Hom Enyigye ne Kɛse Bɛyɛ Dɛn

Elder Ronald A. Rasband ne Kasae

Ɔkã Asomafo Duebien no hɔn Quorum no ho

Afei moto nsa frɛ hom dɛ hom mfa dza hom nyim, nkã hom dasegye a hom agye agye no ho, na hom nkɔ asɛmpakã.

Mo nuanom na nkyerɛbaa adɔfo, ndɛ m’adwen akɛda Israel mboano do, dza President Russell M. Nelson frɛ no “adze a ohia dodow a ɔrokɔ do wɔ asaase do ndɛ.’ Adze biara nnsõ nnkyɛn ne kɛseyɛ, adze biara nnhia nnkyɛn no, adze biara nnso nnkyɛn n’enyimnyam.’’¹

Mboano no na ɔma yehu no yie mu ara dɛ “akra som bo kɛse wɔ Nyame enyim.”² Ɔnnyɛ dzen koraa. Yɛroboaboa Nyame ne mba ano wɔ nda a odzi ekyir yinom mu ama woeenya “nhyira a wobohue egu hɔn tsir do no”³ na anohoba horow dɛ “Mbersantsen ahonyadze no”⁴ bɛyɛ hɔn dze. Odzi do dɛ yɛbɔboa Israel ano a yebehia asɛmpasomafo—dodow a wɔbɔbor hɔn a wɔrosom no do.⁵ Ndɛ merekasa kyerɛ mpanyimfo a wɔabɔ hɔn bra yie a wɔwɔ Asɔr no mu a wobotum asom dɛ asɛmpasomafo. Ewuradze hia hom. Yehia hom wɔ New York na Chicago, Australia na Africa, Thailand na Mexico, na beebiara a ɔwɔ ntamu no.

Menye hom nsan ekyir nkɔ afe 2015. Nna meyɛ Asomafo Duebien no hɔn Quorum no kuwba a mbrɛana wɔfrɛ me fofor. Asodzi nwanwa kor a yɛwɔ dɛ Asomafo nye dɛ yɛdze asɛmpasomafo bɔtotɔ hɔn dwuma mbewdo. Nna makã ho ma wɔayɛ ber meyɛ Eduosuon no,⁶ mbom sesei, dɛ Ɔsomafo no, metsee edwuma no mu dur no ara yie. Mehyɛɛ ase mpaabɔ mu ara dze elderfo mbasirmba, totoo asɛmpakã mbea wɔ wiadze nyina mu, nkorkor. Nkyii medanee kɔr couplefo mpanyimfo do. Nna nkorkor 10 na wɔakyerɛw no kraataa no do. Nna wɔnndɔɔsõ koraa. Ahobow mu, mibisaa me fɛfo a ofi Asɛmpakã Asoɛe, “Dodow ahen na woebisa a yehia dɛ yɛ hyehyɛ no dapɛn yi?”

Obuaa dɛ, “300.”

Meda ho kaa dɛm aber no a ɔbotoow me no: Couplefo 10 dze ahyehyɛ 300 a woebisa.

President Russell M. Nelson ahyɛ awarfo nkuran dɛ “wɔnkɔ hɔn ntwɛr enyim na wombisa Ɔsor Egya sɛ mber no asõ ama hɔn dɛ wɔsom asɛmpakã.”⁷ Ɔkãa dɛ, ahwehwɛdze nyinara no, “ɔpɛ dɛ hom bosom no bia ɔbɛyɛ dza ohia tsitsir.”⁸

Dɛ mbrɛ kyerɛwsɛm no se no, “Sɛ hom wɔ pɛ dɛ hom bɔsom Nyame a, wɔto nsa frɛ hom wɔ edwuma no ho.”⁹ Dɛm edwuma no nyina fa twaber ho mbra no. Yɛkenkan wɔ John nwoma mu dɛ, “Nyia oduae na nyia otwae nyina aabɔ mu edzi dɛw.”¹⁰

Mehu twaber ho mbra a wɔahyɛ mã wɔ mankasa m’ebusua mu.

Mfe kakra abɛsen no, nna meresera m’ebusua na bishop no serɛɛ me dɛ menkasa mfa nwie sacrament som no.¹¹ Ber a meresan efi akasabea no, ɔbaa bi dze ne mba beesuon bɛɛn me na ɔdaa no ho edzi dɛ ɔyɛ Akyerɛbaa Rebecca Guzman.

Obisaa dɛ, “Elder Rasband, ana inyim Rulon na Verda Rasband a?”

Meyerɛɛw m’ano na mubuaa dɛ, “Wɔyɛ m’awofo.”

Hom tum hu bea a iyi rokɔ. Medze Rebecca, a ɔnye n’ebusua wɔ Ehyiadzi Asoɛe ha yi no kwanma no, mekyɛ n’ebusua asɛm no.¹²

Nna m’awofo, Elder Rulon na Akyerɛbaa Verda Rasband, rosom dɛ couplefo mpanyimfo wɔ Florida Fort Lauderdale Asɛmpakã mbew.¹³ Nna worikyima kã asɛmpa no na adom mu ara wɔkɔbɔɔ Rebecca ne fie abow mu. Nna ɔyɛ abasirba ara na ɔdɔ Osmondfo hɔn ndwom ne tsie, nkaanka, hɛn nyɛnko Donny—a ɔnye hɛn wɔ ha nda yi, ne dze.¹⁴ Oetsie hɔn radio do mpɛnsapɛnsamu na oehu dɛ wɔyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba. Onyaa atsenkã dɛ biribi yɛ soronko wɔ hɔn ho, na ɔdween dɛ bia ɔbɛyɛ hɔn som no, ntsi, Rebecca hweer mfe ebien hwehwɛɛ Asɔr no ne gyedzi mu wɔ Skuul no nwoma korabea. Ntsi, ber a ohun awarfo a wɔatsew hɔn enyim fɛɛfɛw robɔ hɔn ebusua abow mu na wɔdaa hɔnho edzi dɛ wɔyɛ Latter-day Saintfo asɛmpasomafo no, ɔyɛɛ no ahobow.

Ekyir no Rebecca kyerɛɛw dɛ, “Me maame kãa kyerɛ me dɛ mema womfi hɔ nkɔ, naaso m’akoma see dɛ ‘Oho.’ Mohwɛɛ hɔn enyim, na menyaa anyɛnkoyɛ na ɔdɔ ho atsenkã. No ho nkaa no daho dze enyisuwa ba m’enyiwa mu na okitsa m’akoma mu.”¹⁵

Rebecca maa wɔbaa dan no mu, na m’awofo asɛmpasomafo no nye ɔno, ne nkyerɛbaa nkakraba beenu, na hɔn nã, a ɔmmpɛ no, kyɛɛ asɛmpa no.

Rebecca kyerɛɛ mu kyerɛɛ me dɛ: “W’awofo beenu no nyina kyerɛɛ nsɛmbisa biara a yɛwɔ no mu nwanwa mu ara. Meda ho tum hu hɔn enyim tse dɛ ma kan bi etwa hɔnho ehyia. Ber biara sɛ wɔrokɔ a, wo maame fua hɛn na aber biara ɔboa me maame ma onya ahomka na ɔtse dɛ wobu no. Nna ber biara sɛ wo papa rekyerɛkyerɛ hɛn Jesus Christ ho nsɛm a n’enyiwa mu hyerɛn. Ɔbɔɔ mbɔdzen dɛ ɔnye me papa bɛkã mpɛnsampɛnsamu no ho na ewiei no n’enyi bɛgyee ho. Nna m’egya yɛ edziban wɔ kurow mu hɔ enyigyedze bea na ɔhyɛɛ ase yɛɛ ewimber edziban maa w’awofo, a key lime pie a w’egya pɛ no paapapa kã ho.”¹⁶

Ber a Elder na Akyerɛbaa Rasband bisaa Rebecca na n’ebusua dɛ wɔnkenkan Mormon Nwoma no, Rebecca dze nda enum yɛe. Nna ɔpɛ dɛ wonuma no ntsɛmara, naaso nna n’ebusua mu mba nkaa no nnyɛ krado. Abosoom anan ekyir no, Rebecca sii nkitsi dɛ wonuma no ma ɔmbɛkã nokwar Asɔr no ho. Ɔkaa dɛ, “Nna me kra mu biribiara nyim dɛ ɔyɛ nokwar.”¹⁷ Ebɔbira 5, afe 1979 no, asɛmpasomafo no numaa mfe-19 Rebecca, ne maame, na ne nkyerɛbaa beenu. M’egya yɛɛ dasefo wɔ enuma no ho.

Ber a mihyiaa Rebecca na n’ebusua wɔ asɔr no, me nye n’ebusua no twaa mfonyin. Medze kɔr fie kɛmaa me maame a n’enyi efir no na ɔdze too n’akoma do yie. Nkyii ɔkãa kyerɛɛ me dɛ, “Ronnie, ndɛ nye m’enyigye da kɛse wɔ m’abrabɔ mu.”

Me maame no mbuae no dze asɛmbisa ma hɛn mpanyimfo no: “Ebɛnadze na ereyɛ wɔ w’abrabɔ gyinabew yi mu?” Akwan pii wɔ hɔ a asɛmpasomafo mpanyimfo botum ayɛ dza obiara nnkotum ayɛ. Hom yɛ ahom nwanwa a wɔdze yɛ papa, hom awea wɔ Asɔr no mu, na hom ayɛ krado dɛ hom bɛhyɛ Nyame ne mba nkuran na wɔagye hɔn.

Hom mu binom bɔdwen dɛ: “Na yeregya mbanana ɛ? Wobedzi ebusua mber soronko, awoda, anyɛnkofo na mboa wɔnye hɔn dzi agor mpo egya hɛn.” Sɛ nkyɛ mibisaa me maame siantsir a ɔno na Papa wɔkɔr asɛmpakã a, minyim dɛ nkyɛ iyi na ɔbɛkã, “Mowɔ mbanana. Mepɛ dɛ wohu dɛ emi na wo papa asom wɔ asɛmpakã mbewdo, yɛpɛ dɛ yɛyɛ fasusu bi ma hɛn mbasantsen, na wohyiraa hɛn, nhyira ara yie.”

Makɛsera asɛmpakã mbew wɔ wiadze nyina mu no, mehu som soronko a hɛn asɛmpasomafo mpanyimfo dodow rosom no. Ɔda edzi pefee dɛ wonya ahomka dɛ “wɔreyɛ Ewuradze ne pɛ” na wɔreyɛ “Ewuradze n’edwuma.”¹⁸

Binom no, na yɛwɔ enyidado dɛ hom mu ɔpepe no, etuhoakyɛ asɛmpasomafo som wɔ wiadze no kokoa beebi bɛyɛ bea pa koraa ama hom.²⁰ Binom no, hom bɛpɛ dɛ hom bɔsom Asɔr som wɔ fie. Osian apɔwmudzen ho nsɛm na gyinabew binom ntsi binom wɔ hɔ a wonnkotum asom. Yɛtse dɛm gyinabew horow no ase, na ɔbɛyɛ m’enyidado dɛ hom bɔhwehwɛ kwan bi dze ama hɔn a wɔrosom no abamba. Hom ndzi nkɔnhyɛnyi n’afotu do na hom mbɔ mpaa mfa nhu dza Ewuradze bɛpɛ dɛ hom yɛ.

Asɛmpakã mbewdo horow a ɔwɔ wiadze no rototɔ serɛ hom mboa. President Nelson akã hɛn asɛmpasomafo mpanyimfo ho asɛm dɛ, “Wɔyɛ sunsum mu abran, enyansafo, na wɔpɛ edwuma no ne nyɛe.”²⁰

Mbew do hɔ no, hom wɔ akwan ahorow pii: hom botum asom wɔ asɛmpakã ɔfese anaa temple, ahyɛ asɛmpasomafo mbasirmba dzen, ekenyan nkorbata kakraba, ayɛ edwuma wɔ FamilySearch asoɛe anaa abakɔsɛm mbea, akyerɛkyerɛ institute, ama nyimpa ho mboa, nye young adults ayɛ edwuma, aboa Asɔr edwumayɛ asoɛe anaa ekuayɛ. Akwan etsitsir a edze bosom, dza ɔgye wo yie, bea wohia wo, na mbrɛ ebesi bɛyɛ krado nyina wɔakã ho asɛm wɔ website “Senior Missionary.”²¹ Botum so enye wo bishop anaa nkorbata president akasa.

Mafrɛ couplefo pii dɛ wɔnsom na mahwɛ Christ ne Kan no a ɔhyɛ hɔn enyim mã no.²² Wɔasan aba no, wɔkã nsɛm a ɔfa mbrɛ wɔabɛn Ewuradze yie na wɔabɛn hɔnho nkorkor, Ewuradze no Sumsum ho atsenkã a wohue gu hɔn do, na wonyim dɛ wɔreyɛ nsesã.²³ Woana na ɔmmpɛ dɛm?

Asɛmpakã dwuma botum ayɛ awarfo hɔn abrabɔ mu adze tsitsir. Bia asɛm ne tsir a obeye nye “Bia Mo Wura Behia Me Beebi.”²⁴ Bia nnyim bea a iwɔ no yie, naaso, Sunsum no tum no bɛma atse dɛ iwɔ fie.

M’awofo, na asɛmpasomafo couplefo a wɔasom ewie no agye dase wɔ enyigye a woenya wɔ asɛmpakã dwuma ho. Ewuradze akã no wɔ nda a odzi ekyir kyerɛwsɛm mu dɛ, “Na sɛ ɔba dɛ hom dze hom nda nyina bɔ nnuho ho dawur kyerɛ nkorɔfo yi na hom dze ɔkra kor mpo brɛ me a, mbrɛ hom bodua nye no edzi dɛw kɛse wɔ m’Egya n’ahenman no mu a!”²⁵

Isaiah ma hɛn awensɛm dze kyerɛ erosom wɔ asɛmpakã “kwã” do no ho. Kyerɛwsɛm no kã kyerɛ hɛn dɛ “kwã no nye wiadze.”²⁶ Tsetse nkɔnhyɛnyi kɛse yi kyerɛɛw dɛ, “Na hom dze enyigye befir akɔ, na wɔdze asomdwee agye hom kwan, mbepɔw na nkoko bɛfa ehurusi ndwom edzi hom enyim, na hamu ndua nyinara abobɔ hɔn nsamu.”²⁷ Yebotum yɛdze mbepɔw, akoko, hamu, na ndua no ato asɛmpakã presidentfo, bishopfo, nkorbata baanodzifo, asɔrmba ho, na hɔn a wɔhwehwɛ nokwar na mbom “wonnyim bea a wobohu efi,”²⁸ Wɔbɛgye dase dɛ asɛmpasomafo mpanyimfo dze hɔn dasegye wɔ Agyenkwa na Pomfo, Jesus Christ ho sesa bea no ankasa.

Dɛ meyɛ Ewuradze Jesus Christ no Somafo no, meserɛ wo dɛ som dɛ asɛmpasomafo wɔ Israel mboano yi na bia san som bio mpo. Yehia hom—yehia hom. Hɛn enyi sɔ hom mpanyimfo no wɔ abrabɔ a hom abɔ na fasusu a hom ayɛ wɔ hom efiefi, ward, na stake horow. Afei moto nsa frɛ hom dɛ hom mfa dza hom nyim, nkã hom dasegye a hom agye agye no ho, na hom nkɔ asɛmpakã. Mobɔ mpaa dɛ sɛ metsena ase bio dɛ medze couplefo mpanyimfo rototo hɔn dwuma mbea a, hom mu ɔha ɔha na wɔbɔtweɔn hom frɛɛ enyimpi mu.

Mobɔ hom anohoba dɛ ber hom rosom no hom bɛtse Ewuradze no dɔ wɔ hom abrabɔ mu, hom bohu No, na Obohu hom, na “hom enyigye ne kɛse bɛyɛ dɛn.”²⁹ Hom som soronko ma Jesus Christ no bekenyan na woehyira hom ebusua, hom nanamba, na hom nanasum. “Asomdwee, na ɔdɔ [bɔ]dɔɔ sõ”³⁰ wɔ hom abrabɔ mu mfe pii a ɔbɛba mu. Mobɔ anohoba. Jesus Christ ne dzin mu, amen.