“Kowos in Mihslac, ac Etu Lah Nga God”
Kuht kuh in mihslac ac etuh lah God El Pahpah tuhmasr Inkuhsrao, kuht pa tuhlihk Nahtuhl, ac Jisus Kraist el Mwet Lahngo lasr.
Ke sie open house ac lwen in ituck petsaci lohm sasuc se sin Leum, nga pwen u in journalist [mwet sihm] in fahsr intein lohm muhtahl sac. Nga ahkuhtweyac srihpen tempuhl ke Alu luhn Jisus Kraist luhn Mwet luhlahlfongi Lal ke Lwen-sahflah ac topuk kihsen siyuck wo pucspucs lalos.
Met liki kuht utyak nuh infuckihl celestial, nga ahkuhtweyac lah infuhkihl se ke lohm sin Leum inge ahkihlwenyacn mihs ac kahtoiyacn lohm se inkuhsrao ma kuht e fohlohk muhta kac tukun moul se inge. Nga fahk nuh sin mwet inte lasr inge lah kuht ac fah tiac sramsram lun infuckihl celestial, tuh nga engan in topuk oacna sie kihsen siyuck tukun kuht som tui ke acn se tok lasr uh.
Ke kuht tifoki liki infuckihl celestial ac toeni ke acn se tok ah, nga siyuck sin mwet kawuck lasr inge lah oasr ma elos aklihlen luhngse akahsruhi. Sie mwet sihm inge fahk ke insiacl, “Nga soenna puhlakihn kain se ngi ke moul luhk nofohn. Nga tiac etuh lah kain in mihs se ingacn oasr fin facluh; Nga tiac luhlahlfongi lah kain in mihs se ingacn kuh in sikyak.”
Nga lut ke kewana inse pwacye ac loaliyacn fahk se lal. Ac ma mwet sihm se inge puhlakihn uh ahkkahlwemye ma yohk srihpac se ke mihs—kuhtanglah ac fohrlah liki muhkwikwi luhn facluh.
Ke nga motko tok ke fahk luhn mwet sihm sac ac nuhnkuh yohk ke kahfofoiyacn moul lasr mihsenge uh—wohwohn, ma wakra, mwe sruhf, ma puhkantwen ma kuht lohacng kac—ma suhmuhslah se tuhkuh nuh ke nuhnak luhk uh: “Kowos in mihslac, ac etu lah nga God.”1
Nga pruhe tuh Nguhn Muhtahl fah ahkkahlwemye nuhnak lasr kais sie ke kuht nuhnkuh yohk ke ma mihs fuhlwact ac muhtahl ke moul lasr—mihs se lin nguhnasr ma oruh kuht in etuh ac esam lah God el Pahpah Tuhmasr Inkuhsrao, kuht pa tuhlihk Nahtuhl, ac Jisus Kraist el Mwet Lahngo lasr. Mwe insewowo askuhlacna se inge mwesahs nuh sin mempucrs nuhkewa ke Alu uh suc inswacneacng ke luhlahlfongi ekihn “mwet wuhlweacng luhn Leum.”2
Kowos in Mihslac
Ke 1833, Mwet Luhlahlfongi fin acn Missouri ahkkolukyeyuck upac. Mwet koluk luhsuhltahlwack liki lohm selos fin acn Jackson County, ac kuhtuh mempucrs ke Alu uh srihke in akiltahluh ke acn fototo siskac ah. Tuhsruhk mwe ahkkoluk inge kalweniyuck, ac sramsram in uniyac mwet inge yohkwelihk. Ke pacl upac inge, Leum el ahkkahlwemye kahs in kahsruh inge nuh sel Mwet pahluh Joseph Smith fin acn Kirtland, Ohio:
“Ohinge, lwelah insiowos in mihslac ke Zion; nuh ke ikoac ma oan ke pouk; kowos in mihslac ac etuh lah nga God.”3
Nga luhlahlfongi lah kahs luhn Leum in “mihslac” yohk srihpac liki na in tiac sramsram kuh tiac mukwi. Sahp, El ke kuht in esam ac luhlahlfongi Kacl ac kuh Lal “pacl nuhkwewa ac ke ma nuhkwewa, ac ke acn nuhkwewa ma [kuht] oasr we.”4 Ohinge, “kowos in mihslac” kuh in sie mwe ahkacsmakihnyekuht in lihksrweni nuhnkuh ke Mwet Lahngo oacna mihs muhtahl sahflah luhn nguhna ma ahkkweye kuht in oruh ac kuhtanglah ma upac.
Muhsah fin Yot
Luhlahlfongi pwacye se el kwacna siac ma nuhkewa kacl Leum Jisus Kraist—in El pa Mwet Muhtahl ac Wen Kuloh Sefanna nuhtin Pahpah Ma Pahtpaht ac Kacl ac kunohnkohn in molwelah ma El ahkfohnyelah.
“Tuh El tohpohklah sahflahiyacn masap uh, ac El eisaclos nuhkwewa suc luhlahlfongel; ac elos suc luhlahlfongel fah fungyang nuh ke ma wo nuhkwewa; ohinge El iwaclah ip yohk luhn tuhlihk nuhtin mwet.”5
Jisus Kraist el Mwet in Molwelah lasr,6 Mwet Iwe lasr,7 ac El iwaclah ip yohk kacsr8 ke Pahpah ac ke yot se ma kuht e muhsahelah pwelucng in nguhn ke moul lasr.
Helaman el fahk, “Esam, esam lah ke fin yot luhn Mwet in Molwelah lasr, suc pa Kraist, Wen nuhtin God, pa kowos enenuh in muhsahelah pwelucng lowos; tuh ke devil el ac suhpwaclah eng upac lal, ahok, sikucl lal nuh ke eng for uh, ahok, ke aes kwekwe raun nuhkwewa lal ac pahkah upac lal fah srihngihl kowos, ma inge ac fah wacngihn kuh la fowos in iskowosi nuh ten nuh ke inahlok luhn suhpwacr ac ongaiyac ma wacngihn sahflahiyac, ke srihpen yot se ma kowos muhsahyak fac, suc pa sie pwelucng pwacye, sie pwelucng ma fin mwet uh muhsah fac elos tiacna kuh in puhtatlac.”9
Akucl ke Kraist el oacna “yot” se ma kuht muhsaeack pwelucng ke moul lasr uh use kahs in kahsruh. Nuhnak muhnahs akihlen lah Mwet Lahngo El tiacna pwelucng sac. Sahyacna, kuht kaiyuck in muhsaheack pwelucng lasr sifacna Kacl.10
Pwelucng pa ip ke lohm ma kuhpahsriyac nuh infohk uh. Pwelucng fokoko se karihngihn kosraclah natural disasters ac eng upac sahyac ma e kuhnaoslah ma uh. Pwelucng wo se oacyacpac kahsruh tanyac muhsah sacn fin acn luhlahp in karihngihn in te toasrlac nuh ke fohk an ac kahsruh ahkfwelye muhsah sacn.
Kuhpahsr fokoko ac pwacye infulwen fohk ac pwelucng yohk srihpac fin muhsah sacn tu kuh ac suwohs ke puhlan pacl. Ac ke kain in muhsah, ma kawuckihnyac ac osra kuh in orekmakihnyuck nuh ke pwelucng luhn lohm in “ahkfokokoi” yot keke, upac se in fohk uh.
In atac se pacna inge, pwelucng ke moul lasr uh enenuh in kuhpahsr nuh ke yot luhn Kraist kuht fin tu na kuh ac tiac mukwikwi. Wuhlweacng ac akwuck muhtahl ke wosasuc fohlohkyak luhn Mwet Lahngo kuh in oacna ma kawuckihnyucki ac osra orekmakihnyuck in muhsahi lohm se. Pacl nuhkewa ma kuht luhahlfongi in eis, nuhnkuh kac, esam, ac ahksasucye wuhlweacng muhtahl uh, nguhnasr kawuckihnyucki fokokoi ac kuhi nuh ke “yot” lal Jisus Kraist.
“Ohinge, el suc luhlahlfongi na pwacye God el finsrak nuh ke sie facl wo liki inge, ahok, finne sie acn ke lacfahl lacyot sin God, ma finsrak tuhkuh ke luhlahlfongi, oraclah sie kawuck ke nguhn luhn mwet, ma ac oruh ma inge in pwacye ac kuh, sesseslah ke orekma wo, kolyuck in kaksakihn God.”11
Kais kuhtuh ac yohkwelihk “ke pacl uh fahsr,”12 nwacsnwacs kwacna nwacklah nuhnak lasr, puhlaik lasr muhtacwacack fokokoi ac fokokoina ye muhtuhn God, ac Nguhn Muhtahl el wi kuht pacl nuhkewa.13 Kuht tu fokoko liki met ah, oasr okah, fohnlah, ac fas.14 Ke pwelucng luhn moul lasr muhsahiyuck fin Mwet Lahngo, kuht ahkinsewowoyeyuck in “mihslac”—nguhn ahkpwacyei lah God el Pahpah tuhmasr Inkuhsrao, kuht pa tuhlihk Nahtuhl, ac Jisus Kraist el Mwet Lahngo lasr.
Pacl Muhtahl, Acn Muhtahl, ac Lohm ah
Leum el use kewana pacl muhtahl ac acn muhtahl in kahsre kuht moulkihn ac luti ke mihslac insiacn nguhnasr.
Ke srihkasrak, lwen Sabbath el lwen luhn God, pacl muhtahl srweyucklac in esam ac kaksakihn Pahpah ke inen Wen Nahtuhl, wi akwuck luhn pristut, ac eis ac ahksasucye wuhlweacng muhtahl. Kais sie wik kuht lutlut lohm ah ac kaksakihn Leum ac oacyacpac oacna “mwet wien mwet lun Go”15 ke pacl in kuhfa luhn Leum ac toeni sahyac. Ke lwen muhtahl Lal, nuhnak lasr, oruh lasr, ac luhmahsr oacna akucl kuht sang nuh sin God in fahkwack luhngse lasr nuh Sel.16 Sacnri nuhkewa, kuht fin oruh, kuht kuh in mihslac ac etuh lah God El Pahpah tuhmasr Inkuhsrao, kuht pa tuhlihk Nahtuhl, ac Jisus Kraist el Mwet Lahngo lasr.
Ip yohk srihpac ke ahkfuhlwact lasr ke lwen Sabbath pa in som nuh ke lohm in pruhe ac sang kuhfa lasr ke lwen muhtahl luhn Leum.17 “Lohm in pruhe” ma kuht tuhkweni kac ke lwen Sabbath elos lohm in toeni ac lohm ahkkweyeyucklac sahyac—acn muhtahl mihs, in alu, ac eis etacack. Kais sie lohm in toeni ac iwac sahyac aluiyucklac selos ma oasr wal luhn pristut se in acn ma Nguhn luhn Leum kuh in muhta ac tuhlihk nuhtin God kuh in tuhkuh “nuh ke kahlwem luhn Mwet in Iwaclah lalos.”18 Kuht fin oruh, kuht kuh in “mihslac” ke acn muhtahl in ahkfuhlwact sesr ac etuh yohk liki met ah lah God el Pahpah tuhmasr Inkuhsrao, kuht pa tuhlihk Nahtuhl, ac Jisus Kraist el Mwet Lahngo lasr.
Tempuhl el oacyacpac sie acn muhtahl srweyucklac in kaksakihn ac kuhlwacnsapuh God ac luti ma pwacye ma pahtpaht. Kuht nuhnkuh, oruh, ac nukum nuknuk siena lin lohm sin Leum liki acn nuhkewa sahyac kuht som nuh kac. In lohm muhtahl Sel, kuht fin oruh, kuht kuh in mihslac ac etuh lah God el Pahpah tuhmasr Inkuhsrao, kuht pa tuhlihk Nahtuhl, ac Jisus Kraist el Mwet Lahngo lasr.
Srihpac yohk ke pacl muhtahl ac acn muhtahl oacna sie: kalweni nuhnkuh ke Pahpah Inkuhsrao ac plwacn Lal, Leum Jisus Kraist ac Iwaclah Lal, kuh ahkfokoko luhn Nguhn Muhtahl, ac olwelah oreklac ke akwuck muhtahl ac wuhlweacng ke wosasuc fohlohkyak luhn Mwet Lahngo.
Mihsenge ngac kalweni mwe luti se nga fahk tari ah. Lohm sesr enenuh in oracni kewana pacl muhtahl ac acn muhtahl ma kais sie ac sucu kuh in “mihslac” ac etuh lah God el Pahpah tuhmasr Inkuhsrao, kuht pa tuhlihk Nahtuhl, ac Jisus Kraist el Mwet Lahngo lasr. Som liki lohm sesr in alu ke lwen Sabbath ac lin lohm sin Leum el yohk srihpac. Tuhsruhktuh ke kuht fohlohk nuh lohm sesr sesseslah ke nuhnak luhn nguhnac kuh kuht eis ke acn muhtahl inge muhkwena kuh in kahsre kuht nuhnkuh yohk ke srihpac luhn moul suhkawihl se ac kuhtanglah mwe sruhf puhs luhn facl puhtatlac se lasr inge.
Oaru lasr ke lwen Sabbath, tempuhl, ac pacl wo luhn lohm ah ac fah ahkfokokoye kuht ke kuh luhn Nguhn Muhtahl, ke kupahsr luhn olweacng fokoko liki met ah yurin Pahpah ac Wen, ac in “oasr kahlwem suwohs luhn finsrak,”19 ke olwelah ma pahtpaht luhn God.
Ke lohm ac Alu tuhkeni nuh sie in Kraist,20 kuht e srihkweyuck ke sroasrihk nuhkewa, tuh kuht ac tiac fohsack ke nuhnak lasr ac insiacsr. Kuht kuh in fohsack ke pacl ac ma upac lasr, tuh kuht ac tiac fuhlweack. Kuht kuh in ahkkolukyeyuck, tuh kuht ac akihlwen lah kuht tiac muhkuh.21 Kuht kuh in eis kuh luhn nguhn in tu na kuh, fokoko, ac pwacye.
Olwelah ac Kahs in Fahkwack Luhlahlfongi
Nga olwelah lah ke kuht muhsaheack pwelucng luhn moul lasr fin “yot” luhn Jisus Kraist, kuht kuh in ahkinsewowoyeyuck sin Nguhn Muhtahl in eis mihs sifacna luhn nguhn ma ac fah lwelah kuht in etuh ac esam lah God el Pahpah tuhmasr Inkuhsrao, kuht pa tuhlihk Nahtuhl, Jisus Kraist el Mwet Lahngo lasr, ac kuht kuh in ahkinsewowoyeyuck in oruh ac kuhtanglah ma upac.
Nga enganin lohoh lah God El Pahpah Tuhmasr Inkuhsrao, kuht pa tuhlihk Nahtuhl, ac Jisus Kraist El Mwet in Molwelah lasr ac “yot” in molwelah lasr. Nga fahkwack ke ine muhtahl luhn Leum Jisus Kraist, amen.