Dɔ Wo Nyɛnko
Ayamuhyehye yɛ Christ no su. Ofi ɔdɔ ma nkaafo mu ba na onnyi ewiei biara.
Anapa yi, moto nsa frɛ wo dɛ kã moho ma yɛnkɔ akwantu bi wɔ Ebibiman mu. Irunnhu ngyata, zebra, anaa ason, mbom bia akwantu no n’ewiei no, ibohu mbrɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no mu mba mpempem dze Christ ne mbrasɛm kɛse a ɔtɔ do ebien dɛ “dɔ wo nyɛnko” no risi dzi dwuma” (Mark 12:31).
Fa mber kakra susu, Ebibiman ekuroba, dɛtse kɔkɔɔ no. Ehwɛ asaase a ayɛ pawee, kɛsɛɛ no a ihu dɛ nsu nntɔree papa biara wɔ mfe dodow pii mu. Anantwi kakra a wotwa mu wɔ wo kwan do no ato mbiew na nyia ɔkã hɔn no yɛ Karamojongnyi a, kuntu dura noho a ɔka nantwi, na asopaatsee da ne nan ho a enyidado mu ara ɔnam dɛ obenya efuw na nsu.
Ber a enam kwan a ɔyɛ krann na mboba mboba no mu no, ihu mbofra ahoɔfɛfo ekuw ekuw pii na edwen siantsir a wɔnnkɔ skuul ho. Mbofra no serew to wo nsa, na ɔwo so dze nyinsuwa kakra na, serew to hɔn nsa no bi. Mbofra hɔn mu kuma koraa a ihu hɔn wɔ akwantu yi mu no hɔn mu ɔha nkyemu eduokron-ebien wɔ edziban hia ho tsebew mu, na w’akoma dze yaw sũ.
Ehwɛ kan a, ihu enã bi a ɔso gallon-enum nsu adze a nsu wɔ mu wɔ n’etsifi na kor so kitsa ne nsamu. Ogyina hɔ ma fidua kor wɔ fidua ebien biara mu wɔ dɛm apaamu yi a mbaa, mbofra na mpanyin, nantsew bɔbor sima 30 wɔ kwan afã do, dabiara, dze kɔ ba, hwehwɛ nsu brɛ hɔn ebusua. Awerɛhow bi fura wo.
Ndɔnhwer ebien ekyir no ikodur bea kɔnn, a wɔadɔw hɔ na nwin wɔ hɔ. Nhyiamu bea no nnyɛ asado anaa ntamadan bi mpo ase, mbom wɔ ndua akɛse kakraabi ase a ɔma nwin fi ewia ne hyew ano. Dɛm bea yi ihu dɛ nsu a wobu, kandzea, anaa egyanan bea a wɔdze nsu pia biara nnyi hɔ. Ehwɛ aprɔw na ihu dɛ ewɔ nkorɔfo a wɔdɔ Nyankopɔn hɔn ntamu, na hɔ noara etse Nyankopɔn No dɔ ma hɔn ne nkã. Wɔaboa ano dɛ wɔrebɛgye mboa na enyidado, na aba dɛ erebɛkyɛ so.
Dɛm na emi na Akyerɛbaa Ardern, yɛnye Akyerɛbaa Camille Johnson a ɔyɛ hɛn Widaze Mfɛndzanan Relief Society President na no kun Doug, nna Akyerɛbaa Sharon Eubank, Asɔr no ne Nyimpa ho Mboa Dwumadzi no kwankyerɛfo, hɛn akwantu wɔ Uganda, ɔman a bɛyɛ nyimpa ɔpepe 47 wɔ mu wɔ Ebibiman Finimfin Asɔr n’Apaamu no tse. Dɛm da no wɔ ndua no win ase no, yɛkɔhwɛɛ sɔn mu apɔwmudzen dwumadzi bi a Asɔr no ne Nyimpa ho Mboa Dwumadzi, UNICEF na Uganda aban n’Apɔwmudzen Asoɛe bɔɔ mu faa ho kaw. Iyinom yɛ nkabɔmu ekuw ekuw a gyedzi wɔ hɔn mu, a wɔtɔɔ bo ara yii hɔn ama wɔahwɛ dɛ wɔdze Asɔrmba hɔn nyimpa ho mboa sika bedzi dwuma yie.
Ɔyɛ akoma yaw dɛ ibohu mbofra a wonnya edziban pa, na nsamanwaw, konduroku, na wɔkɔ duado ntaataado ho no nsunsuando dze, eso yehyiaa hɔn no hɛn mu kor biara nyaa enyidado kɛse wɔ daakye papa bi ho ma hɔn.
Dɛm enyidado no, ne fã bi baa, ɔnam wiadze mfɛndzanan Asɔrmba hɔn ayamuyie do a wɔdze hɔn mber na sika dze ma Asɔr no ne nyimpa ho mboa dwumadzi. Ber a muhun dɛ ayarfo na hɔn a woruhu amandze rinya mboa na enyidado no, misii me tsir adze ndaase mu ara. Dɛm ber no, metsee dza Ahemfo hen no kyerɛ no ase yie, a ɔkãa dɛ:
“Hom mbra, hom a m’Egya ehyira hom, hom mbɛfa ahenman a wosiesiei maa hom … :
“Osiandɛ ɔkɔm dzee me, na hom maa me edziban, nsukɔm dzee me, na hom maa me anondze, meyɛɛ hɔho, na hom faa me kɔr fie” (Matthew 25:34–35).
Hɛn Agyenkwa No ntotɔserɛ nye dɛ “Hom mma hom kan no nhyerɛn wɔ nyimpa enyim, ma woeehu hom ndwuma pa na wɔahyɛ hom Egya a ɔwɔ sor enyimnyam” (Matthew 5:16; san so hwɛ nyiyimu 14–15). Dɛm bea a ɔwɔ ekyirekyir mu yi, hom ndwuma pa dze kan baa hɔn abrabɔ mu na ɔmaa nkorɔfo a wohia ankasa hɔn adzesoa yɛɛ har, na enyimnyam kaa Nyankopɔn.
Me yamu a nkyɛ hom botum atse hɔn nokwar ndaase mpaabɔ a wɔdze maa Nyankopɔn dɛm ɔhyew ber da no mu. Wɔbɛma maakã akyerɛ hom wɔ hɔn Karamojong kasa mu dɛ, “Alakara.” Yɛda hom ase.
Hɛn akwantu no maa mekaa abɛbusɛm a ɔfa Samarianyi yamuyiefo no ho, a n’akwantu dze no kefir huntuma kwan bi do, tse dɛ dza mekãa ho asɛm no, kwan a ofi Jerusalem kɔ Jericho. Samarianyi somfo yi kyerɛkyerɛ hɛn “erodɔ wo nyɛnko” n’asekyerɛ.”
Ohun “nyimpa bi [a] … ɔkɔtɔɔ edwotwafo mu a wɔpaa no ho tam, na wopirapiraa no gyaa no hɔ kɔree, ma ɔtɔɔ akɔtɔmborɔnsa” (Luke 10: 30). Samarianyi no “ne yamu hyehyee no” (Luke 10:33).
Ayamuhyehye yɛ Christ no su. Ofi ɔdɔ ma binom mu ba na onnyi ewiei biara. Jesus, wiadze Agyenkwa no, nye ayamuhyehye fasusu mapã. Ber a yɛkenkan dɛ “Jesus sũi” no (John 11:35), yɛyɛ adasefo, dɛ Mary nna Martha yɛ no, wɔ N’ ayamuhyehye ho, a ogyaa No ma Odzii kan sii nkrum wɔ No sunsum mu na ɔyɛɛ No awerɛhow (hwɛ John 11:33). Christ n’ayamuhyehye fasusu wɔ Mormon Nwoma mu no, Jesus yii noho kyerɛɛ dɔm tutuw bi na ɔsee dɛ:
“Ana hom wɔ ebubuafo anaa efurafo, anaa mpakye, … anaa etsitsifo, anaa hɔn a biribi rehaw hɔn? Hom mfa hɔn mbra na mebɛsa hɔn yarba, osiandɛ me yamu hyehye me wɔ hom ho. …
“ … Na ɔsaa obiara a wɔdze no brɛɛ no no yarba” (3 Nephi 17:7, 9).
Hɛn mbɔdzembɔ nyinara ekyir no, emi na ɔwo nnkotum asa obiara ne yarba, mbom hɛn mu kor biara botum ayɛ nyia ɔdze nsesa papa ba obi n’abrabɔ mu. Ɔyɛ aberantsɛba kor ara, banyimba ara, na ɔmaa paanoo enum na esunam ebien ma nyimpa mpemenum dzii. Bia, dɛ mbrɛ osuanyi Andrew bisaa wɔ paanoo na esunam no ho no, hɛn so yebebisa fa hɛn afɔrbɔ ho dɛ, “Na iyi dze yɛ ebɛn ma nyimpa pii yi?” (John 6:9). Mema wo awerɛhyɛmu: oye dɛ ema dza ibotum, na nkyii ama Christ kwan ma Ɔaayɛ wo mbɔdzembɔ no kɛse.
Ogyina dɛm asɛm yi do no, Elder Jeffrey R. Holland too nsa frɛ hɛn, “ahonyafo anaa ehiafo, … dɛ ‘yɛnyɛ dza yebotum’ sɛ binom wɔ ahohia mu a.” Odzii dase, dɛ mbrɛ meyɛ yi, dɛ “Nyankopɔn bɔboa hom na Ɔaka hom ho wɔ hom ayamuhyehye ndwuma mu dɛ esuafo.” (“Are We Not All Beggars?,” Liahona, Ɔberɛfɛw 2014, 41).
Dɛm asaase a ɔwɔ ekyirekyir no mu, wɔ dɛm da a mo werɛ nnkefir da no mu, migyinae dɛ mbrɛ migyina sesei dɛ dasefo wɔ Asɔrmba ahonyafo na ehiafo nyina hɔn ayamuhyehye a ɔka akoma na ɔsesa abrabɔ ho.
Samarianyi yamuyiefo n’abɛbusɛm no kɔ do ber a “ɔkyekyeer [ɔbarimba no] n’ekur … na ɔkɔhwɛɛ no” (Luke 10:34). Hɛn Asɔr nyimpa ho mboa dwumadzi ma yɛboa ntsɛmara wɔ atoyɛnkyɛm mu na yɛkyekyer wiadze n’ekurekur a wogudo retserɛw a ɔyɛ yarba, ɔkɔm, mbofra a wowuwu, nyimpa nnya edziban pa, woetu hɔn efi mbea a wɔtsetse, na mpɛn pii no ekur a yɛmmfa enyiwa nnhu dɛ abagura, ndaadaa, na abawpa.
Nkyii Samarianyi no “yii denare ebiendze maa ahɔhodan wura no, na ɔsee no dɛ, Hwɛ no yie” (Luke 10:35 Dɛ asɔr no, hɛn enyi sɔ dɛ yɛnye “ahɔhodan wuranom” binom anaa ekuw ekuw binom tse dɛ Catholic Relief services, UNICEF, na Red Cross/Red Crescent, bɔbɔ mu aboa wɔ hɛn nyimpa ho mboa dwumadzi horow mu. Hɛn enyi sɔ ara ma wo “denare ebien” anaa euro ebien, peso ebien, anaa shilling ebien, a wɔdze riyi adzesoa a nyimpa dodow a wɔwɔ wiadze mfɛndzanan rosoa fi hɔn do. Irunnhu hɔn a wɔregye wo mber, wo cedis, na mpɛsewa, naaso ayamuhyehye nnhia dɛ yebenyim hɔn; dza ohia ara nye dɛ yɛdɔ hɔn.
President Russell M. Nelson, yɛda wo ase, dɛ abɔ hɛn nkaa dɛ “sɛ yɛdze hɛn akoma nyina dɔ Nyankopɔn a, Ɔdan hɛn akoma kɔ binom hɔn yieyɛ do” (“The Second Great Commandment,” Liahona, Ɔberɛfɛw 2019, 97). Megye dase dɛ hɛn mu kor biara benya kankɔ wɔ enyigye, asomdwee, ahobrɛadze, na ɔdɔ mu ber a yetsie President Nelson ne frɛ dɛ yɛndan hɛn akoma nkɔ binom hɔn yieyɛ do na Joseph Smith no ntotɔserɛ dɛ “ma nyia ɔkɔm dze no edziban, fura adagyaw tam, hwɛ kunafo, pepa egyanka n’enyinsuwa, [na] kyekye nyia ohu amandze no werɛ, sɛ ɔwɔ Asɔr yi mu o, anaa asɔr biara mu o, anaa onnyi asɔr biara mu koraa, bea biara a [yebohu] hɔn” (“Editor’s Reply to a Letter from Richard Savary,” Times and Seasons, Ebɔw 15, 1842, 732).
Dɛm abosoom nyinara a abasen no, yehun hɔn a ɔkɔm dze hɔn na hɔn a woruhu amandze wɔ asaase pawee huntuma no do na yehun hɔn mboa ho ntotɔserɛ. Hɛn ara hɛn kwan do no, [ye]sii nkrum wɔ sunsum mu na ɔyɛɛ [hɛn] awerɛhow (hwɛ John 11:33), eso dɛm atsenka no botowee ber a yehun Asɔrmba hɔn ayamuhyehye a wɔkyerɛe dze maa hɔn a ɔkɔm dze hɔn edziban, hwɛɛ ekunafo, na wɔkyekyee hɔn a wohu amandze hɔn werɛ na wɔpepaa hɔn nyinsuwa.
Hom ma yɛnhwɛ binom hɔn yieyɛ afebɔɔ na yɛnkyerɛ wɔ kasa na ndzeyɛɛ mu dɛ “[yenya] pɛ dɛ [yɛbɔ]soasoa kor biara n’adzesoa” (Mosiah 18:8), dɛ “[yɛ]bɛkyekyer hɔn a hɔn akoma ebubu” (Nkyerɛkyerɛ na Ahyɛmudzi 138: 42), na dɛ yebesie Christ Ne mbra kɛse a ɔtɔ do ebien dɛ “dɔ wo nyɛnko” no (Mark 12:31). Jesus Christ ne dzin mu, amen.