Dwen Celestial Adwen
Wo nsanmuyi horow bɛkyerɛ bea a ibɛtsena daapem, nyimpadua kor a edze bɔsoɛr efi owu mu, na hɔn a enye hɔn bɛtsena afebɔɔ.
Mo nuanom na nkyerɛbaa, ɔyɛ me enyigye dɛ menye hom kasa ndɛ. Me mfe a meedzi yi, dakor biara dze ndzɛmba nwanwa na dza ɔhaw so ba. Adapɛn ebiasa a abɛsen no. Mipiraa m’ekyir ntsin no. Ntsi, ber a maama wiadze mfɛndzanan ehyiadzi kasa 100 na no mboree a migyinaa m’anan do no, ndɛ modween ho dɛ mebɛtsena ase ayɛ. Mobɔ mpaa dɛ Sunsum no dze m’asɛm no bɔkɔ hom akoma mu ndɛ.
Ndaansa yi ara na midzii me mfe 99 awoda na mahyɛ me mfe 100 abrabɔ ase. Wɔtaa bisa me esumasɛm a wɔdze tsena ase kyɛr. Asɛmbisa a oye nye “Ebɛnadze na meesũa wɔ me mfe bɛyɛ ɔha abrabɔ mu?
Mber a ɔwɔ hɔ ndɛ no remma me kwan ma minnyi asɛmbisa no ano yie, mbom mebɛkyɛ adzesũadze tsitsir kor a meesũa.
Meesũa dɛ Ɔsor Egya ne nhyehyɛɛ ma hɛn no yɛ nwanwa dodow, dɛ dza yɛyɛ no abrabɔ yi mu no hia ampaara, na dɛ Agyenkwa No Werdambɔ no ma Egya ne nhyehyɛɛ no tum ba mu.1
Ber a menye yaw yaayaw a me ndaansa yi mu pira dze bae ridzi aper no, meenya enyisɔ ama Jesus Christ No Werdambɔ akyɛdze a yennkotum aatse ase no ara yie. Dwen ho! Agyenkwa no “ɔatse yaw na oehu amandze na [o]enya nsɔhwɛ ahorow biara bi”2 ama Oeetum akyekye hɛn werɛ, Ɔasa hɛn yarba, na Ɔagye hɛn wɔ ahohia mber mu.3 Jesus Christ kãa dza Oduaa mu wɔ Gethsemane na Calvary ho asɛm dɛ: “Amandzehu a ɔmaa emi a meyɛ Nyame a mo sõ sen obiara mpo no, moho popoe, osian yaw ntsi, na bɔgya fii mo honandua enyi nyina kyĩi.”4 Me pira no ama maadwendwen “Israel Krɔnkrɔnyi No ne kɛseyɛ ” ho mpɛn pii.5 M’ayarsa mu yi, Ewuradze ada No ɔsor tum edzi wɔ asomdwee na akwan horow a ɔda edzi pefee mu.
Osian Jesus Christ No Werdambɔ a onnyiewiei ntsi, hɛn Ɔsor Egya ne nhyehyɛɛ no yɛ emudzi nhyehyɛɛ! Nyankopɔn ne nhyehyɛɛ nwanwa kɛse no ho ntseasee no yi abrabɔ mu esumasɛm na hɛn ndaamba ne pi si ho ekyingye fi hɔ. Ɔma hɛn mu kor biara kwan ma ɔsan mu yi mbrɛ yebesi bɛtsena asaase yi do na bea a yɛbɛtsena afebɔɔ. Adwenkyerɛ a onnyi ngyinado dɛ ɔsɛ dɛ “[ye]dzidzi, [yɛ]nom, na ma [hɛn] enyi gye, osiandɛ ɔkyena na yewu; na obesi hɛn yie”6 yɛ ator kor a mfaso nnyi mu wɔ wiadze yi mu.
Nyankopɔn ne nhyehyɛɛ ho nsɛmpa kɛse nye yi: ndzɛmba kor noara a ɔma wo honandua mu abrabɔ kɔ do yie ankasa no botum wɔayɛ ndzɛmba kor noara a ɔbɛma w’abrabɔ afebɔɔ ber mu no akɔ do yie no ankasa! Ndɛ, ama wɔaaboa wo ma aafata nhyira horow a Ɔsor Egya wɔ ma wo no, moto nsa frɛ wo dɛ fa ndzeyɛɛ dzi dwuma dɛ “ebɔdwen celestial adwen”!7 Erodwen celestial adwen nye irinya sunsum mu adwen. Yesũa fi Mormon Nwoma mu nkɔnhyɛnyi Jacob dɛ “sunsum adwen yɛ nkwa a onnyiewiei.”8
Honandua mu abrabɔ yɛ adzesũabea mapã a yɛdze san mu yi ndzɛmba horow a ho hia kɛsenara onnyiewiei mu. Nkorɔfo dodowara na wɔbɔ hɔn bra dɛ mbrɛ abrabɔ yi ara nye no. Naaso, wo nsanmuyi horow ndɛ bɛkyerɛ ndzɛmba ebiasa: bea a ibɛtsena daapem nyina mu, nyimpadua kor a edze bɔsoɛr efi owu mu, na hɔn a enye hɔn bɛtsena afebɔɔ. Ntsi, dwen celestial adwen.
M’asɛm a odzi kan a mekãe dɛ Asɔr no ne President no, mehyɛɛ hom nkuran dɛ hom bɛhyɛ ase a ewiei no da hom adwen do. Iyi kyerɛ dɛ hom bɛyɛ celestial ahenman no hom onnyiewiei botae na nkyii ahwɛyie mu ara hom esusu hom adwenpɔw biara ber a hom wɔ asaase do no dze hom bɔto wɔ wiadze a ɔreba no mu.9
Ewuradze akyerɛkyerɛ pefee dɛ mbarimba na mbaa a wɔasɔw hɔn ano wɔ temple mu, na wosie hɔn ahyɛmudzi, nko na wɔbɔbɔ mu atsena afebɔɔ kesi afebɔɔ. Ɔkãa dɛ, “Ahyɛmudzi, nhyehyɛɛ, nkyekyeree, asɛdze, nsewdzi, bɔhyɛ, nyɛe, nsesemu, fɛkuwbɔ anaa enyidakwan nyina a wɔannyɛ na [wɔ]ammfa anohoba Sunsum Krɔnkrɔn no annsɔw ano … sɛ nyimpa wu a … ba ewiei.”10
Dɛm ntsi, sɛ yɛannyɛ nyansadze na yɛsan mu dze telestial mbra bɔ bra sesei a, nna yɛresan mu eyi telestial wusoɛr nyimpadua Yɛresan mu eyi dɛ yɛnnye hɛn ebusua ebusua nntsena afebɔɔ.
Ntsi, mo nuanom na nkyerɛbaa adɔfo, kwan bɛn na bea bɛn na nyimpa bɛn na hom pɛ nye no atsena afebɔɔ? Hom ara na hom san mu yi.11
Sɛ hom yɛ nsanmuyi horow a, moto nsa frɛ hom dɛ hom nhwɛ kan ara yie—onnyiewiei nhwɛe. Hom mfa Jesus Christ ndzi kan, osiandɛ w’onnyiewiei nkwa gyina wo gyedzi a ɔwɔ No mu na No Werdambɔ no mu.12 Ogyina wo setsie ma Ne ma Ne mbra no so do. Setsie ma enyigye abrabɔ ho kwan ma wo ndɛ na akyɛdze kɛse a onnyiewiei adzekye enyim.
Sɛ biribi rekyer w’adwen a, dwen celestial adwen! Sɛ nsɔhwɛ to wo a, dwen celestial adwen! Sɛ abrabɔ anaa dɔfo bi bu wo enyimtsia a, dwen celestial adwen! Sɛ obi wu “mpofirmu wu” a, dwen celestial adwen! Sɛ obi da hɔ kyɛr a ɔsɛɛ yarba abɔ no a, dwen celestial adwen! Sɛ abrabɔ mu nkõdzen hyɛ wo do a, dwen celestial adwen! Ber a eretse apɔw efi akwanhyia anaa pira mu, dɛ mbrɛ mereyɛ no sesei no, dwen celestial adwen!
Ber a itsim rodwen celestial adwen no, nya enyidakwan dɛ ibehyia nsɔhwɛ.13 Mfe du mfe du pii abɛsen no, me tsipɛn edwumayɛnyi bi twuuw m’enyim dɛ “meyɛ dodow wɔ temple ho,” na ahwɛdofo mu binom tsĩaa me wɔ me gyedzi ho. Naaso, megye dzi dɛ, modwen celestial adwen no boaa me wɔ m’edwumayɛ mu.
Ber a edwen celestial adwen no, nkakrankakra, w’akoma sesa. Ibɛpɛ dɛ itaa bɔ mpaa na nokwar mu ara. Meserɛ mma mma wo mpaabɔ nnyɛ dɛ ndzɛmba nkorkor a wɔrokɔtɔ. Ewuradze no nhumu tra wo honandua mu nyansa. Wo mpaabɔ ho nyiano botum ayɛ wo ahobow na ɔbɔboa wo ma adwen celestial adwen.
Susu Ewuradze no mbuae ma Joseph Smith ber a ɔtotoe serɛɛ mboa wɔ Liberty Efiadze no. Ewuradze kyerɛkyerɛɛ Nkɔnhyɛnyi no dɛ ɔhaw yaayaw a ɔrefa mu no bɛma no ntɔhunii, na ɔbɛyɛ no mfaso.14 Sɛ esɔw no yie a, Nyankopɔn bɛma wo do wɔ sor.’’15 Nna Ewuradze rekyerɛ Joseph dɛ ɔndwen celestial adwen na ɔmfa n’enyi nto onnyiewiei akatua do kyɛn dɛ obetsim nda no mu nkõdzen yerɛyerɛw do. Hɛn mpaabɔ botum ayɛ—na ɔsɛ dɛ ɔyɛ—mpɛnsampɛnsamu a ɔkɔ do a yɛnye Ɔsor Egya yɛ.
Ber a hom dwen celestial adwen no, hom bohu dɛ hom bokwetsir adze biara ɔgye hom pɛ no. Suban bɔn biara a ɔka awerɛw mu—ɔyɛ agodzi, sika enyiberdze, kaw, ndur bɔn, nsa dzen, ebufuw, ehuhuw mfonyin, ndwamandze, anaa edziban mpo—fom Nyankopɔn. Dɛn ntsi a? Osiandɛ dza w’akɔndɔ tsim do bɛyɛ wo enyame. Ehwehwɛ no kyɛn ehwehwɛ No dze enya ahotɔ. Sɛ enye dza ɔka awerɛw mu dzi aper a, hwehwɛ sunsum mu na adatserfo mboa a ihia no. Mma mma dza w’akɔndɔ tsim do no nngye wo fahodzi a edze bedzi Nyankopɔn ne nhyehyɛɛ nwanwa no do.
Yɛrodwen celestial adwen so bɔboa wo ma ayɛ setsie ama ahosie ho mbra. Ndzɛmba kumabaa binom a ɔbɛma wɔatõtõ wo braa ayɛ no basaa ntsɛm akyɛn erubu ɔsor mbra yi. Hɔn a wɔnye Nyankopɔn dzi ahyɛmu no, ndwamandze yɛ kɔn kor a ebɛyew wo dase ntsɛmara.
Otsĩafo no nsɔhwɛ dodowara a ɔkɔ do dze sɔ hɛn no fa yerebu ahosie do. Tum a wɔdze bɔ nkwa yɛ nyamesu ndzinoa kor a Ɔsor Egya ma Ne mba wɔnnkyebo ho kwan. Dɛm ntsi, Nyankopɔn ama kwankyerɛ pefee a wɔdze ɔsor tum a ɔtsease yi dzi dwuma. Nyimpadua mu nkitahodzi wɔ hɔ nko ma ɔbarimba na ɔbaa a wɔawɔr hɔnho.
Wiadze mu dodowara nngye iyi nndzi, mbom nnyɛ dɔm adwenkyerɛ no na wɔdze bua dza ɔyɛ nokwar. Ewuradze akã dɛ obiara a noho nntsew no nnkenya celestial ahenman no. Ntsi, sɛ ebɔ adwenpɔw a ɔfa ahosanyɛ ho a, meserɛ hom ndwen celestial adwen. Na sɛ woho nntsew a, meserɛ wo nu woho. Bra Christ hɔ na gye N’anohoba a ɔyɛ bɔnfakyɛ kora kora ber a enu woho koraa fi wo bɔn ho.16
Ber a edwen celestial adwen no, ibɔhwɛ nsɔhwɛ na ɔkõtsia wɔ kwan fofor do. Sɛ obi a idɔ no tu hyɛ nokwar do a, dwen celestial adwen, na mma nngye wo dasee ho kyim. Ɔsomafo Paul hyɛɛ nkɔm dɛ, “nda a odzi ekyir no mu binom betsim ndaadaa sunsum nye mbɔnsam nkyerɛkyerɛ do atwe hɔnho efi gyedzi no ho.”17
Otsĩafo no ne ndaadaa no nnyi ewiei. Meserɛ hom nyɛ krado. Mma nngye afotu mmfi hɔn a wɔnngye nndzi hɔ. Hwehwɛ akwankyerɛ fi ndze a ibotum atwer—fi nkɔnhyɛfo, adzehufo na nyikyerɛfo na fi Sunsum Krɔnkrɔn no a wɔse hɔ, ɔno “bɛkyerɛ hom ndzɛmba nyinara ɔsɛ dɛ hom yɛ.”18 Meserɛ hom nyɛ sunsum mu edwuma a ɔbɛma hom etum enya nyikyerɛ yie.19
Ber edwen celestial adwen no, wo gyedzi bɛyɛ kɛse. Ber a meyɛ aberantsɛba a murusũa edwuma no, nna m’akatua yɛ $15 bosoom biara. Dakor anafua, me yer Dantzel bisaa dɛ sɛ mutua ebupɛn du wɔ akatua ketseabaa no do a. Nna munntua. Munuu moho ntsɛmara na mehyɛɛ ase tua $1.50 no kãa ho wɔ bosoom bosoom ebupɛn du no ho.
Ana Asɔr no sesae osian hɛn ebupɛn du a wɔakɔ sor no ho? Oho. Naaso, mebɛyɛɛ obi a otua n’ebupɛn-du emudzi mu no sesãa me. Dɛm ber no musũaa dɛ ebupɛn du no ntuae yɛ gyedzi asɛm nnyɛ sika bi. Mutua ebupɛn-du emudzi mu ntsi, ɔsor ntokura hyɛɛ ase bubue maa me. Edwumayɛ mu akwan a ɔbɛdaa hɔ no medze ma hɛn ebupɛn du no ntuae emudzi mu no.20
Ebupɛn du no ntuae hia gyedzi, na ɔtow gyedzi wɔ Nyankopɔn na No Dɔba mu.
Yɛresan mu abɔ ahosan bra wɔ ndwamansɛm na amanyɛsɛm wiadze mu no tow gyedzi mu.
Yɛrohwer mber ara yie wɔ temple no tow gyedzi mu. Na wo sɔr na som wɔ temple mu no bɔboa wo ma adwen celestial adwen. Temple no yɛ nyikyerɛ bea. Hɔ no wɔkyerɛ wo mbrɛ ibesi benya mpontu akɔ celestial abrabɔ mu. Hɔ no wɔtwe wo bɛn Agyenkwa no yie na wɔma wo kwan kɛse wɔ No tum ho. Hɔ no wɔma wo kwankyerɛ a edze besiesie w’abrabɔ mu nsɛnhia, wo nsɛnhia dzendzen mpo.
Temple ayɛdze na ahyɛmudzi horow no wɔ onnyiewiei nsunsuando. Yɛkɔ do sisi temple binom so kã ho dze ama sunsum mu akwanhorow yinom aada edzi wɔ hom mu kor biara n’abrabɔ mu. Ɔyɛ hɛn enyisɔ dɛ yɛbɔ hɛn nhyehyɛɛ dɛ yebesi temple fofor kor wɔ mbea 20 yinom a odzi do yi ho dawur.
-
Savai’i, Samoa
-
Cancún, Mexico
-
Piura, Peru
-
Huancayo, Peru
-
Viña del Mar, Chile
-
Goiânia, Brazil
-
João Pessoa, Brazil
-
Calabar, Nigeria
-
Cape Coast, Ghana
-
Luanda, Angola
-
Mbuji-Mayi, Democratic Republic of the Congo
-
Laoag, Philippines
-
Osaka, Japan
-
Kahului, Maui, Hawaii
-
Fairbanks, Alaska
-
Vancouver, Washington
-
Colorado Springs, Colorado
-
Tulsa, Oklahoma
-
Roanoke, Virginia
-
Ulaanbaatar, Mongolia
Ewuradze rekyerɛ hɛn ma yesisi temple horow yinom ama wɔaaboa hom a hom adwen celestial adwen. Nyame tse ase. Jesus nye Christ no. N’Asɔr wɔdze asan ananmu aba ma woehyira Nyankopɔn ne mba nyina. Megye ho dase wɔ Jesus Christ ne dzin krɔnkrɔn no mu, amen.