Engankihn Mwe Sang ke Ki luhn Pristut

Sel Prestuhn Russell M. Nelson

Prestuhn luhn Alu luhn Jisus Kraist luhn Mwet Luhlahlfongi ke Lwen-sahflah

Ki luhn pristut karihngihn lah pristut luhn God e orekmakihnyuck fuhkah in ahkfahsrye srihpac luhn Leum ac ahkinsewowoye elos nuhkewa suc eis fohlohkihnyuckyak luhn wosasuc.

Tamuhlacl ac tahmtahel sacohk wiyuck, misenge el sie lwen in acsmakihn nuh sihk ac Prestuhn Dallin H.Oaks. Yac 40 somlah ah, ke Eprel 7, 1984, tuh pahngyak kuht nuh ke U luhn Mwet Sap Singucul Luo.¹ Kuht engankihn kais sie ac toeni luhlahp fahfahsruh ne misenge, weacng pacna ma se inge. Kuht sifilpacna ahkinsewowoyeyuck ke ma muhtahl kahklah sin Nguhn. Nga finsrak kowos in kalweni na in lutlutkihn pweng ke toeni se inge ke mahlwem fahsruh tok uh.

Ke nga isuslac ah,² oasr tempuhl ohnkohsr orekmakihnyuck ke Alu uh—kais sie fin acn St. George, Logan, Manti, ac Salt Lake City, Utah; oacyacpac fin acn Cardston, Alberta, Canada; ac Laie, Hawaii. Tempuhl luo orekmakihnyuck meet fin acn Kirtland, Ohio, ac Nauvoo, Illinois. Ke u in mwet se ke Alu uh som nuh rohtoh, sap kuh sun Mwet Luhlahlfongi inge in som fihliyac tempuhl luo inge.

Tempuhl Navoo kuhnanuclac sin mwet isis e. Tuh sulpac muhsahlah ac kihsackihnyucklac sel Prestuhn Gordon B. Hinckley.³ Tempuhl Kirtland ah tuh kuhnanuclac sin mwet kwase Alu uh. Tok Tempuhl Kirtland tuh itucklac sin Community of Christ, suc karihngihn ke yac na puhs.

Mahlwem tari ac, kuht fahkwelihk lah Alu luhn Jisus Kraist luhn Mwet Luhlahlfongi ke Lwen-sahflah tuh molwelah Tempuhl Kirtland, weacng kuhtuh acn mahtuh fin acn Nauvoo. Kuht srui ma luhlahp ke inseselac wowo ac kuhlwacng kuht eis yurin mwet kol Community of Christ pwacnacng kuht oraclah kena lasr.

Oasr ma usrnguck sikyak Kirtland Tempuhl ke Fohlohkyak luhn Wosasuc luhn Jisus Kraist. Kuhtuh ma sikyak we palyeiyuck ke tausin yac ac yohk srihpac nuh ke fohlohkyak luhn Alu luhn Leum in ahkfalye kunohkohn lal ke lwen-sahflah.

Ma se ma yohk srihpac emet ah sikyak ke Istuh, Sacnri, Eprel 3, 1836.⁴ Ke lwen se ingacn, sikyak nuh sel Joseph Smith ac Oliver Cowdery muhtwacta ekahsr ma yohk kalmac. Ma se met ah, Leum Jisus Kraist el sikme. Mwet pahluh el suhmuhslah lah muhtuhn Mwet Lahngo el oacna fihrihr luhn e uh; aunsifacl fasrfasr oacna snow nwacsnwacs; luhmahl sahromrom liki na faht ah; ac puhsrwacl oacna puhsrwen kahsrusr luhn kof pucspucs.”⁵

Ke muhtwacta se inge, Leum el ahkpwacyei lah suc El uh. El fahk, “Nga pa muhtwacwacack ac sahflah; Nga pa el suc moul, Nga tuh acnwucki; Nga pa Mwet Iwe lowos nuh sin Pahpah.”⁶

Na Jisus Kraist el fahkwack lah El insese nuhke tempuhl in lohm Sel ac oraclah olwelah wolacna se inge: Nga fah Ahkahlwemyeyuc sifacna nuh sin mwet Luhk ke luhng kuhlwacng nuh in lohm se inge.⁷

Olwelah wolacna se inge oreklac nuhke tempuhl nuhkewa ma kihsackihnyucklac misenge. Nga suli kowos in nuhnkuh lah meah kalmen olwelah se luhn Leum nuh sum sifacna inge?

Tukun muhtwacta se luhn Mwet Lahngo, Moses el sikme. Moses el sang nuh sel Joseph Smith ki in oracni Israel ac fohlohklac luhn sruf singucul.⁸

Ke sahflah aruhruhma se inge, “Elias el sikme, ac kihsackuhnwacng we sahflah se ke wosasuc lal Abraham” nuh sel Joseph.⁹

Na mwet pahluh Elijah el sikyak. Luhmahl ahk pwacye elah olwelah lal Malachi lah meet liki Tuhkuh Ahkluo, Leum elac suhpwaclma Elijah in “furohklah insien pahpah nuh sin tuhlihk nahtuh,, ac insien tuhlihk nuh sin pahpah tuhma.”¹⁰ Elijah el sang ki luhn kuh luhn sil nuh sel Joseph Smith.¹¹

Yohk srihpac luhn ki inge ke eltahl fohlohkihnyuckme nuh facluh sin mwet tuhtahf inkuhsrao tolu ye kolkyuck luhn Leum tiac kuh in laisyucklac. Ki luhn pristut orwacni wal ac kuh luhn prestuhnsi. Ki luhn pristut karihngihn lah pristut luhn God e orekmakihnyuck fuhkah in pwacnma srihpac luhn Leum ac ahkinsewowoye elos nuhkewa suc eis wosasuc luhn Jisus Kraist.

Yohk srihpac in esam lah meet liki akwucki luhn Alu uh, mwet tuhtahf inkuhsrao elos sang tari Aaronic ac Melchizedek Pristut nuh sel Mwet Pahluh Joseph ac sang kewa nuh sel ki luhn pristut.¹² Ki inge sang kuh nuh sel Joseph Smith elan akiyac Alu uh ke 1830.¹³

Na fin acn Kirtland Tempuhl ke 1836, tuhkuh luhn ki luhn pristut tolu sahyac inge—suc pa, ki in oracni Israel, ki ke wosasuc lal Abraham, ac ki in siliyac kuh—yohk srihpac. Ki inge sang kuh nuh sel Joseph Smith—ac Prestuhn tohkohl nuhkewa ke Alu luhn Leum—in oracni Israel ke kewana acn lihsrlihsr, in ahkinsewowoye kewa tuhlihk wuhlweacng nahtuhl Abraham, in fihliyac lwelah in sil nuh ke akwuck ke pristut ac wuhlweacng, ac in siliyac sucu ne tok ma pahtpaht. Kuh ke ki luhn pristut inge eltahl wolacna ac wacngihn sahflahiyac.

Nuhnkuh lah moul lowos an e siena fuhkah fin ki luhn pristut tiac fohlohkihnyuckyak nuh facluh.¹⁴ Fin wacngihn ki luhn pristut, kowos tiac kuh in eis akwuck muhtahl ke kuh luhn God.¹⁵ Fin wacngihn ki luhn pristut, Alu uh e kuhlwacnsap na ekihn u in kahsruh ac luti muhkwena ac tiac ma sahyac. Fin wacngihn ki luhn pristut, wacngihn sie sesr kuh in oruh akwuck ac wuhlweacng yohk srihpac ma kaprikuhti nuh selos suc kuht luhngse ne tok ac ikacslah nuh sesr in wi God muhta ne tok.

Ki luhn pristut oruh oasr eklac se ke Alu luhn Jisus Kraist luhn Mwet Luhlahlfongi Lal ke Lwen-sahflah liki u sahyac nuhkewa facluh. Puhs u sahyac kuh ac oruh moul lowos in wo ke moul suhkawihl se inge. Tuhsruhk wacngihn u sahyac kuh ac fah ekuhlah moul lowos an tukun misac.¹⁶

Ki luhn pristut use kuh nuh sesr in tahfwelah mwe insewowo uliyuck nuh sel Abrahahm ah nuh selos mukul ac muhtwacn nuhkewa ma karihngihn-wuhlweacng. Orekma tempuhl oruh mwe insewowo wolacna inge kuh in sun nohfohn tuhlihk nuhtin God, tiac elyah lah elos muhta oyac kuh ngac elos muhta facluh. Lwelah kuht in engan lah ki luhn pristut el sifwilpac na oasr fin facluh!

Nga suli kowos in lihksreni nuhnkuh ke fahk tolu ten inge:

1. Fahsrweni luhn Israel ahkpwacyei lah God el luhngse kewa tuhlihk Nahtuhl nohfohn.

2. Wosasuc lal Abraham el tahfwelah in ahkpwacyei lah God el luhngse kewa tuhlihk Nahtuhl nohfohn. El suli nuhkewa in fahsr nuh Yohrohl—“sralsral ac fasrfasr, srohoh ac sukohsohk, mukul ac muhtwacn; … kewana oacna sie ye muhtuhn God.”¹⁷

3. Kuh in sil el fokoko ahkpwacyei luhpan luhngse luhn God nuh sin kewa tuhlihk Nahtuhl ac kena kais sie selos in sulwaclah in fohlohk nuh lohm Sel.

Ki luhn pristut fohlohkihnyuckyak sel Mwet Pahluh Joseph Smith oruh fihsracsr nuh sin nuhkewa mukul ac muhtwacn karingihn-wuhlweacng in engankihn upac ke ma oasr yohrohlos kais sie. Inse inge, puhslac ma kuh in lutlutkihnyuck ke ma mahtuh muhtahl fin acn Tempuhl Kirtland.

Pruhe in kihsaclah lal Joseph Smith ke Tempuhl Kirtland el mwe lutlut se in etuh fuhkah nguhn luhn tempuhl uh ahkfokokoye kom ac nga in kuhtanglah ma upac luhn moul ke lwen sahflah uh. Nga kwacfe kowos in lutlutkihn pruhe se sihmlac oasr ke Doctrine and Covenants 109. Pruhe in kihsac se ingacn, suc ma tuhkuh ke fwackyuck, luti lah tempuhl el lohm in pruhe, lohm in lalo, lohm in luhlahlfongi, lohm in etwacack, lohm wolacna, lohm akwuck, lohm sin God.¹⁸

Ahkuhtweyac inge yohk liki na ahkuhtweyacn tempuhl se. Olwelah se ke ma e sikyak nuh selos suc kuhlwacnsap ac ahkfuhlwact lin lohm sin Leum. Elos kuh in tuhpan in eis top ke pruhe, fwackyuck nuh selos sifacna, ahkyohkye luhlahlfongi, fokoko,puhla wo, ahkyohkye kahlwem, ac in ahkyohkye kuh.

Pacl kom sislah tempuhl uh kuh in kahsre kom in motko celestial ac in petsacelah aruhruhma se lah suc na pwacye kom uh, kom ac muh meac se, ac moul fuhkah se kom luhngse ne tok uh. Fahsri tempuhl pacl nuhkewa e ikacslah kahlwem inkacnek kom in liye kom sifacna ac kom oasr oyac ke plwacn wolacna luhn God. Nga olweah nuh sum ma se ingacn.

Olwelah pac nuh sesr lah lin tempuhl kuht kuh in “eis fohnlahiyacn Nguhn Muhtahl.”¹⁹ Nuhnkuh lah meah kalmen olwelah se ingacn ke e ikacklah inkuhsrao nuh sin kais sie ma kena suk ke ma pwacye ne tok uh.

Kuht lutiyuck lah elos nuhkewa ma alu in tempuhl uh kuh luhn God ac lipufacn weluhlos “karuhnguhnuhlosyang.”²⁰ Luhpah kah kapwack ke luhlahlfongi lowos in etuh lah, ekihn muhtwacn eis akwuck kuh mukul ma afihnyucki ke kuh luhn God, kom tiac enenuh in muhkena inkacnek lom? Kuh fuhkah se kom eis ke kom etuh lah lupufacn e fah arulacna kahsre kom?

Ma sahflah sacn, olwelah nuh sesr lah “wacngihn kuhpahsr luhn ma koluk” fah kuhtanguhloslac suc alu lin lohm sin Leum.²¹

In kahlwem ke ma wo luhn nguhn kuht kuh in eis tempuhl uh yohk srihpac nuh sesr kais sie misenge.

Tamuhlwel ac tahmtahel sacohk wiyuck, pa inge olwelah luhk. Wacngihn ma kuh in kahsre kom yohk in lihksreni sruokyac osra soko ah²² sahyacn ahkfuhlwact lom lin tempuhl pacl nuhkewa ke pacl kom kuh an. Wacngihn ma kuh in karihngihn kom yohk ke kom sun ohkohk luhn lohsr luhn facluh. Wacngihn ma kuh in ahkfokokoye luhlahlfongi lom kacl Jisus Kraist ac Iwaclah Lal kuh kahsre kom in kahlwem ke plwacn wolacna luhn God sahyac. Wacngihn ma kuh in ahkmihsye nguhn lom ke pacl in kweok sahyac. Wacngihn ma kuh in ikacslah inkuhsraho sahyac. Wacngihn!

Tempuhl pa motonac nuh ke mwe insewowo yohk se emet ma God el ahkolah nuh sesr kais sie, tuh tempuhl el acn se fana fin facluh ma kuht kuh in eis kewa mwe insewowo ma olwelah nuh sel Abraham.²³ Pa oruh kuht sang kuhiyacsr nohfohn, ye kolyuck luhn Leum, in oruh mwe insewowo ke tempuhl in sukohsohk nuh sin mempihr ke Alu uh. Ohinge, kuht engan in ahkkahlwemye lah kuht plwacni in muhsahi tempuhl sasuc ke acn 15 inge:

• Uturoa, French Polynesia

• Chihuahua, Mexico

• Florianópolis, Brazil

• osario, Argentina

• Edinburgh, Scotland

• Brisbane, Australia south area

• Victoria, British Columbia

• Yuma, Arizona

• Houston, Texas south area

• Des Moines, Iowa

• Cincinnati, Ohio

• Honolulu, Hawaii

• West Jordan, Utah

• Lehi, Utah

• Maracaibo, Venezuela

Tamuhlwel ac tahmtahel sacohklacna wiyuck, nga fahkwack lah pa inge Alu luhn Jisus Kraist luhn Mwet Luhlahlfongi Lal ke Lwen-sahflah. El pa kol uh. Kuht mwet tuhma lulut Lal.

Lwelah kuht in engakihn fohlohkihnyuckyak luhn ki luhn pristut ma oruh fihsrwacsr nuh sum ac nga in engan ke mwe insewowo luhn nguhn nuhkewa ma kuht luhngse ac nwacsnwacs in eis. Nga fahkwack ma inge ke ine muhtahl luhn Jisus Kraist, amen.

Mwe Kahsruh

1. Nga kanelah acn se alallah ke U luhn Mwet Sap Singucul Luo ke Jacnwacri 11, 1983, ke misac lal Elder LeGrand Richards. Elder Oaks el kanelah acn se luhlah ah ke Jacnwacri 11, 1984, misac lal Mark E. Petersen.

2. Septempuh 9, 1924.

3. Kihsac in sifwil muhsah Tempuhl Nauvoo Illinois sel Prestuhns Gordon B. Hinckley sikyak ke Jun 27, 2002, anniversary ahk 158 ke acnwucki Joseph ac Hyrum Smith.

4. Wik se na tukun Mwet Pahluh Joseph Smith el kihsaclah Tempuhl Kirtland.

5. Liye Doctrine and Covenants 110:3.

6. Liye Doctrine and Covenants 110:4.

7. Liye Doctrine and Covenants 110:7.

8. Liye Doctrine and Covenants 110:11.

9. Doctrine and Covenants 110:12. Ma se inge tahfweyac na olwelah Leum El oraclah nuh sel Abraham ke yac tausin meet ah (liye Genesis 18:18; 1 Nephi 15:18).

10. Liye Malachi 4:5–6.

11. Liye Doctrine and Covenants 110:13–16

12. Liye Doctrine and Covenants 13; 27:7–8, 12.

13. Liye Doctrine and Covenants 20:1–4.

14. Ke Leum el fahk nuh sel Joseph Smith lah we se inge pa pacl se ma “wacngihn ma kuh in sruokyucki” (Doctrine and Covenants 121:28), ma ke srihpen ki luhn pristut fohlohk nuh facluh.

15. Liye Doctrine and Covenants 95:8; 109:22.

16. Liye Doctrine and Covenants 132:45–46.

17. 2 Nephi 26:33; ahkuhtweyac wo ituckyang.

18. Liye Doctrine and Covenants 109:8.

19. Liye Doctrine and Covenants 109:15.

20. Liye Doctrine and Covenants 109:22.

21. Liye Doctrine and Covenants 109:24–26.

22. Kalmac pa kahs luhn God.

23. Liye Doctrine and Covenants 110:12; 132:29–30.