Tindog! Nagatawag Sia sa Imo
Ang ebanghelyo indi pamaagi agud likawan ang mga hangkat kag mga problema kundi sabat agud magdako ang aton pagtuo kag makatuon kon paano ang mga ini malampuwasan.
Sang nagligad ginpamangkot ko ang akon asawa, “Masugiran mo bala ako kon ngaa, sa madumduman ko, wala gid kita dalagko nga mga problema sa aton kabuhi?”
Gintulok niya ako kag nagsiling, “Sige. Sugiran ta ka kon ngaa wala gid kita dalagko nga problema; tungod ina kay malipaton ka!”
Ang iya maabtik kag maalam nga sabat naparealisar sa akon liwat nga ang pagpangabuhi sang ebanghelyo ni Jesucristo wala nagadula sang kasakit kag mga pagtilaw, nga kinahanglanon agud magtubo.
Ang ebanghelyo indi pamaagi agud likawan ang mga hangkat kag mga problema kundi sabat agud magdako ang aton pagtuo kag makatuon kon paano ang mga ini malampuwasan.
Nahangpan ko ining kamatuoran pila ka bulan ang nagligad, samtang nagalakat ako isa ka adlaw, kag gulpi lang nagburon, nagdulom kag nagbalod ang akon panulok. Ginkulbaan ako. Tapos, ginhambalan ako sang mga doktor, “Kon indi mo pagsugdan dayon ang pagpabulong, basi mabulag ka sa pila lang ka semana.” Mas ginkulbaan ako.
Kag dayon, nagsiling sila: Kinahanglan mo nga maindyeksyonan sa kalimutaw—mga indyeksyon sa tuo nga mata, nga nagamuklat ang mata—kada apat ka semana, sa nabilin sang imo kabuhi.”
Masakit ina nga realisasyon.
Dayon ang pagpamalandong nag-abot paagi sa isa ka pamangkot. Ginpamangkot ko ang akon kaugalingon: OK! Indi maayo ang akon pisikal nga panulok, pero paano ang akon espirituhanon nga panan-aw? Kinahanglan ko bala nga ipabulong ina? Kag ano ang buot silingon sang klaro nga espirituhanon nga panan-aw?
Ginpanumdum ko ang istorya sang bulag, nga si Bartimeo, nga ginalaragway sa Ebanghelyo ni Marcos. Ang balaan nga kasulatan nagasiling, “Kag sang pagkabati niya nga ini si Jesus nga Nazaretnon, nagsugud sia sa pagsinggit kag sa pagsiling, “Jesus, Anak ni David, kalooyi ako.”
Sa nahibal-an sang madamo, si Jesus anak lang ni Jose, gani ngaa gintawag sia ni Bartimeo nga “Anak ni David”? Bangod lamang ginkilala niya nga si Jesus amo gid ang Mesias, nga ginpropesiya nga matawo bilang kaliwat ni David.
Makatilingala nga nakilala si Jesus sining bulag nga tawo, nga indi makakita. Nakita niya sing espirituhanon ang indi niya makita sing pisikal, samtang ang iban makakita kay Jesus sing pisikal, pero lubos nga bulag sa espirituhanon.
Halin sa sining istorya makatuon pa gid kita parte sa klaro nga espirituhanon nga panan-aw.
Mabasa naton, “Kag madamu ang [nagsaway] sa iya, nga maghipus sia; apang nagdugang pa gid ang iya pagsinggit, “Anak ni David, kalooyi ako!”
Ginahambalan sia sang tanan sa palibot niya nga maghipos, pero nagtodo pa gid ang iya singgit tungod nakahibalo sia kon sin-o gid si Jesus. Wala niya ginsapak atong mga tingug kag nagsinggit pa gid sing mas matunog.
Naghulag sia sa iya kaugalingon kag wala ginpahulag. Sa pihak sang iya kakulangan, gingamit niya ang iya pagtuo agud lampuwasan ang iya mga limitasyon.
Gani, ang una nga prinsipyo nga aton matun-an amo nga nagaklaro ang aton espirituhanon nga panan-aw kon magtutok kita kay Jesucristo kag mangin tampad sa aton nahibal-an nga matuod.
Mga kauturan, agud mangin bug-os ang aton espirituhanon nga panulok, dapat pilion naton nga indi magpamati sa mga tingug sa palibot naton. Sa sining makalilibog kag nalibgan nga kalibutan, dapat kita magpabilin nga tampad sa aton nahibal-an, sa aton mga kasugtanan, sa pagtuman sang mga kasugoan, kag palig-onon pa gid ang aton mga ginapatihan pareho sa ginhimo sini nga tawo. Kinahanglan naton ipahayag sa kalibutan sing mas matunog ang aton testimonya parte sa Ginuo. Ini nga tawo nakakilala kay Jesus, nagpabilin nga tampad sa iya ginapatihan, kag wala natublag sang mga tingug sa palibot niya.
May madamo kaayo nga mga tingug subong nga gusto nga pahinayon ang aton mga tingug bilang mga disipulo ni Jesucristo. Ang mga tingug sang kalibutan gusto nga pahipuson kita, pero tungod sina mismo kon ngaa dapat naton ipahayag ang aton testimonya parte sa Manluluwas sing mas matunog kag mas mabaskog. Sa tanan nga mga tingug sa kalibutan, ang Ginuo nagasalig sa aton nga ipahayag ang aton mga testimonya, nga alsahon ang aton mga boses, kag mangin Iya tingug. Kon indi naton ini paghimuon, sin-o ang masaksi parte kay Jesucristo? Sin-o ang mahambal sang Iya ngalan, kag mapahayag sang Iya diosnon nga misyon?
May espirituhanon kita nga buluhaton nga nagahalin sa aton ihibalo parte kay Jesucristo.
Pero ano ang ginhimo ni Bartimeo pagkatapos sina?
Sa sugo sang Ginuo nga magtindog, nag-akto sia liwat nga may pagtuo.
Ang balaan nga kasulatan nagasiling, “Kag sia nga nagapilak sang iya kunup nagtumbo kag nagpalapit kay Jesus.”
Ining mapainubuson kag matinuohon nga tawo nakahangop nga makatindog sia sa mas maayo nga pangabuhi sa sugo ni Jesus. Nahibal-an niya nga mas maayo sia sangsa iya mga sirkumstansya, kag ang pinakauna nga butang nga iya ginhimo sang nabatian niya si Jesus nga nagatawag sa iya amo ang pagpilak sang iya kunup sang pagpakilimos.
Sa liwat, naghulag sia imbes nga ginapahulag.
Siguro namensar sia, “Indi ko na ini kinahanglan, karon nga nag-abot na si Jesus sa akon kabuhi. Bag-o ini nga adlaw. Tapos na ako sining miserable nga kabuhi. Kay Jesus, masugdan ko ang bag-o nga kabuhi sang kasadya kag kalipay sa Iya, upod sa Iya, kag paagi sa Iya. Wala ako labot kon ano ang ginapensar sang kalibutan sa akon. Ginatawag ako ni Jesus, kag buligan Niya ako nga magbag-o sing kabuhi.”
Ano ka dalayawon nga pagbag-o!
Sang ginpilak niya ang kunup sang pagpakilimos, ginsikway man niya ang tanan nga balibad.
Kag ini ang ikaduha nga prinsipyo: —nagaklaro ang aton espirituhanon nga panan-aw kon isikway naton ang kinaandan nga tawo, maghinulsol, kag sugdan ang bag-o nga kabuhi kay Cristo.
Ang paagi sa paghimo sini amo ang paghimo kag pagtuman sang mga kasugtanan nga sugdan ang mas maayo nga kabuhi paagi kay Jesucristo.
Mientras ginapangitaan naton sang rason nga kaluoyan ang aton kaugalingon, magkalisod sa aton mga sirkumstansya kag mga problema, kag sa tanan nga malain nga butang nga nagakatabo sa aton mga kabuhi, kag bisan pa gani sa tanan nga malain nga tawo nga sa pensar naton nagapasubo sa aton, ginasuksok naton ang kunup sang pagpakilimos sa aton mga abaga. Matuod nga kon kis-a ang mga tawo, hungod man ukon indi, nagasakit sa aton. Pero dapat naton pilion nga mag-akto sa pagtuo kay Cristo paagi sa paghukas sang daan nga mga panimuot kag balatyagon nga ginahuptan pa naton agud lipdan ang aton mga balibad ukon sala, kag ipilak ini, nga nakahibalo nga pwede kag himuon Niya nga ayuhon kita.
Wala sing maayo nga balibad para magsiling, “amo ako sini tungod sang masubo kag malain nga mga sirkumstansya. Kag indi ako pwede magbag-o, kag may rason ako.”
Kon amo sina ang aton pamensaron, ginapili naton nga pahulagon.
Ginahuptan naton ang kunup sang pagpakilimos.
Ang pag-akto sa pagtuo nagakahulugan nga magsalig sa aton Manluluwas, kag magpati nga paagi sa Iya Pagbayad-Sala, maka tindog kita kag malampuwasan ang tanan, sa Iya sugo.
Ang ika-tatlo nga prinsipyo ara sa katapusan nga apat ka tinaga, “nagpalapit [sia] kay Jesus.”
Paano sia makakadto kay Jesus kay bulag sia? Ang pamaagi amo gid lang ang maglakat pakadto kay Jesus paagi sa pagpamati sa Iya tingug.
Kag ini ang ika-tatlo nga prinsipyo: nagaklaro ang aton espirituhanon nga panan-aw kon magpamati kita sa tingug sang Ginuo kag tugotan Sia nga giyahan kita.
Pareho nga ining tawo nag-alsa sang iya tingug labaw sa mga tingug sa iya palibot, nagpamati sia sa tingug sang Ginuo sa tunga sang tanan nga iban pa nga mga tingug.
Amo man ini ang pagtuo nga nagtugot kay Pedro nga maglakat sa tubig samtang nagpadayon sia sa iya espirituhanon nga tutok sa Ginuo kag wala natublag sang mga hangin sa iya palibot.
Dayon ang istorya sining bulag nga tawo nagatapos sa mga pulong “nabaton niya ang iya itololok kag nagsunod kay Jesus sa dalanon.”
Isa sang pinakaimportante nga leksyon sa sining istorya amo nga ining tawo nagpakita sang tunay nga pagtuo kay Jesucristo kag nagbaton sang milagro tungod nagpangayo sia sing may matuod-tuod nga tinutuyo, ang matuod-tuod nga tinutuyo nga sundon Sia.
Kag ini ang pinakamaayo nga rason para sa mga bugay nga ginabaton naton sa aton kabuhi, nga amo ang sundon si Jesucristo. Parte ini sa pagkilala sa Iya, paghimo kag pagtuman sang mga kasugtanan sa Dios tungod sa Iya, pagbag-o sang aton mismo kinaugali paagi sa Iya, kag pagpadayon tubtob sa katapusan paagi sa pagsunod sa Iya.
Para sa akon, ang klaro nga espirituhanon nga panan-aw parte gid sa pagtutok kay Jesucristo.
Gani, ang akon bala espirituhanon nga panulok magaklaro, kon magpaindyeksyon ako sa mata? Wala ako nakahibalo. Pero nagapasalamat ako sa akon makit-an.
Klaro ko nga makita ang kamot sang Ginuo sa akon kabuhi.
Makita ko ang pagtuo sang madamo bisan diin ako magkadto, nga nagapabakod sang akon pagtuo.
Makakita ako sang mga anghel sa akon palibot.
Makita ko ang pagtuo sang madamo nga indi makakita sang Ginuo sing pisikal pero nakilala Sia sing espirituhanon, tungod kilala nila Sia sing suod.
Nagapamatuod ako nga ining ebanghelyo ang sabat para sa tanan-tanan, tungod si Jesucristo ang sabat para sa tanan nga tawo. Nagapasalamat ako sa akon makit-an samtang nagasunod ako sa akon Manluluwas.
Ginapromisa ko nga kon pamatian naton ang tingug sang Ginuo kag tugotan Sia nga giyahan kita sa dalan sang kasugtanan sang Manluluwas, bugayan kita sang klaro nga panan-aw, espirituhanon nga paghangop, kag kalinong sang balatyagon kag hunahuna sa bilog naton nga kabuhi.
Kabay nga ipahayag naton ang aton testimonya parte sa Iya, sing mas matunog sangsa mga tingug sa palibot naton sa kalibutan nga kinahanglan makabati sing mas madamo parte kay Jesucristo kag indi sing mas diutay. Kabay nga ubahon naton ang kunup sang pagpakilimos nga basi ginasul-ob pa naton, kag lampuwasan ang kalibutan, sa mas maayo nga kabuhi sa, kag paagi kay Cristo. Kabay nga isikway naton ang tanan nga balibad sa indi pagsunod kay Jesucristo kag makit-an ang tanan nga maayo nga rason nga sundon Sia, samtang nagapamati kita sa Iya tingug. Ini ang akon pangamuyo, sa ngalan ni Jesucristo, amen.