Luhlahlfongi Kuh luhn Jisus
Solsol luhk uh pa in orekma ingena in akiyac acn lom oacna sie suc puhlaik ke luhlahlfongi kuh luhn Jisus.
Ke 1832 [sie alfoko tolngoul luo], Joseph Smith ac Sidney Rigdon elos eis sie aruhruhma usrnguck ke inkacnek ma pahtpaht luhn tuhlihk nuhtin God. Aruhruhma se inge fahk ke tohkohsrahi tolu inkuhsrao. Prestuhn Dallin H. Oaks el sruhmuhn “tohkohsrahi wolacna” inge ke Ohktohpa somlah ah,1 fahk lah ke kuhtanglah ac wolacna luhn Lahm,2 nohfohn sahyacn mwet na ekahsr e fah som nuh ke sie sin tohkohsrahi inge, in fal nuh ke kena ma ahkkahlwemyeyuck ke sulaclah lalos.3 Plwacn luhn God ke molwelah uh nwacnwack pacl wo nuh sin tuhlihk nuhkwewa Nahtuhl, ke oacna sie pacl ac oacna sie acn ma elos muhta we fin facluh.
Wolacna luhn tohkohsrahi tolu inge, telestial suc srihk emet selos, ahluhkwelah kahlwem nuhkwewa [lasr],4 finsrak luhn Pahpah tuhmasr uh pa kuht in sulaclah—ac, ke kuhlwacng luhn Wen Nahtuhl, kuht wo fal nuh ke—tohkohsrahi se ma fuhlwact emet ac wolacna emet sin tohkohsrahi tolu inge, suc pa celestial, yac kuht kuh in insewowo ke moul ma pahtpaht oacna mwet usru wi Kraist.5 Prestuhn Russell M. Nelson el kwacfe kuht in “nuhnkuh ke tohkohsrahi luhn God,” in oruh tuh tohkohsrahi luhn celestial in pa finsrak ma pahtpaht se lasr ac “nuhnkwelah ahkwoyac lah kais sie sulaclah [lasr] facluh inge ac fihlihkuhti oyac ke facl se tok uh.”6
Elos suc oasr ke tohkohsrahi luhn celestial uh pa elos suc eis luhlahlfongi kuh luhn Jisus, … suc pa mwet suc ahksuwohsyeyucklac kacn Jisus suc pa mwet ahkiwe ke wuhlweacng sasuc.7 Mwet muhta ke tohkohsrahi ahkluo, kuh terrestrial, elos ahkuhtweyucki muh wo, weacng mwet wowo fin facluh, suc lohsrlah ke kuhtasrihk luhn mwet uh. Ohiyac yohk se ma ahksrihkye an pa elos sepuhlaik ke luhlahlfongi kuh luhn Jisus.8 Siena liki, elos suc oasr ke tohkohsrahi telestial pa elos suc tiac eis wosasuc, tiac pac eis luhlahlfongi kuh luhn Jisus.9
Lohacng nuh kac lah ohiyacn mwet ke kais sie tohkohsrahi an pa elos kapsri fuhkah nuh ke “luhlahlfongi kuh luhn Jisus,” muhtwacwacack ke (1) insacnweacng yohk fahlac na ne ke (2) sepuhlaik fahlac na ne ke (3) sruhnga. Mukwikwi luhn kais sie mwet wiwi na ma finsrakkihnyuck ne tok ma pahtpaht ke pacl fahsruh lal an.
I.
Meac luhlahlfongi kuh luhn Jisus Kraist?
Mwe loh luhn Nguhn Muhtahl lah El pa Wen muhtahl nuhtin God, Messiah, ac Mwet in Molwelah. Luhlahlfongi kuh lal John lah ac ke muhtwacwacack ah Jisus El nuhna wi God, Suc tuh El pa Mwet Oraclah inkuhsrao ac facluh se, ac “kas se inge oasr yurin God, ac moul uh tuku liki Kas, ac moul se inge pa ase kalem nu sin mwet uh.”10 “Luhlahlfongi kuh luhn Mwet Sap ac Mwet Pahluh pa, … lah El misac, pihkihnyucki, ac sifilpac moulyak ke lwen ahktolu, ac sohwack nuh inkuhsrao.”11 Etwacack uh pa “wacngihn kuhtwena ine ma molwelah tuhkuh we me.”12 Sahflahiyac an, luhlahlfongi kuh, suc utuckuh sin Mwet Pahluh Joseph Smith pa El moul! … Lah El pa Wen Kuloh Sefanna nuhtin Pahpah—ke El, ac Kacl, ac Sel, facluh tuh oreklac, ac mwet we pa wen ac acn kuloh nuhtin God.13
II.
Sahyacn na luhlahlfongi kuh se inge pa kihsensiyuck se, meac kuht ac oruh kac?
Mwet usrui tohkohsrahi celestial elos “eis” luhlahlfongi kuh fohnlah luhn Jisus ke elos pacptaislac, eis Nguhn Muhtahl, ac kuhtanglah ke luhlahlfongi.14 Ip yohk luhn ma pwacye ke wosasuc luhn Jisus Kraist uh kol lah meac yohk srihpac ac sulaclah lalos. Luhlahlfongi kuh luhn Jisus ahkkahlwemyeyuck kac lah elos mwet fuhkah ac elos eklac mwet fuhkah. Srihpac lalos an pa luhngse muhtahl, “luhngse suwohs luhn Kraist.”15 Elos siihyac na in ukwe “fulatan woiyen moul suc oan in Christ.”15
Kuhtuh selos suc e fah sukokyak ke tohkohsrahi terrestrial elos oacyacpac eis ke luhlahlfongi kuh luhn Jisus, tuhsruhk elos akihlenyuck ke ma elos tiac oruh kac. Tiac puhlaik ke lohoh kacn Mwet Lahngo uh ahkkahlwemye lah tiac insacnweacng kuh tiac mokleyuck—lah “tia mihsrisr ku fol”17— in mwe srihkasrak, lah tiac oacna nuh sin mwet lal Ammon ke Puk luhn Mormon, suc tuh “etweyuck ke oaru lalos nuh sin God,.”18
Mwet oasr ke tohkohsrahi telestial pa elos suc forlah liki luhlahlfongi kuh luhn Jisus ac oacyacpac wosasuc Lal, wuhlweacng Lal, ac mwet pahluh Lal. Elos ahkuhtweyucki sel Abinadi muh “elos wacngihnlac fal nuh ke luhngse ac kena luhn moul in ikoac lalos; elos tiacna pahng nuh sin Leum ke paho pahkotwen Lal ahsroeyucklac nuh yohrohlos; tuh paho pahkotwen Lal ahsroeyucklac nuh yohrohlos, ac elos tiac.”19
III.
Meac kalmacn puhlaik ke luhlahlfongi kuh luhn Jisus?
Oasr kuhtuh top ma kuh in nuhnkweyuck in sang topuk kihsensiyuck se inge. Ngwac fahk kuhtuh. Puhlaik ke luhlahlfongi kuh luhn Jisus uh nwacnwack ahkmongoye ac ahkkweye luhlahlfongi kuh sacn. Mwet tuhma lutlut pwacye uh tiac ahkmuhngmuhngye ma srihsrihk ma ahkkweye ac ahkfokokoye luhlahlfongi kuh luhn Jisus, ma oacna pruhe, lutlut ke ma suhmuhslah, liyacacng Sahpuht, ac ipeis kuhfa luhn Leum, auliyak, luti, ac alu ke lohm sin Leum. Prestuhn Nelson el ahkacsmakihnye kuht lah “arulacna pihsrpihsr, ke luhlahlfongi kuh se ma tiacna ahkmongoyeyuck pengana lwen ‘ke kahs wo luhn God’ [Moroni 6:4] ac kuh in muhkahlkahluh. Ohinge, … kuht enenuh ma puhlakihnyuck pengana lwen in kaksakihn Leum ac lutlut ke wosasuc Lal.” Na el tahfwelah fahk, “Nga kwacfe kowos in lwelah tuh God Elan kuhtanglah in moul lowos an. Sang nuh Sel pacl lowos an. Ke kowos oruh, akihlen ma wo sikyak ke mukwikwi luhng nguhn in kom.20
Puhlaik uh oacyacpac pa in sukohsohk ac tiac wukihn lohoh luhn kais sie. Ke pacptais, kuht ahkkweyelah insese lasr “in tu oacna mwet loh luhn God ke pacl nuhkwewa ac ke ma nuhkwewa, ac ke acn nuhkwewa ma [kuht] oasr we, finne ne ke misac.”21 Yohkna ke Istuh se inge, kuht engan, tiac wukihn, ac fahkwelihk loh lasr ke Kraist moul, suc sifilpac moulyak.
Sie ip ke puhlaik ke luhlahlfongi kuh luhn Jisus pa in lihpsre mwet us pweng Lal. God El tiac fohrsi kuht nuh ke inkacnek wo liki uh, inkacnek luhn wuhlweacng, tuhsruhk El sapkihn nuh sin mwet pahluh Lal in ahkkahlwemye nuh sesr ke mwactwacn sulaclah lasr. Ac tiac mempucr muhkwena luhn Alu Lal. Kacn mwet pahluh ac mwet sap Lal, El kwacfe ke luhngse nuh sin facluh nohfohn in lihpsre ma pwacye ma ac oruh elos in fihliyucklac,22 fuhlweloslac liki kweok, ac sang engan yohk nuh selos.
Kalmacn puhlaik ke luhlahlfongi kuh luhn Jisus pa in ahkkweye mwet sahyac, ke kahs ac orekma, in oacpacna in puhlaik, yohkna elos ke sucu lasr sifacna an. Elder Neal A. Maxwell el tuh fahk sie pacl ah lah mempucr ‘suwohswohs’ [luhn Alu uh] suc puhsrallah na fac ah likina in ahkkohnye lutlut lalos ac suc ana oruh likina in ‘kampare oruh’ [liye Doctrine and Covenants 76:75; 58:27].”23 Lihpsre lah mwet nuhkwewa sukohsohk in sulaclah, Elder Maxwell el fahk lah ma suhpwacr se lah ke kuhtuh sulaclah in alsruhngwesr, elos sulaclah tiac nuh selos muhkwena, tuhsruhk tuh nuh sin fihl se tok ah ac tohkoh pac. Ahklohsr srihsrihk luhn ninac pahpah an kuh in oraclah eklac yohk nuh sin tuhlihk nahtuhlos an! Fihlin fihl met ke sucu se sahp ahkkahlwemye insacnweacng, a kuhtuh ke fihl se inge ahkkahlwemye ahklohsr. Suhpwacr lah, ke fihl se tok uh, sahp kuhtuh ac sulaclah in akuhkuhin ke [elos] puhlakihn muhsahli la an.”24
Yac ekahsr somlah ah, Elder John H. Groberg el sruhmuhn sramsram soko ke sie sucu fuhsr suc muhta ke pracns srihsrihk se Hawaii ke muhtuhn yac 1900s ah. Elos mempucr luhn Alu uh yac luo ke sie sin tuhlihk muhtwacn nahtuhlos ah masack ac tiac ekweyuck mas lal an, ac el kauli hospital. Ke alu ah ke Sacnri tok ah, pahpah sac ac tuhlihk mukul se nahtuhl ah ahkoo kuhfa luhn Leum oacna ke elos oruh ke inkaiyen wik, tuhsruhk ke pahpah fuhsr sac sikuckmuhtuhnte in ahkinsewowoye pret, prestuhn luhn pracns, el akihlenwack kihtin pacl sac lah suc ke tepuh in kuhfa luhn Leum, na el tuyak ac salah, “Tui. Kom tiac kuh in kahl kuhfa luhn Leum. Tuhlihk muhtwacn se nuhtum ah mas sakihrihk. Silahklahk som ac siepac mwet sahyac an in oraclah pret sasuc nuh ke kuhfa luhn Leum. Kom tiac kuh in oasr inge. Som.” Pahpah sac lut ngwetwacng nuh sin prestuhn luhn pracns sac ac na nuh sin un mwet wi alu ah ac tuhfalwack, ac mwekihnlac ke ma inge kwewa, srihsrngi nuh sin sucu lal ah, ac elos mihslac tufoklac liki lohm in alu sac.
Tiac sie kahs fwacklac ke, suhpwacrlac, sucu sac fahsr sisken inkacnek ah som nuh lohm srihsrihk se selos ah. Elos muhta raunlac in lohm selos ah, ac pahpah sac fahk, “Nuhnakmuhnahs mihslac ne ke na nga ahkolah in sramsram.” Wen fuhsr sac motko lah meac elos e oruh in fohlohksahk ke mwekihnlac se lalos ah: yac elos e uniyac pik soko nuhtihn prestuhn luhn pracns sac, kuh fuhrreack lohm sel ah, kuh welah siepacna alu? Minit limekohsr, singucul, longoul-limekohsr somlah in mihslac.
Paho iseyucki se luhn pahpah sac muhtwacwacack in fihsrwacsruh, ac luhluhyak muhtahl ke sronin muhta. Ninac sac muhtwacwacack in tuhng, ac tiac paht na kais sie sin tuhlihk ah kahkahsrihk tuhng. Pahpah sac foracng nuh sin muhtwacn kiyacl ah ac fahk, “Nga luhngse kom,” ac na el kalweni kahs inge nuh sin kais sie sin tuhlihk nahtuhlos ah. “Nga luhngse komtacl nohfohn ac nga ke kuht in tuhkweni, ne tok ma pahtpaht, ekihn sucu se. Ac inkacnek sefanna an pa kuht nohfohn in mempucr wowo ke Alu luhn Jisus Kraist luhn Mwet Luhlahlfongi ke Lwen-sahflah ac siliyucki ke pristut muhtahl lun tempuhl. Alu uh tiac ma lal pracns prestuhn. Pa inge Alu luhn Jisus Kraist. Kuht ac tiac lwelah kuhtwena mwet kuh kuhtwena mwe ahkngal kuh ahkmwekihn kuh inse fuhlwact in tulokihn kuht liki tuhkweni ne tok ma pahtpaht. Sacnri tok uh kuht ac fohlohk wi alu. Kuht ac fah srwenglah muhta ne ke na mas se luhn tuhlihk muhtwacn se nahtuhsr inge etweyuckyak, tuhsruhk kuht e fohlohk.”
Elos tuh fohlohk, tuhlihk muhtwacn se nahtuhlos ah kwelac, ac sucu sac siliyucki ke Tempuhl Laie Hawaii ah ke muhsahiyucklac ah. Misenge, puhs liki mwet 100 pahngon pahpah tuhmwaclos an, pahpah mahtuh, ac pahpah tuhmwacn pahpah mahtuh muh el insewowo ke srihpen el siiyac na ma pahtpaht.25
Ip sahflah se ke puhlaik ke luhlahlfongi kuh luhn Jisus ma ngwac sruhmuhn uh pa srihke luhn kais sie sesr sifacna in muhtahl. Jisus El pa Mwet in Molwelah lasr,26 ac el kwacfe fahk, “Auliyak, kowos nuhkwewa fin facluh, ac tuhkuh nuh Yuruk ac pacptaislac ke Inek, tuh kowos in kuh in ahknwacsnwacsyeyucklac ke eisyacn Nguhn Muhtahl, tuh kowos in kuh in tulac nwacsnwacs ye muhtuhk ke lwen sahflah.”27
Mwet pahluh Mormon el ahkuhtweyac un Mwet Luhlahlfongi se suc insacnweacng na ke ohiyac se inge finne elos “sun ongaiyac yohk”28
“Ne ohinge elos tuh lalo ac pruhe pacl nuhkwewa, ac fokokoi na fokokoi ke insepuhsisacl lalos, ac fokokoi na fokokoi ke luhlahlfongi lalos ke Kraist, nuh ke nwacnwaclah luhn nguhnalos ke kaksak ac engan, ahok, finne ke ahknwacsnwacsyeyucklac ac ahkmuhtahlyeyucklac luhn insiaclos, ma ahkmuhtahlyeyucklac uh tuhkuh ke srihpen elos sang insiaclos nuh sin God.”29 Pa inge eklac yohk luhn insiac—in sang insiacsr nuh sin God ac sifilpac isuslac ke nguhn ke kuhlwacng luhn Mwet Lahngo—ma kuht suk uh.30
Solsol luhk uh pa in orekma ingena in akiyac acn lom oacna sie suc puhlaik ke luhlahlfongi kuh luhn Jisus. Oacna ke auliyak uh enenweyuck uh, “in tiac kotwaclah pacl in auliyak lowos,”30 tuh ke pacl se kowos tiac motko, summer ac somlah, ac sahflah pacl in kosrwacni, ac nguhnuwos tiac moliyucklac.31 Insacnweacng in liyacacng wuhlweacng lom yurun God. Nimet “ahkkuluk [ke] srihpen suwohswohs luhn kahs uh.”32 “Esam in sruokyacna ine [luhn Kraist] se ma kwacna sihmlac ke insiowos, … tuh kowos in [kuh in] lohng ac etuh puhsra se suc kowos fah pahngpahng kac, ac oacyacpac, ke ine se suc El fah pahngon kowos kac.”33 In ahksahfye, otwelah ma inge ke insiowos, tuh kowos in fah oruh ma suc [Jesus] El ac luti, ac sapkihn nuh suwos.35
Pahpah Tuhmasr El kena tuhlihk nuhkwewa Nahtuhl in Weluhl insewowo ke moul ma pahtpaht ke tohkohsrahi celestial Lal. Jisus El kweok, misac, ac sifilpac moulyak in oruh ma inge in kuh. El sowack nuh inkuhsrao, ac muhta ke lacpo lacyot luhn God, in eis sin Pahpah ke suwohs Lal ke pahkotwen Lal nuh sin tuhlihk nuhtin mwet.35 Nga pruhe tuh kuht nuhkwewa in ahkinsewowoyeyuck ke sie luhlahlfongi kuh ke Leum Jisus Kraist, in kaksak ac puhlaik ke luhlahlfongi kuh sacn, ac in engankihn fahko ke luhngkuhlwacng Lal pacl nuhkwewa ke moul lasr. Ke inen Jisus Kraist, amen.