Dzesɛɛfo no na Kwan no a Ogya Kɔ Fie
Nsanmuyi horow a ayɛ no, bia na ɔnye wo efi Agyenkwa na N’Asɔr ne nkyɛn akɔ ekyirekyir dze, naaso Owura Ɔyarsafo no gyina kwan no a ogya kɔ fie no do, reyɛ wo akwaaba.
Banyin Bi Wɔ Mbabanyin Beenu
Ibinom wɔafrɛ iyi asɛm tsiabaa a ɔyɛ dɛw papaapa a wɔakã no da.1 Osiandɛ wɔakyerɛ ase akɔ kasa ahorow mpempem mu wɔ wiadze nyina mu no, obotum ayɛ dɛ mfe apem ebien a wɔabɛsen yi, ewia ntɔree a wɔrennyɛ asɛm no ho ntõtõho wɔ wiadze ne beebi.
Jesus Christ, hɛn Agyenkwa na Pomfo, a ɔbaa asaase do dɛ “ɔrebegye dza ɔayew no” na Ɔkãe.2 Ɔdze nsɛmfua yinom a ɔda famu yi hyɛ ase: “Banyin bi wɔ mbabanyin beenu.”3
Ntsɛmara, yɛtse wentwiwentwi a ɔtsew akoma ho asɛm. Babanyin kor4 kã kyerɛ n’egya dɛ ɔnye fie abrabɔ nnyi hwee yɛ bio. Ɔpɛ n’ahotɔ. Ɔpɛ dɛ ogyaa amambra na n’awofo nkyerɛkyerɛ nyina ekyir dzi. Ɔregye ne kyɛfa wɔ egyapadze no mu—sesei ara.5
Ana hom botum esusu dza egya no tsee ho nkã no ber a iyi tɔɔ n’asowa mu no? Ber a ohun dɛ dza ne babanyin no rohwehwɛ akyɛn biribiara nye obefi ebusua no mu na bia ɔnnkɛsan aba bio?
Akwantu Kɛse no
Babanyin no nna ɔyɛ dɛ ma oenya akwantu n’enyigye kɛse ho atsenkã. Afei dze, ɔatsew noho. Oenya fahodzi efi ne mbabun mu nhyehyɛɛ na amambra ahyɛdze horow ho, afei obotum ayɛ ɔnoara ne nsanmuyi a n’awofo nnhyɛ no do. Fɔdzi nnyi hɔ bio. Obotum asɛpew no ho wɔ kuw a wɔnye no yɛ adwen a wɔagye no ato mu, na ɔabɔ bra a ɔnoara pɛ.
Okoduur ekyirekyir man mu no, onyaa anyɛnkofo ntsɛmara na ɔhyɛɛ ase bɔɔ bra a daa ɔsõ ho daa no. Dodowara na wɔbɛpɛ n’asɛm, osiandɛ nna ne nsa gow ara yie. N’anyɛnkofo afofor—hɔn a wodzidzi no ho—emmbua no atsɛn. Wɔnye no dwedwee hɔnho, huahua no, na wofuaa ne nsanmuyi horow no do.6
Nkyɛ social media wɔ hɔ dɛm ber no a, nkyɛ ampara ɔdze no mfonyin horow a n’enyi agye yie bɔto nkraataafa pii do: Abrabɔaabɔso! MenyaahomkaDodow! Nkyɛmehyɛɛasentsɛm!
Ɔkɔm no
Mbom ahosɛpɛw no annkyɛr—ɔnntaa nnkyɛr. Ndzɛmba ebien na osisii: odzi kan ne sika nyina hweree, na otsĩa ebien, ɔkɔm kɛse baa asaase no do.7
Ɔhaw no yɛɛ kɛse no, n’akoma tui. Nkyɛ nkaano ɔhopɔwfo a ɔhwer sika mbrɛ ɔpɛ no, nkyii na onntum nntɔ edziban mpo, ma dabew abɔ no yi. N’asetsena mu bɛyɛ dɛn?
Ne nsa agow wɔ n’anyɛnkofo afamu—ana sesei wɔbɔboa no a? Muhu no dɛ oribisa bambɔ kakra—sesei ara—dze kesi ber a ɔbɛsan egyina n’anan do.
Kyerɛwsɛm no kyerɛ hɛn dɛ, “Na obiara amma no bi.”8
Ɔreper akora no nkwa do no, onyaa asaase no do okuafo bi a osomaa no ma ɔkɔr kɛnyɛɛn mpreko.9
Ɔkɔm dze noara yie, wɔapow no na ɔayɛ ankonam no, aberantsɛ no bɔdwendwen mbrɛ ndzɛmba esi akaa dɛm.
Nnyɛ yafun pan nko na ɔhaaw no. Ɔyɛ ɔkra a ɔatɔ pan. Nna onyim ara yie dɛ ɔrema ne wiadze apɛdze kwan bɛma oenya ahomka, dɛ ɔbrapa ho mbra besianka dɛm enyigye no. Sesei oehu dza oye. Na ao, kaw kɛse ara a oetua dze enya dɛm nyimdzee no!10
Ber a honandua na sunsum mu ɔkɔm reyɛ kɛse no, n’adwen sanee baa n’egya do. Dza woesi nyina ekyir no, ana ɔbɔboa no a? N’egya n’apaafo mu kumaa mpo wɔ edziban dzi na dabew fi ehum mu.
Na ɔnsan mbra n’egya hɔ?
Dabiarada.
Ɔnkã no bɔn wɔ ekurase hɔ dɛ ɔakɛsɛɛ n’egyapadze?
Ɔnnkɛyɛ ara da.
Onhyia fipamfo no a ampara wɔbɔ no kɔkɔ dɛ orugu n’ebusua enyim ase na orububu n’awofo hɔn akoma? Ɔnsan nkɔ n’anyɛnkofo adadawfo no hɔ a oetuw noho dɛ ɔatsew noho ekyir no?
Onnkotum asɔw.
Mbom ɔkɔm, ankonamyɛ, na mfehoekyir no annkɔ—kesii dɛ “n’enyi baa noho do.”11
Nna oyim dza ohia dɛ ɔyɛ.
Nsanekyir no
Afei hom mma yɛnsan ekyir nkɔ egya no hɔ, fie wura a n’akoma ebubu no do. Dɔnhwer ɔha ɔha pii, bia mpempem ahen na ɔahwer dze rodwendwen ne babanyin yi ho.
Mpɛn ahen na ɔahwɛ kwan noara a ne babanyin faa do no na ɔkaa no adze kɛse a ɔyewee ber a ne babanyin nantsewee kɔree no? Mpaabɔ ahɛn na ɔbɔɔ no anafua esuomu, rototɔ serɛ Nyankopɔn dɛ ne babanyin benya bambɔ, dɛ obohu nokwar no, dɛ ɔbɛsan aba?
Na nkyii dakor, egya no hwɛ dɛm kwan kann no do—kwan no a ogya ba fie na ohu obi wɔ ekyirekyir a ɔrenantsew aba ne nkyɛn.
Obotum ayɛ?
Onyia no wɔ ekyir ara yie, naaso egya no hu no ntsɛmara dɛ ɔyɛ ne babanyin no.
Otu mbirika kɔ ne nkyɛn, ɔbar no kɔn, na ofew n’ano.12
“Egya,” ɔbabanyin no tsẽa mu, wɔ nsɛm a otwar dɛ ɔabobɔ do mpɛn apem, “M’ayɛ bɔn etsia ɔsor na w’enyim. Na memmfata dɛ wɔfrɛ me wo ba bio. Dza mibisa ara nye dɛ yɛ me dɛ w’apaafo mu baako.”13
Mbom egya no mma no kwan ma ɔkasa nnwie. Enyinsuwa wɔ n’enyiwa mu no, ɔhyɛ no nkowaa no dɛ: “Hom nyɛ ntsɛm mfa atar pa no mbra mbɛhyɛ no. Hom mfa pɛtsea nhyɛ ne nsa, nye nsokota nhyɛ ne nan. Hom mma hɛn ho ntɔ hɛn. Me babanyin asan aba!”14
Ndwedweho no
Nsaano mfonyin bi a Germannyi adrɔfo Richard Burde yɛe san me ɔfese. Emi na Harriet yɛpɛ mfonyin yi papaapa. Ɔkyerɛ nhumu a ɔdɔ bun mu ara yie wɔ hwɛbew bi a ɔkã akoma wɔ Agyenkwa n’abɛbusɛm no mu.
Ber a obiara n’enyi gyee mbordo wɔ babanyin ne nsanee no—baako, no nua panyin no, ammpɛ.15
Nna ayawdzi kɛse sõ no.
Nna ɔwɔ hɔ ma no nua no gyee n’egyapadze no. Ohun no enyim na enyim awerɛhow kɛse a ɔsoaa n’egya no.
Fitsi ber a no nuabanyin fiir edzi no, ɔabɔ mbɔdzen dɛ ɔbɛma n’egya n’adzesoa no do. Ɔayɛ edwuma da biara dɛ obesiesie n’egya n’akoma a ebubu no.
Na afei ɔba dzesɛɛfo no asan aba, na nkorɔfo nntum nngyaa dɛ wɔrema no nuabanyin otuatsewfo no asokyɛn.
Ɔkã kyerɛ n’egya dɛ, “Mfe pii yi mommpow wo mbra do da. Eso mma [moho] nntɔ me da.”16
Egya no bua wɔ ɔdɔ mu ara, “Ɔba dɔfo, dza mowɔ nyina yɛ wodze! Nnyɛ akatua anaa ahodwedwe na woreker. Ɔyɛ ayarsa ho nsɛm. Iyi nye ber a hɛn enyi ada do mfe yinom nyina mu. Wo nua yi, owui na ɔtse ase bio! Ɔyewee na woehu no!”17
Hɛn Mber yi mu Abɛbusɛm
Mo nuambanyin na nkyerɛbaa adɔfo, anyɛnkofo adɔfo, tse dɛ Agyenkwa n’abɛbusɛm nyina no, iyi mmfa nkorɔfo a wɔtsenaa ase mfe pii a abɛsen no nko ho. Ɔyɛ emi na ɔwo hɛn asɛm ndɛ.
Hɛn mu woana na omfii krɔnkrɔnyɛ kwan no do, a yɛrodwen mfom mu dɛ yebotum enya ahomka ara yie ber a yɛfa hɛn pɛsɛankonya kwan no?
Hɛn mu woana na ɔnntsee dɛ wɔabrɛ no ase, onnyaa akoma a ebubu na ɔremmper nnhwehwɛ bɔnfakyɛ na ehumbɔbɔr?
Bia binom botum adwen mpo dɛ, “Ana mubotum mpo asan ekyir? Ana wɔbɔto me dzin ma ɔakã, wɔapow me, na m’anyɛnkofo adadawfo no ekwetsir me a? Ana oye dɛ nkyɛ mebɛyew? Sɛ mobɔ mbɔdzen san ekyir a, Nyame bɛyɛ ho dɛn?”
Abɛbusɛm yi ma hɛn nyiano no.
Hɛn Ɔsor Egya botu mbirika aba hɛn nkyɛn, a ɔdɔ na ayamuhyehye ebu do wɔ N’akoma mu. Obofua hɛn; dze atar ahyɛ hɛn, mpatsea ahyɛ hɛn nsa, na nsokota ahyɛ hɛn anan, na Ɔapaa mu dɛ, “Ndɛ hɛn ho bɔtɔ hɛn! Na me ba yi, owui no, ɔasan aba nkwa mu!”
Ɔsor bedzi ehurusi wɔ hɛn nsanekyir ho.
Ahosɛpɛw a Onnyi Kabea a Enyimnyam Ahyɛ no Mã
Afei memfa mber kakra menye hom nkasa ankorankor?
Dza wɔakɔ do wɔ w’abrabɔ mu biara no, misi do na mepaa mu kã me nyɛnko dɔfo na Ɔsomafo fɛfo Elder Jeffrey R. Holland n’asɛm no: “Onnkotum aba no dɛ ibɔdɔ koraa akyɛn bea a onnyiewiei kan no a Christ no [werdam afɔrbɔ] ne hyerɛn no nnkodu.”18
Nsanmuyi horow a ayɛ no, bia na ɔnye wo efi Agyenkwa na N’Asɔr ne nkyɛn akɔ ekyirekyir dze, naaso Owura Ɔyarsafo no gyina kwan no a ogya kɔ fie no do, reyɛ wo akwaaba. Na hɛn Jesus Christ N’Asɔr asɔrmba hwehwɛ dɛ yebedzi Ne fasusu do na yefua hom dɛ hɛn nuambanyin na nkyerɛbaa, dɛ hɛn anyɛnkofo. Yɛnye hom dzi ehurusi na hɛn ho tɔ hɛn.
Hom nsanee renntsew nkaafo hɔn nhyira do. Osiandɛ Egya n’ahodze nnyi ewiei, na dza wɔdze ma kor no nntsew nkaafo hɔn awoo mu panyin kyɛfa no do ketseketse mpo.19
Merennfa nsuma dɛ nsanekyir ne yɛ yɛ mberɛw. Mubotum agye ho dase. Bia, nokwar, ɔbɛyɛ nsanmuyi a ɔyɛ dzen kɛse a yɛbɛyɛ.
Megye dase dɛ ber noara mu a ibɔ adwenpɔw dɛ ibɛsan ekyir na anantsew w’Agyenkwa na Pomfo no kwan do no, No tum bɛhɛn w’abrabɔ mu na Ɔasakyer wo.20
Abɔfo a wɔwɔ sor bedzi ehurusi.
Na hɛn so, w’ebusua wɔ Christ mu, dɛmara. Ne nyina ekyir no, yenyim mbrɛ ɔtse sɛ iyɛ ɔdzesɛɛfo a. Daa daa hɛn nyina yɛdan Christ no werdam tum kor noara. Yenyim anamɔn kwan no, na yɛnye wo bɛnantsew do.
Oho, yaw, awerɛhow, anaa nkɔmbɔdzi remmpar hɛn kwan no. Mbom yebodur ha ɔnam “[asɛm] no yɛdze gyedzi a onnhihim suo Christ ne ndwuma pa mu, dze [hɛnho] nyinara twer nyia otum gye nkwa no n’emudzi no.” Na hɛn nyinara no yɛabɔmu “[a]per [a]kɔ kan [e]gyina pintsinn wɔ Christ mu, [e]nya enyidado a ɔhyerɛn na odzi mu, na [ye]nya Nyankopɔn nye [nkorɔfo] nyina ho dɔ.”21 Hɛn nyinara yɛabɔmu wɔ “ahosɛpɛw a onnyi kabea a enyimnyam ahyɛ no mã mu.”22 Osiandɛ Jesus Christ nye hɛn ahoɔdzen!23
Ɔyɛ me mpaabɔ dɛ hɛn mu kor biara bɛtse Egya ne ndze dɛ Ɔrefrɛ hɛn dɛ yɛnhɛn kwan no a ogya kɔ fie, wɔ asɛm nwanwa yi mu—ama yeenya akokodur dze enu hɛnho, yeenya bɔnfakyɛ, na yeedzi anamɔn kwan no a ogya hɛn san kɔ hɛn ayamuhyehyefo na mbɔbɔrhufo Nyame hɔ. Iyi na megye ho dase na megya hom me nhyira wɔ Jesus Christ Ne dzin mu, amen.