Isuklob Ninyo ang Ginuong Jesucristo
Paagi sa pagtahod sang aton mga kasugtanan, ginapatigayon naton nga ibubu sang Dios ang madamo nga ginpromisa nga mga bugay nga naangot sa sinang mga kasugtanan.
Samtang ang akon duha ka kamanghoran nga bata nagatubo, may nadiskubrehan ako nga mga libro nga makalilingaw kag makawiwili pero nagagamit man sang simbolismo sa ila mga istorya. Sa amon ulupod nga pagbasa kon gab-i, nanamian ako magbulig sa akon kabataan nga intiendihon ang mga simbolo nga gingamit sang tagsulat sa pagtudlo sang mas madalom nga mga prinsipyo, bisan pa mga prinsipyo sang ebanghelyo.
Isa ka adlaw, nahibal-an ko nga nahangpan ini sing maayo sang mas manghod ko nga bata sang ara sia sa iya pagkatin-edyer. Nag-umpisa sia sa pagbasa sang bag-o nga libro kag luyag lang gid nga masadyanhan sa istorya, pero ang iya hunahuna nagapangita sang mas madalom pa gid nga kahulugan sa tanan nga iya ginabasa. Napaslawan sia, pero nakayuhum ako.
Si Jesus nagtudlo paagi sa mga istorya kag mga simbolo—liso sang mustasa sa pagtudlo sang gahum sang pagtuo, nadula nga carnero sa pagtudlo sang bili sang mga kalag, buhaha nga anak sa pagtudlo sang karakter sang Dios. Ang Iya mga paanggid mga simbolo kon sa diin makatudlo Sia sang mas madalom pa gid nga mga leksyon sa ila nga may “mga idulungug sa pagpamati.” Pero sila nga wala nagapangita sang mas madalom pa nga kahulugan indi makahangop, pareho nga madamo sa nagbasa sang amo man nga mga libro nga ginbasa ko sa akon kabataan wala gid makahibalo nga may mas madalom pa nga mga kahulugan kag mas madamo pa nga makuha nga mga benepisyo sa inang mga istorya.
Sang gintanyag sang Dios nga Amay ang Iya Bugtong nga Inanak bilang sakripisyo para sa aton, si Jesucristo mismo ang nangin pinakaimportante nga simbolo sang nagapadayon nga gugma sang Amay sa Langit para sa kada isa sa aton. Si Jesucristo nangin Kordero sang Dios.
May ara kita sang pribilihiyo kag bugay nga maagda sa kaangtanan sang kasugtanan sa Dios, sa diin ang aton kaugalingon nga mga kabuhi pwede mangin simbolo sinang kasugtanan. Ang mga kasugtanan nagatuga sang kaangtanan nga nagatugot sa Dios nga gabayan kag bag-uhon kita kag giyahan kita sa pagligad sang panahon agud magmangin mas pareho sa Manluluwas, nga nagadala sa aton palapit nga palapit sa Iya kag sa aton Amay nga Langitnon kag sa ulihi magahanda sa aton sa pagsulod sa Ila presensya.
Ang tagsa ka tawo sa duta pinalangga nga anak sang Dios. Kon pilion naton nga mangin kabahin sang kasugtanan, magapabakod kag magapadalom ini sang aton relasyon sa Iya. Si Pangulong Russell M. Nelson nagtudlo nga kon pilion naton nga maghimo sang kasugtanan sa Dios, mangin mas malapit ang aton relasyon sa Iya sangsa antes sang aton kasugtanan, kag nagapatigayon ini nga Iya kita bugayan sang ekstra nga kaluoy kag gugma, nga ginatawag hesed sa lenggwahe nga Hebreo. Ang dalan sang kasugtanan nagakahulugan sang relasyon upod sa Dios—ang aton hesed nga relasyon sa Iya.
Luyag sang aton Amay ang mas madalom nga relasyon sa tanan Niya nga mga anak, pero aton ina desisyon. Kon pilion naton ang magpalapit sa Iya paagi sa relasyon sa kasugtanan nagatugot ini nga magpalapit Sia sa aton kag mas bugayan pa gid kita.
Ang Dios ang nagapahamtang sang mga kondisyones kag mga obligasyon sang kasugtanan nga aton ginahimo. Kon pilion naton nga magsulod sa ina nga relasyon, nagasaksi kita sa Iya paagi sa mga simboliko nga aksyon sang tagsa ka kasugtanan nga nagapasugot kita nga magtuman sa mga kondisyones nga iya ginpahamtang. Paagi sa pagtahod sang aton mga kasugtanan, ginatugotan naton ang Dios nga ibubu ang madamo nga ginsaad nga mga bugay nga naangot sinang mga kasugtanan, lakip na ang dugang nga ikasarang nga magbag-o kag mangin mas pareho sa Manluluwas. Si Jesucristo ang sentro sang tanan nga kasugtanan nga aton ginahimo, kag ang mga bugay sang kasugtanan mangin posible tungod sang Iya nagabayad-sala nga sakripisyo.
Ang bunyag paagi sa pagtugmaw amo ang simboliko nga ganhaan kon sa diin nagasulod kita sa relasyon sang kasugtanan upod sa Dios. Ang matugmaw sa tubig kag magbutwa simboliko sang kamatayon kag Pagkabanhaw sang Manluluwas sa bag-o nga kabuhi. Kon kita bunyagan, simboliko kita nga mapatay kag mabuhi liwat sa panimalay ni Cristo kag nagapakita nga nagapasugot kita nga dal-on sa aton kaugalingon ang Iya ngalan. Kita mismo nagapakita sina nga symbolismo sang kasugtanan. Sa Daan nga Katipan, mabasa naton, “Kay ang [kadamuon] sa inyo nga [ginbunyagan] kay Cristo nagsuklob kay Cristo.” Sa aton bunyag, simboliko naton nga ginasuklob si Cristo.
Ang ordinansa sang sakramento ginapatuhoy man sa Manluluwas. Ang tinapay kag tubig nagasimbolo sang lawas kag dugo ni Cristo nga ginpaagay para sa aton. Ang regalo sang Pagbayad-sala simboliko nga ginatanyag sa kada isa sa aton kada semana sa tion nga ang isa ka priesthood holder, nga nagarepresentar sang Manluluwas Mismo, nagatanyag sa aton sang tinapay kag tubig. Kon nagaakto kita sa pagkaon kag pag-inom sang mga simbolo sang Iya unod kag dugo, si Cristo simboliko nga mangin kabahin naton. Liwat naton nga ginasuklob si Cristo kon nagahimo kita sang bag-o nga kasugtanan kada semana.
Kon nagahimo kita sang mga kasugtanan sa Dios sa balay sang Ginuo, mas ginapadalom pa gid naton ang aton relasyon sa Iya. Ang tanan nga aton ginahimo sa templo nagatudlo sa plano sang aton Amay sa Langit, nga ang sentro sini amo ang Manluluwas kag ang Iya nagabayad-sala nga sakripisyo. Ang Ginuo magatudlo sa aton dinalan sa dinalan paagi sa simbolismo sang mga ordinansa kag mga kasugtanan kon aton ginabuksan ang aton mga tagipusuon kag mapinangamuyuon nga nagapangita agud maintiendihan ang mas madalom nga mga kahulugan.
Bilang kabahin sang temple endowment, awtorisado kita nga magsuksok sang garment sang balaan nga priesthood. Ang mga ini pareho nga sagrado nga obligasyon kag sagrado nga pribilihiyo.
Sa madamo nga mga tradisyon sang relihiyon, espesyal nga panggwa nga bayo ang ginasuksok bilang simbolo sang mga pagtuluohan kag pangako sang isa ka tawo sa Dios, ang pangseremonya nga bayo masami nga ginasuksok sang mga nagapanguna sa mga seremonya sa pagsimba. Inang sagrado nga mga panapton nagadala sang madalom nga kahulugan sa ila nga nagasuksok sang mga ini. Mabasa naton sa balaan nga mga kasulatan nga sang una nga panahon, ang sagrado nga mga pangseremonya nga bayo ginasuksok man upod sa mga ritwal sa templo.
Bilang mga miyembro sang Ang Simbahan ni Jesucristo sang mga Santos sa Ulihing mga Adlaw, kita nga nagpili sa paghimo sang mga kasugtanan sa Dios sa balay sang Ginuo nagasuksok sang sagrado nga panggwa nga seremonyal nga garment sa tion sang pagsimba sa templo, nga nagasimbolo sang bayo nga ginsuksok sa mga ritwal sa templo sang-una. Nagasuksok man kita sang garment sang balaan nga priesthood, parehos sa tion sang pagsimba kag sa adlaw-adlaw naton nga pagpangabuhi.
Ang garment sang balaan nga priesthood madalom nga nagasimbolo kag nagapatuhoy man sa Manluluwas. Sang si Adan kag Eva nagkaon sang bunga sang kahoy sang ihibalo sang maayo kag malain kag kinahanglan magbiya sa Katamnan sang Eden, ginhatagan sila sang mga lambong sang mga panit bilang panabon nila. Mahimo nga isa ka sapat ang ginsakripisyo agud himuon ang mga lambong sang mga panit—nagasimbolo sang kaugalingon nga sakripisyo sang Manluluwas para sa aton. Ang Kaphar kinaubsan nga pulong sa Hebreo para sa pagbayad-sala, kag ang isa sa mga kahulugan sini amo ang, “tabunan” Ang aton temple garment nagapahanumdum sa aton nga ang Manluluwas kag ang bugay sang Iya Pagbayad-sala nagatabon sa aton sa bug-os naton nga mga kabuhi. Sa aton pagsuksok sang garment sang balaan nga priesthood kada adlaw, inang matahum nga simbolo nangin kabahin na naton.
Sa libro sang Mga Taga-Roma sa Daan nga Katipan, aton mabasa: “Ang kagab-ihon manugtaliwan na, malapit na ang adlaw: niyan isikway ta ang buhat sang kadudulman kag isuklob ang hinganib sang kapawa. … Isuklob ninyo ang Ginuong Jesucristo.”
Nagapasalamat gid ako sang pribilihiyo sang pagsuksok sang garment sang balaan nga priesthood agud pahinumdumon ako nga ang Manluluwas kag ang bugay sang Iya wala dulonan nga Pagbayad-sala wala untat nga nagaprotekta sa akon sa bilog nga mortal ko nga pagpanglakaton. Nagapahinumdum man ini sa akon nga kon ginatipigan ko ang mga kasugtanan nga akon ginhimo upod ang Dios sa balay sang Ginuo, simboliko ko nga ginasuklob si Cristo, nga Sia mismo isa ka hinganib sang kapawa. Protektahan Niya ako batok sa kalainan, hatagan ako sang gahum kag dugang nga ikasarang, kag mangin akon kasanag kag giya sa kadudulman kag mga kabudlayan sa ining kalibutan.
May madalom kag matahum nga kahulugan nga nagasimbolo sang garment sang balaan nga priesthood kag sang iya sini kaangtanan kay Cristo. Nagapati ako nga ang akon kahanda sa pagsuksok sang balaan nga garment mangin akon simbolo sa Iya. Akon ini personal nga palatandaan sa Dios kag indi palatandaan sa iban nga tawo.
Nagapasalamat gid ako sa akon Manluluwas nga si Jesucristo. Ang Iya nagabayad-sala nga sakripisyo para sa aton nangin pinakadako nga simbolo sang walay dulonan nga pagpalangga Niya kag sang aton Amay sa Langit para sa tagsa sa aton, kaupod ang maathag nga mga simbolo sinang pagpalangga kag pagsakripisyo—ang mga marka sa mga kamot, mga tiil kag kilid sang Manluluwas—nga nagapabilin bisan tubtob sa Iya Pagkabanhaw.
Paagi sa pagtipig sang akon mga kasugtanan kag mga obligasyon sa Dios, lakip na ang pagsuksok sang garment sang balaan nga priesthood, ang akon mismo kabuhi sarang mangin personal nga simbolo sang akon pagpalangga kag dako nga kapasalamatan sa akon Manluluwas nga si Jesucristo, kag sang akon handum nga makaupod Sia pirme.
Kon wala pa ninyo ini mahimo, akon kamo ginaagda nga pilion ang mas madalom nga relasyon sa Dios paagi sa paghimo sang mga kasugtanan sa Iya sa balay sang Ginuo. Tun-i ang mga pamulongpulong sang aton propeta (lakip ang matahum nga mga panudlo sa footnote sang iya pamulongpulong, nga kalabanan sang mga pamulongpulong may ara gid). Pila ka tuig na nga ginasulit-sulit niya hambal ang parte sa mga kasugtanan kag ilabi na gid sang nangin Pangulo sia sang Simbahan. Tun-i ang iya mga pinanudlo parte sa matahum nga mga bugay kag nagadugang nga kusog kag ikasarang nga mangin inyo paagi sa paghimo kag pagtipig sang mga kasugtanan sa Dios.
Ang Pangkabilogan nga Pagsulundan nagasiling nga indi kinahanglan nga may tawag sa misyon ukon mangin kalaslon agud makahimo sang mga kasugtanan sa templo. Ang isa ka tawo dapat indi magnubo sa 18 anyos, wala na nagaeskwela sa high school ukon katumbas sini, kag miyembro sang Simbahan sa indi magnubo isa ka tuig. May mga talaksan man nga ginapangayo ang personal nga pagkabalaan. Kon may handum ka nga padalumon ang imo kaangtanan sa imo Amay sa Langit kag kay Jesucristo paagi sa paghimo sang mga kasugtanan sa balay sang Ginuo, ginaagda ko ikaw nga makighambal sa imo bishop ukon pangulo sang branch kag pabal-a sia sang imo mga handum. Buligan ka Niya nga makahibalo kon paano maghanda sa pagbaton kag pagtipig sang mga kasugtanan.
Paagi sa relasyon sa kasugtanan sa Dios, ang aton kaugalingon nga mga kabuhi mahimo mangin buhi nga simbolo sang aton pangako kag dako nga pagpalangga sa aton Amay sa Langit, ang aton hesed para sa Iya, kag sang aton handum nga mag-uswag kag mangin pareho sa aton Manluluwas sa ulihi, nga sa pila ka adlaw mangin handa na sa pagsulod sa Ila presensya. Nagasaksi ako nga takus ang bili sang dalagko nga mga bugay sinang relasyon sang kasugtanan. Sa ngalan ni Jesucristo, amen.