Ɔwofoyɛ Krɔnkrɔn Adzesũadze

Elder Valeri V. Cordón ne Kasaa

Ɔkã Eduosuon no ho

Awofo nye hɔn Ɔsor Egya bɔ ɔkosow fekuw ma ɔweɔn hɔn mba a wɔsom bo san kɔ sor.

Ana idze ba fofor ato w’abasa mu da? Kan bi wɔ hɔ a ofi ba fofor biara mu ba, na ɔdze ɔdɔ nkitahodzi soronko bi a otum dze dɛwdzi hyɛ hɔn awofo hɔn akoma mu mã.¹ Mexiconyi kyerɛwfo bi kyerɛɛw dɛ, “Meesũa dɛ sɛ ba fofor dzi kan mia n’egya ne nsa tseaba wɔ ne kutuku ketseaba mu a, nna ne nsa akã no afebɔɔ.’’²

Ɔwofoyɛ yɛ abrabɔ ne sũahu horow soronko dodow no mu kor. Awofo nye hɔn Ɔsor Egya bɔ fekuw ma ɔweɔn hɔn mba a wɔsom bo san kɔ sor.³ Ndɛ mepɛ dɛ mekyɛ ɔwofoyɛ adzesũadze a yehu no wɔ kyerɛwsɛm mu na ma nkɔnhyɛfo atseasefo akyerɛkyerɛ dze aboa hɛn ma yeegya hɛn ɔwofo egyapadze.

Ma Asɛmpa Kusum no Nsesa Wo

Otwar dɛ yɛma asɛmpa kusum no sesa hɛn nye hɛn ebusua ebusua. President Russell M. Nelson paa mu kãa dɛ: “Ebusua ebusua fata ɔsor akwankyerɛ. Awofo nnkotum dze hɔnankasa hɔn sũahu, suro anaa tsema etu hɔn mba fo.’’⁴

Ɔwɔ mu dɛ hɛn kusum ntsetsee, ɔwofo ntsetsee, na ankorankor sũahu horow botum asom bo ama ɔwofoyɛ, eso nyimdzee yinom nndɔɔsõ a wɔbɔboa hɛn mba ma wɔasan akɔ sor. Yehia “suban gyinapɛn na … nyɛe horow,’’⁵ ɔdɔ na enyidoadze ebien ho kusum, a wopegya yie ho kwan, a wɔma yɛnye hɛn mba nya nkitahodzi “wɔ kwan a ɔkrɔn, na krɔnkrɔn mu.’’⁶ President Dallin H. Oaks kãa asɛmpa kusum ho asɛm dɛ “suban gyinapɛn, na enyidoadze na nyɛe horow ho abrabɔ soronko. … Asɛmpa kusum yi fi nkwagye ho nhyehyɛɛ, Nyankopɔn ne mbrasɛm, na nkɔnhyɛfo atseasefo hɔn nkyerɛkyerɛ mu. Ɔweɔn hɛn wɔ kwan a yɛtsetse hɛn ebusua ebusua na yɛbɔ hɛn ankorankor bra mu.⁷

Jesus Christ nye asɛmpa kusum yi no ne fapem. Yɛrefa asɛmpa kusum no wɔ hɛn ebusua ebusua mu no yɛ adze tsitsir dɛ yɛbɛma bea papa bi a gyedzi aba no betsim. Yɛbɛsesa no, President Oaks too nsa frɛ hɛn dɛ “yenngyaa ankorankor anaa ebusua amambra anaa nyɛe biara mu a ɔnye Jesus Christ N’Asɔr ne nkyerɛkyerɛ no bɔ ebira.’’⁸ Awofo, fɛr wɔ hɛn afã dɛ yɛbɛkyekyerɛ asɛmpa kusum no bɛma ɔsɛɛfo no kwan ma oenya egyinanan wɔ hɛn efiefie anaa, omo koraa no mpo, wɔ hɛn mba hɔn akoma mu.

Sɛ yɛsan mu yi dɛ yɛbɛma asɛmpa kusum no ayɛ kusum a odzi akotsen wɔ hɛn ebusua mu a, afei ɔnam Sunsum Krɔnkrɔn no tum nhyɛdo do no,⁹ hɛn sesei ɔwofoyɛ ntsetsee, amambra, na nyɛe horow no do bɔsɔn, bɛtsen, bɔpɔw, na oetu mpon.

Yɛ Fie Asɛmpa no Nsũae ne Fapem

President Russell M. Nelson akyerɛkyerɛ dɛ ɔwɔ dɛ fie no yɛ “asɛmpa no nsũae fapem.’’¹⁰ Asɛmpa no nsũae no botae nye dɛ “ɔma hɛn nsakyeree kɔ Ɔsor Egya na Jesus Christ hɔ a no mu dɔ na ɔboa hɛn ma yɛbɛyɛ tse dɛ Hɔn yie.”¹¹ Hom ma yɛnhwɛ ɔwofoyɛ asodzi horow ebiasa a ohia papaapa a nkɔnhyɛfo na asomafo akã ho asɛm a wobotum aboa hɛn ma yɛakyekyer asɛmpa kusum a ɔkrɔn wɔ hɛn efiefie.

Odzi kan: Kyerɛkyerɛ a Irinngya Bi

Ɔsor Egya kyerɛkyerɛɛ Adam fa Jesus Christ na Ne nkyerɛkyerɛ ho asɛm. Ɔkyerɛkyerɛɛ no dɛ “kyerɛkyerɛ [wo] mba ndzɛmba yinom a irinngya bi.’’¹² Yɛkã no bio a, Ɔsor Egya kyerɛkyerɛɛ Adam dɛ ɔnkyerɛkyerɛ ndzɛmba yinom kwa, ayamuyie mu ara, na onngya bi.¹³ Kyerɛwsɛm no kã kyerɛ hɛn dɛ “Na Adam na Eve hyiraa Nyankopɔn ne dzin, na wɔkãa biribiara kyerɛɛ hɔn mbabanyin na hɔn mbabaa.”¹⁴

Yɛkyerɛkyerɛ hɛn mba ayamuyie mu ara sɛ yɛnye hɔn dzi mber a ɔyɛ mfaso a. Yɛkyerɛkyerɛ a yenngya bi ber a yɛrepɛnsapɛnsa ahwɛyie nsɛntsir tse dɛ “abaefo mfir do mber,’’ mu a yɛdze mboa horow a Asɔr no dze ama ridzi dwuma.¹⁵ Yɛkyerɛkyerɛ kwa sɛ yɛnye hɛn mba sũa kyerɛwsɛm no a yɛdze Bra, Bɛka Mo Do na yɛma Sunsum no kwan ma ɔyɛ hɛn kyerɛkyerɛnyi a.

Otsĩa ebien: Yɛ Osuanyiyɛ ne Nhwɛdo

John nwoma mu no, yɛkenkan dɛ mber a Jewfo beberee bisaa Agyenkwa No suban ho asɛm no, Jesus daan hɔn adwen kɔr Ne nhwɛdo, N’Egya, do. Ɔkyerɛkyerɛɛ dɛ “Ɔba no nankasa nntum nnhyɛ noho nnyɛ hwee, gyedɛ dza ohu Egya no dɛ ɔyɛ: na biribiara a ɔno yɛ no, ɔnoara na Ɔba no so yɛ no dɛmara.’’¹⁶ Awofo, ebɛnadze na yehia dze ayɛ nhwɛdo ama hɛn mba? Osuanyiyɛ

Dɛ awofo no, yebotum akyerɛkyerɛ dɛ yɛma Nyankopɔn dzi kan no ho hia sɛ yɛpɛnsapɛnsa mbrasɛm a odzi kan no mu a, naaso yɛyɛ ne nhwɛdo sɛ yɛdze wiadze ndanenyi horow no to nkyɛn na yesie Ahomgyeda no krɔnkrɔn dapɛn biara a. Yebotum akyerɛkyerɛ temple ahyɛmudzi horow no ho hia a ohia sɛ yɛkã celestial awar no ho asɛm a, naaso yɛyɛ ne nhwɛdo sɛ yedzi hɛn ahyɛmudzi horow nyi, a yɛdze enyidzi ma hɛn ɔhokafo.

Otsĩa ebiasa: Nsato ma Adzeyɛ

Gyedzi wɔ Jesus Christ mu wɔdɛ ɔyɛ hɛn mba hɔn dasee horow n’akoma, na otwar dɛ dasee yinom ba, ba kor biara hɔ a ɔnam ankorankor nyikyerɛ do.¹⁷ Yɛbɔboa hɛn mba ma woenya hɔn dasee no, yɛhyɛ hɔn nkuran dɛ wɔmfa hɔn pɛ nsan mu nyi dza oye¹⁸ na yesiesie hɔn ma hɔn abrabɔ nyina wɔ Nyankopɔn n’ahyɛmu anamɔn kwan no do.¹⁹

Ɔbɛyɛ nyansadze dɛ yɛbɛhyɛ hɛn mba hɔn mu kor biara nkuran ma ɔagye President Nelson ne ɔfrɛ ato mu dɛ ɔnoara bɛyɛ ne dase wɔ Jesus Christ na N’asɛmpa ne hwɛfo, ɔnyɛ ho edwuma, ɔntsetse no ama oenyin, ɔmfa nokwar nyɛn no, na mma ɔmmfa mbanyin na mbaa ekyingyefo hɔn ator wiadze nyansa ngu ho fĩ.²⁰

Tsenenee, Adwen da hɔ Ɔwofoyɛ

Hɛn Ɔsor Egya n’adwen da hɔ dɛ ɔwofo krɔnkrɔn no wɔdaa no edzi wɔ nyikyerɛ mu maa Moses dɛ: “Na hwɛ, iyi nye m’edwuma na m’enyimnyam—dɛ medze nyimpa ne bɛkyebo na onnyiewiei nkwa bɔbɔ adze.’’²¹ President Nelson dze aka ho dɛ, “Nyankopɔn bɛyɛ biribiara a Obotum, a onnkɛsiw hom pɛ kwan, dze aboa hom ma nhyira kɛsenara wɔ mfesantsen nyinara mu ammbɔ hɛn.’’²²

Dɛ awofo no, yɛyɛ Nyankopɔn n’ananmusifo wɔ hɛn mba hɔn hwɛe mu.²³ Otwar dɛ yɛyɛ biribiara a yebotum dze ayɛ bea a oye a hɛn mba bɛtse Ne nhyɛdo krɔnkrɔn ne nkã.

Ɔsor Egya annhyehyɛ da amma hɛn dɛ awofo dɛ yɛntsena hɔ ara dɛ bɔhwɛadzefo, a yɛrohwɛ ma hɛn mba hɔn sunsum mu abrabɔ ada edzi. Hom mma memfa mankasa mo sũahu mfa nkyerɛkyerɛ adwen da hɔ ɔwofoyɛ adwenkyerɛ yi. Mber a nna mokɔ Primary wɔ nkorbata kakraba bi mu wɔ Guatemala no, m’awofo hyɛɛ ase kyerɛkyerɛ me patriarch nhyira ho mfaso ho asɛm. Me maame nyaa adagyer nye me kyɛɛ ne patriarch nhyira a onyae a ɔsom no bo ho suahu. Ɔkyerɛkyerɛɛ me nkyerɛkyerɛ no a ɔfa patriarch nhyira ho no, na ɔgyee anohoba nhyira ho dase. N’adwen da hɔ ɔwofoyɛ kenyaan me ma menya pɛ dɛ mebɛgye me patriarch nhyira.

Mber a midzii mfe 12 no, m’awofo boaa me ma muduaduae hwehwɛɛ patriarch bi. Nna iyi hia osiandɛ nna patriarch biara nnyi mansin a nna yɛtse hɔ no. Mutuu kwan kɔr patriarch bi hɔ a nna ɔwɔ stake bi a ɔyɛ aborɔfo kwansin 97 fi bea metse no. Mekaa pefee mber a patriarch no dze ne nsa guu me tsir do dze hyira me. Nna me nam sunsum mu pisi a tum wɔ mu do, a ekyingye biara nnka ho hun dɛ, me Ɔsor Egya nyim me.

Mfe 12 banyimba a ofi kurow kakraba mu dze, nna ɔyɛ m’ehiadze. M’akoma danee kɔr me Ɔsor Egya do dɛm da no osian me maame na m’egya hɔn adwen da hɔ ɔwofoyɛ ntsi, na mebɛda hɔn ase daa.

Akyerɛbaa Joy D. Jones, nkaano Primary General President, kyerɛkyerɛɛ dɛ: “Yennkotum atweɔn dɛ nsesã bɛba ara kwa ama hɛn mbofra. Mpofirmu nsakyeree nnyɛ Jesus Christ N’asɛmpa ne fapem no mu bi.”²⁴ Hɛn dɔ na nkenyan nsato botum enya nsunsuando wɔ mbrɛ hɛn mba si dze hɔn pɛ dzi dwuma do mu. President Nelson tsii mu dɛ, “Edwuma biara nnyi hɔ a ɔkyɛn tsenenee adwen da hɔ ɔwofoyɛ!’’

Ewiei

Awofo, wiadze nyansa, kusum, na adwenkyerɛ horow a wɔnye hɛn mba adwen ridzi esi ahyɛ wiadze yi mu mã. Dan kɛse potoon no robɔ n’akadofo ho dawur daa daa a ɔdze abaefo mfir a ɔwɔ hɔ sesei no. Nkɔnhyɛnyi Moroni kyerɛkyerɛɛ dɛ: “Mbom Nyame nam akyɛdze a ɔyɛ ne Ba no mu esiesie kwan a oye kyɛn biribiara.”²⁶

Sɛ yɛnam ahyɛmudzi horow do nye Nyankopɔn bɔmu na yɛbɛyɛ n’ananmusifo wɔ hɛn mba hɔn nhwɛe mu a, Ɔbɛtsew hɛn nhyehyɛɛ ho, obekenyan hɛn nkyerɛkyerɛ, na ɔagow hɛn nsato mu ama “hɛn mba eehu fibea kor a ɔsɛ dɛ wɔkɔ kɔhwehwɛ hɔn bɔnfakyɛ.’’²⁷ Jesus Christ ne dzin mu, amen.