Ma Kalweniyuck Fokoko, Suwohswohs ke Mwe Luti luhn Kraist

Sel Elder Dale G. Renlund

Ke U luhn Mwet Sap Singucul Luo

Nga suli kowos in muhta na ke mwe luti luhn Kraist pacl nuhkwewa ac muhsaheack ac kahsruh mwet sahyac ke fuhfahsryucsr lalos.

Yac ekahsr somlah ah, muhtwacn kiyuck, Ruth; tuhlihk se nahtuhsr, Ashley; ac nga tuh som wi mwet muhtwacta ah som kal ke kayak e Hawaii United States. Kayak uh oacna ak ma an e ten fototo nuh inkof ah, ma mwet kal el muhta ngwet nuh met ah ac orekmakihn oac ma oasr acn tuhpahsrpahsr luo ke kwewana muhta ah ac acn tok ke oac ah ac kal kwewana ke lacyot ac na ke lacsac. Plwacn an pa in kallah nuh ke fintuhka srihsrihk luo ma an fototo nuh pe acn Oahu na sifilpac fohlohk. Nga orek tuhngahk ke srihpen, ke nga tuh mukul fuhsr ah, nga tuh kal ke kayak ke luhluh luhlahp ke finohl ah. Wacngihn sie pacl luhkuhk uh el kohsrwacni ma wo, pwacye?

Mwet se pwen kuht ah luti kuht ac uskuhtlac in liye kayak ma kuht ac orekmakihn inkof ah. Siena atac ah liki na ma nga orekmakihn kalkal kac met ah. Ma se nge nga enenuh in muhta fin kayak ah, likina in muhta ten loac. Ke nga sroacng nuh fin kayak sac, nga langihrngngihryak ke nga muhta fuhlwact lucng liki ma nga pahlah kac, ac nga muhta fac rengreng inkof ah.

Ke kuht oacyak ah, nga kal pihsrpihsr luhkwel Ruth ac Ashley. Tukun puhlan pacl se nga loeskalah oasr met ah luhkweltahl. Finne nga kaksakihn pihsrpihsr in kal luhk, nga tui tilac kal ac sanwelos in sunyuc. Noa luhlahp se—yohk oacna inge, sahp centimeter 13¹—fuohf na ke sisken kayak se luhk ah ac nga mai mayak pihnpihnlac na inkof ah. Ke pacl se nga kuh in mayak ke kayak sac ac tikuclkucl in sroacng nuh fac ah, Ruth ac Ashley pahsiyuclac, tuhsruhk nga arulacna ullac in sifilpac muhtwacwacack kal. Met liki nga kuh in monglac mongmong, noa se sahyac, ma se inge arulacna fuhlwact—yohk oacna inge, centimeter 20 ma²—fuohf ke kayak se luhk ah ac nga pihnpihnlac kac. Ke pacl se nga mayak nuh lucng ke kayak sac, nga arulacna mahlwack oruh nga fosrngahlah muh nga tiac kuh in fanyak nuh fac.

Liyeyucyak, mwet se pwen kuht ah kalma nuh yuruk ac sruokyac kayak se luhk ah, oruh fihsrwacsr nuh sihk in fanyak nuh fac. Ke el liye lah nga srwackna arulacna mahl in sifacna kal, el kapriyac sucl soko nuh ke kayak luhk ah ac muhtwacwacack kal, ulyuc tohkohl. Tiac paht na nga tilac mahl ac muhtwacwacack sifacna kal. El tuhlweyac sucl soko ah, ac nga oraclah sun fintuhka se met ah, tiac sulpac enenuh kahsruh. Ke nga fihli ah, nga puhtatyang nuh fin puhkpuhk ah, ullac.

Tukun u sac monglac tari, mwet se pwen kuht ah mahmah fahk nuh sihk, “Mr. Renlund, kom fin kal, oruh kal lom an in fwel oacna sie, nga motko tuh kom wo na.” Nga ukwe kahs in kahsruh lal ke kuht kallah nuh ke fintuhka ahkluo sac ac fohlohk nuh ke acn se ma kuht tuh muhtwacwacack we ah. Pacl luo, mwet se pwen kuht ah kalma siskuck ac fahk nuh sihk lah nga arlac wo! Finne ke noa luhlahp fungul sisken kayak se luhk ah, tuhsruhk nga tiacna langlah.

Ke [nga] kal fwel ke kayak ah, nga ahkwot nuh met, ahkfihsrwacsrye usren noa ma srihngihl sisken kayak ukohk ah. Ip se pac na inge fal nuh ke moul in nguhn lasr uh. Kuht oasr in sensen ke kuht kahkahsrihki ac yohk na ke kuht tui uh.³ Fin kuht oruh ma nguhnnguhn pacl nuhkwewa ke sikalweni in “kal” nuh yurun Mwet Lahngo, kuht sef liki met ah ac karihgnihnyuck yohk ke srihpen moul ma pahtpaht lasr uh wiwi na luhlahlfongi lasr in El.⁴

Moul nguhnnguhn pacl nuhkwewa uh oreklac ke lusen moul lasr ke kuht sikalweni in apihsyac mwe luti luhn Kraist.⁵ Ke [kuht] oruh ohinge, Prestuhn Russell M. Nelson el luti, ac oraclah sie “ma kalweniyuck fokoko, suwohswohs.”⁶ Pwacye lah, ip yohk ke mwe luti luhn Kraist—suc oacna luhlahlfongi ke Leum Jisus Kraist, auliyak, ilyak nuh ke wuhlweacng nuh sin Leum ke pacptais, eis mwe sang luhn Nguhn Muhtahl, ac muhtweng ne ke sahflah⁷ma inge tiac luhmweyuck in puhlakihnyuck pacl sefanna. Yohkna, “muhtweng ne ke sahflah” uh tiac siepacna step ke mwe luti luhn Kraist—oacna in muh kuht ahksahfyelah ip ahkosr emet an ac na [kuht] fungyang, ngalisyac wihsesr, ac sano in misac. Moh, muhtweng ne ke sahflah pa in sikalweni na in oruh ip sahyac ke mwe luti luhn Kraist, in oraclah “ma kalweniyuck fokoko, suwohswohs” ma Prestuhn Nelson el ahkuhtweyac ah.⁸

Kalmacn repeatedly pa kuht puhlakihn ip yohk ke mwe luti luhn Kraist pacl nuhkwewa in moul lasr uh. Kalmacn iteratively pa kuht muhsaheack ac ahkwoyelah ke kais sie pacl kuht kalweni in oruh. Finne kuht kalweni ip yohk inge, kuht tiacna oruh na oruh ke wacngihn srihpac. Tuhsruhk, kuht fototoyang nuh yurun Jisus Kraist ke kais sie pacl [kuht] kalweni na.

Ahkfahsrye uh enenuh in kwewana pihsrpihsr ac in oasr kolyuck kac.⁹ Fuhnuh nga sang kuhiyuck kal pihtucklac som liki acn kuht som nuh we uh, kal pihsrpihsr, luhkuhn ngac tiacna sun acn ma kuht fahsr nuh we uh. Oacpacna, ke moul uh, kuht enenuh in “kal” nuh yurun Mwet Lahngo in tuhkuh nuh Yohrohl.¹⁰

Luhlahlfongi lasr ke Jisus Kraist enenuh in ahkmongoyeyuck lwen nuhkwewa.¹¹ E ahkmongoyeyuck ke kuht pruhe lwen nuhkwewa, lutlut ke ma suhmuhslah lwen nuhkwewa, nuhnkuh ke wolacna luhn God lwen nuhkwewa, auliyak lwen nuhkwewa, ac ukwe pihrihkyuck luhn Nguhn Muhtahl lwen nuhkwewa. Oacna ke tiac wo nuh in mahno ke suhkwac mongo ne ke na sun Sacnri na kain mongo kanglah kwewa mwe ahkmongoye mahno, tiac wo in kihnsrihk ke mwe ahkkweye luhlahlfongi-kuh lasr ke lwen sefanna ke wik se.¹²

Ke kuht eis nuh facsr luhlahlfongi kuh lasr sifacna,¹³ kuht kapkapwack ke nguhn ac kais kuhtuh na akiyac pwelucng in luhlahlfongi ke Jisus Kraist, ac mwe luti luhn Kraist e eklac yohk srihpac nuh ke srihpen moul uh.¹⁴ Kuhiyac an oacpacna fokokoi ke kuht srihke in ahkos masap luhn God ac auliyak. Auliyak uh mwe engan se ac e lwelah kuht in etwaclah ke tahfonglac lasr, pa inge ohiyacn kapkapwack lasr nuh tok ma pahtpaht. Oasr pacl kuht e lwenglah ke kayak lasr uh ac kuht moti ke inkof loal. Ke auliyak, kuht kuh in sifilpac sroacng nuh fac ac ahkwot, macnsiskihn lah pacl ekahsr kuht puhtatlac.¹⁵ Ma yohk srihpac se kac an pa kuht in tiac fuhlweack.

Sie pac ip ke mwe luti luhn Kraist an pa pacptais, ma nwacnwack pacptaislac ke kof ac, ke ahkkweyelah, pacptaislac ke Nguhn Muhtahl.¹⁶ Pacptais uh orek pacl sefanna, kuht ahksasucye wuhlweacng ke pacptaislac lasr uh pacl nuhkwewa ke kuht ipeis kuhfa luhn Leum. Kuhfa luhn Leum tiacna ahollah pacptais, tuhsruhk e kuhpahsreni ip inge ke luti luhn Kraist—luhlahlfongi ac auliyak—nuh ke eisyacn Nguhn Muhtahl.¹⁷ Ke kuht motko ac ipeis ke kuhfa luhn Leum, kuht suli Nguhn Muhtahl nuh ke moul lasr uh,¹⁸ oacna ke kuht tuh pacptaislac ac ahkkweyeyucklac ah.¹⁹ Ke kuht karuhnguhnwacng wuhlweacng ma ahkuhtweyucki ke pruhe in kuhfa luhn Leum, Nguhn Muhtahl e wi kuht.

Ke Nguhn Muhtahl mokle kuht yohk in moul lasr uh, kuht kais kuhtuh kapwack ac wolac ke kuht oruh ohiyac wo luhn Kraist. Eklac insiacsr. Kena lasr in oruh ma koluk uh srihkeni. Kena lasr in oruh ma wo uh yohkwaclihk ne ke na kuht kena “tahfwelah in oruh wo.”²⁰ Ac ohinge kuht kuh in eis kuh inkuhsrao ma enenweyuck in muhtweng ne ke sahflah.²¹ Luhlahlfongi lasr yohkwaclihk, ac kuht ahkolah in sifilpac oruh ma kalweniyuck fokoko, suwohswohs.

Ahkwot nuh met ke nguhn uh oacyacpac pahtok kuht in oruh kuhtuh pac wuhlweacng nuh sin God ke lohm sin Leum. Puhs wuhlweacng ma ahkfototoye kuht nuh yurun Kraist ac kuhpahsr kuht yang in fokoko liki na met ah nuh Sel. Ke wuhlweacng inge, kuht mwesahs in eis kuh Lal. In kahlwem, olwelah luhn pacptais ac tempuhl tiac, ma kaclos sifacna, mwe sang kuh se. Kuh tuhkuh sin Leum Jisus Kraist ac Pahpah tuhmasr Inkuhsrao. Oraclah ac karihngihn olwelah oraclah ohiyac lah kuh Lalos tuhkuh nuh moul lasr. Ke kuht moul fal nuh ke wuhlweacng inge, kuht kais kuhtuh na eis usru ke ma nuhkwewa luhn Pahpah Lucng.²² Usrwen ma oreklac ke [kuht] muhta na ke mwe luti luhn Kraist an tiac ahkfokokoye muhkwena eklac ke ohiyacsr nuh ke acn kuht finsrakkihn ne tok ma pahtpaht, tuhsruhk e oacyacpac mokle kuht in kahsruh mwet sahyac ke ohiyac fal.

Nuhnkuh kac lah mwet se pwen kuht ke kal sac el kahsreyuc fuhkah tukun nga renglah ke kayak sac. El tiacna wowoyak e lacah me siyuck kihsensiyuck wacngihn srihpac ma oacna, “Mr. Renlund, meac kom oruh inkof an?” El tiacna kalma ac muhlat nuh sihk, fahk, “Mr. Renlund, ac tiac sikyak ohinge nuh sum kom fin fokoko in mahno.” El tiacna muhtwacwacack ul kayak soko luhk ah ke nga srihke in fanyak nuh fac ah. Ac el tiacna ahkpwacyeiyuc ye muhtuhn u sac. Tuhsruhk, el kahsreyuc ke pacl se nga enenuh kahsruh. El use kahs in kahsruh ke pacl nga lohng. Ac el sikalweni na in ahkkweyeyuc.

Ke kuht kuhlwacnsuhpuh mwet sahyac, kuht tiac enenuh in kihsensiyuck wel kuh fahk ma ma kahlwem tari. Inkaiyacn mwet ma tihkuclkucl uh etuh tari lah elos tihkuclkucl. Kuht tiac enenuh in nuhnuhnkuh; nuhnuhnkuh lasr uh e tiac kahsruh kuh tiac ngihsreyuck, ac inkaiyacn pacl uh tiac pwacye.

Akaci kuht sifacna nuh sin mwet sahyac uh kuh in kol kuht lac in oraclah tahfonglac yohk, yohkna fin kuht motko muh kuht suwohs liki elos suc tihkuclkucl. Kain atac se inge oacna ke walomlah wacngihn finsrak ke mita na tolu²³inkof ah, liye mwet sahyac walomlah ke mita na ahkohsr²⁴inkof ah, nuhnuhnkwacl muh el mwet koluk liki [kom], ac yuckihn kom sifacna. Ke pwacye, kuht nohfohn tahfonglac sifacna pac. Wacngihn kuhtwena sesr eis tari molwelah uh.²⁵ Kuht tiac kuh. Jacob, ke Puk luhn Mormon, el luti, “Esam, tukun [kuht] fohlohkyang nuh yurun God, tuh ke luhng kuhlwacng luhn God muhkwefanna tuh [kuht] moliyucklac.”²⁶ Kuht nuhkwewa enenuh Iwaclah ma pahtpaht luhn Mwet Lahngo, tiac kihtin ip na.

Kuht enenuh pahkotwen, pahkomuhta, ac luhngse kwewa lasr ke kuht sramsram nuh selos suc oasr siskacsr.²⁷ Elos suc tihkuclkucl “enenuh in puhlakihn luhngse suwohs luhn Jisus Kraist in kahlwem ke kahs ac mukwikwi [lasr] uh.”²⁸ Ke kuht luti, kuht ahkkweye mwet sahyac pacl puhkantwen ac sang kahsruh. Finne oasr mwet tiac porongo, kuht tahfwelah na in luti oa ke elos lwelah. Mwet Lahngo El luti lah “nuh sin kain mwet se inge kowos fah tahfwelah in luti; tuh kowos tiac etuh fin elos fah fohlohk ac auliyak, ac tuhkuh nuh Yuruk ke inse pwacye, ac Nga fah unweloslac; ac kowos fah inkacnek in acse molwelah nuh selos.”²⁹ Orekma luhn Mwet Lahngo uh pa in unwelah. Orekma lasr uh pa in luhngse—in luhngse ac luti ke ohiyac ma oruh mwet sahyac uh in fototo nuh yurun Jisus Kraist. Pa inge se sin fahko luhn ma kalweniyuck fokoko, suwohswohs ke mwe luti luhn Kraist

Nga suli kowos in muhta na ke mwe luti luhn Kraist pacl nuhkwewa ac muhsaheack ac kahsruh mwet sahyac ke fuhfahsryucsr lalos. Nga fahkwack lah mwe luti luhn Kraist pa yohk srihpac ke plwacn luhn Pahpah Lucng; yohk liki nuhkwewa, pa inge mwe luti Lal. Ke kuht oruh luhlahlfongi lasr ke Jisus Kraist ac Iwaclah Lal, kuht fahsr nuh met ke inkacnek in wuhlweacng ac pihrihkyuck in kahsruh mwet sahyac in eklac mwet tuhma lutlut oaru luhn Jisus Kraist. Kuht kuh in eklac mwet usru ke tohkohsrahi luhn Pahpah Lucng, suc pa ma nwacnwack oaru in muhta na ke mwe luti luhn Kraist. Ke inen Jisus Kraist, amen.

Mwe Kahsruh

1. Apkuhran inches limekohsr.

2. Apkuhran inches alkosr.

3. Ke physics, mukwi = ma fohn se × muhiyac Ke kuht tui, muhiyac an pa sero. Ohinge, ma tuhkuh ke ma fohn se ac muhiyac an pa sero, finne kuht mukwi kuh finne ke oasr ma fohn se.

4. Liye Russell M. Nelson, “Kuh se ke Mukwikwi luhn Nguhn,” Liahona, Mei 2022, 98. Prestuhn Nelson el fahk, “Kuht sonna enenuh mwe mokleyuck wowo luhn nguhn yohk oacna kuht enenuh ingena uh.” Pa ingacn ohiyac wo se emt in mukwi “met finne … ke sahngweng ac ahlohloh.” Liye pac 2 Nephi 2:6–7; 9:23–24.

5. Russell M. Nelson, “Kuhtanglac Facluh ac Sokwack Monglac,” Liahona, Nov. 2022, 97.

6. Russell M. Nelson, “Kuhtanglah Facluh,” 97.

7. Pohloh kahs se “mwe luti luhn Kraist” uh kalmac uh oacna sie nuh ke pohloh kahs se “wosasuc luhn Jisus Kraist.” Liye 2 Nephi 31:2–21; 3 Nephi 9:14–22; 11:7–41; 27:1–21.

8. In som liki kuhtwena ip ke mwe luti luhn Kraist uh ahksuhmuhiyelah kuh tulokihnyac mukwi luhn nguhnasr. Liye 2 Nephi 28:30Alma 12:10–11Doctrine and Covenants 20:31–34;50:24.

9. Ke physics, mukwi = ma fohn se × muhiyac Muhiyac pa muhi weacng inkacnek luhn ma kolyuck luhn ma se. Muhiyac pa sie ohiyac ac oasr oasr inkacnek la.

10. Liye 2 Nephi 2:6–7; 9:23–24.

11. Liye Russell M. Nelson, “Kuh se ke Mukwikwi luhn Nguhn,” 99.

12. Liye Colossae 2:6–7.

13. Liye Russell M. Nelson, “Kutanglah Facluh,” 97. Kahlwem ke yohk srihpac luhn luhlahfongi yohk lasr ke karuhnguhnwacng mukwikwi luhn nguhn, pohloh kahs se inge sel Prestuhn Nelson tuh fwack kac sel Prestuhn M. Russell Ballard (liye “Fahsr tukun Jisus Kraist ke Falken Nien Luhlahlfongi,” Liahona, Nov. 2022, 35) and Elder Quentin L. Cook (liye “Oruh in Pwacye nuh sin God ac Orekma Lal,” Liahona, Nohfohmpuh. 2022, 120).

14. Liye “The Restoration of the Fulness of the Gospel of Jesus Christ: A Bicentennial Proclamation to the World,” Gospel Library; Russell M. Nelson, “A Plea to My Sisters,” Liahona, Nov. 2015, 97.

15. Liye Mosiah 26:30Alma 34:31Moroni 6:8Doctrine and Covenants 58:42

16. Liye 2 Nephi 31:13

17. Elder James E. Talmage el suhmuhslah muh ke lutlut lasr ke ip yohk ac akwuck luhn Wosasuc, oacna ke srihsrngiyucki ke Ip Yohk luhn Luhlahlfongi ahkahkosr, sifac se ke Kuhfa luhn Leum uh oruh kuht in lohacng, in akihlen akwuck se inge enenuh na kuht nuhkwewa suc welah mempucr ke Alu luhn Kraist ke ahkostwen ke ma enenweyuck ke luhlahlfongi, auliyak, ac pacptaislac ke kof ac ke Nguhn Muhtahl (Ip Yohk ke Luhlahlfongi12th ed. [1924], 171).

18. Liye Doctrine and Covenants 59:9

19. Liye Dallin H. Oaks, “Special Witnesses of Christ,” Ensign, Apr. 2001, 13; Liahona, Eprel. 2001, 14.

20. Mosiah 5:2

21. Liye, in mwe srihkasrak, 2 Nephi 31:2–213 Nephi 11:23–3127:13–21Moroni 4:35:26:6Doctrine and Covenants 20:77, 7959:8–9

22. Liye Doctrine and Covenants 14:784:33–38

23. Sahp feet 10.

24. Sahp feet 13.

25. Liye Ephesus 2:8–9

26. 2 Nephi 10:24

27. Prestuhn Jeffrey R. Holland el luti lah ke sie mwet kofkof ullac el srihke in fohlohk nuh pe acn uh, tukun el lain eng upac ac noa tuhyak ma el tiac enenuh in lain, kuhtuh sesr suc sahp nuhnuhnkuh wo liki, kuh sahp lucky liki na, tiac enenuh in kallah nuh siskacl, sang oac lasr uh onel, ac sifilpac pahtokyac insifacl nuh ye kof ah. Tiac pa ingacn ma oak uh oreklac nuh kac uh. Tuhsruhk kuhtuh sesr oruh ma ingacn nuh sin sie sin sie (“A Robe, a Ring, and a Fatted CalfBrigham Young University devotional, Jan. 31, 1984], 5, speeches.byu.edu).

28. Russell M. Nelson, “Peacemakers Needed,” Liahona, Mei 2023, 100.

29. 3 Nephi 18:32