin nga tampad hasta sang ulihi—tampad sa ila diosnon nga pagkatawo, sa kasanag kag ihibalo nga ila nabal-an, kag tampad sa tawo nga nabal-an nila mangin sila.
Konklusyon
Kabay nga iugyun naton ang aton mga kaugalingon sa “pagbuot sang Dios” kag magpatubo sang Cristohanon nga kinaiya nga integridad. Kabay nga sundon naton ang aton Ehemplo, ang Manluluwas sang kalibutan, kag indi mag-isol kundi magpangabuhi nga tampad sa Dios, sa kada isa, kag sa aton diosnon nga pagkatawo.
Sa ginsiling ni Job, “Kon timbangon ako sang Dios sa wala sing daya nga timbangan, iya makita nga wala gid ako sing sala.” Sa sagrado nga ngalan ni Jesucristo, amen.