14:14

Kapsreni Masap Wolacna Luo

Sel Elder Gary E. Stevenson

Ke U luhn Mwet Sap Singucul Luo

Kuhiyacsr in ukwe Jisus Kraist tuhkuh ke fokokoien kuh lasr ac kuh in moulkihn masap se met ac ahkluo in oacna sie ac insacnweacng sefanna.

Ikacslah

Ke nga ac muhtwacn kiuck Lesa forfor ke kunohkohn lasr fin facluh nohfohn, kuht srui ke inkacnek in ohsun lasr nuh suwos ke acn in toeni luhlahp ac srihsrihk. Inswacneacng lowos nuh ke orekma luhn Leum moklwekuhtyak ac tuyak ekihn mwet lohoh ke wosasuc luhn Jisus Kraist. Kuht fohlohk nuh lohm ah ke kais sie fahsr lasr inge nuhnkuh lah oacna kuht sang yohk oacna ma kuht eis.

Ke forfor inge, srihklac pacl lasr in intwe. Tuhsruhktuh, fin wolac ohiyac , nga sislah kihtin pacl ke ma se nga arulacna luhngse. Oasr luhngse se luhk ke kamtuh ac luhmahlah ac ohiyac usrnguck ke sohs uh. Mwe lut se nuh sihk pa sohs ma kuhpahsreniyucki uh. Lah Rainbow Bridge fin acn Tokyo, Tsing Ma Bridge fin acn Hong Kong, Tower Bridge fin acn London, kuh sohs sahyac nga liye, nga koflah in tiac tui ke nuhnkeyacn lahlmwetmwetiyacn mwet oraclah muhsahelah nuh ke kain in atac inge. Sohs uh us kuht nuh ke acn ma kuht koflah in som nuh kac. (Met liki nga tahfwelah sramsram luhk, Nga ke ahkkahlwemye lah ke pacl se ma ahkoeyucklac sramsram se inge, oasr acksitacn na upac se sikyak ke sohs fin acn Baltimore. Nuh selos suc ahsor ke wacngihnlac luhn sucu ac kawuck, kuht wi kowos ahsor.)

Sohs Fokoko Kahto Soko

Ke pacl fototo somlah ah, kunohkohn nuhke toeni luhlahp se usyuclac nuh California, suc nga tuh sulpac tuhpallah sohs soko oacna in Golden Gate Bridge, mwet se oraclah inge liye oacna ke el liye kahtoiyen facluh. Sohs soko inge oracni kahtoiyacn atac, srihpac nuh kac, ac luhmweyuck usrnguck. El sohs kuhpahsrweni na fokoko soko ma oasr tower kac, kapriyucki ke weah luhlahp. Yohkiyac, toasriyacn twin tower ma an fin kof inge pa ma tuh kamtuhiyucki e met ah. Ma luo inge tuhkweni karihngihn toasr ke pihsen weah ma som ac fahsriyacn weah ac sucl sahyac, suc karihngihn inkacnek ten ah. Fokokoiyac in sruokyac na— kuhiyacn tower sac— pa mwemwen se tuhkuh ke muhsahlah luhn sohs soko inge.

Petsac mahtuh ke sohs soko inge ke pacl met ah fahkwack luhlahlfongi ke ma pwacye ke suhmaht iyacn mwet oraclah inge. Kais sie ip ke sohs inge konwacack ma in kahsruh toasr ke tower oreklac inge, kwewana akacsruhi kuhpahsrweni nuh sie.

Ke pacl se ma sahflah, tower luo ingacn akiyucki ke acn la an, ac sucl kapihri ke pwelucng ke bedrock, tower luo ingacn sruhlwaclah sraol na kahto ac fokoko se.

Misenge nga suli kowos in liye sohs utuftuf soko inge— suc tower fuhlwact kac inge muhsahyak ke pwelung fokoko— ke inkacnek luhn wosasuc.

Ke apkuhran in sahflah moul lal Jisus Kraist, ke puhlan pacl se kuht pahngon misenge Wik Muhtahl, Pharisee se suc etuh masap uh¹siyuck sin Mwet Lahngo kihsen siyuck soko ma el etuh e upac in toplac:² “Mwet Luti, piac ma sap se ma yohk omeet ke Ma Sap uh?” Lawyer sac, “srihfe Jisus” ac suk sie top upac, suc srihke in ahktahfongyacllah, eis sie top lahlmwetmwet, muhtahl, ac wolacna sin Jisus Kraist.

“Ac Jisus El fahk, Kom fah luhngse Leum God lom ke insiom kwewa, ke nguhnum kwewa, ac ke nuhnkom kwewa.

“Pa inge ma sap se omeet ac yohk srihpac.” Lihpsre ke kuht kuhpahsri sohs, tower se met ah!

“Ma sap se akluo el oacna ma se meet an: ‘Kom fah luhngse mwet tuhlan lom oacna kom lungse kom sifacna.” Pa inge masap yohk se ahkluo!

“Ma sap nuhkwewa lal Moses ac mwe luti nuhkwewa luhn mwet pahluh oan ye ma sap luo inge.”³ Ip luhlah sahyac ke sohs soko ah!

Lwelah kuht in lohacng nuhke kais sie sin masap fuhlwact luo inge, ahkahlwemyeyuck ac sifwil fwacklac ke top lal Jisus Kraist. Ke kuht oruh uh, lwelah petsac se ke sohs fokoko askuhlacna sac in srwemlah ke nuhnak lom an.

Luhngse Leum

Ma se met, in luhngse Leum ke insiom kwewa, ke nguhnum kwewa, ac ke nuhnkom kwewa.

Ke top se inge, Jisus Kraist el lihklihkiyac ma enwenweyuck nuhke masap akwucki ke luti muhtahl ke Wuhlweacng Mahtuh. In luhngse Leum pa ma se e met insiom—keim sifacna. Leum el siyuck tuh kom in luhngse ke insiom kwewa⁴ —ma nuhkewa yurum— ac sahflah, in luhngse ke nguhnum kewa—etwacack ac lahlmwetmwet lom. Luhngse ke God wacngihn luhpah kuh sahflaiyac. El ma ne tok ac ma pahtpaht.

Nuh sihk, ma fihliyucki ke masap se met inge kuhtuh pacl uh tena orekmakihnyuck, oacpacna wacngihnlac finsrak. Kulohlacna, ke nga nuhnkuh ke kahs ma Jisus el sang nuh sin Mwet Tuhma Lutlut Lal ah, masap se inge oasr kalmeyac: “Kowos fin lungse nga, kowos liacacng ma sap luk.”⁵ Nga kuh in oruh ma se inge. Nga kuh in luhngse Pahpah Inkuhsrao ac Jisus Kraist, suc kol nuhke pruhe, lutlutkihn ma suhmuhslah, ac alu in tempuhl. Kuht luhngse Pahpah ac Wen ke kuht moli sie tahfuh singucul, ahkmuhtahlye lwen Sabbath, moulkihn moul nwacsnwacs ac suwohs, ac in ahkostwen.

Luhngse Leum el srihkweyucki ke orekma srihsrihk, fahsr ke inkwacnek in wuhlweacng: nuh sin mwet fuhsr, orekmakihn social media in muhsahi liki na in kuhnahoslah; som liki party, petsac, kuh mukwikwi ma luhlahlfongi lasr uh tiac fahsr kac; ahkahlwemye suhnak la nuh ke ma muhtahl.

Motko ke srihkasrak wowo se inge. Sacnri in lalo ke Vance⁶ac nga tongtong ke sruhnguhl ke sie lohm srihsrihk, muhkahimtacl se. Kuht ac tikin pac sahyac ke koruhm ah tuhkuh ac ahkolah in lohng kahs inge, “Nuhnak muhnahs utyak,” fwacklac ke puhsrwen kahs German yohk fal kuht in lohng tuhkuh ke sruhnguhl ah. Tahmtahel Muellar el sie sin katinmas puhs ma tuhkuh sahyac me oasr ke ward se inge. Upac nuh sel in ikacslah sruhnguhl ah, ke srihpen el ohkohk. Ke kuht utyak nuh lihn lohm lohsrlohsr sac, el paing kuht ke kihsensiyuhk kuhlwacng: Suc inewos uh? Kowos fuhkah? Kuh kom luhngse Leum? Kuht tohpkohllah ac ahkkahlwemye lah kuht tuhkuh in eis fast offering lal. Kuht finne fuhsr, kahlwem sesr kwacohiyacl, ac top lal suc yohk luhlahlfongi kac fakihsyac insiyacsr: “Nga fihliyac sacn singuhul se fin tepuh se ngoh ke litutacng ah. Nga arulacna srui kaksak in sang fast offering luhk. Kom kuh in nuhnak muhnahs sang nuhke sie acnfuhlop ah ac nwacklah risit luhk nuhke fast offering? Luhngse lal nuh sin Leum ahkweye luhlahlfongi lasr pacl nuhkwewa kuht som liki lohm sel ah.

Tohkohsrah Benjamin el olwelah kuh usrnguck nuh selos suc ahkos masap fuhlwact se omet inge. “Nga kena tuh kowos in motko ke mwe insewowo ac ohiyac engan lalos suc liyacacng masap luhn God. … Tuh liye, elos ahkinsewowoyeyuck ke ma nuhkwewa, kwewana ke ikoac ac nguhn; ac elos fin muhtweng in luhlahlfongi ne ke sahflah elos eisyuck nuh inkuhsrao … ke sie ohiyac engan wacngihn sahflahiyac.”⁷

Luhngse Leum kohllah nuh ke engan ma pahtpaht!

Luhngse Mwet Tuhlan Lom

Na Jisus el fahk, “Na ma se ahkluo ah oacpacna ma se meet an, Kom fah luhngse mwet tuhlan lom oacna kom luhngse kom sifacna.”⁸ Pa inge tower ahkluo ke sohs soko ah.

Inge Jisus el kapsrweni kena lasr nuh inkuhsrao, in luhngse Leum, wi kena lasr facluh, in luhngse mwet wiacsr. Sie in akacsruhi nuh sin mwet se sahyac ah. Luhngse Leum tiacna orekma kuht fin pihlwesruh mwet tuhlan lasr. Luhngse mwet tuhlan inge oracni kewa tuhlihk nuhtin God tiac elyah lah elos mukul kuh muhtwacn, ataclos, tuhnaclos, luhngse lalos, kahsruhpiaclos, matwaclos, kuh elos ma oyac. Kuht suk elos suc ngal ac muhsahllah, elos suc sriyucklac, tuh “mwet nuhkwewa oacna sie yurin God.”⁹ Kuht “ahkkweye elos suc muhnahs, sruhkwack nuh lucng paho ma ahtlah, ac ahkkweye niac ma muhnahslah.”¹⁰

Motko srihkasrak se inge; Tamuhlwel Evans¹¹ el lut ke pihrihkyuck el elan tulokihnyac stosah ukacl ah ac tongtong ke sruhnguhl luhn sie sucu el tiac etuh. Ke ninac katinmas oasr tuhlihk puhs liki 10 nahtuhl ikacslah sruhnguhl sac, elyah upac ac enenuh yohk lalos tuhkuh kahlwem nuh sel. Enenuh se emet ah fihsrwacsr, sruhlaclah lohm selos ah, suc tukun yac puhs oasr muhtwacta in walihl ac lutlut ke nguhn orek yurin sucu se inge.

Tok ninac se inge suhmuhslah kuloh lal ke kawuck se suhpweyuckme inkuhsrao ah: “Kom sislah moul lom in suk mwet ma srihk sesr. Fuhkah wolacnaiyac in lohng ma inge ke Leum El fahk nuh suwos ke El ahkahlwemye kuloh Lal ke ma wowo kowos oraclah ma tuhkuh ke mani ac in nguhn, nuh sin mwet ma kom ac El muhkwena etuh kac uh. Kuloh nuh sum ke ahkinsewowoyekuht ke ohiyac puhs, … ke misineris kom use in kahsruh. … Nga kwacna motko lah Leum el sulekomlac liki inmahsrlo, kuh sahp kom na pa porongo uh.”

In luhngse mwet tuhlan lom wikihn ohiac wowo ke kuhlwacng ac kuhlwacnsap oana Kraist. Kom kuh in muhlkuhnlah ahngyahng, nuhnak muhnahs nuh sin mwet lokalok lom, paing ac muhtwacta yurin mwet tuhlan lom, ac kahsruh mwet mahtuh? Kais sie suwos ac puhla moklweyuck sin nguhn ke kowos muhsahi tower in luhngse lowos nuh sin mwet tuhlan lom.

Prestuhn Russell M. Nelson el luti: “Sang kahsruh nuh sin mwet sahyac—sismouk in kwacfeacng in nuhnkuh ke mwet sahyac in yohk kuh yohk liki na ke kuht nuhnkuh kwacsr sifacna—pa engan lasr uh. Yohkna … ke ac tiac fihsrwacsr ac ke ac itucklac kuht liki ma kuht pahlah kac uh. Moulkihn masap yohk ahkluo sac pa ki nuh ke in eklac oacna sie mwet tuhma lutlut pwacye luhn Jisus Kraist.”¹²

Kuhpahsr luhn ma Luo

Jisus el tahfwelah in luti, “Ma sap nuhkwewa lal Moses ac mwe luti nuhkwewa luhn mwet pahluh oan ye ma sap luo inge.”¹³ Ma se inge ahktuhtweyucki wo. Yohk srihpen kuhpahsr luo inmahsrlon luhngse Leum ac luhngse sie sin sie. Nuh ke Golden Gate Bridge in oruh ma el oreklac nuhkac uh, kewana tower ingacn fokoko ac kewana sruok toasriyacn weah luhlahp kac ingacn, inkacnek an, ac stosah puhkantwen ma kahsruhsr fac. Fin tiac ke suhmahtiyacn oraclah se inge, sohs soko inge kuh in mwe sensen, finne oruh in muhsahllah. Nuh ke oacna sie sohs fokoko ma oreklac nuhke ma eltahl muhsahiyucklac in oruh, tower kac an enenuh in tuhkweni na orekma sefanna in muh fokoko. Oacpacna, kuhiyacsr in ukwe Jisus Kraist tuhkuh ke fokokoiyac in moulkihn masap se omet ac ahkluo in oacna sie ac tuhkweni oruh ma kunaclos.

Yohkwelihk fohs facluh use kuht in nuhnkuh, lah, kuhtuh pacl uh kuht tiac liye kuh esam ma se inge. Kuhtuh kampare in karihngihn masap inge tuh srihklac mongfihsrwacsr lalos nuh selos ma elos liye muh tena arlac suwohs. Kuhtuh upac in luhngse elos suc sulwaclah in moulkihn moul lalos lihkihn wuhlweacng kuh finne som liki luhlahlfongi ma elos wi.

Sie pac sulwaclah ah, oasr selos suc ahkuhtweyac yohk srihpaciyen luhngse mwet sahyac uh tiac ahkuhtweyac lah kuht nuhkwewa oacna sie yurin God. Kuhtuh sruhnga na pwacye ke fwack muh oasr ma pwacye se, kuh pwacye ac stuhuh, ac ma sefanna enwenweyuck sesr uh pa in arulacna mongfihsrwacsr ac insese ke sulwaclah luhn mwet sahyac uh. Wacngihn sie sin ma inge kuh in pwacnwacng sohs in nguhn lom an in tikuclkuclyak kuh finne puhtatlac.

Prestuhn Dallin H. Oaks el ahkuhtweyac ke el fahk ohinge: “Sapkihnyuck nuh sesr in luhngse mwet nuhkwewa, ke na puhpuhlyuck lal Jisus ke mwet wowo Samaria luti lah mwet nuhkwewa pa mwet tuhlan lasr uh. Tuhsruhk ma kuht e oruh in sruokyac masap se ahkluo inge pa in tiac ahkkolukye kuht in muhlkuhnlah ma se meet ah, pa in luhngse God ke insiacsr kwewa, nguhnasr kwewa, ac nuhnkwacsr kwewa.”¹⁴

In Ahksahfye

Na kihsensiyuck soko nuh sesr kais sie, kuht muhsahi fuhkah sohs in luhlahlfongi ac ahkfuhlwact lasr uh—muhsaheack tower fuhlwact ke kewana in luhngse God ac luhngse mwet tuhlan lasr? Kacl, kuht tuhfahna in muhtacwacack. Kampare lasr uh sahp e oacna sral se ke tukun napkin se kuh in atacn sohs soko ma kuht finsrakkihn in muhsahi uh. Sahp e nwacnwacak finsrak pwacye ekahsr in kahlwem ke wosasuc luhn Leum yohk kuh in oraclah fuhlahk in ahksrihkyelah nuhnuhnkyeacn mwet sahyac. Wacngihn mwet srihklaclac kuh mahtuhlaclac in muhtwacwacack.

Puhlan pacl se, ke pruhe ac placn yohk, mwe nuhnak tiac fwel uh fwellac. Mukwikwi sasuc uh eklac nuhke elah. Plwacn oreklac emet ingacn eklac nuhke sral fwellacna. Kuht muhsaheack sohs in nguhn lasr uh ke insiac ac nuhnak ma nget nuh sin Pahpah Inkuhsrao ac Wen Kuloh Nahtuhl ac oacyacpac nuh sin tamuhlwel ac tahmtahel ma kuht wi orekma, sritacl, ac wi muhta.

Ke lwen ma e fahsruh inge, ke kowos kahsruhsr ahluhkwelah sohs luhlahp fin kof inge kuh finne ke kowos liye petsac kac an, ke tower fuhlwact la an, nga suli kowos in esam masap fuhlwact luo omet, ma ahkuhtweyucki sel Jisus Kraist ke Wuhlweacng Sasuc. Lwelah mwe luti luhn Leum in moklwekuht. Lwelah insiacsr ac nuhnak lasr in tohuyak nuh lucng, in luhngse Leum ac in ngetnget nuh sahyac, in luhngse mwet tuhlan lasr.

Lwelah in ahkkweye luhlahlfongi lasr kacl Jisus Kraist ac Iwaclah Lal, suc nga fahkwack ma inge,ke inen Jisus Kraist, amen.