Mas Makahulugan nga Kasadya
Kabay nga pangitaon naton kag masalapoan ang mas makahulugan nga kasadya nga maangkon sa pagdedikar naton sang aton mga kabuhi sa aton Amay nga Langitnon kag Iya pinalangga nga Anak.
Daku nga bugay sa akon ang makahambal sa pangkabilogan nga komperensya sa tatlo na ka dekada subong. Sa sinang tinion, madamo sa bilog nga kalibutan ang nagpamangkot sa akon parte sining mga mensahe. Sang sini lang, isa ka partikular nga pamangkot ang nagabalik-balik. Kasami, daw amo ini sia: “Elder Uchtdorf, namati ako maayo sa imo ulihi nga pamulongpulong pero [pundo] … wala ako nakabati sing bisan ano parte sa abyasyon [aviaton].
Te, pagkatapos subong, basi indi na ako makabati sina nga pamangkot sing madugaydugay.
Ang “Masadya nga Pagbulubaliswa sang mga Panganod nga Ginatuslok sang Adlaw”
Mabudlay patihan nga 120 katuig lang ang nagligad sang si Wilbur kag Orville Wright una nagtulak sa kahanginan kag naglupad sa ibabaw sang mga balas sang Kitty Hawk, North Carolina. Apat ka malip-ot nga paglupad sinang adlaw sang Disyembre ang nagbag-o sang kalibutan kag nagbukas sang puertahan sa isa sang pinakadaku nga imbensyon sa kasaysayan sang kalibutan.
Ang paglupad delikado sadtong una nga mga adlaw. Ang mag-utod nakahibalo sini. Kag amo man ang ila tatay, si Milton. Ang matuod, nahadlok gid sia nga madula ang duha niya ka anak sa aksidente sa eroplano nga ginpromisahan sia nila nga indi gid sila maglupad nga upod.
Kag wala gid nila ginhimo—luwas lang sa isa. Pito ka tuig pagkatapos sinang makasaysayan nga adlaw sa Kitty Hawk, si Milton Wright sang ulihi nagtugot kag naglantaw samtang si Wilbur kag Orville upod nga naglupad sa una nga tion. Pagkahugpa, ginkumbinsi ni Orville ang iya tatay nga magsakay sa una kag isa lang gid ka tion sa eroplano agud lantawon kon daw ano ini.
Pag-alsa halin sa duta sang eroplano, ang 82 anyos nga si Milton nakunyag sa kanami sang paglupad nga nadula ang tanan niya nga kahadlok. Nagkasadya si Orville sang nagsinggit ang iya tatay sa kalipay, “Mas taas pa, Orville, Mas taas pa!”
Pareho gid kami sini nga tawo!
Siguro ang rason nga nagahambal ako parte sa abyasyon kon kis-a amo nga nakahibalo ako diutay sang kon ano ang ginabatyag sang mga Wright. Ako man “nakapalos sa mabug-at nga hawid sang Duta kag nagbayle sa kahawaan gamit ang pilak nga pakpak nga salaming sang kasadya.”
Ang una nga paglupad sang mag-utod nga Wright 37 lang ka tuig antes ako natawo, nagtugot sang pagpasimpalad, kahalawhaw, kag tunay nga kasadya nga mangin posible sa akon kabuhi.
Kag bisan pa nga dalayawon inang kasadya, may mas makahulugan pa gid nga klase sang kasadya. Subong, sa paagi sang malipayon nga singgitan ni Milton, “Mas taas pa, Orville, Mas taas pa,” gusto ko maghambal parte sa sining mas makahulugan nga kasadya—diin ini nagahalin, paano ini mabatyagan, kag paano naton ini maeksperiyensiahan sing labi pa.
Ang Bug-os nga Katuyoan sang Kabuhi
Maathag nga ang tanan gusto mangin malipayon. Ugaling, maathag man nga indi ang tanan malipayon. Sa masubo, dawsa mabudlay para sa madamo nga tawo nga masalapoan ang kalipay.
Ngaa amo sina? Kon ang kalipay isa ka butang nga ginahandum naton nga mga tawo, ngaa indi kita madinalag-on nga makita ini? Sa pagsambit sang isa ka kanta, basi ginapangita naton ang kasadya sa indi husto nga mga lugar.
Diin Naton Makita ang Kalipay?
Antes naton hambalan kon paano makita ang kasadya, tugoti ako nga kilalahon nga ang depresyon kag iban pa nga mabudlay nga mental kag emosyonal nga mga hangkat ara gid kag ang sabat indi simple lang nga “Tinguhai nga mas magmalipayon.” Ang akon tuyo subong indi nga pagamayon ukon i-balewala ang mga isyu sa mental nga ikaayo. Kon nagapangatubang kamo sinang mga hangkat, nagakasubo ako kag nagaunong sa inyo. Sa pila ka mga tawo, ang pagkasalapo sang kasadya mahimo maglakip sang pagbaton sang bulig halin sa sampaton nga mga propesyonal sa mental nga ikaayo nga naghinguyang sang ila mga kabuhi sa pagpangbulong. Dapat kita magpasalamat para sinang bulig.
Ang kabuhi indi wala untat nga sunod-sunod nga kalipay. “Kay kinahanglan gid nga may pamatok sa tanan nga butang.” Kag kon ang Dios Mismo nagahibi, pareho sang ginahambal sa balaan nga mga kasulatan, siyempre ikaw kag ako magahibi man. Ang pagpangasubo indi tanda sang kapaslawan. Sa sini nga kabuhi, bisan magkainano, ang kasadya kag kasubo suod gid nga magkaupod. Pareho sa inyo tanan, may ara man ako sang akon bahin sang kapaslawan, kalisod, kasubo, kag paghinulsol.
Ugaling, naagyan ko man sa akon kaugalingon ang mahimayaon nga panugod nga nagpuno sang akon kalag sang tuman nga kasadya nga haluson mapunggan. Nadiskubrehan ko para sa akon kaugalingon ining malinong nga kompiansa nga mabaton sa pagsunod sa mga panudlo kag ehemplo sang Manluluwas.
Ang kalinong nga Iya ginahatag sa aton indi pareho sa ginahatag sang kalibutan. Mas maayo ini. Mas makahulugan ini kag mas balaan. Si Jesus nagsiling, “Ako nagkari agud nga may kabuhi sila, kag may kabugana sini.”
Ang ebanghelyo ni Jesucristo matuod gid nga “maayong balita sang dakung kalipay”! Mensahe ini sang wala tupong nga paglaum! Mensahe ini sang pasalig nga si Jesucristo nagabulig sa aton kag naga-alsa sang aton mga palas-anon. Mensahe sang diosnon nga impluwensia sa kalibutan. Mensahe sang langitnon nga pabor, mas maayo nga paghangop, mas balaan nga mga kasugtanan, seguridad sa wala katapusan, kag wala katubtuban nga himaya!
Ang kasadya amo gid ang katuyoan sang plano sang Dios para sa Iya mga anak. Amo ina kon ngaa gintuga kamo—“agud makaangkon [kamo] sing kalipay”! Gintuga kamo para sini!
Ang aton Amay sa Langit wala nagtago sang dalan padulong sa kalipay. Indi ini sekreto. Ara ini para sa tanan!
Ginapromisa ini sa mga nagalakat sa dalan sang pagkadisipulo, nagasunod sang mga panudlo kag ehemplo sang Manluluwas, nagatuman sang Iya mga kasugoan, kag nagatipig sang mga kasugtanan nga ila ginahimo upod sa Dios. Katahum nga pangako!
Ang Dios May Dugang pa nga Ginatanyag
Tanan kita may kilala nga mga tawo nga nagasiling nga indi nila kinahanglan ang Dios agud mangin malipayon, nga husto na sila kamalipayon bisan wala sang relihiyon.
Ginakilala ko kag ginatahod ining mga balatyagon. Ang aton mahal nga Amay sa Langit gusto nga ang tanan Niya nga mga anak makaangkon sang pinakadaku nga kalipay nga posible, gani ginpuno Niya ining kalibutan sang matahum, maayo nga mga kalingawan kag kalipayan, “sa pagpalipay sang mata pati sa pagpasadya sang tagipusuon.” Para sa akon, ang paglupad nagadala sang tuman nga kalipay. Makita ini sang iban sa musika, art, mga hobby, ukon sa duna nga kapalibotan.
Paagi sa pag-agda sa tanan kag pagpaambit sang maayong balita sang dakung kalipay sang Manluluwas, wala naton ginapagamay ang bili sang bisan ano sining mga kuluhaan sang kasadya. Nagasiling lang kita nga ang Dios may sobra pa nga mahatag sa aton. Mas makahulugan kag mas madalom nga kasadya—kasadya nga labaw pa sangsa bisan ano nga mahatag sining kalibutan. Kasadya ini nga nagapadayon bisan pa sa kasakit, nagapangibabaw sa kasubo, kag nagahaganhagan sang kamingaw.
Ang kalibutanon nga kalipay, sa kabaliskaran, wala nagadugay. Indi ini makadugay. Duna sa tanan nga dutan-on nga butang ang magdaan, madunot, maguba, ukon maglain. Pero ang diosnon nga kasadya wala katapusan, tungod ang Dios wala katapusan. Si Jesucristo nag-abot agud buligan kita nga makatibawas sa epekto sang pagkadutan-on kag buslan ang madunot sang di-madunot. Sia lang ang may amo sina nga gahum, kag ang Iya lang kasadya ang nagapadayon.
Kon pamatyag ninyo basi pwede madugangan ang amo sini nga klase sang kasadya sa inyo kabuhi, ginaagda ko kamo nga magsugod sa pagsunod kay Jesucristo kag sa Iya panudlo kag ehemplo. Pagpanglakaton ini sa bilog nga kabuhi—kag lampas pa. Palihog tugoti ako nga magpanugda sang pila ka panugod nga mga tikang sa sining maayo nga pagpanglakaton sa pagdiskubre sang tunay nga kasadya.
Magpalapit sa Dios
Nadumduman ninyo bala ang babayi sa Bag-ong Katipan nga may balatian nga tagas sang dugo sa 12 katuig? Gingasto na niya ang tanan niya sa mga manugbulong, pero naglala pa ang iya kondisyon. Nakabati sia parte kay Jesus; Ang iya gahum sa pag-ayo bantog kaayo. Pero mapaayo bala Niya sia? Kag paano bala sia makapalapit man lang sa Iya? Ang iya balatian naghimo sa iya nga “di-matinlo” suno sa layi ni Moises, kag gani kinahanglan sia magpalayo sa iban.
Ang magpalapit sa Iya sing hayag kag magpangayo sang pag-ayo daw indi posible.
Sa gihapon, namensar sia, “Kon akon matandug ang iya mga panapton lamang, magaayo ako.”
Sang ulihi, ang iya pagtuo nagdaug sang iya kahadlok. Gin-agwanta niya ang pagkondenar sang iban kag nagdutdut palapit sa Manluluwas.
Sang ulihi, malapit na lang sia. Gin-untay niya ang iya kamot.
Kag nag-ayo sia.
Indi bala nga tanan kita daw pareho sining babayi?
Siguro may madamo nga rason nga naga-alaala kita nga magpalapit sa Manluluwas. Basi yagutaon kita ukon kondenahon sang iban. Tungod sang aton bugal, mahimo nga pabay-an naton ang tsansa nga ang simple katama nga butang mangin tuman ka malahalon. Mahimo kita maghunahuna nga ang aton kondisyon nagaupang sa Iya pagpang-ayo—nga ang distansya tuman kadako ukon ang aton sala tuman kadamo.
Pareho sining babayi, natun-an ko nga kon magpalapit kita sa Dios kag magdab-ot sa pagtandog sa Iya, makakita kita matuod sang pag-ayo, kalinong kag kalipay.
Pangitaa Ini
Si Jesus nagtudlo, “Pangita, kag kamo makakita.”
Nagapati ako nga ining simple nga dinalan indi lang espirituhanon nga promisa; pahayag ini sang kamatuoran.
Kon mangita kita sang mga rason nga mangakig, magduda, maghinakit ukon mag-isahanon, makita naton ini.
Pero, kon mangita kita sang kasadya—kon mangita kita sang mga rason nga magkalipay kag malipayon nga sundon ang Manluluwas, makita naton ini.
Talagsa lang naton makita ang butang nga wala naton ginapangita.
Nagapangita bala kamo sang kasadya?
Pangita, kag kamo makakita.
Magbinuligay sa Pagdala sang mga Palas-anon sang Tagsatagsa
Si Jesus nagtudlo, “Bulahan pa ang paghatag sangsa pagbaton.”
Indi ayhan nga, sa aton pagpangita sang kasadya, ang pinakamaayo nga paagi nga makita ini amo ang pagdala sang kasadya sa iban?
Mga kauturan, nakahibalo kamo kag nakahibalo ako nga matuod ini! Ang kasadya pareho sa tadyaw sang harina ukon tibod sang lana nga indi gid mawad-an. Ang tunay nga kasadya nagalapta kon ginapaambit.
Wala ini nagapangayo sang butang nga daku ukon mabudlay.
Makahimo kita sing simple nga mga butang.
Pareho sang pagpangamuyo para sa isa ka tawo sa bilog naton nga tagipusuon.
Paghatag sang sinsero nga pagdayaw.
Pagbulig sa iban nga makabatyag nga ginabaton sing maayo, ginarespeto, may balor, kag ginapalangga.
Pagpakigbahin sang paborito nga balaan nga kasulatan kag ang kahulugan sini sa aton.
Ukon bisan magpamati lang.
“Kon yara kamo sa pag-alagad sa inyo mga isigkatawo yara lamang kamo sa pag-alagad sa inyo Dios,” kag balosan sang Dios ang inyo kaayo sing maalwan. Ang kasadya nga ginahatag ninyo sa iban magabalik sa inyo “nasukob sing maayo, nadasok, nauyog, kag nagaawas.”
Ano Dayon ang Himuon Naton?
Sa maabot nga inadlaw, sinemana, kag binulan, pwede bala agdahon ko kamo nga:
-
Maghatag sang tion sa sinsero, hugot sa buot nga pagtinguha nga magpalapit sa Dios.
-
Pangitaon sing matutum ang adlaw-adlaw nga mga tinion sang paglaum, paghidaet, kag kasadya.
-
Magdala sang kasadya sa mga ara sa imo palibot.
Mahal kong kauturan, mahal nga mga abyan, sa inyo pag-usisa sang pulong sang Dios para sa mas madalom nga paghangop sang wala katapusan nga plano sang Dios, pagbaton sining mga pangagda, kag pagtinguha nga maglakat sa Iya Dalanon, maeksperiyensiahan ninyo “ang paghidaet sang Dios, nga nagalabaw sa tanan nga paghangop,” bisan pa sa tunga sang kalisod. Mabatyagan ninyo sing dugang ang indi matupungan nga gugma sang Dios nga nagadaku sa inyo tagipusuon. Ang langitnon nga kasanag magadugang sang diosnon nga impluwensia nga magatabog sang kadulom sang inyo mga pagtilaw, kag maeksperiyensiahan ninyo ang indi malaragway nga himaya kag katahum sang indi makit-an, perpekto, langitnon nga kaharian. Mabatyagan ninyo ang inyo espiritu nga ginahakwat palayo sa kabug-at sining kalibutan.
Kag pareho kay Milton Wright, basi alsahon man ninyo ang inyo tingug sa kalipay kag magsinggit “Mas taas pa, Amay, mas taas pa!”
Kabay nga pangitaon naton kag masalapoan ang mas makahulugan nga kasadya nga maangkon sa pagdedikar naton sang aton mga kabuhi sa aton Amay nga Langitnon kag sa Iya pinalangga nga Anak. Ini ang hugot ko nga pangamuyo kag pagpakamaayo sa sagrado nga ngalan ni Jesucristo, amen.