11:25

Tampad tubtob sa Katapusan

Ni Sister Andrea Muñoz Spannaus

Ikaduhang Manuglaygay sa Kabilogan nga Pangulohan sang Young Women

Paagi sa Iya kamot, madaug ninyo ang tagsa ka mabudlay nga pagtilaw sa inyo kabuhi.

Mahal kong mga abyan, subong gusto ko maghambal direkta sa inyo—ang mga lamharon sang Simbahan.

Isa na ka tuig halin sang gintawag kami sa Kabilogan nga Pangulohan sang Young Women. Kadamo gid sang natabo sining nagligad nga tuig!

Nakapakigkita kami sa madamo sa inyo kag ulupod nga nagtuon sang mga panudlo ni Cristo. Nagkanta kami, nakig-abyan, kag nagserbe upod sa inyo sa inyo mga kumonidad. Napabakod kami sa pagpamati sang inyo mga panaksihon sa mga youth conference kag bilog-kalibutan nga mga kahiwatan. Kag nagsimba kita sing ululupod sa templo.

Sa tagsa ka tion nagpaambit kami sang mensahe halin sa aton Ginuong Jesucristo. Indi mangin lain ini nga gab-i; may mensahe ako para sa inyo, nga mga lamharon sang Simbahan ni Jesucristo.

Ang Importante nga mga Pamangkot

Napamensar bala ninyo kon paano mangin tampad sa Dios samtang nagakabuhi sa makasasala nga kalibutan? Diin kamo makakuha sang kusog nga magsulong kag magpadayon sa paghimo sang maayo? Paano ninyo mabatyagan ang tunay nga kalipay?

Nagapati ako nga ang eksperiyensia ni David kag Goliat makabulig.

Si David kag Goliat

Sa Daan nga Katipan, ang kasoldadohan sang mga Filistinhon nagapakig-away sa mga Israelinhon, kag adlaw-gab-i, ang higante nga Filistinhon nga si Goliat nagapanghangkat sa bisan sin-o nga Israelinhon nga makig-away sa iya.

Upod sa mga Israelinhon amo si David, isa ka lamharon nga manugpahalab nga gamay kaayo sangsa kay Goliath pero daku kaayo ang pagtuo kay Jesucristo! Nagboluntaryo si David nga makig-away. Bisan ang hari nagtilaw nga punggan sia, pero si David nagpili nga magsalig kay Jesucristo.

Antes pa, si David nakig-away sa leon kag sa uso. Halin sining mga eksperiyensia, nahibal-an niya nga ang Dios nag-amlig sa iya kag naghimo sa iya nga madinalag-on Para kay David, ang kawsa sang Dios ang pinakaimportante nga kawsa. Gani, puno sang pagtuo sa Dios nga indi magpabaya sa iya, nagtipon sia sang lima ka [matipulon] nga bato, ginkuha ang iya labyog, kag gin-atubang ang higante.

Ang balaan nga mga kasulatan nagasugid sa aton nga ang una nga bato nga ginhaboy ni David nag-igo sa agtang ni Goliat nga nagpatay sa iya.

Pagpangita sang mga Sabat

Samtang si David naggamit sang isa lang ka bato agud patyon si Goliat, naghanda sia sang lima. Sang lima! Nagpapensar ini sa akon kon paano ko ihanda ang akon kaugalingon nga atubangon ang kalibutan.

Ano abi kon ang kada bato ni David nagarepresentar sang kusog nga kinahanglan naton agud magmadinalag-on sa aton mga kabuhi? Ano ayhan inang lima ka bato? Napamensar ko ining mga posibilidad:

Ang bato sang akon pagpalangga sa Dios.
Ang bato sang akon pagtuo sa aton Manluluwas, nga si Jesucristo.
Ang bato sang ihibalo sang akon wala katapusan nga pagkatawo.
Ang bato sang akon adlaw-adlaw nga paghinulsol.
Ang bato sang akon pagbaton sang gahum sang Dios.

Hambalan naton kon paano kita ginabugayan sining mga kusog.

Una, ang bato sang akon pagpalangga sa Dios. Ang pagpalangga sa Dios ang una nga dakong sugo. Ang Para sa Kusog sang mga Lamharon nga giya nagatudlo sa aton: “Palangga ka sang Dios. Sia ang imo Amay. Ang Iya perpekto nga pagpalangga mahimo nga makainspirar sa imo nga palanggaon Sia. Kon ang imo pagpalangga sa Amay nga Langitnon ang pinakaimportante nga impluwensya sa imo kabuhi, madamo nga desisyon ang mas mahapos himuon.”

Ang aton pagpalangga sa Dios kag aton suod nga relasyon sa Iya nagahatag sa aton sang kinahanglanon nga kusog agud bag-ohon ang aton mga tagipusuon kag mas mahapos nga malampuwasan ang aton mga hangkat.

Ika-duha, ang bato nga amo ang akon pagtuo sa aton Manluluwas, nga si Jesucristo. Sang nag-abot si Jesucristo sa kalibutan, nag-antos Sia para sa aton mga sala, kag gindala sa Iya Kaugalingon ang aton mga kalisod, kasakit, kahuyang, kag mga balatian sa lawas kag panghunahuna. Amo ina kon ngaa nakahibalo Sia kon paano kita buligan. Ang pag-angkon sang pagtuo kay Jesucristo nagakahulugan sang lubos nga pagsalig sa Iya kaalam, gugma, kag gahum nga magbayad para sa aton mga sala. Ang bato sang pagtuo kay Jesucristo magadaug sang bisan ano nga “higante” sa aton mga kabuhi. Madaug naton ining nahulog nga kalibutan tungod una Niya ini nga gindaug.

Ika-tatlo, ang bato sang ihibalo sang akon wala katapusan nga pagkatawo. Ang mahal naton nga propeta, si Pangulong Russell M. Nelson, nagtudlo nga ang aton pinakaimportante nga mga pagkatawo amo ang bilang mga anak sang Dios, mga anak sang kasugtanan, kag mga disipulo ni Jesucristo.

Ang tanan nagabag-o kon nahibal-an ko kon sin-o gid ako. Kon nagaduda ako sa akon mga ikasarang, ginasulit ko sa akon hunahuna ukon sing matunog, “anak ako sang Dios,” sing liwatliwat asta may kompiansa na ako liwat nga magpadayon.

Ika-apat, ang bato sang akon adlaw-adlaw nga paghinulsol. Sa Para sa Kusog sang mga Lamharon nga giya, mabasa naton: “Ang paghinulsol indi silot para sa kasal-anan; amo ini ang paagi sang Manluluwas para hilwayon kita sa sala. Ang paghinulsol nagakahulugan sang pagbag-o—sang pagtalikod sa sala kag pagliso sa Dios. Nagakahulugan ini sang pag-uswag kag pagbaton sang kapatawaran. Ini nga klase sang pagbag-o indi isahay lang; nagapadayon ini nga proseso.”

Wala na sing mas makapahilway pa sangsa mabatyagan ang kapatawaran sang Dios kag mahibal-an nga matinlo kita kag nakapakig-uli sa Iya. Ang kapatawaran posible para sa tanan.

Ang ika-lima nga bato amo ang bato sang akon pagbaton sang gahum sang Dios. Ang mga kasugtanan nga ginahimo naton upod sa Dios, pareho sinang sa ordinansa sang bunyag, nagabulig sa aton nga mabaton ang gahum sang pagkadiosnon. Ang gahum sang Dios tunay nga gahum nga nagabulig sa aton sa pag-atubang sang mga hangkat, paghimo sang maayo nga mga desisyon, kag pagpadaku sang aton ikasarang sa pagbatas sang mabudlay nga mga sitwasyon. Gahum ini nga makapauswag sa aton sa partikular nga mga abilidad nga kinahanglanon naton.

Ang Para sa Kusog sang mga Lamharon nga giya nagapaathag: Ang mga kasugtanan nagaangot sa imo sa Amay nga Langitnon kag sa Manluluwas. Ang mga ini nagadugang sang gahum sang Dios sa inyo kabuhi.”

Hambalan naton inang koneksyon. Kadumdum kamo sang nagatudlo si Cristo parte sa kinalain sang balay nga gintukod sa bato kag sang isa nga gintukod sa balas? Si Elder Dieter F. Uchtdorf nagpaathag: “Ang isa ka balay makalampuwas sa bagyo indi tungod mabakod ang balay. Indi man ini makalampuwas tungod ang bato mabakod. Ang balay makalampuwas sa bagyo tungod malig-on ini nga naangot sa sinang mabakod nga bato. Ang importante amo ang kabakod sang pagkaangot sa bato.”

Ang aton personal nga relasyon kay Jesucristo magahatag sa aton sang kaisog kag kompiansa nga magpadayon bisan pa may mga tawo nga wala nagarespeto sa aton mga ginapatihan ukon naga-bully sa aton. Ginaagda kita ni Cristo nga dumdumon Sia pirme; Siling Niya sa aton, “Magtulok sa akon sa tagsa ka panghunahuna.” Ang pagpanumdum sa Manluluwas nagahatag sa aton sang kaathag sang pamensaron sa pagdesisyon, paghulag nga wala sing kahadlok, kag pagpangindi sa mga kontra sa panudlo sang Dios. Sa mabudlay nga mga adlaw nga daw indi na ako makapadayon, ang pagpanumdum kay Cristo nagadala sa akon sang kalinong kag nagahatag sa akon sang paglaum.

Paano kita makadangop sa sining gahum ni Jesucristo? Ang pagtuman sang aton mga kasugtanan kag pagdugang sang aton pagtuo kay Jesucristo amo ang yabi.

Sa pagkamatuod, luyag ko tani nga si David may isa pa gid ka bato; nga amo ang bato sang akon panaksihon. Ang aton panaksihon ginapasad paagi sa espirituhanon nga mga eksperiyensia sa diin ginakilala naton ang diosnon nga impluwensia sa aton mga kabuhi. Wala sang makakuha sina nga ihibalo sa aton. Ang pagkahibalo sang aton nahibal-an paagi sa pagkabuhi sang aton espirituhanon nga mga eksperiyensia indi matupungan. Ang pagkabuhi sing tampad sa sinang ihibalo nagahatag sa aton sang kahilwayan. Nagahatag ini sa aton sang kalipay! Kon ginapalangga naton ang kamatuoran, pangitaon naton ini, kag kon makita naton ini, pangapinan naton ini.

Isa ka Pangagda

Pareho nga nagpili ako sang ika-anum nga bato, ginaagda ko kamo nga magmiting sa inyo klase, korum, ukon pamilya kag manumdum sang iban pa nga mga kusog nga kinahanglan ninyo maagom agud magpabilin nga tampad sa Dios, kag gani, madaug ang kalibutan.

Isa ka Promisa

Mahal kong mga abyan, si Cristo maluyag gid nga updan kita sa mga pagpanglakaton naton sa kabuhi. Promisa ko sa inyo nga sa inyo paghawid sa barandilya nga salsalon, pagaupdan kamo ni Jesucristo agud suportahan kamo. Magagiya Sia sa inyo, kag magatudlo Sia sa inyo. Paagi sa Iya kamot, madaug ninyo ang tagsa ka mabudlay nga pagtilaw sa inyo kabuhi.

Panaksihon

Nagasaksi ako nga may kalipay sa pagpangamuyo adlaw-adlaw, sa pagbasa sang Libro ni Mormon adlaw-adlaw, sa pag-ambit sang sakramento kada Domingo, kag sa pagkadto sa seminary—bisan aga pa katama! May kalipay sa paghimo sang maayo.

May kalipay nga mangin tampad sa Dios sang uniberso, ang Manluluwas sang kalibutan, ang Hari sang mga hari. May kalipay nga mangin disipulo ni Jesucristo.

Ang Dios amo ang aton Amay. Nakahibalo Sia sang mga handum sang inyo tagipusuon kag sang inyo mga potensyal, kag nagasalig Sia sa inyo.

Pinalangga nga mga lamharon, buligan kamo ni Jesucristo nga mangin tampad asta sa katapusan. Nagasaksi ako sa sining mga kamatuoran sa ngalan ni Jesucristo, amen.