Ma Nuhkwewa Ac Wona Ke Srihpen Wuhlweacng In Tempuhl
Wacngihn ma yohk srihpac oacna karuhnguhnwacng wuhlweacng kowos oraclah ac e fah oraclah tempuhl.
Tamuhlwel ac tahmtahel sacohk wiuck, toeni ke jacnuhruhl kanfracns inge sruhluhkihn pacl muhtahl se nuh sihk. Nga srui ke pakpucki ngan sramsram nuh sin miliacn Mwet Luhlahlfongi ke Lwen-sahflah ac kawuck lasr raunweack facluh. Nga luhngse kom, ac nga etuh lah Leum el luhngse kom.
Ke yac 50-kuhtuh somlah, nga srui in kuhlwacnsap ekihn prestuhn ke Ricks College, e Rexburg, Idaho. Ke lututacng in Jun 5, 1976, nga ac muhtwacn kiuck, Kathy, kahsruhsr liki acn Rexburg nuh ke Tempuhl Idaho Falls in wi siling se luhn kawuck fototo se. Ahok pwacye, oasr tuhlihk mukul fuhsr ahkosr in lohm sesr ke pacl sac, fahsr nuh tempuhl lasr uh kuh in fahlac wo ke kahsruh wowo luhn to se! Kuht fihliac tuhlihk sacohk nahtuhsr inge in pahol ac oraclah kahsruhsr fototo sac, minit 30.
Ma kuht puhla ke lwen sac in tempuhl arulacna wo, oacna pacl nuhkwewa. Tuhsruhktuh, tukun sahflahiyen siling sac—ac ke kuht ahkolah in fohlohk nuh lohm ah—kuht akihlen lah mwet orekma ke tempuhl ac mwet kol elos sramsram in fosrngahlah ke acn in muhta ke tempuhl. Kihtin pacl na, sie mwet orekma ke tempuhl ah fahk nuh sesr lah Teton Dam ke lacfahl kuhtuhlacp Idaho ma tuhfwahna muhsahiucklac musahllah! Yohk liki 80 billion gallon (300 million cubic meters) ke kof sohrohrlah ke tacm sac nuh ke 300 square miles (775 square kilometers) ke infahlfahl an apkuhran. Inkaiyen siti fin acn Rexburg tuh an ye kof, wi lohm ac stosah ah pahtlah ke sronot. Luo-tahfuh tolu ke mwet 9,000 kitin pacl na wacngihnlac lohm se.1
Oacna ke kom petsacelah uh, nuhnak ac elyah lasr lihksrweni na forlah nuh ke sefti ac muhtwengacn tuhlihk sacohk nahtuhsr, siofok kuhtuh tuhlihk lutlut ke college ac mwet luti, ac mura se kuht luhngse yohk. Kuht fototo liki mael 30 (50 kilometers) liki lohm ah, ac ke len se inge, met likina cell phone ac text message, wacngihn inkacnek kuht in sa sruokyac tuhlihk nahtuhsr ah, kuht tiac pac kuh in oraclah kahsruhsr Idaho Falls fohlohk nuh Rexburg, oacna ke inkacnek nuhkwewa kauli.
Inkacnek sefanna pa kuht in muhta ke fong sac ke hotel se Idaho Falls. Nga ac Kathy tuhkweni sikuck muhtuhnte ke rum se ke motel lasr ah ac epahsrlah pahng nuh sel Pahpah Lucng nuh ke sefti luhn tuhlihk sacohk nahtuhsr ac tausin sahyac ma puhlakihn ongaiyac sac. Nga esam Kathy el foroht forma ke falfucl ah tang na ke lututacng ah, fosrngah ke tuhlihk nahtuhl ah. Finne oasr ma nga nuhnkuh sihk sifacna, nga tuh kuh in ahkmwesahsyelah insifuck ac toplac mutullac.
Tiac paht tohkoh ke kampacniacn sacohk ma pahtpaht se luhk ah okasyucyak ac fahk, “Hal, kom kuh kuh in mutul ke kain pacl se inge?”
Kahs inge tuhkuh arulacna kahlwem nuh ke insiuck ac nuhnak luhk uh. Nga akacsruhi nuh sin muhtwacn kiuck ah, “Kathy, tiac elyac lah mac sikyak, ma nuhkwewa wona ke srihpen tempuhl. Kuht orek wuhlweacng yurin God ac kuht siliyucki oacna sucu ma pahtpaht.”
Ke pacl sac, Nguhn luhn Leum ahkpwacyelah nuh insiacsr ac nuhnak lasr lah kuht kwewa etuh tari lah pwacye: akwuck ke siling, konweyuckyak in lohm sin Leum muhkwena ac karihngihnyuck sin wal suwohs luhn pristut, orekuhtweni oacna mukul tuhma ac muhtwacn kiac, ac tuhlihk nahtuhsr oayacpac siliyucki nuh sesr. Pwacyena lah kuht tiac enenuh in sahngweng, ac kuht srui lah kuht etwacack tok lah tuhlihk mukul nahtuhsr ah wona.
Sahp kahs lal Prestuhn Thomas S. Monson lihksreni ahkuhtweyac ma nga ac Kathy puhla ke fong se tiac kuh in muhlkihnyucklac. “Ke kuht wi nuh tempuhl, oasr kain ma luhn nguhn ac puhla luhn mihslac kuh in tuhkuh nuh sesr mihs. … Kuht ac kahlwem ke kalmeyac pwacye ke kahs luhn Mwet Lahngo ke El fahk: ‘Mihslac nga usot nuh sum, mihslac luhk nga usot nuh suwos. … Lwelah insiom in tiac fosrngah, kuh in tiac sahngeng.[John 14:27].’”2
Nga insewowo ke nga puhla mihslac pacl nuhkwewa nga utyak nuh ke tempuhl muhtahl. Nga esamwack lwen se emet nga utyak nuh ke Tempuhl Salt Lake. Nga tuh mukul fuhsr se.
Nga ngwetwack nuh lucng ac liye acn lucng fasrfasr ma oruh rum se arulacna kahlwem oacna inkuhsrao. Ac ke pacl sacn, nuhnak se tuhkuh nuh sihk ke kahs kahlwem inge: “Nga tuh oasr ke acn kahlwem se inge met.” Tuh oacyacpac tuhkuh nuh ke nuhnak luhk uh, tiac ke puhsrwek, kahs inge: “Moh, kom sonna tuhkuh nuh ke acn se inge. Kom esam pacl se met liki kom isuslac ah. Kom tuh oasr ke sie acn muhtahl oacna nge ma Leum El kuh in tuhkuh.”
Tamuhlwel ac tahmtahel, nga puhsisacl in fahkwack lah ke kuht som nuh tempuhl uh, kuht kuh in esamwack ke ohiyacn wolacna luhn nguhn lasr uh, kuhpahsr lasr nuh sel Pahpah ac Wen muhtahl Nahtuhl, ac kena yohk in fohlohk nuh ke acn sesr lucng.
Ke sramsram ke kanfracns tari ac, Prestuhn Russell M. Nelson el luti:
“Acn se ma sef emet nuh sum in nguhn pa in muhta na ke wuhlweacng lom ke tempuhl!”
Ma nuhkwewa kuht luhlahlfongi ac ma nuhkwewa ma God El olwelah nuh sin mwet wuhlweacng Lal tuhkweni lin tempuhl.”3
“Kais sie mwet ma oraclah olwelah la … lin tempuhl—ac karuhnguhnwacng—elos ahkyohkyelihk inkacnek nuh ke kuh lal Jisus Kraist.”4
El oacyacpac luti lah “ke kuht oraclah olwelah yurin God, kuht sislah ma kuht oruh met ne tok ma pahtpaht. God El ac tia sislah kuhpahsr Lal nuh selos suc oraclah kuhpahsr na oa nuh Sel uh. Pwacye lah, oasr inkacnek nuh ke luhngse ac pahkomuhta nuh selos nuhkwewa suc ma oraclah olwelah lalos nuh sin God.”5
Ye kolyuck wolacna lal Prestuhn Nelson, Leum El ahkpihsrpihsryeack, ac sifilpac ahkpihsrpihsrye, muhsah ke tempuhl uh raunweack facluh. Ma inge ac lwelah tuhlihk nuhkwewa nuhtin God in eis akwuck luhn molwelah ac moul ma pahtpaht yurin God ac in oraclah ac karuhnganwacng wuhlweacng muhtahl. Enenuh nuh ke oraclah wuhlweacng muhtahl uh tiac srihkeyuck pacl sefanna tuhsruhk ohiyac se inge ma nuh tok. Leum El fahk tari lah ac fah nwacklah insiacsr nohfohn, kuh, nuhnak, ac kuhiyacsr.6
Fususien kahsruh ke akwuck luhn tempuhl kuh in oraclah sie pactuhn in kihsackuhnlah nuh sin Leum. Ke kom liyacacng wuhlweacng lom tempuhl ac esamuhltahl, kom suli oasr luhn Nguhn Muhtahl in kwewana ahkkweye kom ac ahknwacsnwacsye kom.
Kom ac sahp puhlakihn sie puhla luhn kahlwem ac finsrak ahkkahlwemye lah olwelah inge ma pwacye. Kom fah etwacack lah olwelah nuhkwewa yurin God pa inkacnek se in fototo nuh Sel, suc ac fah oraclah kena se ke insiom in liyacacng wuhlweacng ke tempuhl.
Uliyuck nuh sesr tari, “Ke srihpen olwelah lasr nuh sin God, El ac fah tiac tohtohlah ke insacnweacng Lal in kahsrwe kuht, ac kuht ac fah tiac ahktohtohyelah pahkotwen mongfishrwacsr Lal nuh sesr.”7
Ma ke wuhlweacng ke siling lin tempuhl pa kuht kuh in eis etuh na pwacye muh kuhpahsr luhn sucu luhngse lasr ac som tukun kuht misac ac ne tok ma pahtpaht. Ahkfuhlwactye pahyuck ac wuhlweacng luhn sucu oreklac lin tempuhl luhn God fah kosrwaclos liki ma koluk ke nuhnkuh kac sifacna ac inse fuhlwact.
Oaru in liyacacng inmahsrlon tamuhlwel ac tahmtahel fah tuhkuh ke oaru insacnweacng in kol sucu lom an nuhke inkacnek luhn Leum. Sang pacl luhn tuhlihk srihsrik in pruhe ke kais sie sahyac. Sa in akihlen muhtwacwacack luhn amacin, ac etuh na suwohs orekma luhn akacsruhi, yohkna nuh sin sie sin sie. Ke tuhlihk wiac pruhe ke sie sin sie ac kahsruh elos ngiac, insiac fah fihsracsrlah ac forlah nuh selos sahyac ac pahpah ninac kiaclos.
Sie ip, pa ahkuhtweyucki sel Malachi ke el sruhmuhn kacl mwet pahluh Elijah: “Elac fah ukwiac ke insien tuhlihk wuhlweacng ma oreklac nuh sin pahpah tuhmwaclos, ac insiacn tuhlihk fah forlah nuh sin pahpah tuhmwaclos. Fin tiac ohinge, facluh nohfohn ac kuhnausyucklac ke tuhkuh Lal.”8
Ma upac, srihkeyuck, ac muhsahllah luhn insiac pwacyena fah tuhkuh nuh sesr nuhkwewa. Wacngihn sie sesr kosrweyucklac liki “ma ngal [luhn] ikwac.”9 Ne ohinge, ke kuht som nuh tempuhl ac esam olwelah lasr, kuht kuh in ahkolah in eis inkacnek lasr sin Leum.
Ke nga Kathy macruhtlac ac siliyucki ke Tempuhl Logan Utah ah, Elder Spencer W. Kimball pa tuh oruh siling sac. Ke kuhtuh kahs el sruhmuhn ah, el use kahs in kahsruh inge, “Hal ac Kathy, moul tuh ke oasr pahng tuhkuh, fihsrwacsr in som liki.”
Met na, kuht tiacna etuh lah mac kalmen kahsruh sac nuh sesr, tuhsruhk tuh kuht kampare in moulkihn moul lasr ke sie inkacnek in ahkoekuhtlac in kuhlwacnsuhpuh Leum ke pahng sac ac tuhkuh. Tukun kuht pahyuckyak apkuhran in yac 10, pahng se tuhkuh sin Commissioner of Church Education, Neal A. Maxwell.
Kahs in kahsruh luhn Prestuhn Kimball lin tempuhl in kuh in “fisrwacsr in som liki” tuh sikyak na pwacye. Nga ac Kathy eis pahng sac pa in som liki ma liyeyuck muh sie sucu engan se in kuhlwacnsap ke acn se nga tiac etuh kac. Ke ma inge, sucu lasr ahkolah in som ke srihpen sie mwet pahluh, ke sie tempuhl muhtahl, sie acn in fwackyuck, liye ma se ke pacl fahsruh ma kuht ahkolah kac.
Tamuhlwel ac tahmtahel sacohk wiuck, Nga fahkwack loh luhk lah wacngihn ma yohk srihpac sahyacn in ahkfuhlwactye olwelah kom oraclah kuh kom ac oruh lin tempuhl. Tiac elyah lah kom oasr oyac ke inkacnek luhn wuhlweacng, nga kwacfe kom in oruh kom in kuh in wi som nuhke tempuhl. Fahsri in fusus fin wacngihn ma sruok kom. Oraclah ac liyacacng wuhlweacng muhtahl yurin God. Nga kuh in ahkpwacye ma nga tuh akacsruhi nuh sel Kathy ke infulwen fong apkuhran in yac 50 somlah lin rum srihsrihk se motel Idaho Falls: “Tiac elyah ma ac sikyak uh, ma nuhkwewa ac wona ke srihpen tempuhl.”
Nga usot nuh sum luhlahlfongi pwacye luhk lah Jisus pa Kraist. El Moul ac kol Alu Lal. Tempuhl uh lohm sin Leum. Prestuhn Russell M. Nelson pa mwet pahluh moul luhn God fin facluh. Nga luhngse el, ac luhngse kais sie suwos. Ke ine muhtahl luhn Jisus Kraist, amen.