Nyame Nyim Wo na Ɔdɔ Wo.

Elder Alan T. Phillips

Ɔkã Eduosuon no ho

Nyankopɔn n’enyigye nhyehyɛɛ no nyina fa wo ho. Eyɛ Ne ba a esom bo.

Mfe esia abasen kɔ no, nna hɛn ebusua rutu kwan anafua wɔ Oxford kuropɔn n’abɔntsen. Dɛ ma mbofraba kã wo ho a eyɛ no, nna ohia dɛ yegyina, ntsi yɛnyaa ahomgyebea bi a ɔwɔ fiadze horow na wɔtontɔn edziban. Yefi kaar no mu pɛpɛɛpɛr, seraa bea yi yɛɛ hɛn ho yie, na yɛtoaa hɛn akwantu no do.

Sema duenum ekyir no, hɛn babanyin panyin bisaa asɛm a ohia dɛ: “Jasper wɔ hen?” Jasper nankõ taa tsena hɛn no n’ekyir. Yesusui dɛ gyama ɔada anaa oesuma anaa ɔnye hɛn redzi ndaadaa agor.

Ber a no nuabanyin gye enyim ara hwehwɛɛ kaar no mu no, yehun dɛ hɛn mfe enum babanyin no nnyi hɔ. Hu hyɛɛ hɛn akoma mu mã. Yɛredan kaar no dɛ yɛresan akɔ ahomgyebea hɔ no, yɛtotɔeserɛ Ɔsor Egya dɛ Ɔmbɔ Jasper no ho ban. Yɛfrɛ polisifo na yɛbɔɔ hɔn amandzɛɛ fa hɛn gyinabew no ho.

Ber a ahoɔhar mu ara yedur hɔ sema 40 ekyir no, yehun polisifo hɛn wɔ kaar gyinabea hɔ, a nkandzea rinyinam nyinam. Nna Jasper tsena kaar no mu kor mu a ɔdze bɔtoms ridzi agor. Mo werɛ nnkefir dɛw nkãtse a yenyae dɛ yɛnye no akã abɔmu bio.

Agyenkwa n’abɛbu nkyerɛkyerɛ tsim mboano, nsanananmu, anaa mbɔdzembɔ dɛ yɛbɔhwehwɛ dza ɔabɔ apetse anaa ɔayew no do. Dza ɔkã iyinom ho nye guan a ɔayew, sika a ɔayew, na babanyin a ɔayew no abɛbusɛm.¹

Jasper n’asɛm a osii yi ada m’adwen do mpɛn pii wɔ mfe a oetwa mu no, maadwen Nyankopɔn ne mba hɔn ho hia na hɔn krɔnkrɔn awosu, Jesus Christ no ɔpon tum, na Ɔsor Egya a Onyim ɔwo na emi No dɔ a odzi mu no ho. Mowɔ enyidado dɛ mebedzi nokwar yinom ho dase ndɛ.

1. Nyankopɔn ne Mba

Abrabɔ yɛ dzen. Nkorɔfo dodowara nya ahobow, ankonamyɛ, anaa ɔberɛ ho nkãtse. Sɛ ndzɛmba yɛ dzen a, yenya atsenkã dɛ yɛayew anaa yɛaka ekyir. Yenyim dɛ hɛn nyina yɛyɛ Nyame ne mba na yɛkã Ne onnyiewiei ebusua ho no, dze eka ho na botae pa nkãtse bɛsan ananmu aba.²

President M. Russell Ballard kyɛɛ dɛ: “Awosu kor wɔ hɔ a, ohia a hɛn nyina yɛkyɛ mprɛmprɛ na afebɔɔ. … Ɔno nye dɛ eyɛ na ebɔkɔ do ayɛ Ɔsor Egya ne babanyin anaa ne babaa. … Eretse nokwar yi ase—eretse ase yie ankasa na eregye ato mu no—sakyer abrabɔ.”³

Nya ntseasee a osi pi dɛ esom bo ma w’Egya a ɔwɔ Sor. Ɔgye enyim ara bɔɔ wo, nnyɛ egyanka koraa, anaa ammba mpofir mu. Bea a edwindze wɔ no, ɔwenfo wɔ hɔ.

W’abrabɔ wɔ mfaso na botae. Jesus Christ N’asɛmpa nsanananmu a ɔrokɔ do no dze kan na ntseasee fa wo awosu krɔnkrɔn ho ba. Eyɛ Ɔsor Egya ne ba dɔfo. Mbɛbusɛm na ne nkyerɛkyerɛ no nyinara yɛ ɔwoara w’asɛm. Nyankopɔn dɔ wo dodoodow dɛ Ɔsomaa Ne Ba, dɛ Ɔmbɛgye wo, Ɔnsa wo yarba, na Ɔmpon wo.⁴

Jesus Christ hun ankorankor biara n’awosu krɔnkrɔn na onnyiewiei bo a ɔsom.⁵ Ɔkyerɛkyerɛɛ mbrɛ mbrasɛm akɛse ebien dɛ yɛndɔ Nyankopɔn na hɛn nyɛnko no si yɛ fapem ma Nyankopɔn Ne mbrasɛm nyinara mu.⁶ Hɛn asɛdze krɔnkrɔn mu kor nye dɛ yɛbɔhwɛ hɔn a wɔwɔ ahohia mu.⁷ Iyi nye siantsir ntsi a Christ N’akãdofo no, yɛsoasoa kor biara n’adzesoadze, … [yɛ]nye hɔn a hɔn werɛ ahow dzi hɔn yaw … , na [yɛa]kyekye hɔn a wohia awerɛkyekyer no hɔn werɛ.”⁸

Nyamesom nnyɛ hɛn na yɛnye Nyankopɔn nkitahodzi nko ho asɛm; ɔsan so yɛ yɛnye hɛnho nkorkor nkitahodzi ho asɛm. Elder Jeffrey R. Holland kyerɛkyerɛɛ mu dɛ nyamesom no Borɔfo kasafua no fi Latin kasafua religare mu a n’ase kyerɛ dɛ “kyekyer” anaa yɛrekã no yie a, “san kyekyer.” Dɛm ntsi, “nokwar nyamesom [yɛ] dza ɔkyekyer hɛn fam Nyankopɔn na hɛnho nkorkor.”⁹

Mbrɛ yesi hwɛ hɛn ho do yie no hia nokwar ara. President Nelson kyerɛkyerɛ dɛ, “Agyenkwa n’asɛm no yɛ pefee: N’esuafo nokwafo ma ntowdo, pegya, hyɛ nkuran, tu aso, na wokenyan.”¹⁰ Iyi mpo hia sɛ hɛn mfɛfo akwantufo nya nkã-tse dɛ wɔayew, wɔayɛ ankonam, wɔnkaa hɔn, anaa woeyi hɔn efi mu a.

Ɔnnsɛ dɛ yɛhwɛ ekyirekyir dze hwehwɛ nkorɔfo a woridzi aper. Yebotum ahyɛ ase dɛ yɛroboa obi wɔ hɛnara hɛn ebusua mu, mboanofo mu, anaa sɔn mu. Yebotum asan so ahwehwɛ aboa eyi amandzehu a nyimpa ɔpepe 700 a wɔtse hia neminemi wɔ mu a¹¹ anaa nyimpa ɔpepe 100 a nhyɛ mu ara woetu hɔn a ɔnam atsetsee, ɔkõ, na basabasayɛ ntsi.¹² Jesus Christ nye fasusu mapã wɔ erohwɛ hɔn a wɔwɔ ahohia mu—nyia kɔm dze no, ɔhɔho, nyia ɔyar, ohianyi, nyia ɔda efiadze. N’edwuma yɛ hɛn edwuma.

Elder Gong kyerɛkyerɛ dɛ “Yɛtaa bɔ mu tu kwan kɔ Nyankopɔn nkyɛn.”¹³ Dɛm ntsi, hɛn ward ahorow sɛ dɛ ɔyɛ guandɔbew ma Nyankopɔn ne mba nyina. Ana yɛdze ahokeka rokɔ asɔr anaa yereyɛ nyimpakuw a no botae nye dɛ ɔbɔsom, akaa Christ, na ɔasom hɔnho nkorkor?¹⁴ Yebotum etsie President Nelson n’afotu dɛ yerummbu atsɛn pii, yɛndɔ pii, na yendua hɛn nsɛm na ndzeyɛɛ do ntserɛw Jesus Christ No dɔ mapã no mu.¹⁵

Jesus Christ No Ɔpon Tum no

Jesus Christ No Werdambɔ yɛ ngyinahɔmadze a ɔkrɔn na ɔkyerɛ Ɔsor Egya No dɔ ma Ne mba.¹⁶ Kasfua atonement kyerɛ dɛ edze nkabɔmu rebrɛ hɔn a hɔn mu atsetsew.

Nna Hɛn Agyenkwa No so, edwuma no nye dɛ Ɔbɛma hɛn kwan a yɛdze bɛsan akɔ Ɔsor Egya hɔ na mboa wɔ dɛm akwantu no mu. Agyenkwa no dua No suahu do nyim mbrɛ Osi bɔboa hɛn wɔ ɔbra no nkodzen mu.¹⁷ Mma hom nnyɛ mfomdo, Christ nye hɛn gyefo na hɛn akra ne yarsafo.

Ber a yɛdze gyedzi dzi dwuma no, Ɔboa hɛn ma yɛper kɔ kan wɔ ahokyer ber mu. Ɔkɔ do tserɛw No dɔ na ehumbɔbɔr nsato mu:

“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.

“Hom mfa mo kɔndua no nto hom do;na hom nsũa me; … na hom benya ahomgye ama hom kra.”¹⁸

Tum wɔ kɔndua mafatoho no .mu. Dɛ mbrɛ President Howard W. Hunter kyerɛkyerɛɛ mu no: “Kɔndua no yɛ adze a ɔma kwan ma wɔdze abowa a ɔtɔdo ebien n’ahom ka dza odzi kan no no mbɔdzembɔ ho ama edwumayɛ dzendzen a ɔwɔ dwumadzi no mu no do ehuan. Nyimpa beenu a kɔndua kor ka hɔn bɔmu botum dze pɛrpɛryɛ na ahomka asoa ɔhaw a nkyɛ nyimpa kor nnkotum asoa.”¹⁹

President Nelson kyerɛkyerɛɛ dɛ: “Eba Christ hɔ dɛ edze No kɔndua a tum wɔ mu no bɔto wo do, amma annnyɛ akonam anntwe ɔbra n’adzesoadze. Eretwe ɔbra n’adzesoadze ber a wiadze Agyenkwa na Pomfo no nye wo ato kɔndua no.”²⁰

Yebesi dɛn akyekyer hɛnho afam Agyenkwa no? Elder David A. Bednar kyerɛkyerɛ mu dɛ:

“Yɛreyɛ na yɛresie ahyɛmu krɔnkrɔn no ma yɛnye Jesus Christ to kɔndua. Asekyerɛ nye dɛ, Agyenkwa no refrɛ hɛn dɛ yentwer no na yɛnye no mbɔmu ntwe. …

“Yɛnnyɛ na onnhia dɛ yɛbɛyɛ ankonam.”²¹

Nyia ɔsõ adzesoa, ɔayew, oenya adwen furae, ɔnnsɛ dɛ wo nko soa iyi.²² Ɔnam Christ no Werdambɔ na ayɛdze horow do no, ibotum nye No ato kɔndua anaa akyekyer wo ho afam No. Ɔdɔ mu ara, Ɔdze ahom na ayarsa a ihia dze ehyia akwantu a ɔda w’enyim no bɛma wo. Ɔda ho yɛ hɛn guandɔbew fi hɛn ehum mu.²³

III. Ɔsor Egya No Dɔ

Hom nhyɛ no nsew, Jasper dzi agor, no ho yɛ enyikã, onyim adze, na no ho yɛ dede. Mbom, asɛm yi ne saafee nye dɛ ɔyɛ medze. Ɔyɛ me babanyin, na modɔ no kyɛn dza obohu da. Sɛ asaase do egya a onndzi mu mapã nya nkã-tse a ɔtse dɛm fa ne ba ho a, ibotum esusu nkã-tse a Ɔsor Egya enyimnyamfo dɔfo a odzi mu mapã wɔ fa wo ho?

M’anyɛnkofo adɔfo mbasantsen a wɔreba no, Gen Z na Gen Alpha: meserɛ hom nnhu dɛ gyedzi hia ndwuma.²⁴ Yɛtse mber bi mu a dodow noara pɛ dɛ “wohu ansaana wɔagye edzi.” Gyedzi botum ayɛ tafɛrbanyinmbɔmu na ohia nsanmuyi horow. Mbom, mpaabɔ woyi ano.²⁵ Na ibotum enya nyiano ho nkã-tse.²⁶ Abrabɔ yi mu nokwasɛm bi wɔ hɔ a wɔmmfa enyiwa nnhu; wɔgye nkã-tse, nyimdzee, na suahu. Wɔyɛ nokwar turodoo.

Jesus Christ pɛ dɛ ihu na enye w’Egya a ɔwɔ Sor nya nkitahodzi.²⁷ Ɔkyerɛkyreɛɛ dɛ, “Hom mu nyimpa bɛn, na ɔwɔ ba, na ogyina abow ano no, na ɔbɛse dɛ, Egya, bue wo fi ma membra mu nye wo mbedzidzi, na ɔrennse dɛ, Bra mu, me ba; na dza ɔyɛ me dze no, yɛ wo dze na wo dze, yɛ medze?”²⁸ Ibotum adwen ɔdɔ mu ara, Onnyiewiei Egya ne saso ho?

Eyɛ Ne ba. Sɛ inya nkã-tse dɛ ayew, sɛ ewɔ nsɛmbisa anaa ihia nyansa, sɛ iridzi sunsum na honandua mu aper a, dan wo ho ma No. Bɔ mpaa kyerɛ no dɛ ɔmma wo awerɛkyekyer, ɔdɔ, nyiano, na akwankyerɛ. Ma ehiadze no tse biara na bea a ewɔ biara no, hue w’akoma gu wo Ɔsor Egya do. Hom mu binom dze, ebia hom pɛ dɛ wodzi President Nelson ne nsato do na “woebisa sɛ Ɔwɔ hɔ ampaara—sɛ onyim wo a. Bisa no ma Ɔnkã N’atsenkã wɔ woho nkyerɛ wo. Na nkyii tsie.”²⁹

Nuambanyin na nkyerɛbaa adɔfo:

Hu w’Egya a ɔwɔ Sor. Odzi mu na Ɔyɛ ɔdɔ.
Hu Jesus Christ ne myimpa ban.³⁰ Ɔyɛ hɛn Agyenkwa na hɛn Pomfo. Kyekyer wo ho na w’adɔfo fam No ho.
Na hu wo nyimpa ban. Hu wo nokwar awosu krɔnkrɔn. Nyankopɔn n’enyigye nhyehyɛɛ no nyina fa wo ho. Eyɛ Ne ba a esom bo. Onyim wo na Ɔdɔ wo.

Nokwar fapem yinom a ɔda famu ho na megye me dasee wɔ Jesus Christ ne dzin mu, amen.