Ma W’Asefo Ntsi
Mma nnyɛ gyedzi nkɔnsɔnkɔnsɔn a ihyɛɛ ase, anaa igyee, dɛ egyapadze no mu dza ɔayɛ mberɛw. Yɛ mu dza ɔyɛ dzen no.
Mfe kakra a abɛsen no, ber a morosom wɔ America Anaafo Etsifi-Anee Apaamu na metse Peru no, minyaa sũahu dɛɛdɛw bi a mepɛ dɛ menye hom kyɛ.
Osii dapɛn ewiei bi ekyir a dwumadzi horow ntsi, adagyer nnyi mu, ber a meresan akɔ fie no. Muwiee wimuhɛn gyinabea immigration ho nkrataasɛm ekyir no, muhun taxi ɔhɛnkãnyi bi a ɔatsew n’enyim a ofi taxi kuw a yɛtaa fa hɔn taxi no. Ɔfaa me tsenaa ne kaar mu, na metsenaa ekyir a, mayɛ krado dɛ mebɛgye m’ahom enya akwantu komm enyigye mu ara akɔ fie. Ɔkãa hɛn no kɔr ekyir kakra ara no, ɔhɛnkãnyi no nyaa foon do ɔfrɛ fii no hwɛfo hɔ a ɔrekã kyerɛ no dɛ mayɛ mfom wɔ taxi a mafa no ho. Nna kaar fofor bi na ɔrotwɔen afa me, na ɔhwɛfo no kãa kyerɛ no dɛ sɛ mepɛ dɛ meyɛ nsesã a, ɔnsan nye me nkɔ wimuhɛn gyinabea no. Mesee no dɛ onnkehia, na ɔmma yɛnkɔ do nkɔ. Mber simabaa ekyir a ɔannkã hwee no, ɔhwɛɛ me wɔ ahwehwɛ a wɔdze hwɛ ekyir no mu na obisaa dɛ, “Ana iyɛ Mormonyi, ɔnntse dɛm a?”
Nsɛmbisa a ɔgye nyiano yie ekyir no, muhun dɛ kommyɛ ber no do etwa. Nna munntum nnhyɛ moho do dɛ yɛbɔhwehwɛ n’asɛmbisa no mu ara yie.
Muhun dɛ wɔfrɛ no Omar, ne yer ne dzin dze Maria Teresa, na wɔwɔ mba beenu—Carolina, a oedzi mfe 14, na Rodrigo, mfe 10. Nna Omar ayɛ Asɔrba fi ne mbafober mu. Nna n’ebusua no bɔhyew, mbom ber bi durii no, n’awofo gyaa dɛ wɔrokɔ asɔr. Omar bɛyɛɛ akɔtrɔbɔdwe koraa ber a odzii mfe 15 no. Sesei oedzi mfe 40.
Dɛm aber no muhun dɛ mammfom taxi mfae no. Ɔnnyɛ dza osii ara! Mekãa me nyimpa ban kyerɛɛ no na dɛ mafow ne taxi osiandɛ Ewuradze refrɛ no bio aba No guanbuw no mu.
Nkyii yɛkãa ber a nna ɔno na n’ebusua wɔbɔhyew wɔ Asɔr mu no ho nsɛm. Nna ɔwɔ enyigye nkaadze wɔ ewimbir fie nhyiamu mber binom mu na Primary ndwom ho. Nkyii ɔtoow “Meyɛ Nyame Ne Ba”1 no mu nsɛm kakrabaa berɛɛw.
Megyee n’address, foon nkanee, na meserɛɛ kwan dɛ menye ne bishop bɛkyɛ no, mekãa kyerɛ no dɛ mobɔhwehwɛ kwan aba asɔrfi hɔ wɔ ne da a odzi kan a ɔbɛsan aba asɔr. Yewiee hɛn akwantu fi wimuhɛn gyinabea ba me fie, na hɛn akwantu tseabaa kɔ n’abrabɔ a abɛsen mu no, yɛkɔr hɛn akwan horow.
Adapɛn kakra ara ekyir no, ne bishop frɛɛ me, rekã dɛ Omar reyɛ nhyehyɛɛ dɛ ɔbɛba asɔr Kwesida pɔkyee bi. Mekãa kyerɛɛ no dɛ mebɛba hɔ. Dɛm Kwesida no, Omar nye ne babanyin bae. Nna ne yer na ne babaa no enyi nnyaa nngyee ho. Abosoom kakra ekyir no, ne bishop frɛɛ me bio, ber yi ɔsee me dɛ, Omar rubonuma ne yer na ne mba beenu no na ɔato nsa afrɛ me dɛ membra hɔ. Dɛm Kwesida no a wosii hɔn pi dɛ Asɔrmba no ho mfonyin nye yi.
Dɛm Kwesida no, mekãa kyerɛ Omar na n’ebusua dɛ, sɛ wɔyɛ ahoboa a, afe kor ekyir no, ɔbɛyɛ me enyimnyamhyɛ dɛ mebɛyɛ hɔn nsɔwano wɔ Lima Peru Temple mu. Nkaadze ber ma hɛn nyina ho mfonyin a, wotwaa no afe kor ekyir no.
Ebɛnadze ntsi na menye hom rekyɛ sũahu yi? Merekyɛ no wɔ botae ebien do ntsi.
Odzi kan, dze akã akyerɛ asɔrmba pa a ɔnam siantsir bi ho ntsi, wɔahwe ase efi Jesus Christ n’asɛmpa a wɔdze asan ananmu aba no ho no. Otsĩa ebien, dze akã akyerɛ asɔrmba no a ndɛ wɔba na worinndzi nokwar mma hɔn ahyɛmudzi horow dɛ mbrɛ ɔsɛ dɛ wɔyɛ no. Gyinabew ebien nyina mu no ɔkã mbasantsen a wɔreba no, na nhyira na anohoba horow a wɔdze ato hɔ ama hɔn asefo horow no botum esianka.
Hom mma yɛnhyɛ ase mfi gyinabew a odzi kan no, asɔrmba pa a woefi ahyɛmu anamɔn kwan do no, dɛ mbrɛ ɔtoo me Perunyi nyɛnko Omar no. Ber a mibisaa no siantsir a ɔyɛɛ n’adwen dɛ ɔbɛsan aba no, ɔkãa dɛ ɔno na ne yer nyaa atsenkã bi dɛ hɔn mba no benya ahomka ara yie wɔ Jesus Christ n’asɛmpa no mu. Onyaa atsenkã dɛ mber asõ dɛ ɔsan ba asɔr wɔ hɔn mba no ntsi.
Ɔyɛ yaw sɛ yehyia asɔrmba a wɔmmbɔ hyew anaa hɔn a wɔnnyɛ asɔrmba a mber bi mu, nna wɔwɔ asɛmpa no wɔ hɔn ebusua ebusua mu, na wɔayew no osian hɔn awofo anaa nananom hɔn adwenpɔw dɛ wobegyaa Asɔr no ntsi. Dɛm adwenpɔw no botum akã hɔn asefo afebɔɔ!
Woeyi hɔn mba na hɔn mbanana efi bambɔ na nhyira horow a ɔwɔ Jesus Christ n’asɛmpa mu no wɔ hɔn abrabɔ mu. Dza obubu akoma koraa nye dɛ, wɔayew onnyiewiei ebusua ho anohoba a nna ɔwɔ hɔ dabi no. Adwenpɔw kor no akã ebusuasantsen ntoatoado no. Woebubu gyedzi egyapadze.
Naaso, dɛ mbrɛ yenyim no, wobotum edua Jesus Christ mu esiesie biribiara a ebubu no. Siantsir yi ntsi, meserɛ hom mma yensusu nsato yi a ofi President Russell M. Nelson hɔ no: “Sesei, sɛ hom mu binom efi anamɔn kwan no do a, hom ma memfa m’akoma mu enyidado nyina nto nsa mfrɛ, dɛ yɛserɛ hom nsan ekyir mbra. Mbrɛ wo dadwen tse biara no, mbrɛ wo haw tse biara no, beebi wɔ hɔ ma wo wɔ Ewuradze N’Asɔr no mu. Sɛ hom fa kwan sesei san ba ahyɛmu anamɔn kwan no do a, wobehyira hom nye ebusuasantsen a wonnyaa nnwoo hɔn.”2
Afei, hom mma yɛnkã gyinabew no a otsĩa ebien no ho nsɛm, hɔn a ndɛ wɔba na bia worinndzi nokwar dɛ mbrɛ ɔsɛ dɛ wɔyɛ no. Dɛ mbrɛ adwenpɔw horow a wɔabɛsen no kã dza ndɛ orisisi no, ndɛ adwenpɔw bɛkã hɛn ndaamba na hɛn ebusua mu mba hɔn daakye.
President Dallin H. Oaks kyerɛkyerɛɛ hɛn dɛ:
Jesus Christ N’asɛmpa nsanananmu no hyɛ hɛn nkuran ma yɛdwen ndaamba ho. … Ɔkyerɛkyerɛ adwenkyerɛ horow a ɔkrɔn a ɔfa ndaamba ho a ɔma hɛn ndɛ ndzeyɛɛ ho kwankyerɛ.
“Dza ɔbɔ ebira no, hɛn nyina yenyim nkorɔfo a dza ɔfa hɔnho nko nye ndɛ nsɛm, wɔhwer mber ndɛ, wodzi dɛw ndɛ, na wɔnndwen ndaamba ho.
“… Ber a yɛrobɔ adwenpɔw horow ndɛ no, ɔsɛ dɛ ber biara yebisa dɛ, ‘Iyi begya akɔ henfa?’”3 Ana hɛn adwenpɔw horow ndɛ begya hɛn akɔ enyigye na daapem mu anaa obegya hɛn akɔ awerɛhow na enyinsuwa mu?
Binom botum adwen dɛ, “Onnhia dɛ yɛbɔkɔ asɔr Kwesida biara,” anaa “Yebotua ebupɛn du sɛ ndzɛmba mu yɛ yie a,” anaa “mennkɛma Asɔr baanodzifo abamba wɔ nsɛngyinado yi ho.”
“Mbom,” wɔkã dɛ, “yenyim dɛ Asɔr no yɛ nokwar, na yennkegyaa Jesus Christ n’asɛmpa no ekyir dzi dabiarada.”
Hɔnnom a wɔwɔ adwen binom dɛ iyinom no, nnhu nsunsuando bɔn a asɔrbayɛ a “wɔnnyɛ hyew na wɔnnyɛ nwin” benya wɔ hɔn abrabɔ na hɔn asefo hɔn abrabɔ do. Bia awofo no bɔkɔ do abɔ hyew, mbom wonnkotum esianka dɛ wɔbɛyew hɔn mba—wɔ abrabɔ yi mu na daapem.
Ɔfa hɔnom a wɔnye hɔn ebusua ebusua wonnkenya celestial enyimnyam ayɛ hɔn dze no, Ewuradze kã ho dɛ, “Woyinom nye hɔn a hɔn dasegye a ɔwɔ Jesus ho no nnyɛ dzen dɛm ntsi, woennya Nyankopɔn n’ahenman mu ahenkyɛw no.”4 Ana ɔno nye dza yɛpɛ ma hɛnho anaa ma hɛn mba? Ana onnyi dɛ yɛyɛ dzen yie kyɛn yɛnnyɛ hyew na yɛnnyɛ nwin ma hɛnara hɛnho ntsi na hɛn asefo ntsi?
President M. Ballard so kãa biribi a ɔtse dɛ iyi ho asɛm:
“Ma binom no, Christ ne nsato dɛ wɔbɛgye edzi na wɔbɛtsena no kɔ do yɛ dzen. … Esuafo binom dzi aper dɛ wɔbɛtse Asɔr nhyehyɛɛ anaa nkyerɛkyerɛ pɔkyee bi ase. Nkaafo no nya nsɛnhia wɔ hɛn abakɔsɛm anaa asɔrmba na baanodzifo binom, hɔn a wɔabɛsen na sesei hɔn esintɔ ho. …
“… Adwenpɔw dɛ wɔnnye Asɔrmba na Ewuradze ne baanodzifo a Ɔasan mu Eyi hɔn no ‘nnantsew bio’ no benya nsunsuando a ɔkɔ ekyir a nnyɛ daa na wobohu no seseiara.”5
Hom nhwɛ awerɛhow egyapadze a wɔdze gya—na wɔ siantsir bɛn ho? Mbrɛ ɔtse biara no, onnye dɛ ibobu enyi egu sunsum mu nsunsuando a ɔbɛyɛ ato hɔ ama mbasantsen a wɔreba no.
Mo nuambanyin na nkyerɛbaa adɔfo, sɛ hom rudua gyinabew ebien yinom a makã ho asɛm wɔ me kasaa mu a, meserɛ hom nsusu hɔn ndzeyɛɛ n’anamɔn kwan. Hom nyim dɛ nhyehyɛɛ wɔ hɔ ma hɛn wɔ abrabɔ yi mu. Hom nyim dɛ ebusua ebusua botum ayɛ onnyiewiei. Dɛn ntsi na ibesiankã wo dze? Mma nnyɛ gyedzi nkɔnsɔnkɔnsɔn a ihyɛɛ ase, anaa igyee, dɛ egyapadze no mu dza ɔayɛ mberɛw. Yɛ mu dza ɔyɛ dzen no. Oedu wo do dɛ ibɛyɛ, na Ewuradze botum aboa wo.
Fi m’akoma no bun mu, moto nsa frɛ wo dɛ dwen ho, dɛ ibɔhwɛ kan na eker dɛ “Iyi begya akɔ henfa,” na, sɛ okehia a, ayɛ dzen yie dze esiesie w’anamɔn kwan no ama w’asefo ntsi. Jesus Christ ne dzin mu, amen.