Strongpela, Stretpela Saikol bilong Doktrin bilong Krais
Mi invaitim yupela long bihainim doktrin bilong Krais olgeta taim na mekim gut na helpim ol narapela tu.
Sampela yias i go, meri bilong mi, Ruth, pikinini meri, Ashley, na Mi igo wantaim ol turis long wanpela kayak ekskesen long Hawaii United States. Kayak em i liklik bot olsem kanu we man i pul bai sindaun pesim poret na yusim pul i gat tupela bled na pulim long fran i go long baksait long wanpela sait na narapela sait. Plen em bin long pul i go long tupela liklik ailan ausait long Oahu na kam bek. Mi pilim olsem mi save bikos, olsem yangpela man, mi pul long kayak long maunten raun wara. Pasin bilong ting olsem i no gutpela ah?
Gaid bilong mipela i givim ol instraksen na soim mipela ol kayak mipela bai yusim. Ol i narakain long ol dispela mi bin pul long ol bipo. Mi mas sindaun antap long kayak, na i no insait long en. Taim mi go antap long kayak, mi no pilim gut, na mi no sindaun gut insait long wara.
Taim mipela i stat, mi pul strong moa long Ruth na Ashley. Bihain liklik mi stap long we tru long ol. Maski mi pilim olsem mi save tumas, mi stop na wetim ol long painim mi. Bikpela weiv—olsem, 13 sentimitaspaitim kayak bilong mi na salim mi go insait long wara. Taim mi tanim kayak na traim long go bek antap, Ruth na Ashley i go pas long mi, tasol mi sot win long pul gen. Mi no kisim gut win yet, narapela weiv i kam, dispela i bikpela moa—olsem, ating 20 sentimitapaitim kayak bilong mi na mi tanim go gen. Long taim mi tanim kayak gut, mi sot win nogut tru mi pret mi bai no inap long go antap.
Gaid i lukim mi, em i pul kam na stretim kayak bilong mi, mekim isi long mi long go antap. Taim em i lukim mi sot win yet na i no inap long pul mi yet, em i pasim rop long kayak bilong mi na stat long pul, na pulim mi wantaim. I no long taim, Mi kisim win gut na stat long pul mi yet. Em lusim rop, na mi kamap long nambawan ailan mi yet. Mi kamap, mi pundaun long wesan, mi sot win tru.
Bihain long grup i malolo, gaid toktok isi long mi, “Mista. Renlund, sapos yu pul, long sem spid,ating bai yu orait.” Mi bihainim tok bilong em taim mipela pul i go long nambatu ailan na go bek long hap mipela i stat. Tupela taim gaid i pul go pas na tokim mi mi mekim gut. Ol bikpela weiv i paitim kayak bilong mi long sait, tasol mi no kapsait.
Mi pul long kayak gut stret, mi meinteinim dispela spid, mi abrusim ol weiv i paitim mi long sait. Dispela wankain rul i aplai long spiritual laip bilong yumi. Yumi kamap wik taim yumi slo daun na moa yet taim yumi stop. Sapos yumi meinteinim spiritual momentum taim yumi “pul” i go long Seivia, yumi bai seif na orait bikos laip oltaim bilong yumi i stap long feit long Em.
Spiritual momentum i kamap “long laip taim yumi olgeta taim holim pas doktrin bilong Krais.” Taim yumi mekim olsem Presiden Russell M. Nelson i tisim, i kamapim strongpela stretpela saikol.” Tru, ol bikpela samting long doktrin bilong Krais—olsem feit long Bikpela Jisas Krais, tanim bel pasin, go insait long kavanen wantaim Bikpela long baptisim, kisim presen bilong Holi Gos, na stap strong i go long pinis—i no min yu bai kisim long wanpela taim tasol na tikim boks. Moa yet, “long stap strong i go long pinis” i no wanpela narapela step insait long doktrin bilong Krais—olsem yumi mekim olgeta fopela na bihain yumi sindaun isi, kaikai tit na weit long dai. Nogat, stap strong i go long pinis em long ripitim na mekim gut ol samting long doktrin bilong Krais, kamapim “strongpela, stretpela saikol” Presiden Nelson i tok long en.
Ripitim i min olsem yumi ekspiriensim ol dispela samting long doktrin bilong Krais gen na gen long laip bilong yumi. Mekim gen na gen i min yumi mekim wok gut olgeta taim yumi mekim gen. Maski yumi ripitim ol dispela samting, yumi no spin nating nating. Nogat, yumi kam moa klostu long Jisas Krais olgeta taim long dispela saikol.
Momentum i nidim spid na daireksen. Sapos mi bin pul long kayak strong tru long rong daireksen, mi nap kamapim gutpela momentum, tasol mi bai no inap kamap long hap mi laik go. Wankain olsem, long laip, yumi nid long “pul” i go long Seivia long kam long Em.
Feit bilong yumi long Jisas Krais i mas kisim gutpela kaikai olgeta de. Em i gutpela taim yumi pre olgeta de, stadim ol skripsa olgeta de, lukluk bek long gutpela pasin bilong God olgeta de, tanim bel olgeta de, na bihainim ol prompting bilong Holi Gos olgeta de. Olsem tasol i no helti long lusim olgeta kaikai go long Sande na bai yumi pulapim bel wantaim ol gutpela kaikai, em i no helti long spirit long lusim olgeta testimoni na gutpela kaikai bilong spirit long wanpela de long wik.
Taim yumi kisim wok long testimoni bilong yumi, yumi kisim spiritual momentum na isi isi kamapim strongpela feit long Jisas Krais, na dispela doktrin bilong Krais i kamap namel tru bilong laip. Momentum bai strong taim yumi traim long bihainim ol lo bilong God na tanim bel. Tanim bel pasin i givim amamas long yumi long lainim long ol mistek bilong yumi, em hau yumi bai go long laip oltaim.15 I gat ol taim we yumi bai kapsait long ol kayak na painim yumi yet insait long dip wara. Long pasin tanim bel, yumi ken go bek antap na go yet, maski hamas taim yumi bai kapsait. Impoten samting em olsem yumi noken givap.
Narapela samting long doktrin bilong Krais em baptisim, i gat baptisim long wara na, long konpemesen, baptisim bilong Holi Gos. Baptisim i save kamap wanpela taim, yumi save riniwim baptisim kavanen taim yumi kisim sakramen. Sakramen i no kisim ples bilong baptisim, tasol i konektim i go long doktrin bilong Krais—feit na tanim bel—na kisim Holi Gos Taim yumi kisim sakramen, yumi invaitim Holi Gos kam insait long laip bilong yumi,olsem taim yumi baptais na kisim konpemesen. Taim yumi kipim ol kavanen olsem i stap long sakramen prea, Holi Gos bai kamap poro bilong yumi.
Taim Holi Gos i putim bikpela influens long laip bilong yumi, yumi bai go het na kamapim ol pasin bilong Krais. Bel bilong yumi bai senis. Temtesen long wokim nogut bai pinis. Laik long mekim gutpela pasin bai bikpela inap yumi bai “mekim gutpela pasin olgeta taim.” Na yumi bai kisim dispela pawa bilong heven long stap strong i go long pinis. Feit bilong yumi i bikpela, na yumi redi long ripitim dispela strongpela, stretpela saikol gen.
Spiritual momentum i go fowod i mekim yumi mekim moa kavanen wantaim God long haus bilong Bikpela. Ol kavanen pulim yumi klostu long Krais na konektim yumi strong moa long Em. Thru long ol dispela kavanen, yumi gat wei long pawa bilong Em. Yumi mas klia, baptisim na temple kavanen i no , dispela sos bilong pawa. Sos bilong pawa em Bikpela Jisas Krais na Papa bilong yumi long Heven. Mekim na kipim ol kavanen i kamapim rot long pawa bilong ol long laip bilong yumi. Taim yumi stap bihainim ol dispela kavanen. yumi bai kisim olgeta samting Papa long Heven i gat. Dispela momentum i kamap taim yumi bihainim doktrin bilong Krais i no givim yumi pawa tasol long senis tasol i mekim yumi helpim ol narapela long ol gutpela rot.
Tingim hau gaid i bin helpim mi bihain long mi kapsait long kayak. Em no bin singaut na tok samting nogut, olsem, “Mista. Renlund, yu wokim wanem insait long wara?” Em no bin pul i kam na tokim mi, “Mista. Renlund, yu bai no nap olsem sapos yu fit.” Em no bin stat long pulim kayak taim mi wok long go antap long en. Em i no bin tokim mi long ai bilong ol narapela. Tasol, em i helpim mi long taim mi nidim. Em i givim mi advais taim mi redi long kisim. Na em i go het long enkarisim mi.
Taim yumi minista long ol narapela, yumi noken askim ol kwesten i no nap long helpim ol. Planti lain husat i painim hat taim i save olsem ol i stap long hat taim. Yumi noken jasim ol, jasmen bilong yumi i no nap long helpim ol na planti taim i no gutpela.
Komperim yumi long ol narapela i ken mekim yumi mekim ol rong, moa yet sapos yumi ting yumi stret moa long ol narapela. Kain pasin em olsem yu draun insait long 3 mitas wara, lukim lain bilong yu draun long 4 mitas wara, jasim em olsem sin man, na yu pil gud yu yet. Yumi olgeta i painim hat long wei bilong yumi yet. Yumi no inap kisim salvesen olsem pe. Yumi no inap. Jekop, long Buk Momon, i tis, “Tingim, bihain [yumi] go bek long God, dispela em i wanpela wei long go insait na thru long marimari bilong God [yumi] bai seiv.” Yumi olgeta nidim Atonmen bilong Seivia, na ino liklik hap tasol.
Yumi bringim kam bel sore, na lav taim yumi bungim ol narapela istap wantaim yumi. Ol lain husat i stragel “nid long ekspiriensim piua lav bilong Jisas Krais i stap long ol toktok bilong [yumi] na ol eksen.” Taim yumi minista, yumi enkarisim ol narapela olgeta taim na givim helpim. Sapos wanpela i no laik harim, yumi mas go het long minista long liklik taim ol i harim. Seivia i tis olsem “long ol dispela yu mas go het long minista; bilong wanem yu no save wanem taim ol bai kam bek na tanim bel, na kam long mi wantaim olgeta bel bilong ol, na mi bai oraitim ol, na yu bai kamap wei bilong bringim salvesen i go long ol.” Wok bilong Seivia em long mekim orait. Wok bilong yumi long lav—long lavim na minista long wei ol narapela bai kam long Jisas Krais. Dispela em i wanpela prut bilong pawaful, stretpela saikol bilong doktrin bilong Krais.
Mi invaitim yupela long bihainim doktrin bilong Krais olgeta taim na mekim gut na helpim ol narapela tu. Mi testifai olsem doktrin bilong Krais i namel tru long plen bilong Papa long Heven, dispela em i doktrin bilong Em. Taim yumi eksasaisim feit long Jisas Krais na Atonmen bilong Em, yumi tanim go long kavanen rot na kisim strong long helpim ol narapela kamap feitful disaipol bilong Jisas Krais. Yumi ken kamap ol lain bai kisim kingdom bilong Papa long Heven, dispela em i mak bilong feitful na stap insait long doktrin bilong Krais. Long nem bilong Jisas Krais, amen.