Ma Nuh kwewa Ma Ac Wo Nuh Sum
Inge ac nwe tok ma pahtpaht, srihpac luhn Oreklac ac ke ma luhn God sifacna pa in use ma nuhkwewa in wo nuh sesr.
Mihsenge pa Eprel 6, acnifihrsacri luhn Jisus Kraist ke fohlohkohnwack Alu Lal ke Lwen-sahflah—ac oacyacpac puhluhn pacl in Istuh, ke kuht enganwack in fahkwack ke moul suwohs luhn Jisus Kraist, kihsackuhnlah, ac sifilpac Moulyak wolacna Lal.
Oasr pihlengfong Sacini soko muhtwacwacack ke tuhlihk mukul se nuhtin pahpah se konwacack ohsr soko.
“Wo na pwacye,” mwet tuhlan lal ah fahk.
“Kuht e fah liye,” pahpah sac fahk.
Tohkoh wen se nahtuhl ah puhtatlac liki ohsr soko ah na el muhsahllah kac.
“Koluk na pwacye,” mwet tuhlan lal ah fahk.
“Kuht e fah liye,” pahpah sac fahk.
Te paht na oasr solse tuhkuh eis mukul in weluhlos tuhsruhk elos tiacna eis mukul sac ke srihpen el suhkahpahslah.
“Wo na pwacye,” mwet tuhlan lal ah fahk.
“Kuht e fah liye,” pahpah sac fahk.
Ekyek luhn facluh se inge oacna in puhla fohs, tahfuh luo, kuhtuh pacl uh wo ohiyac, ac—inkaiyen pacl uh—koluk ohiyac. Tuhsruhk, ke ma upac nuhkwewa luhn facluh se inge,1 “kut etuh lah ma wo nukwewa, fah sikyak nuh selos suc luhngse God.”2 Pwacyena lah, ke kuht fahsr suwohs ac esam in liyacacng olwelah lasr, “ma nuhkwewa ac fah sikyak wo nuh sum.”3
Ma nuh kwewa ma ac wo nuh sum.
Olwelah yohk se! Mwe ahkkweye sin God Sifacna! Ke inkacnek usrnguck, srihpen Oreklac luhn facluh ac kacl God pa in etuh muhtwacwacack ac sahflah,4 in ahkfahsryelah nohfohn ma e wo nuh sesr, ac in kahsre kuht ahknwacsnwacsyeyucklac ac muhtahl ke kuhlwacng ac Iwaclah luhn Jisus Kraist.
Iwaclah luhn Jisus Kraist kuh in uslah ac molikuhtlac liki ma koluk. Tuhsruhk Jisus Kraist el oacyacpac kahlwem ke kweok nuhkwewa lasr, ma upac, mas,5 ahsor, fahsrwelihk. In pacl inge ac nwe tok ma pahtpaht, kuhtanglah Lal fin misac ac hell kuh in ahkwoyelah ma nuhkwewa.6 El kahsruh onwelah mwet ahsor ac srihkkihnyuck, oracni mwet ahngyahng ac fahsrwelihk, ahkkweye mwet muhkwena ac srenglah, ahkkweye mwet tahfuh luo ac suhfas, ac orek mwenmwen ma God muhkwena kuh in oruh.
Kuht ohn hallelujah ac fahkwack hosanna! Ke kuh ma pahtpaht ac wolacna wacngihn sahflah kac, ke plwacn in engan luhn God ma nuh kwewa ac sikyak in wo nuh sesr. Kuht kuh in lain moul ke luhlahlfongi ac in tiac sahngweng.
Ke kuht e sifacna uh, sahp kuht ac tiac kuh in sifacna etuh ma ac wo nuh sesr. Ke “nga sulweyuclac uh,” nga oacyacpac sulaclah kuhiyuck, muhnahs luhk, ac ma suhfal luhk. Yohkiyacna, in oraclah ma wo yohk, kuh enenuh in wo.7 Ke srihpen wacngihn mwet wo sahyacl,8 kuht suk suwohswohs kacl Jisus Kraist.9 Kuht eklac kuht na pwacye, wo emet muhkwena ke kuht forlah liki ma luhn facluh ac eklac tuhlihk nuhtin God.
Ke luhlahlfongi lasr sin God, ma upac ac mwe kweok uh kuh in ma ac wo nuh sesr. Joseph, el tuh kuhkwaclac nuh Egypt, tok el molwelah sucu ac mwet lal. Kaclpous lal Joseph Smith ke Liberty Jail ah lotwelwacng “ma inge fah usot etwacack lom, ac ma ac fah wo nuh sum.”10 Moulkihn luhlahlfongi, ma upac ac kihsackuhnlah ma kuht tiacna sulaclah kuh in mwe insewowo nuh sesr ac mwet sahyac ke inkacnek kuht tiac kuh in kahlwem kac.11
Kuht ahkyohkyelihk luhlahlfongi lasr kacl Leum lah ma nuh kwewa kuh in eklac wo nuh sesr ke kuht eis in nuhnkuh pal ke moul lasr;12 in kahlwem kac lah ma upac lasr inge ac ma na nuh ke kihtin pacl;13 akihlen lah ma upac uh kuht kuh in eis kapwack kac;14 insese ke ongaiyac, misac te pwacpa, muhnahslah ke mas, ac mas el ipin moul fin facluh; ac luhlahlfongi lah Pahpah Tuhmasr Inkuhsrao el tiac use ma upac uh in kai kuht kuh nuhnuhnkwe kuht. El tiac kuh in sang sie yot nuh sin sie mwet suc ngihsre ke puhret, kuh finne in sang snek soko nuh sin sie mwet ma ngihsre ke ik soko.15
Ke ma upac uh tuhkuh, inkaiyacn pacl uh ma kuht ke uh pa sie mwet ah in lohng ac wi kuht.16 Ke kain pacl se inge, top ma kuht kwacna muhta lohng uh tiac arlac kahsruh, finne elos srihke in ahkkweye. Kuhtuh pacl uh kuht ke sie mwet ma ac ahsor, ngal ac wi kuht tuhng; lwelah kuht in ahkkahlwemye ngal lasr, fohsack, ac kuhtuh pacl finne kasrkuhsrak; ac wi kuht akihlen lah oasr ma kuht tiac etuh.
Ke kuht luhlahlfongi ke God ac ke luhngse Lal nuh sesr, finne ahsor ma yohk emet lasr uh kuh, in eklac wo, nuh sesr ke sahflahiyac uh.
Nga esam lwen se nga tuh lohng acksitacn ke stosah suc sikyak nuh selos ma Nga luhngse. Ke kain pacl inge, ke kweok ac luhlahlfongi, kuht kuh in weluhl Job fahk, “LEUM El ase, ac Leum El eslah; lwelah Inen Leum in kaksakihnyuck.”17
Ke Alu luhn Jisus Kraist fin facluh nohfohn, oasr stek 3,500 ac tistrik ac ward 30,000 weacng pac pracns ma kahsruh ke nien wihklac ac sefti.18 Tuhsruhk inmahsrlon stek ac ward lasr inge, puhkantwen sucu wowo ac kais sie mwet lain ma upac inge, finne elos etuh lah (sonna oasr ma kahlwem) ma nuh kwewa ac fah sikyak wo nuh sesr.
Fin acn Huddersfield, England, Tamuhlwel Samuel Bridgstock konweyuckyak tuh el nuh oasr ke stage four cancer tukun na pahng el nuh ke stek prestuhn sasuc. Ke ituckyang ma upac sikyak nuh sel inge, el siyuck sin muhtwacn kiyacl ah, Anna, lah enenuh se elacn som kihsensiyuck in lohlngohk.
“Mweyen,” Tahmtahel Bridgstock el fahk, “kom ac pahngonyuck nuh ke stek prestuhn.”
Ituckyang yac se kuh luo elan moul, Prestuhn Bridgstock (suc oasr yohrohsr misenge) el ingena yac ahkosr lac in kuhlwacnsap lal. Oasr pacl wo ac pacl upac lal. Stek se el wi inge kapkapwack ke luhlahlfongi, kuhlwacnsap, ac kuhlwacng. Tiacna fihsrwacsr, tuhsruhk muhtwacn kiacl ac sucu lal uh moulkihn luhlahlfongi, srui, ac kahlwem kac lah suhpwacr lalos ac tuhfah eklac engan ma pahtpaht ke Iwaclah lal Jisus Kraist.19
Ke kuht mihs, ikuhskuhtlac, ac muhtahl uh, kuht kuh in puhla kahtoiyac, srihpac, mislaciyacn olwelah tuhkuh sin Leum. Ke pacl muhtahl uh, El kuh in use kuht in liye kuhtuhsrihk ke ma kuht e fah eis ke moul ma pahtpaht ke ipin moul lasr ke kais sie lwen, suc ma srihsrihk ac fihsrwacsr uh kuh in oraclah ma wo se nuh sin mwet sang ac mwet eis.
Rebekah, tuhlihk muhtwacn se nuhtin misin prestuhn se luhk emet, sruhmuhn ke Leum el tuh tohpohklah pruhe se lal ke inse mislac in pacl el, tiac ahkolah in tohpohklah pruhe luhn sie mwet.
Sie ekuh ah, ke el srwackna puhla ahsor ke misac luhn ninac kiacl ah, Rebekah, el puhla muh el enenuh in som moul gas nuh ke stosah nahtuhl ah. Ke el sun stoh ah, el ohsun nuh sin ninac mahtuh se mahlwack ac enenuh kahsruh nuh ke twacng in momong lal ah. Tohkohyang, Rebekah el sang insin in momong luhn ninac kiacl ah nuh sin muhtwacn se inge. Tahmtahel se inge kulohkihn ac fahk, “Kom fohlohkohnma sukohsohk luhk.” Ma uh ac tuhkweni sikyak nuh ke ma wo ke kuht kahsruh oacna Jisus Kraist El oruh uh.
Kuneyucki pahpah se ac wen-se nahtuhl oacna elos tuhkweni forfor luti ahkuhtweyac, “Forfor lutlut pa ekihn mwet tuhlan ma utuck cookies nuh yurin kawuck wowo, mwet kahsruh ahkolah emet in nguhn.” Wuhlweacng oasr yurin Jisus Kraist uh ahkkweye, kapsruh, ac ahkmuhtahlye.
Finne ke pacl in ongaiyac, ahkolah luhn nguhn kuh in ahkacsmakihnye kuht lah Pahpah Tuhmasr Inkuhsrao El etuh pacl kuht puhla muhnahs upac ac muhkwena. In mwe srihkasrak, sie sucu suc tuhlihk se nahtuhlos utucklac nuh lohm ono ah konwacack ahkkweye ke elos esamwack Nguhn Muhtahl ke tuh mahmahi nuh selos ma e sikyak uh.
Kuhtuh pacl uh Leum El use nuh sesr kuht in kuh in puhla sucu lasr ma muhta ke facl luhn nguhn. Sie tahmtahel el konwacack engan ke el eklac ke wosasuc luhn Jisus Kraist. Na ma na upac luo sikyak in moul lal—liye acksitacn luhn oak soko ac ninac kiacl ah sifacna eslah moul lal.
Ne ohinge tahmtahel se inge kuhtanglah sahngweng lal ke kof in pacptaislac ke tili otyak. Ac ke lwen se ma engan emet lal, el liye sie mwet, orekma ke ninac misac kiacl ah, pacptaiselah lin tempuhl. “Pacptais lun tempuhl unwelah ninac kiyuck ah, ac ahksukohsohkyeyuclac,” tahmtahel se inge fahk. “Pa inge pacl se emet nga puhla mislac tukun ninac kiyuck ah tuh misac ah.”
On in alu muhtahl soko fohlohkohnma ahkkweye Lal lah ma nuh kwewa ma ac wo nuh sesr.
Ahkmihsye, nguhnihk: God luhk fah wiyuc kahsreyuc
In kol pacl fahsruh uh oacna ke el kol pacl somlah ah.
Finsrak lom, luhlahlfongi lom lwelah in tiac moklweyuck;
Ma lukmei nuh kwewa ac tuhfah kahlwem ke sahflahiyac.20
Fahsruh, fahsruh, Mwet Wo, tiac tui tiac sahngweng in orekma;
Ke engan ke fahsr lom.
Finne upac sum fuhfahsryucsr ac tuhkuh.
Kuhlwacng ac fah oasr in lwen lom. …
Ac kuht fin misac met liki sahflah fuhfahsryucsr lasr,
Lwen engan! Kwewa wo!21
Puk luhn Mormon pa mwe ahkpwacye se ma use nuh sesr kuht in etuh lah Jisus pa Kraist ac God el ahkpwacyeiye pahluh Lal. Sihmlac sin mwet pahluh ma liye we se lasr inge, Puk luhn Mormon muhtwacwacack ke sie sramsram—sie sucu ma mukwikwi yohk ke eklac inmahsrlolos. Tuhsruhk, ke kuht riti ac nuhnkuh 1 Nephi 1 nuh ke Moroni 10, kuht fototoyang nuh sin Jisus Kraist ke sie luhlahlfongi fokoko lah ma sikyak insac ac ke pacl sac kuh in ahkinsewowoye kuht inge ac ingena.
Oacna Leum, tuhkuh sin mwet pahluh moul Lal, muhsahelah in puhkantwen lohm sin Leum in fototo nuh sesr ke acn puhkantwen, kuht liye mwe insewowo luhn tempuhl orekma kac uh ma wo nuh sesr. Kuht tuhkuh ke wuhlweacng ac akwuck nuh sin God suc pa Pahpah tuhmasr ac Jisus Kraist ac eis fwackyuck nuh ke moul se fin facluh inge. Kais sie, ine nuh ke ine, kuht sang mempuhr ke sucu wolacna—mwet somlah met—akwuck muhtahl ac mwe insewowo ke olwelah ke pactuhn luhn Leum ke molwelah fin Ohl Zion.22
Ke tempuhl uh fototo me nuh sesr ke acn puhkantwen, sie ma kuht kuh in kihsackuhnlah pa in suk muhtahl in lohm sin Leum inkaiyacn pacl uh. Ke lusen yac puhkantwen, kuht sackuhnlah, pwacpa, ac kihsackuhnlah in tuhkuh nuh ke tempuhl uh. Ingena, fin oasr pacl lasr, nuhnak muhnahs tuhkuh nuh yurin Leum finne fusus nuh ke lohm muhtahl Sel. Lwelah fahsr lasr nuh ke tempuhl ac kuhlwacnsap lasr in ahkinsewowoye, karihngihn, ac sang kolyuck wo nuh sum ac sucu lom—sucu lom ingena kuh sucu se kom ac tuhfah oraclah sie lwen.
Oacyacpac, nuhnak muhnahs nuhnkuh ke mwe insewowo ke ac oasr nuknuk in tempuhl lom sifacna uh.23 Sie ninac mahtuh ke sucu puhsisacl se fahk lah ma se el kena emet fin facluh pa in oasr nuknuk in tempuhl lal. Tuhlihk mukul se nuhtin nahtuhl fahk, “Ninac mahtuh el mahmah fahk, ‘Nga ac fah kuhlwacnsap ke nuknuk in tempuhl luhk sifacna, ac fin nga misac, nga e fah nukum puckpucki.’” Ac ke sun pacl sac, el oruh oacna ke el tuh fahk ah.
Oacna ke Prestuhn Russell M. Nelson el luti uh, “Ma nuh kwewa kuht luhlahlfongi ac ma nuh kwewa ma God El olwelah nuh sin mwet wuhlweacng Lal e fahsreni lun tempuhl.”24
Inge ac nuh tok ma pahtpaht, srihpac luhn ma nuhkwewa God El oraclah ac oasr lal God uh pa in use ma nuhkwewa in wo nuh sesr.
Pa inge srihpac ma pahtpaht luhn Leum. Ngwetngwet ne tok Lal. Olwelah ne tok Lal.
Pacl moul uh fohsack, tiacna kahlwem srihpac uh, ke kom kena moul in wo tuhsruhk tiacna etuh lah fuhkah, nuhnak muhnahs fahsruh nuh yurin God Pahpah tuhmasr ac Jisus Kraist. Luhlahlfongi muh Elos moul, luhngse kom, ac kena tuh ma nuhkwewa in wo nuh sum. Nga fahkwack lah Elos oruh, wacngihn sahflahiyac ac ne tok, ke ine suhnak ac muhtahl luhn Jisus Kraist, amen.