Wuhlweacng ac Kunohkohn
Alu luhn Jisus Kraist etweyuck muh sie alu ma lihksreni lohacng in oruh wuhlweacng nuh sin God.
“Alu lom uh siena fuhkah liki alu sahyac?” Top luhk nuhke kihsen siyuck yohk srihpac se inge eklac ke nga mahtuhyak ac Alu uh kapwack. Ke nga isuslac fin acn Utah ke 1932, pihsen mempucr ke Alu uh oasr ke 700,000 kuhtuh, inkaiyen mempucr inge muhta Utah ac stet fototo siskac. Ke pacl sac, oasr tempuhl 7. Misenge oasr million 17 yak mempucr ke Alu luhn Jisus Kraist luhn Mwet Luhlahlfongi Lal ke Lwen-sahflah fin acn 170 kuhtuh. Ke Eprel 1 ah, oasr tempuhl 189 ma tuh kihsackihnyucklac ke acn puhs ac tempuhl 146 sahyac srwack plwacniyuck ac muhsahiyuck. Nga mokleyuck in sramsramkihn srihpen tempuhl inge ac sramsram mahtuh ac kunohkohn ke wuhlweacng ke alu lasr uh. Ma inge fah wi mwe luti moklweyuck luhn mwet sramsram met.
I.
Wuhlweacng el olwelah se in ahkfalye kunohkohn. Olwelah lasr kais sie uh yohk srihpac nuh ke kolyacn moul lasr kais sie ac nuh ke mukwikwi luhn acn uh. Nuhnak se inge srihkeyuck ingena. U srihsrihk lain mwet kol ac ngihsre muh mwet uh in kuh in mwesahslah liki masap ma tulokihn sukohsohk lalos. Tuhsruhk kuht etuh ma sikyak ke yac pucspucs lah mwet fuhlweack kuhtuh sukohsohk lasr kais sie in eis ma wo ma tuhkuh ke muhta ke mura wowo. In fuhlweack sukohsohk luhn kais sie inge elos tuhkuh fal nuh ke olweacng kuh wuhlweacng, ma sruhmuhnyuck kuh oacna fahk na.
Kuhtuh inge mwe srihkasrak ke kunohkohn luhn wuhlweacng fin facluh: (1) mwet nuhnuhkuh, (2) solse, (3) taktuh, ac (4) firefighter. Elos nuhkewa suc wi oruh kain in orekma inge uh olwelah—elos oraclah fuhlahk kuh wuhlweacng—in oruh orekma lalos. Ma inge oacpacna orekma in misineri lasr. Nuknuk lalos siena ac tag ke inelos ahkkahlwemye nuh sin mwet sahyac lah elos oraclah wuhlweacng ac pwacnacng oasr orekma lalos in luti ac kuhlwacnsap. Srihpac na pwacye pa in ahkacsmakihnye mwet orekmakihn inge ke kunohkohn lalos ke wuhlweacng. Wacngihn mwenmwen ke siena luhn nuknuk kuh akucl an, mwe ahksacsmak muhkena ke kunohkohn sacohk luhn mwet orekmakihn an. Ma se inge pwacye pac ke mwe akucl ke ring in ngihsrwacllah kuh macruht ac ma kunac in ahkkahlwemye nuh sin mwet intei an kuh in ahkacsmakihnye mwet se orekmakihn an ke ma kunac ke wuhlweacng sacn.
II.
Kalmen fahk luhk ke wuhlweacng muh el pwelucng se orekmakihnyuck na sin kais sie fal nu ke wuhlweacng ke luhlahlfongi lalos. Pwelucng ac sramsram mahtuh ke luhlahlfongi puhs ac ma enenweyuck nuh kac uh elos tuhkuh ke wuhlweacng. Sie pa, wuhlweacng lal Abraham uh yohk srihpac nuh ke facsin puhkantwen ke luhlahlfongi. Ma inge muhtwacwacack fahk ke nuhnak muhtahl ke wuhlweacng luhn God ma uliyuck nuh sin tuhlihk Nahtuhl. Wuhlweacng Mahtuh kwacna sramsramkihn wuhlweacng luhn God nuh sel Abraham ac fihtac lal. .1
Ip se met ke Puk luhn Mormon, sihmlac ke we luhn Wuhlweacng Mahtuh, ahkkahlwemye in kahlwem kunohkohn ke wuhlweacng ke sramsram mahtuh ac alu luhn mwet Israel. Tuh fwack nuh sel Nephi ma lah mwet Israel ke pacl sac pa “sie ma sihmlac ke mwet Jew, ma nwacnwack wuhlweacng luhn Leum, ma El oraclah nuh sin mwet Israel.”2 Puk ke Nephi kwacna sramsramkihn wuhlweacng lal Abraham3 ac nuh sin mwet Israel ah muh elos,“mwet wuhlweacng luhn Leum.”4 Orekmakihnyacn wuhlweacng nuh sin God kuh mwet kol ke alu uh sihmlac oasr ke Puk luhn Mormon ke sramsram lal Nephi, Joseph fin acn Egypt, Tohkohsrah Benjamin, Alma, ac Captain Moroni.5
III.
Ke tuhkuh pacl in Fohlohkyak luhn wosasuc fohnlah luhn Jisus Kraist, God El pahngon mwet pahluh se, Joseph Smith. Kuht tiac etuh kwena koanon mwe luti ma lipufacn Moroni el sang nuh sin mwet pahluh fuhsr se. Kuht etuh lah Moroni el ahkuhtweyac lah oasr orekma God El ahkolah [elan] oruh ac lah fohnlah luhn Wosasuc ma pahtpaht enenuh in fohlohkyak, weacng pacna olwelah oreklac nuh sin pahpah.6 Kuht etuh pac muh mukul fuhsr Joseph el riti ma suhmuhslah inge ke kuh—met liki sapkihnyuck elan sramtweack alu se—pa mwe luti puhs ke wuhlweacng el luhngaslah ke Puk luhn Mormon. Puk sacn pa akucl yohk se ke Fohlohkyak ke fohnlah luhn wosasuc, weacng pac plwacn luhn God nuh sin tuhlihk Nahtuhl, ac Puk luhn Mormon nwacnwaclah ke mwe kahsruh in ahkuhtweyac wuhlweacng inge.
Ke srihpen el riti Bible uh, Joseph el etuh ke puk luhn Hebrew luti ke plwacn luhn Mwet Lahngo in “oakiya sie wuleang sasu yurin mwet Israel, ac yurin mwet Judah.”7 Puk Hebrew el oacyacpac sruhmuhn muh Jisus pa “mwet akiwe su oakiya wuleang sasu.“8 Yohkna, sruhmuhnyuck ke bible moul in kuhlwacnsap luhn Mwet Lahngo suc pahngpahng “Wuleang Sasu,” oacpacna “Wuhlweacng Sasuc.“
Wuhlweacng pa pwelucng ke Fohlohkyak luhn wosasuc. Pwacye pa inge step omet ma Leum El sapkihn nuh sin Mwet Pahluh in oruh in oraclah Alu Lal. Ke Puk luhn Mormon tuhfahna in luhngasyucklac, Leum El kol muhsaheack Alu fohlohkyak Lal, suc tok pahngpahng Alu luhn Jisus Kraist luhn Mwet Luhlahlfongi Lal ke Lwen-sahflah.9 Fwackyuck sihmlac ke Eprel 1830 fahk lah tukun mwet uh eis loh (kalmac pa fahklah ke inse pwacye) muh elos auliyak na pwacye ke ma koluk lalos, ac kena eis nuh faclos inen Jisus Kraist, oaru in kuhlwacnsuhpwacl nuh ke sahflah.10
Fwackyuck se inge oacyacpac ahkkahlwemye lah Alu uh enenuh in muhta ohsun pwengana pacl in ipeis ke bred ac wine [kof] in esam Leum Jisus. Ma yohk srihpac ke akwuck se inge ahkpweyeiyuck ke kahs luhn wuhlweacng ma fwack sin elder kuh prist ma ahkfahsrye an. El ahkinsewowoye puhret nuh sin “mwet nuhkewa suc ipeis kac … , tuh elos … ahkkahlwemye nuh Sum, O God, Pahpah Ma Pahtpaht, tuh elos insese in eis nuh faclos inen Wen nuhtum, ac esamuhl pacl nuhkwewa, ac liyacacng masap Lal ma El tuh sang nuh selos.”11
Ip yohk srihpac luhn wuhlweacng ke Alu fohlohkuhnwack sasuc se in ahkacsmakihn ke kahs emet ma Leum el use ke puk emet luhn mwe fwackyuck Lal. Ingoh Leum El fahkwack lah El pahnglol Joseph Smith ke srihpen mwet fin facluh som liki akwuck Lal, ac kuhnahoslah wuhlweacng kawihl Lal.12 Fwackyuck se inge ahkkahlwemye lah masap Lal ituckyang in muh akwucki wuhlweacng ma pahtpaht Lal.13
Misenge kuht kahlwemwack ke kunohkohn luhn wuhlweacng ke Alu fohlohkihnyuckyak ac alu luhn mempucr kac an. Prestuhn Gordon B. Hinckley el sruhmuhn ahkfototoye usren pacptaislac lasr ac ipeis ke kuhfa luhn Leum pengana wik lasr: Mempucr nuhkwewa ke Alu uh suc ilyang nuh ke kof in pacptais an elos ilyang nuh ke wuhlweacng muhtahl se. Pacl nuhkwewa kuht ipeis ke sackramacn luhn Leum, kuht sifil ahksasucye wuhlweacng se ingacn.14
Kuht akacsmakihnyeyuck ke mwet sramsram ke toeni se inge lah Prestuhn Russell M. Nelson el kwacna sruhmuhn lah plwacn in molwelah pa “inkacnek ke wuhlweacng” ma “kol kuht nuh yohrohl [God]“, ac “kuhpahsr lasr nuh sin God.”15 El luti ke yohk srihpen olwelah lasr ke akwuck luhn tempuhl ac kwacfe kuht in liye sahflahiyac uh ke muhtacwacackiyacah ac in “motko ke celestial.”16
IV.
Ingena nga sramsramkihn wuhlweacng tempuhl. In ahkfalye kunohkohn lal in fohlohkohnwack fohnlahiyacn wosasuc luhn Jisus Kraist, mwet pahluh Joseph Smith el orekma upac ke yac sahflah ke moul lal in kol muhsah ke tempuhl Nauvoo, Illinois. Kacl Leum el ahkkahlwemye mwe luti muhtahl, mwe luti suwohs, ac wuhlweacng nuh sin mwet kol tok in orekmakihn lun tempuhl. Loac mwet ma e eis mwe sang muhtahl lutiyuck ke plwacn in molwelah luhn God ac suli in oruh wuhlweacng muhtahl. Elos suc moul in suwohs fal nuhke wuhlweacng lalos fah eis moul ma pahtpaht, pwacnwacng ma nuhkwewa ma lalos ac elos fah muhta yurin God ac Kraist Lal nwe tok ma pahtpaht.18
Toeni in eis mwe sang muhtahl lin Nauvoo Temple ahkfahsryeyuck met liki na mwet mahtuh lasr ah lihlihlyak ac muhtwacwacack oruh fuhfahsryucsr lalos nuh fin finohl ke acn Rohtoh. Puhs luhlahlfongi kuht eis yurin mwet mahtuh inge lah kuh ma elos eis ke elos sie lac nuh sin Kraist ke elos eis mwe sang muhtahl lalos Nauvoo Tempuhl ah ahkkweyaclos in ahksahfyelah fuhfahsryucsr lalos and sokwack acn wowo Rohtoh.19
Mwet suc eis mwe sang muhtahl lun tempuhl enenuh in nokomwacng tempuhl karmacn, nuknuk se tiac kuh in liyeyuck ke srihpen afyucfi. Ahkacsmakihnye mempucr ma eis mwe sang muhtahl lalos ke wuhlweacng muhtahl elos oraclah ac mwe insewowo ma uliyuck nuh selos lun tempuhl muhtahl. In eis srihpac muhtahl inge, lutiyuck kuht in nukum tempuhl karmacn pacl nuhkwewa, sahyacn pacl kuht tiac kuh in oruh. Ke srihpen wacngihn pacl in sislah wuhlweacng muhtahl uh, fin kuht sislah karmacn uh kuht lahfwekihn kunohkohn luhn wuhlweacng ac mwe insewowo kac. Likina, mwet suc oaru in nukum tempuhl karmacn lalos ac karihngihn wuhlweacng elos oraclah tempuhl kalweni in ahkpwacyei lah elos mwet tuhma lutlut luhn Leum Jisus Kraist.
Alu luhn Jisus Kraist luhn Mwet Luhlahlfongi Lal ke Lwen-sahflah muhsahi tempuhl fin facluh nohfohn. Srihpac lalos uh pa in ahkinsewowoye tuhlihk wuhlweacng nuhtin God, ac ke kunohkohn muhtahl ac kuh ac mwe insewowo ma pahtpaht ma elos eis ke wuhlweacng.
Alu luhn Jisus Kraist etweyuck muh sie alu ma lihksreni lohacng in oruh wuhlweacng nuh sin God. Wuhlweacng uh kapsreni na nuh ke kais sie akwuck luhn molwelah ac moul ma pahtpaht yurun God ma Alu fohlohkihnyuckyak se inge oruh uh. Akwuck ac wuhlweacng ke pacptais enenweyuck in ilyak nuhke tohkohsrahi celestial. Akwuck ac wuhlweacng luhn tempuhl enenweyuck in eis moul ma pahtpaht yurin God ke tohkohsrahi celestial, suc pa moul kawihl, mwe sang yohk emet luhn God.19 Pa srihpen Alu luhn Jisus Kraist luhn Mwet Luhlahlfongi Lal ke Lwen-sahflah.
Nga fahkwack kacl Jisus Kraist, suc pa sifen Alu sacn, ac ngihsre mwe insewowo Lal nuh selos nuh kwewa suc karihngihn olwelah muhtahl lalos. Ke inen Jisus Kraist, amen.