Ahyɛmudzi na Asodzi horow
Jesus Christ N’Asɔr wonyim no dɛ asɔr a wosi do kã enye Nyankopɔn ridzi ahyɛmu ho asɛm yie.
“Osi dɛn na w’Asɔr yɛ soronko kyɛn nkaa no?” Mo mbuae ma asɛmbisa yi a ohia yi asesã ber a menyin na ber a Asɔr no ayɛ kɛse. Ber a wɔwoo me wɔ Utah afe 1932 mu no, nna hɛn Asɔrmba hɔn dodow yɛ bɛyɛ 700,000 pɛr, a hɔn mu dodowara aboa ano wɔ Utah na amansin a ɔbɛn no. Dɛm aber no nna yɛwɔ temple 7 pɛr. Ndɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba hɔn dodow bor ɔpepe 17 wɔ aman 170 mu. Dze besi Ebɔbira 1 no yɛwɔ temple dodow 189 a woetu ahyɛ Nyame nsa wɔ aman pii mu na 146 so a wɔwɔ nhyehyɛɛ na adansi. Menya atsenkã dɛ menkasa mfa temple horow yinom botae na abakɔsɛm na asɛdze a ahyɛmudzi wɔ hɛn som mu. Iyi bɔto nkenyan akyerɛkyerɛ hɔn a woedzi kan akasa no do.
I.
Ahyɛmu yɛ enyimpi si bi dɛ ibɛhyɛ asodzi binom mã. Ankorankor enyimpi si hia papaapa dze ahwɛ hɛn ankorankor abrabɔ do na ama ɔman akɔ do. Adwenkyerɛ yi sesei wɔregye ho kyim. Kuw kakrabaa a hɔn ano kɔ ekyir tsia ɔman mu etumdzifo na wɔkã no ketsee dɛ onnyi dɛ nyimpa biara nya nsiwdze a obotwa n’ankorankor fahodzi do. Naaso yenyim fi mfe mpem pii sũahu mu dɛ yegyaa hɛn ankorankor fahodzi bi mu dze enya mfaso dze atsena sɔn a wɔayɛ nhyehyɛɛ mu. Yerigyaa ankorankor fahodzi mu no ne kɛse ara gyina enyimpi si anaa ahyɛmudzi horow, a wɔakã anaa wɔtse ase do.
Ahyɛmudzi asodzi ho mfatoho binom wɔ hɛn ɔman mu nye yi: (1) atsɛmbuafo, (2) nsordaafo, (3) eduyɛfo na (4) odumgyafo. Hɔn a wɔwɔ edwuma horow yi a yenyim no si enyimpi—wɔtaa dze nsewdzi anaa ahyɛmudzi dze kyerɛw to hɔ—ama wɔdze aayɛ hɔn edwuma a wɔdze ama hɔn no. Dɛm ara so yɛ nokwar ma etuhoakyɛ asɛmpasomafo no. Ntarhyɛ a ɔda edzi anaa dzin ahyɛnsewdze no no botae nye ɔbɛkyerɛ dɛ nyia ɔhyɛ no wɔ ahyɛmudzi ase na dɛm ntsi ɔyɛ n’asodzi dɛ ɔkyerɛkyerɛ adze na ɔsom na ɔsɛ dɛ wɔma hɔn abamba wɔ dɛm som no mu. Botae bi so a ɔfa ho nye ɔbɛkaa hɔn a wɔhyehyɛ no wɔ hɔn ahyɛmudzi asodzi horow ho. Nkongyaa biara nnyi hɔn atarhyɛ soronko anaa nsɛnkyerɛdze no mu, ɔyɛ nkaa ara a ohia wɔ asodzi tsitsir a hɔn a wɔhyehyɛ no agye ato hɔn do no. Iyi so yɛ nokwar ma engagement na awar mpatsea ngyinahɔmadze na hɔn asɛdze dɛ ɔhyɛ ahwɛfo no nsew anaa ɔkaa hɔn a wɔhyehyɛ no hɔn ahyɛmudzi asodzi horow.
II.
Dza makã afa ahyɛmudzi a ɔyɛ fapem a wɔdze hwɛ ankorankor abrabɔ do no fa nkanka nyamesom ahyɛmudzi ho. Nyamesom ekuwmba na hɔn ahwehwɛdze hɔn fapem na abakɔsɛm no gyina ahyɛmudzi do. Mfatoho, Abraham n’ahyɛmu no yɛ nyamesom ekuw akɛse pii hɔn amambra ne fapem. Oyi adwenkyerɛ krɔnkrɔn a Nyankopɔn nye Ne mba bɔ wɔ anohoba mu no enyim. Ahyɛmu Dadaw no taa kã Nyankopɔn N’ahyɛmu a Ɔnye Abraham na n’asefo dzii ho asɛm.
Mormon Nwoma n’afã a odzi kan no, a wɔkyerɛɛw no wɔ Ahyɛmu Dadaw ber mu no, da ahyɛmudzi n’asɛdze pefee wɔ Israelfo abakɔsɛm na nyamesom mu no edzi. Wɔkãa kyerɛɛ Nephi dɛ Israelfo hɔn dɛm aber no mu nkyerɛwee no yɛ “Jewfo ho abakɔsɛm no a ɔfa Ewuradze n’ahyɛmu a ɔnye Israel fifo edzi no ho.” Nephi nwoma no taa kã Abraham ahyɛmu no ho nsɛm na ɔfrɛ Israel dɛ “Ewuradze n’ahyɛmu mba no.” Ntɔyɛɛ a wɔnye Nyankopɔn anaa nyamesomfo baanodzifo dzii ahyɛmu no wɔakyerɛw ho asɛm so wɔ Mormon Nwoma mu a ɔfa Nephi, Joseph a ɔwɔ Egypt, Ɔhen Benjamin, Alma, na Ɔsahen Moroni ho.
III.
Ber a Jesus Christ n’asɛmpa no ne mãhyɛ ne Nsanananmu ne ber no durii no, Nyankopɔn frɛɛ nkɔnhyɛnyi, Joseph Smith. Yennyim dza ɔwɔ ahyɛdze a Moroni dzi maa nkɔnhyɛnyi aberantsɛba a ɔreyɛ panyin ne nyina. Yenyim dɛ ɔkãa kyerɛɛ Joseph dɛ “Nyame wɔ dwumadzi bi dze ma [no]” dɛ otwar dɛ “ Asɛmpa ne mãhyɛ a ɔwɔ hɔ daapem no” wɔdze pue guado, a “anohoba a wɔdze bɔɔ egyanom” no kã ho. Yenyim so dɛ kyerɛwsɛm a aberantsɛba Joseph kenkaan no papaapa—ansaana wɔrekyerɛ no ma ɔakyekyer asɔr no—yɛ nkyerɛkyerɛ pii a ɔfa ahyɛmudzi a ɔrekyerɛ ase wɔ Mormon Nwoma mu no ho. Dɛm nwoma no nye Nsanananmu no n’asɛmpa ne mãhyɛ ne farbaa kɛse, a Nyankopɔn ne nhyehyɛɛ ma Ne mba, na Mormon Nwoma no ahyɛmudzi ho ntõtõho hyɛ mu mã.
Nna ɔkenkan Bible ara yie no, otwar dɛ nna Joseph nyim Hebrew nwoma a ɔkã Agyenkwa no botae ho dɛ “menye Israel fi na Judah fi bedzi ahyɛmu fofor.” Hebrewfo kyerɛ so dɛ Jesus nye “ahyɛmu fofor ho ntamugyinafo.” Nokwar ara dɛ, Bible mu asɛm a ɔfa Agyenkwa no honanduamu som no ne dzin nye “Dasegye Fofor no,” a ogyina hɔ ma “Ahyɛmu Fofor no.”
Ahyɛmudzi horow yɛ fapemdze wɔ asɛmpa Nsanananmu mu. Ɔda edzi wɔ ahyɛase koraa no, kwan a Ewuradze kyerɛɛ Nkɔnhyɛnyi no dɛ ɔmfa do nkyekyer N’Asɔr. Wɔdze Mormon Nwoma puee guado no annkyɛr na Ewuradze kyerɛɛ N’Asɔr no a wɔdze asan ananmu aba ne nkyekyeree, a ɔnnkɛkyɛr na wɔafrɛ no Jesus Christ N’Asɔr a ɔwɔ hɔ ma Nda a Odzi Ekyir Ahotseweefo. Nyikyerɛ a wɔkyerɛɛw no Ebɔbira 1830 mu no kyerɛɛ dɛ ɔsɛ dɛ wodua enuma mu gye nyimpa ba n’asɔr mu “[ɔ]agye dase” (a ɔkyerɛ dɛ ɔgye dase nokwar mu) “dɛ woenu hɔnho nokwar mu wɔ hɔn bɔn nyinara ho, na wɔpɛ dɛ wɔfa Jesus Christ ne dzin to hɔn do, na wɔagye ato mu dɛ wɔbɔsom no akɔ ewiei no.”
Nyikyerɛ kor yi ara kyerɛɛ dɛ Asɔr no ohia dɛ “[wo]hyia mu mpɛn pii na wodzi paanoo na wɔnom wenyin [nsu] no dze kaa Ewuradze Jesus.” Ayɛdze yi no ho hia a ohia no da edzi wɔ ayɛdze nsɛmfua a wɔakyerɛw ama elder anaa sɔfo a ɔhwɛ do no. Ohyira paanoo ne sɛnkyerɛdze no do ma “ma akra a wobedzi nyina … , ama … wɔagye dase dze ama wo, O Nyankopɔn, Onnyiewiei Egya, dɛ woenya pɛ dɛ wɔbɛfa wo Ba ne dzin ato hɔn do, na wɔakaa no aber nyina na woedzi ne mbrasɛm a ɔdze ama hɔn no do.”
Ahyɛmudzi horow no botae tsitsir wɔ Asɔr fofor a wɔdze asan ananmu aba no wosii no pi wɔ nyienyim a Ewuradze dze maa Ne nyikyerɛ a wodzii kan dze pue guado no. Hɔ no Ewuradze paa mu kã dɛ Ɔafrɛ Joseph Smith osiandɛ adasamba “woefi me nhyehyɛɛ ho, na wɔatõ m’ahyɛmu a ɔwɔ hɔ daapem no.” Nyikyerɛ yi kyerɛkyerɛmu bio dɛ wɔdze Ne mbrasɛm mae “ama wɔaada m’ahyɛmu a ɔwɔ hɔ daapem no edzi.”
Ndɛ yɛtse ahyɛmudzi asɛdze wɔ Asɔr no a wɔdze ananmu aba na asɔrmba hɔn asɔryɛ. President Gordon B. Hinckley twaa hɛn enuma na hɛn dapɛn dapɛn sacrament a yedzi ho nsunsuando no tsia dɛ: “Asɔrba biara a oesian enuma esu mu no abɛkã ahyɛmu krɔnkrɔn ho. Ber biara a yedzi Ewuradze edzidzi ne sacrament no, yekenyan dɛm ahyɛmu no.”
Hɔn a wɔakasa wɔ ehyiadzi yi ase no akaa hɛn dɛ President Russell M. Nelson taa kã dɛ nkwagye ho nhyehyɛɛ no dɛ ɔyɛ “ahyɛmu anamɔn kwan” a ogya hɛn dze san kɔ [Nyame] nkyɛn” na “ne nyina fa hɛn nkitahodzi a yɛnye Nyame wɔ ho.” Ɔkyerɛkyerɛ ahyɛmudzi wɔ hɛn temple nhyiamu horow no na otu hɛn fo dɛ yɛnhwɛ ewiei fi ahyɛse no na “yɛndwen celestial adwen.”
IV.
Afei mekasa fa temple ahyɛmudzi horow ho. Nkɔnhyɛnyi Joseph Smith dzii ne mfe a odzi ewiei no mu dodow dze maa akwankyerɛ wɔ Nauvoo, Illinois temple ne nsii ho dze hyɛɛ n’asodzii mã dɛ ɔdze Jesus Christ asɛmpa ne mãhyɛ no bɛsan ananmu aba. Ewuradze duaa no do yii nkyerɛkyerɛ krɔnkrɔn, nkyerɛkyerɛ na ahyɛmudzi horow dze kyerɛe maa hɔn a wodzi n’ekyir no ma wɔdze edzi dwuma wɔ temple. Hɔ no nkorɔfo a wɔmaa hɔn akyɛdze na ɔwɔ dɛ wɔkyerɛkyerɛ hɔn Nyankopɔn no nkwagye ho nhyehyɛɛ na wɔto nsa frɛɛ hɔn ma wodzi ahyɛmudzi horow krɔnkrɔn. Hɔn a wɔdze dɛm ahyɛmudzi no bɔɔ bra nokwar mu no wɔdze onnyiewiei nkwa bɔɔ hɔn anohoba, a “ndzɛmba nyina yɛ hɔndze” na “wɔbɛtsena Nyame nye ne Christ no hɔn enyim afebɔɔ kesi afebɔɔ.”
Endowment ayɛdze wɔ Nauvoo Temple mu no wɔdze maa hɛn asɔpɔkan edzikamfo no a wotuu hɔn ma wɔdze kɛhyɛɛ hɔn akwantu a wɔayɛ atsenkã kɔ Anee mbepɔw no ase. Yɛwɔ dasegye fi edzikamfo ii no hɔ dɛ tum a wonyae fi wɔkyekyeer hɔn faam Christ ho wɔ hɔn endowmentwɔ Nauvoo Temple no, maa hɔn ahoɔdzen ma wɔdze tuu hɔn akwantu a wɔayɛ atsenkã na wɔkɛtahyee wɔ Anee.
Nkorɔfo a wɔagye hɔn endowmentwɔ temple mu no wɔ asodzi dɛ wɔhyɛ temple garment, atar a wonnhu osiandɛ wɔhyɛ no atar ase. Ɔkaa asɔrmba a wɔagye hɔn endowment no ahyɛmudzi krɔnkrɔn a woedzi na nhyira a wɔdze abɔ hɔn anohoba wɔ temple krɔnkrɔn mu. Ama nsa eetum aakã dɛm botae krɔnkrɔn no, wɔma hɛn ahyɛdze dɛ yɛbɛhyɛ temple garment no aber nyina, a gyinabew horow a ɔnnkã ho yɛ dza ɔsɛ ankasa no. Osiandɛ ahyɛmudzi “nngyaa dakor mpo” no, sɛ obi yi ne garment a nna wobotum atse ase dɛ ɔatwe noho efi ahyɛmu asodzi na nhyira horow a ɔfa ho no. N’afã no, nkorɔfo a wɔhyɛ hɔn garment nokwar mu ara na wosie hɔn temple ahyɛmudzi kɔ do si hɔn asɛdze do Ewuradze Jesus Christ esũafo no pi.
Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no risisi temple pii wɔ wiadze nyina mu. Hɔn botae nye dɛ wɔdze temple sɔr na asodzi krɔnkrɔn na tum na nhyira soronko horow a wɔnye Christ kyekyer na wodua ahyɛmudzi do gye no.
Jesus Christ N’Asɔr wonyim no dɛ asɔr a wosi do kã enye Nyankopɔn ridzi ahyɛmu ho asɛm yie. Ahyɛmudzi kã nkwagye na nkwagye ntowdo ayɛdze biara a Asɔr a wɔdze asan ananmu aba no dze ma no. Enuma ayɛdze na ahyɛmudzi a ɔfam ho no yɛ ahwehwɛdze a wɔdze hɛn celestial ahenman no mu. Temple ayɛdze no na ahyɛmudzi a ɔfam ho no yɛ ahwehwɛdze a ama eenya nkwagye ntowdo wɔ celestial ahenman mu, a ɔyɛ onnyiewiei nkwa, akyɛdze a ɔsõ kyɛn Nyame n’akyɛdze nyina.” Ɔno na Jesus Christ N’asɔr a ɔwɔ hɔ ma Nda a Odzi Ekyir Ahotseweefo no tsim do.
Megye dase dɛ Jesus Christ, a ɔyɛ dɛm Asɔr no ne tsir no, na medze Ne nhyira ma hɔn a wɔhwehwɛ dɛ obesie hɔn ahyɛmudzi krɔnkrɔn no. Jesus Christ ne dzin mu, amen.