Irubue Ɔsor Ntokura no
Ɔsor ntokura bue wɔ akwan pii mu. Twer Ewuradze ne mber pa; nhyira no ba ber biara.
Mo nuanom na nkyerɛbaa adɔfo, ndaansa yi ber mowɔ America Anaafo no, Onuabanyin Roger Parra nye me kyɛɛ sũahu yi a odzi do yi:
“Afe 2019 mu no, nsɛnhia pii too Venezuela ma ɔmaa enyinam ahoɔdzen dundumii nda enum.
“Begyabegyayɛ na etuatsew hyɛɛ stiitsi mu mã, na nkorɔfo pii a hɔnho akyer hɔn no ennya edziban a ɔbɔsõ hɔn.
“Binom tui hyɛɛ edzibanyɛ ndwuma do foom edziban na wɔsɛɛ adze.
“Dɛ meyɛ adzetõ edwuma wura no, modwendween hɛn edwumadze no ho. Dɛ yɛyɛ ebusua no, yɛbɔɔ adwenpɔw dɛ yɛdze edziban no a ɔwɔ hɛn adzetõ bea no bɛma nkorɔfo a wohia.
“Anafua kor a sum hyɛɛ tumm no nna basabasayɛ wɔ beebiara. Nna dza modwen ho ara nye me yer dɔfo na me mba hɔn bambɔ ho.
“Ahanamakye no mokɔr adzetõ bea no. Awerɛhow mu ara nna epoobɔfo no asɛɛ edzibanyɛ edwumadze biara a ɔbɛn, naaso m’ahobow kɛse mu no, hɛn adzetõ bea no ho enntsĩ mpo. Wɔannsɛɛ hɔ hwee. Ahobrɛadze mu ara medaa mo Sor Egya ase.
“Mukodur fie no, mekãa Nyankopɔn ne nhyira na bambɔ ho nsɛm kyerɛɛ hɔn.
“Hɔn nyina hɔn enyi sɔɔ dodow.
Me babanyin panyin, Rogelio, a oedzi mfe 12 pɛr no kãa dɛ, ‘Papa! Minyim siantsir a hɛn fiadze no wɔbɔɔ ho ban no. Ɔwo na Mama ber biara hom tua hom ebupɛn du.’”
Onuabanyin Parra wiee dɛ: “Malachi n’asɛm no baa m’adwen mu. ‘Na mubotwuw ɔsɛɛfo no enyim wɔ hom ntsi, na ɔnnkɛsɛɛ hom asaase do eduadzewa’ [Malachi 3:11]. Yebuu nkotodwe na enyisɔ mu ara yɛdaa hɛn Ɔsor Egya ase wɔ N’anwanwadze no ho.”1
Hom Mfa Iyi Nsɔ Me Nhwɛ
Dza yɛwɔ nyina na hɛn nyimpa ban nyina fi Nyame hɔ. Yɛyɛ Christ esuafo yi, yebue hɛn akoma mu nye hɔn a wɔbɔ hɛnho aporow no kyɛ.
Dza Ewuradze dze ma hɛn nyinara no, Ɔase hɛn dɛ yɛmfa hɛn mfaso mu ɔha nkyɛmu 10 nsan mma No na N’ahenman a ɔwɔ asaase do. Ɔabɔ hɛn anohoba dɛ sɛ yedzi nokwar wɔ hɛn ebupɛn du mu a, “[O]bobue ɔsor ntokura, na [o]ehue nhyira … a [ye]rinnya bea a ɔsõ a [yɛ]dze bɛgye.”2 Ɔabɔ hɛn anohoba dɛ Ɔbɔbɔ hɛn ho ban efi ɔsɛɛfo no ho.3 Anohoba yinom si pi ara ma,4 Ewuradze paa mu kãa dɛ, “Hom mfa iyi nsɔ me nhwɛ,”5 kasasin a onnyi kyerɛwsɛm mu beebiara bio.
Ɔsor ntokura bue wɔ akwan pii mu. Binom yɛ honandua mu, mbom dodowara yɛ sunsum mu. Binom yɛ ketseaba na ɔyɛ mberɛw dɛ yebobu enyi egu do. Twer Ewuradze ne mber pa; nhyira no ba ber biara.
Yɛnye hɔn a wodzi aper ansaana woenya ɔbra mu ehiadze no dzi yaw. Ndaansa yi Asɔr no dze sika US dɔlla ɔpepe 54 mae ma wɔdze aboa mbofra na hɔn enãnom a wɔwɔ wiadze nyina mu a wɔrehaw.6 Na afɔrbɔ a ofi hom bosoom bosoom akɔnkye mu no, hɛn bishopfo aboafo yinom dze boa mpempem a dapɛn biara woekegyina dɛ wohia edziban edzi, atar ahyɛ, na dabew ada. Wiadze yi mu ohia ho nyiano nko a obetsim nye Jesus Christ asɛmpa no.7
Gyedzi ho Asɛm
Paul bɔɔ kɔkɔ dɛ nyimpa ne nyansaa tse nyimpa ndzɛmba ase mbom sunsum mu ndzɛmba no onnhu mu.8 Wiadze kã ebupɛn du ho asɛm wɔ sika kwan do, naaso ebupɛn du ho mbra krɔnkrɔn no yɛ hɛn gyedzi ho nsɛm tsitsir. Yeridzi nokwar wɔ hɛn ebupɛn du mu no yɛ kwan kor a yɛkyerɛ dɛ yɛbɛma Ewuradze edzi kan wɔ hɛn abrabɔ mu, abor hɛn kɔdaannda na dza yɛpɛ do. Mobɔ hom nohoba dɛ sɛ hom nya awerɛhyɛmu wɔ Ewuradze mu a, ɔsor nhyira bɛba.
Jesus see dɛ “hom ndan dza ɔyɛ Ceasar dze mma Ceasar na dza ɔyɛ Nyankopɔn dze mma Nyankopɔn.”9 Agyenkwa no a Ɔasoɛr no see Nephifo no dɛ wɔnkyerɛw N’anohoba a wohu no wɔ Malachi no nkã hɔn nkyerɛwee ho.10 Hɛn nda yi mu yi, Ewuradze esi ɔsor mbra a ɔyɛ ebupɛn du no do, repaa mu kã dɛ: “Na iyi bɛyɛ mo nkorɔfo hɔn ebupɛn du n’ahyɛse. Na [wo]botua hɔn mfaso no mu nkyɛmu du no mu kor afrenhyia biara; na iyi bɛyɛ mbra a ɔbɔwɔ hɔ ama hɔn afebɔɔ.”11
Ewuradze kyerɛɛ pefee mbrɛ wobesi dze ebupɛn du no edzi dwuma, rese dɛ, “Hom mfa ebupɛn du no nyina mbra adzekoradan no mu,”12 n’asekyerɛ nye dɛ wɔmfa ebupɛn du no mbra N’ahenman a wɔdze asan ananmu aba, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu.13 Ɔkyerɛɛ dɛ ebupɛn du krɔnkrɔn yi President a Odzi Kan na n’Apamfo na Asomafo Duebien no hɔn Quorum na bishopfo banodzifo na n’apamfo no bagua na wobosusu mpaabɔ mu ara dza wɔdze bɛyɛ, “na mankasa me ndze a ɔkasa kyerɛ hɔn, Ewuradze na ɔse.”14
Ewuradze No Fotow Krɔnkrɔn
Fotow krɔnkrɔn yi nnyɛ Asɔr banodzifo no dze. Ɔyɛ Ewuradze dze. N’asomfo no nyim hɔn ɔhwɛdo dwuma no krɔnkrɔn su no ara yie.
President Gordon B. Hinckley kãa ne mbafober mu sũahu ho asɛm: “Meyɛ banyimba no mibisaa m’egya asɛm a ɔfa mbrɛ wosi dze Asɔr fotow yɛ adze. Ɔkaa me dɛ medze nye Nyame ahyɛdze a Ɔdze ama dɛ muntua m’ebupɛn du na afɔrbɔ. Sɛ meyɛ dɛm a, [m’egya se,] dza medze ama no nnyɛ medze bio. Ɔyɛ Ewuradze dze Ɔno na medze ama No. N’egya dze toaa do dɛ: “Dza Asɔr etumdzifo dze yɛ no nnhia dɛ ɔfa [ɔwo, Gordon] ho. Wobeyi ano ama Ewuradze, Ɔno na Ɔbɔhwehwɛ nkontaabu efi hɔn nsamu.”15
Yɛtse “nkontaabu ma Nyame” no dur kɔ bun mu no ara yie.”
W’Ebupɛn Du na Afɔrbɔ Ayamuyie Mu
Fi ebupɛn du na afɔrbɔ a ayamuyie mu yɛdze ma Ewuradze no, mfeda, no mu bɔbor US dɔla ɔpepeepe kor na wɔdze hyiraa hɔn a wohia.16
Hɛn asodzi son dɛ yɛdze asɛmpa a wɔdze asan ananmu aba bɔkɔ wiadze nyina mu no, yɛwɔ asɛmpasomafo bɔbor 71,000 a wɔrosom wɔ asɛmpakã mbea 414 mu.17 Osian hom ebupɛn du na afɔrbɔ ntsi, asɛmpasomafo no tum som a hɔn ebusua sikasɛm gyinabew ho mmfa ho.
Worisisi temple pii wɔ wiadze a no dodow bi mmbaa da. Sesei, temple dodow 177 na wodzi mu dwuma, sesei worisisi anaa worisiesie 59 mu, na wɔreyɛ 79 binom ho nhyehyɛɛ.18 Hom ebupɛn du rema kwan ma temple nhyira edu mbea a nna Ewuradze nko na Odzii kan tumii hunii.
Mboanofo bɔbor 30,000 na wɔwɔ asɔradan mpempem na mbea binom mu wɔ aman na atsena mbea 195 mu.19 Osian hom nokwardzi wɔ ebupɛn du ho ntsi, wɔrekyekyer Asɔr no ekyirekyir mbea a eronnkɔ hɔ nserahwɛ na wɔ Ahotseweefo atseneneefo a bia innkohu hɔn dabiarada mu.
Sesie Asɔr no hwɛ esũapon enum do.20 Iyinom som adzesũafo bɔbor 145,000. Wɔkyerɛ adzesũa mbea bɔbor mpem ɔha na du wɔ hɛn seminary na institute ahorow mu.21
Nhyira horow yinom na binom pii so ne kɛse ara fi mbabun na mpanyimfo a wɔwɔ sikasɛm tsebew ahorow mu a wotua ebupɛn du nokwar mu.
Ebupɛn du ho mbra krɔnkrɔn no sunsum mu tum no nnyɛ sika no dodow a wɔdze ma na wɔdze ker, osiandɛ ahonyafo na abrɛfo nyina no, Ewuradze ahyɛ hɔn dɛ wontua hɔn mfaso ho ɔha nkyɛmu 10.22 Tum no ba ber a yɛdze hɛn werɛ hyɛ Ewuradze mu.23
Prɔmprɔmyɛ a Ewuradze dze edua hom ebupɛn du ayamuyie mu akã ho na ahyɛ Asɔr fotow a ɔda hɔ no mã, a wɔama kwan ma Ewuradze n’edwuma etu mpon akyɛn biribiara a yeehu pɛn. Ewuradze nyim ne nyina, na mber pa mu no, yebohu N’anohoba krɔnkrɔn ne mãhyɛ.24
Nhyira fi Akwan horow mu Ba
Ebupɛn du mu nhyira horow no fi akwan pii mu ba. Afe 1998 mu no, mekãa Elder Henry B. Eyring ho ma yɛkɔr Asɔr nhyiamu kɛse bi wɔ Utah apaamu a sesei wɔfrɛ no Silicon Slopes, bea sɔnmufo a wɔyɛ abaefor mfir ho edwuma tse. Nna ɔyɛ mber a worenya hɔnho ara yie, na Elder Eyring bɔɔ Ahotseweefo no kɔkɔ wɔ ntõtõho na edzifodzipɛ ho. Mebɛkaa daa n’anohoba no dɛ sɛ wotua hɔn ebupɛn du nokwar mu a, hɔn pɛ wɔ wiadze ndzɛmba ho bɔkɔ famu. Mfe ebien ntamu no, edwumadze horow no hwee ase. Dodowara edwuma bɔɔ hɔn, na edwumadze horow peree wɔ sikasɛm nsesa ho. Wohyiraa hɔn a wotsie Elder Eyring n’afotu no.
N’anohoba no kaa me sũahu fofor bi. Mihyiaa mfe-12 Charlotte Hlimi wɔ bea a ɔbɛn Carcassonne, France, ber a morosom dɛ asɛmpakã president no. Hlimifo no yɛ ebusua nokwafo a wɔnye mba baawɔtwe tse fie bi mu. Nna Agyenkwa na nkɔnhyɛnyi hɔn mfonyin bɔ ban no ho. Kokoamu mpɛnsapɛnsamu no a ɔdze rekɛgye ne patriarch nhyira no, mibisaa Charlotte sɛ otua ebupɛn du nokwar mu a. Obuaa dɛ, “Nyew, President Andersen. Me maame akyerɛ me dɛ yɛwɔ honandua mu nhyira na sunsum mu nhyira a ofi hɛn ebupɛn du no ntuae mu ba. Me maame akyerɛ me dɛ sɛ yetua hɛn ebupɛn du aber nyina a, yerennhia. Na President Andersen, yenndzi hia.”
Ɔrema me kwan ma makyɛ n’asɛm no, Charlotte a, sesei mfe 45 na wɔasɔw no ano wɔ temple, kãa dɛ “Me dasegye wɔ ebupɛn du dɛm aber no nna ɔyɛ nokwar ampaara, na sesei ɔayɛ dzen mpo. M’enyisɔ mbrasɛm yi papaapa. Morokɔ do dze ridzi dwuma no mokɔ do nya nhyira mborodo.”25
Dakor hɛn mu kor biara bowie hɛn asaase do akwantu. Mfe eduonu enum a abɛsen no, nda kakra ara ansaana m’asew, Martha Williams, owui wɔ kokoram yarba ho no, onyaa sika kakra bi wɔ check do wɔ mail mu. Obisaa ne checkbook fii me yer, Kathy hɔ ntsɛmara ma ɔdze etua n’ebupɛn du. Osiandɛ dɛ ne maame ayɛ mberɛw ara ma onntum mpo nkyerɛw no, Kathy bisaa no sɛ obotum akyerɛw check no ma no a. Ne maame buaa dɛ, “Kathy, Oho. Mepɛ dɛ emi mara meyɛ.” Na ɔdze kãa ho dzinn dɛ, “Mepɛ dɛ me biribiara da yie wɔ Ewuradze enyim.” Adze kor a Kathy yɛɛ ma ne maame a odzi ewiei nye dɛ ɔdze n’ebupɛn du envelope no maa ne bishop.
Nyankopɔn n’Edwuma a Ohia
Mo nuanom na nkyerɛbaa, Jesus Christ N’asɔr a ɔwɔ hɔ Ma Nda a Odzi Ekyir Ahotseweefo no “efi kusukusuyɛ mu,”26 a ɔdze nhyira nwanwa rebrɛ wiadze nyina. Binom bɛkamfo hɛn dɛ yɛnkɔ kan na binom so nnkɛyɛ. Madwen ho dɛ Gamaliel onyansafo ne nsɛm mu no, ɔno a ɔtsee anwanwadze a Asomafo Peter na John yɛe no, ɔbɔɔ abaguafo a wɔwɔ Jerusalem no kɔkɔ:
“Hom ngyaa [mbarimba yinom]: na sɛ … edwuma yi fir nyimpa mu a, obobutuw:
“Na sɛ ofir Nyankopɔn a, hom runntum mmbutuw no, amma hom aammbɛyɛ dɛ hom nye Nyankopɔn mpo rokõ.”27
Emi na hom kã Nyankopɔn N’edwuma a ohia wɔ asaase yi do ho. Orinndzi nkõgu mbom ɔbɔkɔ do etwuw afa wiadze mu, esiesie kwan no ama Agyenkwa no ne mbae. Megye President Russell M. Nelson n’asɛm ho dase, “Nda a ɔreba mu no, yebohu Agyenkwa no tum a ɔreda edzi kɛse akyɛn dza wiadze ehu no pɛn. Ofi sesei kesi ber a Ɔbɛsan aba … , Ɔdze ndzinoa, nhyira, na anwanwadze a wonntum nnkan bogu anokwafo do.”29
Iyi nye me dasegye. Jesus nye Christ no. Iyi nye No ndwuma krɔnkrɔn. Ɔbɛba bio. Jesus Christ ne dzin mu, amen.