Olgeta Samting Bai Orait Bikos long ol Temple Kavanen
I nogat wanpela samting i moa impoten long onarim ol kavanen yu mekim o yu bai mekim long temple.
Ol brata susa bilong mi, dispela sesin bilong jeneral konferens em i wanpela sekred taim bilong mi. Mi amamas long toktok long planti milion Las-de Seint na ol poro long olgeta hap bilong wol. Mi lavim yupela, na mi save Bikpela lavim yupela.
Sampela 50-plus yias i go, Mi gat dispela privilis long sev olsem presiden bilong Ricks College, nau BYU–Idaho, long Rexburg, Idaho. Long moning bilong Jun 5, 1976, meri bilong mi, Kathy, na Mi draiv long Rexburg i go long Idaho Falls Temple long siling bilong wanpela gutpela poro. Wantaim fopela yangpela mangi, mipela no inap long mekim dispela wokabaut inap mipela painim wanpela gutpela bebisita! Mipela lusim ol pikinini long lukaut bilong em na mekim dispela sotpela, 30-minit draiv.
Ekspiriens long temple dispela de bin naispela tumas, olsem olgeta taim. Tasol, bihain long pinis bilong temple siling—na taim mipela redi long go bek long haus—mipela lukim planti ol temple wok lain na petron i guria na toktok long lobi bilong temple. Wanpela temple wokman i toksave long mipela olsem nupela Teton Dem long isten Idaho i bruk na pundaun! Moa long 80 bilion galon (300 milion kubik mita) wara i wok long ron kam thru long dem kam insait long 300 skwea mails (775 skwea km) ol ples daun arere. Planti hap bilong siti Rexburg i stap aninit long wara, ol haus na ol ka em bikpela wara i karim ol i go. Planti lain long 9000 ol manmeri long siti nogat ol haus nau.
Olgeta tingting na wari bilong mipela go long seifti bilong ol pikinini bilong mipela, planti ol kolij sumatin na skul, na komuniti mipela i lavim. Mipela stap olsem 50 km longwe long haus bilong mipela, na long dispela dei, em pastaim long ol cel pon na teks mesij, mipela nogat wei long toktok wantaim ol pikinini, na mipela i no nap long mekim dispela draiv long Idaho Falls i go bek long Rexburg, olgeta rot i pas.
Wanpela wei tasol em long stap long wanpela liklik hotel long Idaho Falls. Kathy na Mi nil daun long liklik hotel rum na wantaim daun pasin tok plis long Papa long Heven long seifti bilong ol pikinini na planti tausen ol narapela husat i kisim taim long dispela bagarap. Mi tingim Kathy wokabaut i go kam long bik moning, wantaim wari na i no bin slip gut. Maski mi bin wari tumas, bel bilong mi i stap isi na mi bin slip.
I no long taim em i kam na kirapim mi na i tok, “Hal, hau na yu slip long kain taim olsem?”
Ol dispela toktok i kam klia long bel na tingting bilong mi. Mi se wantaim meri bilong mi: “Kathy, maski wanem samting i kamap, olgeta bai orait bikos long temple. Yumi mekim ol kavanen wantaim God na sil pinis olsem famili bilong oltaim.”
Long dispela taim, em bin olsem Spirit bilong Bikpela i strongim bel na tingting bilong mitupela olgeta samting mitupela i save i tru: ol odinens bilong siling, istap insait long haus bilong Bikpela na yumi kisim wantaim stretpela prishud atoriti, i pasim yumi olsem man na meri, na ol pikinini i sil long mipela. Tru i no bin gat nid long pret, na bihain mipela i amamas long save olsem ol pikinini bin seif.
Ating dispela stetmen i kam long Presiden Thomas S. Monson i soim klia samting Kathy na mi pilim long dispela nait. “Taim yumi go long temple, yumi ken kisim gutpela spirit na piling bilong bel isi. … Bai yumi holim pas stret trupela mining bilong toktok bilong Seivia taim Emi tok: “Bel isi Mi lusim wantaim yu, bel isi bilong Mi, Mi givim long yu … Noken larim bel bilong yupela i hevi, noken larim em i pret [John 14:27].’”
Mi gat blesing long pilim dispela bel isi planti taim mi go insait long sekred temple. Mi tingim nambawan de mi go insait long Salt Lake Temple. Mi bin yangpela man.
Mi lukluk go antap long waitpela siling i mekim rum i lait i bin olsem i open long skai. Na long dispela taim, tingting i kam klia olsem: “Mi bin stap long hap i lait olsem bipo.” Tasol hariap tru tingting i kam long mi, i no long nek bilong mi, ol dispela tok: “Nogat, yu no bin kam long hia bipo. Yu tingim taim bipo long yu bon. Yu bin stap long wanpela sekred hap olsem we Bikpela bai kam.”
Ol brata na susa, mi testifai olsem taim yumi kam long temple, yumi tingim stap oltaim bilong spirit bilong yumi, stap bilong yumi wantaim Papa na Pikinini Man bilong Em, na laik long go bek long ples heven.
Long wanpela konferens toktok, Presiden Russell M. Nelson i tis:
“Seif hap long stap long spiritem stap insaitlong temple kavanen bilong yu!”
“Olgeta samting yumi bilipim na olgeta promis God i mekim long ol Kavanen pipol bai kam wantaim insait long temple.”
“Wanwan man husat i mekim kavanen … insait long temples—na kipim ol—i gat moa wei long kisim pawa bilong Jisas Krais.”
Em i tis tu olsem “taim yumi mekim kavanen wantaim God, yumi lusim olgeta pasin bilong sanap namel. God bai no inap lusim stap bilong Em wantaim ol lain husat i mekim dispela wantaim Em. Olgeta husat i mekim kavanen wantaim God i gat rot long wanpela spesel kain lav na marimari.”
Aninit long lidasip bilong Presiden Nelson, Bikpela i hariapim, na bai go het long hariapim, wok bilong bildim ol temple long olgeta hap bilong wol. Dispela bai larim olgeta pikinini bilong God i kisim ol odinens bilong salvesen na eksaltesen na long mekim na kipim ol sekred kavanen. Long kamap long mak bilong kisim sekred kavanen i no samting bilong wanpela taim tasol em i bilong olgeta laiptaim. Bikpela i tok em bai kisim olgeta bel bilong yumi, bun, tingting na strong.
Kam long temple olgeta taim bai kamapim wanpela paten bilong divosen i go long Bikpela. Taim yu kipim temple kavanen bilong yu na tingim ol, yu invaitim Holi Gos long strongim yu na klinim yu.
Yu bai kisim dispela piling bilong lait na hop testifai olsem ol promis i tru. Yu bai kam long save olsem olgeta kavanen wantaim God em i opotuniti long kam klostu long Em, na bai kamapim laik insait long bel bilong yu long kipim ol temple kavanen.
Yumi gat promis, “Bikos long kavanen wantaim God, Em bai no inap taiyet long helpim yumi, na yumi bai no inap tru sot long marimari na gutpela pasin bilong Em.”
Thru long ol siling kavanen insait long temple yumi ken kisim gutpela piling bilong ol famili koneksen bai go yet bihain long yumi dai long laip oltaim. Taim yumi onarim ol kavanen bilong marit na famili yumi mekim insait long temple God bai banisim yumi long ol pasin nogut.
Gutpela lukaut bilong ol brata susa long wanpela narapela bai kam wantaim gutpela wok long lidim famili long wei bilong Bikpela. Givim ol pikinini opotuniti long pre long wanpela narapela. Lukim klia stat bilong ol kros, na luksave gut long ol gutpela pasin, moa yet long wanpela narapela. Taim ol brata susa i pre long wanpela narapela, ol bel bilong ol bai malumalu na tanim long ol yet na long ol papamama.
Dispela em i Malachi i toktok long en taim em i profesai long profet Elijah: “Em bai planim long ol bel bilong ol pikinini ol promis emi mekim long ol pikinini, na bel bilong ol pikinini bai tanim i go long ol papa bilong ol. Sapos i no olsem, olgeta ples graun bai weist nating taim em i kam bek.
Ol traim, salens, na bel hevi bai kam yet long yumi olgeta. Nogat wanpela long yumi i no nap long kisim ol “nil [bilong] mit bilong bodi.” Tasol, taim yumi kam long temple na tingim ol kavanen, yumi ken redi long kisim ol daireksen i kam long Bikpela.
Taim Kathy na Mi i marit na sil long Logan Utah Temple, Elda Spencer W. Kimball long dispela taim i bin mekim siling. Liklik toktok em i givim, em i givim kaunsel bilong em: “Hal na Kathy, stap so taim singaut i kam, yu ken wokabaut i go isi.”
Pastaim, mipela i no klia gut wanem dispela kaunsel i minim, tasol mipela traim long stap long gutpela wei na redi long sevim Bikpela taim singaut i kam. Bihain long mipela i marit 10 pela yias, wanpela singaut bin kam long Komisina bilong Sios Edukesen, Neal A. Maxwell.
Dispela kaunsel Presiden Kimball bin givim long temple long gat strong long “wokabaut i go na lusim” i kamap tru. Kathy na Mi i kisim wanpela kol long lusim dispela naispela hap long California long sevim wanpela asainmen long wanpela ples mi no save long en. Tasol,famili bilong mipela i redi long lusim bikos profet, long holi temple, ples bilong autim tok, i lukim bihain taim bilong mipela i i bin redim mipela.
Ol dia brata na susa, Mi berim witnes i no gat wanpela samting i moa impoten long onarim ol kavanen yu mekim o yu bai mekim long temple. Wanem hap yu stap long dispela kavanen rot, Mi singautim yupela long kisim mak na kamap redi long go long temple. Go long temple olgeta taim yu gat sans. Mekim na kipim ol sekred kavanen wantaim God. Mi ken tokim yu long dispela wankain toktru mi bin serim wantaim Kathy long biknait klostu faipella 10 yias i go pinis long liklik hotel rum long Idaho Falls : “Wanem samting i kamap, olgeta samting bai orait bikos long temple.”
Mi givim yupela strongpela witnes olsem Jisas em i Krais. Em i stap na lidim Sios bilong Em. Ol Temple em ol haus bilong Bikpela. Presiden Russell M. Nelson em i profet bilong God long ples graun. Mi lavim em, na mi lavim yupela wanwan. Long sekret nem bilong Jisas Krais, amen.