Ana Epɛ Dɛ W’enyi Gye?
Hom ntsena ahyɛmudzi anamɔn kwan no do Hom abrabɔ bɛyɛ mberɛw yie, enyigye yie, na dɛwdzi ahyɛ no mã.
Ana Epɛ Dɛ W’enyi Gye? Ebɛnadze na ɔma w’enyi gye? President Russell M. Nelson kãa dɛ: “Sɛ epɛ dɛ idzi awerɛhow a, bu mbrasɛm no do—na ma nnu wo ho da. Sɛ epɛ dɛwdzi a, ka anamɔn Kwan no do.’’1 Ana ɔnnyɛ mbrɛw dɛ w’enyi bɛgye? Yɛ ahyɛmudzi krɔnkrɔn ara na sie no wɔ w’abrabɔ mu. Hom mma yɛnhwɛ ndzɛmba a obotum aboa hɛn ma yɛaka ahyɛmudzi anamɔn kwan no do na wɔama hɛn enyigye.
1. Ebɛnadze nye ahyɛmu anamɔn kwan no?
Dɛ mbrɛ Elder Dale G. Renlund kãe no: “dzin ahyɛmu ananmɔn kwan no yɛ ahyɛmu horow a yedua do ba Christ hɔ na yɛnye No nya nkitahodzi. Ɔnam ahyɛmu nkyekyeree yi do no, yenya No onnyiewiei tum no ho kwan. Gyedzi wɔ Jesus Christ mu na nnuho na ɔhyɛ anamɔn kwan yi ase, na enuma na eregye Sunsum Krɔnkrɔn no toa do.’’2 Yekenyan ahyɛmudzi no Kwesida biara ber a yedzi sacrament no.
Yɛdze enuma ahyɛmudzi hyɛ ase no, yɛyɛ ahyɛmu horow bi ka ho wɔ hɛn abrabɔ nyina mu. Elder Renland kãa no bio dɛ: Ahyɛmu anamɔn kwan no gya hɛn kɔ temple ayɛdze horow ho, tse dɛ temple endowment. Endowment no yɛ Nyankopɔn n’ahyɛmudzi krɔnkrɔn akyɛdze a ɔma yɛnye No nya nkitahodzi yie ara.”3
2. Ana Ewɔ Ahyɛmu Anamɔn Kwan no do?
Ɔtɔfabi na yɛyɛ ahyɛmu horow a, yɛfom dɛ yesie. Sɛ iyi si a, yebesi dɛn bɛsan akɔ ahyɛmu anamɔn no do? Hom mma menye hom nkyɛ fasusu horow bi wɔ eresan akɔ ahyɛmu anamɔn kwan no do ho.
Bɔbor abosoom kakra a abasen no, minyaa nkra fi asɛmpasomafo bi a ɔnye hɛn somee na ɔasan aba bi hɔ. Ɔkãa dɛ, “Mber kakra a abasen no ayɛ dzen. Ɔnye ahoper na abagura edzi akõ da biara no enya nsusuando wɔ no do na ɔyɛ dzen papaapa. Metse ankonamyɛ na awerɛhow ara nkã. Mobɔ mpaa gye hɛn Ɔsor Egya n’akwankyerɛ dze enya asomdwee na awerɛkyekyer wɔ dza mubotum ayɛ nye nkõdzen no edzi akõ. … Mber a morobɔ mpaa no, metsee Sunsum ne nkenyan a ɔkã kyerɛ me dɛ mihia dɛ mutua me ebupɛn du emudzi mu. … Metsee sunsum no ne nkã dzendzenndzen na ntsɛmara minyaa pɛ dɛ meyɛ. Medze pɛ dɛ mebɛyɛ no menyaa nkenyan no dɛ: “Sɛ itua wo ebupɛn du a biribiara bɛyɛ YIE.’ Meda ho ridzi aper dɛ mebenya asomdwee, na mowɔ dase wɔ hɛn Agyenkwa mu na ɔnam mesetsie do no mutum tse nkã na menya asomdwee no a morohwehwɛ wɔ m’akoma na m’adwen mu no. Ndaansa yi na meyɛɛ m’adwen dɛ mebɛsan aba Asɔr na mahwehwɛ sunsum no wɔ dza meyɛ nyinara mu.
Sesei dze ɔreyɛ adze. Hom so botum ebisa Ɔsor Egya hɔ asomdwee, mbom ebia nyiano no bɛyɛ soronko akyɛn dza w’enyi da kwan dɛ ɔbɛyɛ no. Susuampara dɛ ebɔhwehwɛ ehu Agyenkwa na abɔ mpaa ama Ɔsor Egya no, Ɔbɛma wo nyiano a Ɔahyehyɛ dze ama wo nko.
President Thomas S. Monson kyerɛkyerɛɛ dɛ:
“Adzesua kɛsenara a yebotum esũa no wɔ ɔnnkyebo abrabɔ mu no, nye dɛ sɛ Nyankopɔn kasa na yɛyɛ setsie a, daa yɛnnkɔfom.”4
Sɛ yesie mbrasɛm no a, hɛn abrabɔ bɛyɛ enyigye mbordo, ɔbɛhyɛ mã mbordo, na ntõtõananmu do bohuan. Hɛn ɔhaw na nsɛnhyia bɛyɛ mberɛw dɛ yɛbɔsɔw, na yebenya [Nyankopɔn n’] anohoba nhyira no.”5
Ber a wɔfrɛɛ dɛ menyɛ bishop no, nna ɔyɛ m’abrabɔ mu mber a ɔyɛ dzen papaapa no. Nna meyɛ egya kumabaa a mowɔ me mfe 30 ahyɛse mu na nna mowɔ sikasɛm ahokyer mu osian ebusua nsɔhwɛ horow ntsi. Nna munntum nnya nyiano biara, na nna m’adwen nye dɛ nsɔhwɛ horow no nnkowie da. Mehawee ankasa wɔ sikasɛm na nkãtse mu Mehyɛɛ ase dɛ meregye mo sunsum mu ahoɔdzen ho kyim, so dɛmara. Ɔyɛ dɛm nkõdzen mber no na me stake president dze ɔfrɛ no maa me. Nna ɔwɔ mu dɛ ɔyɛ dzen, eso megyee ɔfrɛ no.
Stake president no nye me yer so yɛɛ mpɛnsapɛnsamu, na oenntum annkã nyew, nna oenntum so annkã dɛ oho mbom ɔkɔɔr do kyii nyinsuwa. Osũii dapɛn no nyina a, obisaa Ɔsor Egya dɛ, “Dɛn ntsi na sesie?’’ na “Ana Inyim ankorankor biara ara yie a?’’ Oennya nyiano, naaso Kwesida a nna odzi do no wɔmaa me tsipia dɛ bishop. Oemmbisa Ɔsor Egya nsɛmbisa no bio na ɔboaa me wɔ me ɔfrɛ mu no mfe esia.
Kwesida no ber a wosiaan me no, me yer tsee ndze bi mber a nna ɔregye sacrament no. Ndze no wɔsaa kyerɛɛ no dɛ, “Osiandɛ nna ɔyɛ dzen ma wo dɛ ebɛnantsew ntsi, mefrɛɛ no dɛ bishop ama oeesuo wo mu na ɔanantsew ama wo.’’ Ɔhwɛɛ n’ekyir mfe esia a abasen no, ohun dɛ nsɔhwɛ horow nyinara a nna ɔyɛ dɛ onnkotwa no mber rokɔ no oesiesie ne nyinara.
Yesũaa dɛ sɛ yɛdwen dɛ ɔnnyɛ mber pa ma hɛn dɛ yɛbɛgye ɔfrɛ a, ebia ɔbɛyɛ mber no a yehia dɛm ɔfrɛ no dodoodow. Mber biara a Ewuradze se hɛn dɛ yɛnsom wɔ ɔfrɛ biara mu no, sɛ ɔyɛ ɔfrɛ a ɔyɛ har anaa ɔyɛ dur yie o, Ohu hɛn ehiadze. Ɔma hɛn ahoɔdzen a yehia na Ɔayɛ nhyira krado dɛ obohue egu hɛn do ber a nokwar mu ara yɛsom.
Ndzɛmba pii so wɔ hɔ a wɔdan hɛn enyi ma yɛnntsena ahyɛmudzi anamɔn kwan no do. Dza ɔtse biara mmfa ho no, ɔnnka ekyir koraa dɛ yɛbɛdan hɛn akoma akɔ Ɔsor Egya hɔ akɛgye mboa. Elder Paul V. Johnson kyerɛkyerɛɛ hɛn dɛ: “Sɛ yedzi Satan n’ekyir a, yɛma no tum. Sɛ yedzi Nyankopɔn n’ekyir a, Ɔma hɛn tum.”6
Ɔhen Benjamin a ɔwɔ Mormon Nwoma no mu gyee dase dɛ: “Mebɛpɛ dɛ hom dwendwen nhyira nye ahomka tsebew a hɔn a wodzi Nyankopɔn ne mbrasɛm do no wɔ mu. Na hwɛ, woehyira hɔn wɔ adze nyina mu, wɔ honam nye sunsum nyina mu; na sɛ wosuo nokwar no mu dze kɔ ewiei a wɔbɛgye hɔn akɔ sor, ama wɔnye Nyankopɔn aakɛtsena wɔ enyigye a onnyi ewiei da tsebea no mu.”7
3. Enye Nyankopɔn Ridzi Ahyɛmudzi Horow Besi Dɛn Botum Ama W’enyi Agye?
Me yer kã dɛ hɛn awar ma yɛbɔmu tõ kɔndua, na ɔnam dɛm ntsi otum yɛ ndzɛmba a nkyɛ nkaano onnkotum ayɛ no. Mfatoho, ofitsi ber a nna osuar no, nna ɔyɛ dzen ma no dɛ opue anafua, na ɔnnyɛ dzen bio osiandɛ menye no kɔ. Ɔyɛ etsĩa na onntum nnyi adze wɔ shelf a ɔwɔ sor do gyedɛ ogyina egua anaa atwer do, naaso mutum yiyi ndzɛmba fi shelves a wɔ sor do ma no osiandɛ emi meyɛ tsentsen sen no. Yɛrefa hɛn Agyenkwa no kɔndua atõ hɛn do tse dɛm. Ber a yɛdze hɛnho nye No tõ kɔndua no, yebotum ayɛ ndzɛmba a hɛnara yennkotum ayɛ osiandɛ Obotum ayɛ ndzɛmba no yɛnnkotum ayɛ ama hɛnho no.
Elder David A. Bednar kãa dɛ: “Yɛreyɛ na yerisie ahyɛmudzi krɔnkrɔn horow no ma yɛnye Ewuradze Jesus Christ tõ kɔndua. Ohia no, Agyenkwa no refrɛ hɛn dɛ yɛndan No na yɛnye No mbɔmu ntwe, mpo ɔwɔ mu dɛ hɛn mbɔdzenbɔ papa koraa no nnye Ne dze nnyɛ pɛ na yennkotum dze atõtõ Ne dze ho. Sɛ yɛdze hɛn werɛ twer No na yɛnye No twe hɛn adzesõa wɔ ɔnnkyebo akwantu no mu a, nokwar ara, No kɔndua yɛ mberɛw, na N’adzesõa yɛ har.’’8
President Nelson kyerɛkyerɛɛ so dɛ:
“Enye Agyenkwa no ato kɔndua no n’asekyerɛ dɛ ewɔ kwan wɔ N’ahoɔdzen na ɔpon tum no ho.”9
Irisie ahyɛmudzi a enye Nyankopɔn dzi n’akatua nye ɔsorsor tum—tum a ɔhyɛ hɛn dzen ma yetum gyina hɛn haw, nsɔhwɛ, na akomayaw ano yie. Tum yi ma hɛn kwan do yɛ mberɛw. Hɔnnom a wɔdze Jesus Christ ne mbrasɛm a ɔkrɔn no bɔ bra no nya kwan wɔ No tum a ɔkrɔn no ho.”10
“Yerisie ahyɛmudzi horow no ma abrabɔ yɛ mberɛw yie ankasa! Nyimpa kor biara a odzi ahyɛmu wɔ enuma nsubura mu na wɔ temple mu no—na osie no—nya Jesus Christ no tum ho kwan ntowdo.”11
Mo nuambanyin na nkyerɛbaa adɔfo, ana hom pɛ dɛ hom enyi gye a? Hom ntsena ahyɛmudzi anamɔn kwan no do Hom abrabɔ bɛyɛ mberɛw yie, enyigye yie, na dɛwdzi ahyɛ no mã. Hɛn Agyenkwa rotõ nsa frɛ hɛn dɛ, “Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.”12 Ɔno nye Christ tseasefo no. Ɔsoa hɛn adzesoa na Ɔma hɛn abrabɔ yɛ mberɛw yie. Jesus Christ ne dzin mu, amen.