Gintangdo nga Mag-alagad
Ang aton Amay nga Langitnon luyag nga ipahibalo sa inyo ang personal nga gintangdo sa inyo, kag Iya ini himuon kon inyo tun-an kag sundon ang Iya pagbuot.
Sini nga gab-i, nagahambal ako sa mga lamharon sang Simbahan, ang mga ulihing tubo sang mga pamatan-on kag mga bataon nga babayi nga amo ang tigdala sang talaksan para sa madason nga henerasyon.
Sang Oktubre 2013, ang aton pinalangga nga propetang si President Russell M. Nelson, nagpahayag: “Nakilala kamo sang inyo Amay nga Langitnon sa malawig kaayo nga panahon. Ikaw, bilang Iya anak, ginpili Niya nga magkari sa duta sa sining sibo nga panahon, agud mangin lider sa Iya dakong buluhaton sa duta.”
Duha ka tuig ang nagligad, Si Pangulong Nelson nagpadayon:
“Mabaskog ko nga ginasulit karon ang pangabay sang Ginuo nga ang tagsa ka takos, makasarang nga pamatan-on maghanda kag magserbe sa misyon. Para sa mga pamatan-on nga mga Santos sa Ulihing mga Adlaw, ang pagserbisyo sa misyon isa ka responsibilidad sang priesthood. Kamo nga mga pamatan-on ginreserba sa sini nga panahon kon san-o nagakatabo ang ginpromisa nga pagtipon sang Israel. …
“Para sa inyo nga mga lamharon kag makasarang nga mga sisters, ang misyon isa man ka mabaskog, pero opsyunal, nga oportunidad. … Magpangamuyo para mahibal-an kon gusto sang Ginuo nga magserbe kamo sa misyon, kag ang Balaan nga Espiritu magasabat sa inyo tagipusuon kag kaisipan.”
Ang mga komento sang aton propeta nga gintigana sang Ginuo ang aton mga lamharon sa sining tion sang pagtipon sang Israel kag ang iya imbitasyon nga mangamuyo agud mahibal-an kon ano ang luyag sang Ginuo nga inyo himuon, sa pila ka bahin, nagatumod sa inyo kabuhi sadto kag mga bugay nga inyo nabaton halin sa Dios antes kamo matawo sa sini nga duta. Tanan kita nga natawo sa sini nga duta una nga nagkabuhi upod sa Amay nga Langitnon bilang Iya mga anak nga espiritu. Ang Ginuo nagpahayag kay Moises, “Kay ako, nga Ginuong Dios, nagtuga sang tanan nga butang … sing espirituhanon, antes ang mga ini ginpahamtang sa ibabaw sang duta.”
Sang Iya kamo gintuga sa espirituhanon, ginpalangga Niya kamo bilang Iya mga anak nga espiritu kag gintanom sa kada isa sa inyo ang diosnon nga kinaiya kag kapalaran.
Sa panahon sang inyo kabuhi antes sa duta, “ginpalambo ninyo ang inyo identidad kag ginpauswag ang inyo espirituhanon nga ikasarang.” Ginbugayan kamo sang regalo sang pagpili, ang ikasarang sa paghimo sang mga pagpili para sa inyo kaugalingon, kag naghimo kamo sang importante nga mga desisyon, pareho sang pagdesisyon nga sundon ang plano sang kalipay sang Amay nga Langitnon, nga “makaangkon sang dutan-on nga lawas kag makaagom sang dutan-on nga inagihan sa pag-uswag … kag sa ulihi malab-ot ang katumanan sang [inyo] diosnon nga kapalaran bilang mga manunubli sang kabuhi nga wala’y katapusan.” Kag ini nga desisyon nag-apekto sang inyo sadto kabuhi, sa inyo kabuhi antes sa duta, kag nagapadayon ini sa pag-apekto sa inyo kabuhi sa karon. Bilang anak sang Dios nga nagkabuhi antes matawo sa duta, kamo “nagtubo sa kaalam kag nakatuon nga palanggaon ang kamatuoran.”
Antes kamo matawo, gintalana sang Dios nga ang kada isa sa inyo magahuman sang espisipiko nga misyon sa inyo kabuhi sa duta. Kon magpabilin kamo nga nagakaangay, ang mga bugay sinang kasugoan antes sa duta magahatag sa inyo sang tanan nga oportunidad sa sini nga kabuhi, lakip ang mga oportunidad nga mag-alagad sa Simbahan kag magpartisipar sa pinakaimportante nga buluhaton nga nagakatabo sa kalibutan karon: ang pagtipon sang Israel. Atong mga promisa kag mga bugay antes sa duta ginatawag nga pagtangdo (foreordination). Ang doktrina sang pagtangdo madapat sa tanan nga miyembro sang Simbahan.” Ang pagtangdo wala nagagarantiya nga magabaton kamo sang pat-od nga mga calling kag mga responsibilidad. Ining mga bugay kag mga oportunidad nagaabot sa sini nga kabuhi resulta sang inyo matarong nga paggamit sang kahilwayan sa pagpili, pareho man nga ang pagtangdo sa inyo sa kabuhi antes sa duta nag-abot resulta sang pagkamatarong. Kon mapamatud-an ninyo nga nagakaangay kamo kag nagauswag sa dalan sang kasugtanan, magabaton kamo sang mga oportunidad nga mag-alagad sa inyo klase sa Young Women ukon korum sang priesthood. Pagapakamaayuhon kamo nga mag-alagad sa templo, mangin ministering nga brother ukon sister, kag magserbe sa misyon bilang disipulo ni Jesucristo.
Ano kaimportante nga mahibal-an kag mahangpan ang gintangdo sa inyo? Sa karon nga pahanon nga madamo sing mga pamangkot, kon san-o tuman kadamo ang nagapangita sang ila matuod-tuod nga identidad, ang kamatuoran nga ang Dios isa-isa nga nakakilala kag nagpakamaayo sa aton antes pa kita matawo sa sini nga duta sang “importante nga [mga] kinaiya sang … antes sa duta, sa duta,kag walay katapusan nga identidad kag katuyuan ” nagadala sang paghidaet kag pasalig sa aton hunahuna kag tagipusuon. Ang paghibalo kon sin-o kamo nagaumpisa sa paghangop sang mga bugay nga ginhatag sa inyo antes kamo matawo sa sini nga duta. Ang aton Amay nga Langitnon luyag nga ipahibalo sa inyo ang personal nga gintangdo sa inyo, kag Iya ini himuon kon inyo tun-an kag sundon ang Iya pagbuot.
Nanamian ako magbasa sang mga gina-post ni President Nelson sa Instagram. Isa sang akon mga paborito amo ang sang Hulyo 20, 2022. Sia nagsulat:
“Nagapati ako nga kon ang Ginuo direkta nga nagpakighambal sa inyo, ang una Niya nga seguraduhon nga nahangpan ninyo amo ang inyo matuod nga identidad. Palangga kong mga kaabyanan, literal kamo nga mga espiritu nga anak sang Dios. …
“… Indi magsala parte sina: Diosnon ang inyo ikasarang. Sa inyo maukod nga pagpangita, ang Dios magahatag sa inyo sang mga ideya kon ano kamo pwede nga mangin.”
Pwede ko bala ipaambit sa inyo kon paano ako gintudloan sang akon dutan-on nga amay nga madiskubrehan ang akon identidad kag ang plano sang Dios sa akon kabuhi?
Isa ka Sabado sang aga sang 13 anyos ako, nagapanghilamon ako bilang parte sang akon ulobrahon sa balay. Sang makatapos ako, nabatian ko nga nagsira ang amon pwertahan sa likod balay kag nakita ang akon amay nga nagapanawag sa akon nga updan sia. Nag-agi ako sa balkonahe sa likod, kag iya ako gin-agda nga magpungko upod sa iya sa hagdanan. Kanami sadto nga aga. Akon pa madumduman nga nagapungko sia malapit kaayo sa akon nga ang amon abaga nagatandoganay. Nag-umpisa sia sa paghambal nga palangga niya ako. Ginpamangkot niya ako kon ano ang akon mga lalab-uton sa kabuhi. Sa pensar ko, “Ahmm, kahapos lang sina ah.” Duha ka bagay ang piho gid ako: luyag ko magtaas, kag luyag ko nga mas pirme magkamping. Isa lang ako ka simple nga tawo. Nagyuhom sia, nagpundo sing makadali, kag nagsiling: “Steve, may luyag ako ipaambit sa imo nga importante gid kaayo sa akon. Ginpangamuyo ko sa aton Amay nga Langitnon nga kon ano ang ihambal ko sa imo subong magtatak gid sa imo hunahuna kag sa imo kalag agud nga indi mo malimtan.”
Ara sa akon amay ang akon bug-os nga atensyon sa sina nga tion. Nagbalikid kag gintulok niya ako sa mga mata kag nagsiling, “Anak, amligi ang pribado nga mga tinion sang imo kabuhi” Naglawig ang kahipos samtang iya gintugotan nga magtudok sa akon pensar ang kahulugan.
Kag nagpadayon sia, “Ina balang, mga tinion nga isahanon ka lang kag wala sing iban nga nakahibalo kon ano ang ginahimo mo? Inang mga tinion nga pensar mo, ‘Ano man ang himuon ko subong indi maapektohan ang iban, kundi ako lang’?”
Dayon nagsiling sia, “Labaw sa iban nga tion sang imo kabuhi, kon ano ang imo ginahimo sa pribado nga mga tinion sang imo kabuhi magahatag sang pinakadako nga impluwensya kon paano mo pakigbatoan ang mga hangkat kag mga kasakit nga imo pagaatubangon; kag kon ano ang imo ginahimo sa pribado nga mga tinion sang imo kabuhi magahatag man sang mas dako nga impluwensya kon paano mo atubangon ang mga kadalag-an kag kalipay nga imo maekspireyensyahan sangsa iban nga tinion sang imo kabuhi.”
Nakuha gid sang akon amay ang iya handom. Ang tono sang iya tingog, kag ang pagpalangga nga akon nabatyagan sa iya mga tinaga, nagtapik gid sa akon hunahuna sa sina nga adlaw.
Natun-an ko sa mga tinuig nga ang pinakadako nga milagro sina nga adlaw sa hagdanan sang puluy-an sang akon pagkabata amo nga sa pribado nga mga tinion sang akon kabuhi, pwede ako magpalapit sa Dios sa pagpangamuyo agud makabaton sang rebelasyon. Gintudloan ako sang akon amay kon paano ko mahibal-an ang mga gintangdo nga mga bugay sang Dios. Sadtong pribado nga mga tinion, natun-an ko nga ang Libro ni Mormon pulong sang Dios. Natun-an ko nga gintangdo ako nga magserbe sa misyon. Natun-an ko nga kilala ako sang Dios kag ginapamatian kag ginasabat Niya ang akon mga pangamuyo. Nahibal-an ko nga si Jesus amó ang Cristo, aton Manluluwas kag Manunubos.
Bisan nakahimo ako sang madamo nga mga sayop pagkatapos sinang halandumon nga adlaw kaupod ang akon amay, ang pagtinguha nga amligan ang pribado nga tinion sa akon kabuhi nagpabakod sa akon sa tunga sang mga kabudlayan kag pagtilaw sa kabuhi kag nagbulig sa akon nga mangin luwas sa katalagman kag pangitaon ang nagaayo kag nagapabakod nga mga bugay sang gugma kag pagbayad-sala sang aton Manluluwas.
Mga hubin ko nga kauturan, kon inyo amligan ang pribado nga tinion sang inyo kabuhi sang maayo nga mga kalingawan; pagpamati sa makapabayaw nga musika; pagbasa sang balaan nga mga kasulatan; masunson, makahulugan nga pagpangamuyo; paghimud-os sa pagbaton kag pagbinagbinag sang inyo patriarchal blessing, magabaton kamo sang rebelasyon. Sa mga pulong ni Pangulong Nelson, ang inyo mga mata mangin “bukas kaayo sa kamatuoran nga ining kabuhi amo gid ang tion nga kinahanglan kamo magpamat-od sang klase sang kabuhi nga luyag ninyo ikabuhi sa katubtuban.”
Ang aton Amay sa Langit magasabat sang inyo mga pangamuyo, ilabi na ang mga pangamuyo nga inyo ginhalad sa pribado nga mga tinion sang inyo kabuhi. Kon sinsero kamo nga mangamuyo kag matuodtuod nga nagahandom nga makahibalo, ipahayag Niya sa inyo ang inyo gintangdo nga mga dulot kag mga kinaadman, kag mabatyagan ninyo ang Iya pagpalangga nga nagalikop sa inyo. Kon inyo amligan ang pribado nga mga tinion sang inyo kabuhi, ang inyo partisipasyon sa mga ordinansa kag mga kasugtanan sa ebanghelyo mangin mas makahulugan. Mas mahigot ninyo sing maayo ang inyo kaugalingon sa mga kasugtanan nga inyo ginhimo upod sa Iya kag ibayaw kamo agud makaangkon sang mas dako nga paglaum, pagtuo, kag kasigurohan sa Iya mga ginpromisa sa inyo. Luyag bala ninyo mahibal-an ang mga plano sang Dios para sa inyo? Nagasaksi ako nga luyag Sia nga makahibalo kamo, kag Iya gin-inspirar ang Iya mga propeta sa kalibutan nga agdahon ang kada isa sa aton nga magpangamuyo kag magbaton sining makapamuklat nga eksperiyensya para sa aton mga kaugalingon Nagasaksi ako sang pagkamatuod kag gahom sang nagabayad-sala nga sakripisyo sang aton Manluluwas nga nagahimo nga posible nga mangin nagakabagay kita kag magkasadya sa tanan nga bugay nga gintangdo sang Dios, sa ngalan ni Jesucristo, amen.