Kasulatan parte sa mga Butang nga Akon Nakita kag Nabatian
Wala na sing mas maayo pa nga tion nga mangin miyembro sang Simbahan ni Jesucristo sangsa subong.
Pagkatapos ko eskwela sa abogasiya, kami ni Marcia nga akon asawa nag-obra sa kompanya nga espesyalista sa mga bista sa korte. Sang pagsugod ko hanas sa trabaho, daku nga tiempo ang ginhatag ko sa paghanda sang mga saksi nga magtestigo sa korte. Madasig ko natun-an nga ang kamatuoran ginapat-od sa korte paagi sa pagtestigo sang nanumpa nga mga saksi, sa kamatuoran sang ila nakita kag nabatian. Kon magtestigo ang mga saksi, ang ila mga ginahambal ginarekord kag ginatipigan. Ang importansya sang masaligan nga mga saksi panguna gid pirme sa akon paghanda.
Wala madugayi kag narealisar ko nga ang mismo mga termino nga ginagamit ko adlaw-adlaw bilang abogado amo man ang mga termino nga ginagamit ko sa akon mga pagsugilanon parte sa ebanghelyo. Ang “saksi” kag “panaksihon” mga termino nga ginagamit naton sa pagpaambit sang aton ihibalo kag mga balatyagon parte ka kamatuoran sang ebanghelyo ni Jesucristo.
Sang ginsakdag ako bilang bag-o nga Area Seventy, ginbuksan ko ang balaan nga mga kasulatan agud tun-an ang akon mga tulumanon kag basahon ang Doktrina kag mga Kasugtanan 107:25, nga nagasiling, “Ang Sitenta ginatawag man … [agud] mangin espesyal nga mga saksi sa mga Gentil kag sa bilog nga kalibutan.” Sa mahunahuna ninyo, natandaan ko gid ang termino nga “espesyal nga mga saksi.” Nangin klaro sa akon nga may responsibilidad ako nga magsaksi—magtestigo sa ngalan ni Jesucristo—bisan diin ako magkadto sa kalibutan.
May madamo nga ehemplo sa balaan nga mga kasulatan sang mga nakasaksi gid kag nagtestigo sang ila nakita kag nabatian.
Sang ginsugdan sang dumaan nga propetang si Mormon ang iya rekord, nagsulat sia, “Kag karon ako, si Mormon, nagahimo sang kasulatan parte sa mga butang nga akon nakita kag nabatian, kag ginatawag ini nga Libro ni Mormon.”
Gin-ayo sang mga apostoles sang Manluluwas nga si Pedro kag Juan ang tawo sa ngalan ni Jesucristo sang Nazaret. Sang ginmandoan nga indi maghambal sa ngalan ni Jesus, nagsabat sila:
“Kon matarung sa itololok sang Dios ang magpamati sa inyo sang sa Dios, hukmi ninyo.
“Kay kami indi makahimo kondi magpamolong sang amon nakita kag nabatian.”
Isa pa ka makakumbinsi nga testimonya nagahalin sa mga Santos sa Libro ni Mormon nga nakasaksi sang pagbisita sang Manluluwas nga si Jesucristo. Pamatii ining paglaragway sang ila panaksihon: “Kag sa amo nga paagi sila nagpamatuod: Halin sang una, wala pa gid nakita sang mata, kag wala man nabatian sang dulunggan ang sa pagkadako kag makadalayaw nga mga butang nga amon nakita kag nabatian nga ginhambal ni Jesus sa Amay.”
Mga kauturan, subong ginapahayag ko ang akon panaksihon kag nagahimo sang kasulatan parte sa mga butang nga akon nakita kag nabatian sa tion sang akon sagrado nga pag-alagad bilang isa ka Sitenta sang Ginuong Jesucristo. Sa paghimo sini, nagasaksi ako sa inyo sang mapinalanggaon nga Amay nga Langitnon kag Iya maluluy-on nga Anak, si Jesucristo, nga nag-antos, napatay, kag nabanhaw agud ihatag ang kabuhi nga wala katapusan sa mga anak sang Dios. Nagasaksi ako sang “isa ka dalayawon nga buluhaton” kag nga ang Ginuo nagbutang liwat sang Iya kamot agud ipanumbalik ang Iya ebanghelyo sa duta paagi sa Iya buhi nga mga propeta kag mga apostoles. Nagasaksi ako nga suno sa akon nakita kag nabatian, wala na sing mas maayo pa nga tion agud mangin miyembro sang Ang Simbahan ni Jesucristo sang mga Santos sa Ulihing mga Adlaw sangsa subong. Nahibal-an ko ini suno sa akon kaugalingon nga ihibalo, nga hilway sa bisan ano pa man nga basehan, tungod sang akon nakita kag nabatian.
Sang akon senior year sa high school, dapat ko kilalahon ang 15 tanan ka templo sang Simbahan agud makagradweyt sa seminary. May litrato sang tagsa ka templo sa atubang sang amon classroom, kag dapat ko mahibal-an kon diin ang kada isa nahamtang. Subong, tinuig pagkatapos, daku na kaayo ina nga hangkat —nga may 335 na ka templo nga nagaoperar ukon naanunsyo—nga hingadlan ang kada isa. Personal ko nga nakita ang madamo sining mga balay sang Ginuo kag nagasaksi nga ang Ginuo nagatanyag sang Iya mga bugay kag mga ordinansa sa mas nagadamo Niya nga anak sa bilog nga kalibutan.
Ang akon mga abyan sa FamilySearch nagtudlo sa akon nga masobra isa ka milyon nga bag-o nga mga ngalan ang ginadugang sa FamilySearch adlaw-adlaw. Kon wala ninyo nakita ang inyo mga katigulangan kahapon, ginaagda ko kamo nga magpangita liwat bwas. Parte sa pagtipon sang Israel sa kalibutan sang mga espiritu, wala na sing mas maayo pa nga tion nga mangin miyembro sang Ang Simbahan ni Jesucristo sang mga Santos sa Ulihing mga Adlaw sangsa subong.
Sang ginapadaku namon ang amon kabataan sa Twin Falls, Idaho, ang amon panan-aw sang bilog-kalibutan nga Simbahan limitado lang. Sang gintawag ako nga General Authority, gin-asayn kami ni Marcia nga mag-alagad sa Pacific Area, isa ka lugar nga wala pa gid kami nakakadto. Nalipay kami nga makakita sang mga stake sa bilog nga New Zealand, nga may templo nga gindedikar sang 1958. Isa ini sa 15 nga dapat ko imemorize sa seminary. Nakakita kami sang mga templo sa tagsa ka daku nga siyudad sa Australia nga may mga stake sa bilog sinang kontinente. May asaynment kami sa Samoa, nga may 25 ka stake, kag sa Tonga, nga halos tunga sang mga pumuluyo sini mga miyembro sang Simbahan. May asaynment kami sa isla sang Kiribati, nga may duha ka stake. May asaynment kami nga magbisita sa mga stake sa Ebeye sa Marshall Islands kag sa Daru sa Papua New Guinea.
Pagkatapos sang amon pag-alagad sa mga Isla sang Pasipiko, gin-asayn kami nga mag-alagad sa Pilipinas. Sa akon kakibot, ang Simbahan ni Jesucristo sa Pilipinas nagatubo sing labaw sangsa bisan ano pa man nga akon nakita. May ara na karon 125 ka stake, 23 ka misyon, kag 13 ka nagaoperar ukon naanunsyo nga mga templo. Nasaksihan ko ang simbahan nga may masobra 850,000 ka miyembro sa sina nga pungsod. Paano nga wala ko natalupangdan ang pagtukod sang Simbahan ni Cristo sa bilog nga kalibutan?
Pagkatapos sang tatlo ka tuig sa Pilipinas, gin-asayn ako nga magserbisyo sa Missionary Department. Ang akon asaynment nagadala sa amon sa mga misyon sa bilog nga kalibutan. Ang akon panan-awan sang bilog-kalibutan nga Simbahan sang Manluluwas nagsangkad sing tuman. Si Marcia kag ako gin-asayn nga magbisita sa mga misyon sa Asia. Nakita namon ang isa ka matahum nga stake center sa Singapore, nga may manami, matutum nga mga miyembro. Nagbisita kami sa mga miyembro kag mga misyonero sa chapel sa Kota Kinabalu, Malaysia. Nakigkita kami sa mga misyonero sa Hong Kong kag nagpartisipar sa manami nga stake conference upod sa matutum, debotado nga mga Santos.
Ini nga eksperiyensia nasulit sa amon pagpakigkita sa mga misyonero kag mga miyembro sa bilog nga Europa, Latin America, Carribean, kag Africa. Ang Simbahan ni Jesucristo nagaeksperiyensia sing daku kaayo nga pag-uswag sa Africa.
Saksi ako sang nagapadayon nga pagpanumbalik sang ebanghelyo ni Jesucristo kag sang katumanan sang propesiya sang propeta sang Ginuo nga “ang kamatuoran sang Dios magasulong sing mabaskog, dalayawon, kag hilway tubtob makasulod ini sa tagsa ka kontinente, makaabot sa tagsa ka lugar, makalabay sa tagsa ka pungsod, kag mabatian sang tagsa ka dulunggan.”
Ang aton dalayawon nga mga misyonero sa bilog nga kalibutan subong 74,000 na ang kadamuon. Nagatrabaho upod sa mga miyembro, nagabunyag sila sing masobra 20,000 ka tawo kada bulan. Sining ulihi, mga 18 tubtob 20 anyos ini sila nga lamharon nga mga lalaki kag mga babayi nga, sa bulig sang Ginuo, nakahimo sining daku nga milagro sang pagtipon. Makita naton ining lamharon nga mga babayi kag mga lalaki sa magagmay nga mga baryo sang Vanuatu kag sa dalagku nga mga siyudad sang New York, Paris, kag London. Nakita ko sila nga nagatudlo parte sa Manluluwas sa naligwin nga mga kongregasyon sa Fiji kag mas dalagku nga mga pagtililipon sa mga lugar pareho sang Texas, California, kag Florida.
Makakita kamo sang mga misyonero sa bisan diin sa kalibutan nga nagahambal sing 60 ka lainlain nga lenggwahe kag ginatuman ang daku nga sugo sang Manluluwas sa Mateo 28: “[Gani] lakat kamo kag himuon nga mga [disipulo] ang tanan nga [nasyon], nga [nagabunyag] sa ila sa ngalan sang Amay kag sang Anak kag sang Espiritu Santo.” Ginapasidunggan ko ang mga misyonero sang Simbahan sang nagliligad kag sa subong kag ginapahanumdum ang ulihing tubo sang pangagda ni Pangulong Russell M. Nelson nga magkari kag tipunon ang Israel.
Nagasaksi ako subong nga nakita ko ining daku nga Pagpanumbalik sang ebanghelyo sang Manluluwas sa akon mismo mga mata kag nabatian sa akon mismo mga dulunggan. Saksi ako sa buluhaton sang Dios sa bilog nga kalibutan. Wala na sing mas maayo pa nga tion nga mangin miyembro sang Ang Simbahan ni Jesucristo sang mga Santos sa Ulihing mga Adlaw sangsa subong.
Siguro ang pinaka-makainspirar nga milagro sang pagpanumbalik nga nasaksihan ko amo kamo, ang tampad nga mga miyembro sang Simbahan sa tagsa ka nasyon. Kamo, ang mga Santos sa Ulihing mga Adlaw, nga ginlaragway ni Nefi sa Libro ni Mormon sang nakita niya ang aton panahon kag nagsaksi, “Kag natabo ini nga ako, si Nefi, nakakita sang gahum sang Kordero sang Dios, nga nagpanaog ini sa mga santos sang simbahan sang Kordero, kag sa katawhan sang kasugtanan sang Ginuo, nga ginpanglapta sa bug-os nga ibabaw sang duta; kag naarmasan sila sang pagkamatarong kag kaupod ang gahum sang Dios sa dako nga himaya.”
Nagasaksi ako nga nakita ko sa akon mismo mga mata ang nakita ni Nefi—kamo, ang mga Santos sang kasugtanan sa tagsa ka nasyon, nga naarmasan sang pagkamatarong kag sang gahum sang Dios. Sang sa pulpito ako sa isa sining daku nga mga nasyon sang kalibutan, ang Ginuo nagbutang sa akon hunahuna sang pareho sa gintudlo ni Haring Benjamin sa Mosias 2 sa Libro ni Mormon. Brent, “Luyag ko nga inyo pagabinag-binagon ang bulahan kag malipayon nga kahimtangan sadtong mga nagatuman sang mga kasuguan sang Dios. Kay tan-awa, ginapakamaayo sila sa tanan nga mga butang, alangay nga umalagi kag espirituhanon.”
Nagasaksi ako sa inyo nga nakita ko ini sa akon mismo mga mata kag nabatian sa akon mismo mga dulunggan sang nakigkita kami sa inyo, matutum nga mga Santos sang Dios sa bilog nga kalibutan nga nagatuman sang mga kasugoan. Mga anak kamo sa kasugtanan sang Amay. Mga disipulo kamo ni Jesucristo. Nakahibalo man kamo sang akon nahibal-an tungod nakabaton kamo sang inyo personal nga saksi sang kamatuoran sang ginpanumbalik nga ebanghelyo ni Jesucristo. Ang Manluluwas nagtudlo, “Apang bulahan ang inyo mga mata, kay makakita sila, kag ang inyo mga idulungug, kay nagapamati sila.”
Sa paggiya sang Ginuo kag sa pagpanguna sang Iya mga propeta kag mga apostoles, magapadayon kita sa paghanda sang mga misyonero, paghimo kag pagtuman sang sagrado nga mga kasugtanan, pagpahamtang sang Simbahan ni Cristo sa bilog nga kalibutan, kag pagbaton sang mga bugay nga nagaabot kon ginatuman naton ang mga kasugoan sang Dios. Nagaisa kita. Mga anak kita sang Dios. Kilala naton Sia kag palangga naton Sia.
Nagabuylog ako sa inyo, mga abyan ko, sa aton tingob nga pagsaksi nga ining mga butang matuod. Nagahimo kita sang kasulatan sang mga butang nga aton nakita kag nabatian. Ikaw kag ako, mga saksi nga nagapamatuod. Tungod ini sa gahum sining tingob nga panaksihon nga nagapadayon kita sa pagsulong nga may pagtuo sa Ginuong Jesucristo kag Iya ebanghelyo. Ginapahayag ko ang akon panaksihon nga si Jesucristo buhi. Sia ang aton Manluluwas kag aton Manunubos. Sa ngalan ni Jesucristo, amen.