Sa Pagsuporta sang mga Ulihing Tubo
Ang mga relasyon sa kabuhi sang mga lamharon amo ang may pinakadaku nga impluwensia sa ila mga pagpili.
Sa paghanda nga maghambal sa inyo, nanamian ako sang istorya ni Helaman kag sang lamharon nga mga Amonhon. Nabatyagan ko ang gahum sang mga propeta sa Libro ni Mormon nga nagatudlo sa mga ginikanan, mga bishop, kag mga miyembro sang ward paagi sa pagtuon sini nga istorya.
Si Helaman tawo nga masaligan sang lamharon nga mga Amonhon. Ginbuligan niya sila mga magdaku kag matuboan buot sa pagkamatarong. Kilala kag palangga nila sia kag “luyag nga ila [sia] mangin lider.”
Ginpalangga ni Helaman ining mga pamatan-on nga daw iya mga anak kag nakita ang ila potensyal. Si Elder Dale G. Renlund nagtudlo nga “agud epektibo nga makaalagad sa iban, kinahanglan tan-awon naton sila … paagi sa mga mata sang Amay nga Langitnon. Sa sina lamang nga masugdan naton nga mahangpan ang matuod-tuod nga bili sang isa ka kalag. Sa sina lamang nga mabatyagan naton ang gugma sang Amay nga Langitnon para sa tanan … Niya nga mga anak.” Ang mga Bishop sa karon nabugayan sang inughalangop nga makita ang diosnon nga pagkatawo sang mga lamharon nga ila ginaatipan.
“Gin-isip” ni Helaman ang mga pamatan-on nga iya ginaatipan. Gin-una niya ang pagpabakod sang ila relasyon.
Sa delikado nga tion nga mahimo magresulta sa kabuhi ukon kamatayon, ginpatalang ni Helaman kag sang iya lamharon nga hangaway ang mga soldado nga nagalagas sa ila. Ginkonsulta ni Helaman ang mga lamharon:
“Tan-awa, wala kita nakahibalo nga basi nagdulog sila sa tuyo nga pasalakayon kita batok sa ila. …
“Gani ano ang inyo masiling, mga anak ko, … ?”
Ining matinuohon nga mga pamatan-on nagsabat, “Amay, tan-awa ang aton Dios upod sa aton, kag indi sia magtugot nga malaglag kita; gani malakat kita.” Ang inaway nadaug, sang ginsuportahan ni Helaman ining mga pamatan-on sa ila desisyon nga maghulag.
Ang lamharon nga mga Amonhon may daku nga kawsa kag maisog sa “pagsuporta sa katawhan.” “Ining diutay nga puwersa,” nga ginpangunahan ni Helaman, nagdala “sing dako nga mga paglaum kag tuman nga kalipay” sa balatyagon sang ekperiyensiado nga Nefinhon nga kasoldadohan. Ang mga bishop sa karon makapanguna sang ila pinasahi ka talentado nga mga lamharon sa pagbugay sang ward kag pagtipon sang Israel. Si Pangulong Nelson nagtudlo nga “ini ang misyon nga para sini ginpadala [sila] sa duta.”
Pareho sining lamharon nga mga Amonhon nga “tampad sa tanan nga tion sa bisan ano nga butang nga ginatugyan sa ila,” si Helaman tampad nga nagsunod sa ila mga lider. Bisan ano pa man ang hangkat ukon kapaslawan, Si Helaman nagpabilin nga “determinado gid” nga isulong ang ila katuyoan. Sang ginsugo sia nga “maglakat sia upod ang [iya] lamharon nga mga anak,” nagtuman sia.
Ang mga lamharon sa karon ginabugayan kon ang mga bishop nagasunod sa giya sang aton mga lider nga “[maghiwat] sang konsultasyon sa [mga] presidente sang Young Women sa ward.” Ginasiguro sang mga Stake President nga ang mga bishop kag mga presidente sang Young women ginatudloan sa pagtuman sang ila mga responsibilidad sa mga lamharon.
Si Helaman nagtipig sang iya mga kasugtanan. Sang gintudlo ni Amon ang ebanghelyo sa mga ginikanan sang lamharon nga mga pamatan-on, ginbaton nila ini gilayon. Tuman sila ka komitido sa ila bag-o nga kabuhi sang matarong nga pagkadisipulo nga naghimo sila sang kasugtanan nga “[buy-an] nila ang mga armas sang ila pagrebelde.” Ang butang lang gid nga nagpapensar sa ila nga supakon ining kasugtanan, nga magbalik sa ila naandan nga gawi sang pagpakig-away, amo ang pagkakita sa mga Nefinhon sa peligro.
Ang mga Amonhon luyag nga buligan ining katawhan nga naghatag sa ila sang puluy-an nga luwas sa katalagman. Ginkumbinsi sila ni Helaman, upod sang iban pa, nga tumanon ang ila kasugtanan nga indi na gid makig-away. Mas nagsalig sia sa kusog nga ihatag sang Dios sangsa kusog nga mahatag sining mga Amonhon paagi sa ila mga espada kag mga baslay.
Sang si Helaman kag iya lamharon nga hangaway nag-atubang sang dalagko nga mga hangkat, si Helaman determinado. “Tan-awa, indi ini importante—nagasalig kami nga ang Dios magaluwas sa amon.” Sa isa ka tion, nga malapit na mapatay sa gutom, ang ila ginhimo amo nga “ginbubo [nila] ang [ila] mga kalag sa pagpangamuyo sa Dios, nga pabakuron niya [sila] kag luwason [sila] … [kag] ang Ginuo … nagbisita sa [ila] upod ang mga pagpasalig nga luwason niya [sila]” “tungod sang ila tuman nga pagtuo sa sinang gintudlo sa ila nga amo ang patihan.”
Matun-an naton kay Helaman nga ining mga pamatan-on ginsuportahan sang ila mga ginikanan. Ining matinuohon nga mga ginikanan nakahibalo nga sila ang may panguna nga responsibilidad sa pagtudlo sa ila kabataan. Gintudloan nila ang ila kabataan nga tumanon ang mga kasugoan kag “sa paglakat sing matarong” sa atubang sang Dios. Gintudloan sila sang ila mga iloy “nga kon indi sila magduhaduha, pagaluwason sila sang Dios.” Ang ila mga amay nagpakita sing maayo gid nga ehemplo sa paghimo sang kasugtanan. Ining mga hangaway sadto nakahibalo nga makahaladlok ang inaway. Ginsalig nila ang ila wala-eksperiyensia nga mga anak nga lalaki sa pag-amlig ni Helaman kag ginsuporta sila paagi sa pagpadala sing “madamo nga panigana.”
Si Helaman indi isahanon sang nagaalagad sia sa iya lamharon nga kasoldadohan. May mga tawo sa iya palibot nga ginpangayoan niya sang suporta kag laygay. Nagpangayo sia sang bulig kay Kapitan Moroni, kag nag-abot ini.
Wala sang nagaalagad sa ginharian sang Dios nga nagaalagad nga isahanon. Ang Ginuo nagbugay sa aton sang mga ward kag mga stake. Paagi sa Iya ginpanumbalik nga organisasyon, may mga ikasarang kita, kaalam, kag inspirasyon nga masolbar ang bisan ano nga hangkat.
Ang bishop nagagiya sa ward paagi sa mga konseho. Ginasulong niya ang ministering interview kada tatlo ka bulan kag ginapaisog ang elders quorum kag Relief Society nga tungdan ang ila responsibilidad sa pag-minister sa mga pamilya. Ining mga pangulohan nagapanguna sa pagtulutimbang sang panginahanglan kag nagapangita sang inspirado nga mga solusyon. Ang mga Stake president nagahatag sang suporta paagi sa pagtudlo sang mga pangulohan sang elders quorum kag Relief Society sa sining mga responsibilad.
Ang kinahanglanon nga giya para sa mga lider kag mga ginikanan makita sa Librarya sang Ebanghelyo kag Gospel Living nga mga app. Sa sining inspirado nga mga bulig, makita naton ang balaan nga mga kasulatan, mga panudlo sang moderno nga mga propeta, kag ang Pangkabilogan nga Pagsulundan. Ang Lamharon nga tab sa Librarya sang Ebanghelyo may madamo nga bulig para sa mga pangulohan sang korum kag klase kag ara dira ang Para sa Kusog sang mga Lamharon: Giya sa Paghimo sang mga Pagpili. Tungod tanan nga miyembro sang ward nagatuon sining inspirado nga mga bulig kag nagapangita sang paggiya sang Espiritu, ang tanan mahimo magiyahan sang Ginuo sa pagpabakod sang mga lamharon.
Ang bilog nga ward mabugayan kag mapabakod kon ang mga miyembro magtutok sa mga ulihing tubo. Sa pihak sang aton pagkadi-perpekto kag mga kakulangan, ang Amay nga Langitnon nagaagda sa tagsa sa aton, paagi sa pagpakig-upod sang Iya Espiritu, nga magdab-ot sa iban. Nakahibalo Sia nga nagatubo kita kag ginapakabalaan kon ginasunod naton ang mga pagpabatyag sang Balaan nga Espiritu. Indi importante nga ang aton mga pagpaninguha indi perpekto. Kon magpares kita sa Ginuo sa aton mga buluhaton, makasalig kita nga ang aton mga pagpaninguha magasanto sa Iya gusto himuon para sa mga lamharon.
Sa pagsunod sang giya sang Balaan nga Espiritu sa pagdab-ot sa mga lamharon, mangin mga saksi kita sang gugma sang Amay nga Langitnon sa ila mga kabuhi. Ang pag-akto sa mga pagpabatyag sang Ginuo nagapauswag sang mga relasyon sang gugma kag pagsalig. Ang mga relasyon sa kabuhi sang mga lamharon amo ang may pinakadaku nga impluwensia sa ila mga pagpili.
Matun-an sang mga lamharon ang sulundan sang rebelasyon sa ila pagpartisipar upod sa aton sa proseso sang pagpangita kag pag-akto sa mga pagpabatyag nga mag-alagad sa iban. Sa pagdangop sang mga lamharon sa Ginuo para sining inspirado nga paggiya, ang ila mga relasyon kag pagsalig sa Iya magadalom.
Ginapahayag naton ang aton kompiansa sa mga lamharon paagi sa paghatag sang suporta kag paggiya, nga wala sila ginakontrolar. Sa pag-atras naton agud tugotan ang mga lamharon nga magtuon paagi sa pagkonsultahanay, magpili sang inspirado nga alagyan, kag ibutang ang ila mga plano sa buhat, makaeksperiyensia sila sang matuod nga kalipay kag pag-uswag.
Si Pangulong Henry B. Eyring nagtudlo nga “ang pinakaimportante amo ang kon ano ang matun-an nila halin sa [inyo] parte sa kon sin-o gid sila kag kon mangin ano gid sila. Ang pakot ko amo nga indi nila ini matun-an kaayo sa mga leksyon. Maagom nila ini halin sa mga balatyagon kon sin-o kamo, sin-o sila sa inyo pamatyagan, kag kon ano sa banta ninyo mahimo sila nga mangin.”
Nagadayaw kita sa aton mga lamharon sa ila kaisog, pagtuo kag mga abilidad. Sa ila pagpili nga mangin mapisan nga mga disipulo ni Jesucristo, ang Iya ebanghelyo magapabilin sa ila mga tagipusuon. Ang pagsunod sa Iya mangin kabahin kon sin-o sila, indi lang butang nga ila ginahimo.
Si Helaman nagbulig sa lamharon nga mga Amonhon nga makita kon paano ang maisog nga disipulo ni Jesucristo nagakabuhi. Pwede kita mangin gamhanan nga ehemplo sa mga lamharon kon paano ang mga disipulo ni Cristo nagakabuhi sa karon. Ang matinuohon nga mga ginikanan nagapangamuyo para sining mga ehemplo sa kabuhi sang ila kabataan. Wala sing makabulos sa impluwensya sang mapinalanggaon, nagahimo-kasugtanan nga mga hamtong.
Bilang presidente sang korum sang mga priest, ang bishop makahatag sang ehemplo sa mga lamharon kon paano mangin tampad kag mapinalanggaon nga amay paagi sa pagprotekta, pag-aman, kag pagpamuno sa matarong nga mga paagi. Ang mga bishop, nga may “daw pareho sa laser nga pagtutok sa mga lamharon,” may impluwensia nga magaapekto sa madamo nga henerasyon.
Ang mga lamharon subong nalakip sa pinakadungganon nga mga espiritu sang Amay nga Langitnon. Nalakip sila sa mabakod nga mga tag-pangapin sang kamatuoran kag kahilwayan sa pagpili sa kabuhi antes sa duta. Natawo sila sa sining panahon agud tiponon ang Israel paagi sa ila gamhanan nga saksi sang Ginuong Jesucristo. Kilala Niya ang kada isa sa ila kag nakahibalo sang ila daku nga potensyal. Mapinasensyahon Sia samtang nagatubo sila. Tuboson Niya kag protektahan sila. Ayohon kag giyahan Niya sila. I-inspirar Niya sila. Kita, ang ila mga ginikanan kag mga lider, ginhanda agud suportahan sila. Ang Simbahan sang Manluluwas magabulig sa aton sa aton pagpadaku sang madason nga henerasyon.
Nagapamatuod ako nga ang Simbahan ni Cristo, nga ginpanumbalik paagi sa Propetang si Joseph Smith kag ginapangunahan subong ni Pangulong Russel M. Nelson, gin-organisa agud buligan ang mga lamharon nga matuman ang ila daku nga katuyoan sa sining ulihing mga adlaw. Sa ngalan ni Jesucristo, amen.