Enyimnyam Ahenman
Yɛwɔ Ɔsor Egya dɔfo a Ɔbɔhwɛ dɛ yenya nhyira biara na mfaso biara a hɛnankasa hɛn apɛdze na nsanmuyi bɛma ho kwan.
Jesus Christ N’Asɔr a ɔwɔ hɔ ma Nda a Odzi Ekyir Ahotseweefo asɔrmba no wɔtaa bisa hɛn dɛ, “Osi dɛn na w’asɔr yɛ soronko fi Christian asɔr nkaa no ho?” Nyiano a binom yɛma nye Jesus Christ ne nkyerɛkyerɛ ne mãhyɛ. Dza odzi akotsen wɔ dɛm nkyerɛkyerɛ mu no nye nokwar no dɛ hɛn Ɔsor Egya dɔ Ne mba nyinara ara ma Ɔpɛ dodoodow dɛ hɛn nyina kɛtsena enyimnyam ahenman bi mu daapem. Bio so, Ɔpɛ dɛ yɛnye Ɔno na Ne Ba, Jesus Christ tsena afebɔɔ. Ne nhyehyɛɛ no ma hɛn nkyerɛkyerɛ na kwan a yɛbotum ayɛ nsanmuyi horow a ɔbɛma yenya nkrabea na abrabɔ a yɛsan mu yi.
I.
Fi ndɛ nyikyerɛ mu no, yenyim dɛ hɔn a wɔtse asaase do hɔn nkrabea asoɛe nnyɛ adwenkyerɛ a onndzi mu dɛ heaven wɔ hɔ ma atseneneefo na hɛl onnyiewiei amandzehu ma nkaafo no. Nyankopɔn no dɔ nhyehyɛɛ ma Ne mba no dɛm nokwar yi a hɛn Agyenkwa, Jesus Christ kyerɛkyerɛɛ no kã ho: “M’Egya fie wɔ tsenabew pii.”1
Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no a wɔdze asan ananmu ne nkyerɛkyerɛ a woeyi akyerɛ no kyerɛkyerɛ dɛ Nyankopɔn ne mba nyina—a hɔn a wɔnnkã ho suar dodow dɛ yɛbɛkã ho asɛm—ewiei no wobenya enyimnyam ahenman ebiasa no mu kor a dza osuar koraa mpo “ɔbor ntseasee nyina do.”2 Asoɔdzenfo ehu amandze wɔ hɔn bɔn ho mber kakra ekyir no, a amandzehu no boa hɔn wɔ dza ɔbɛba do no, obiara benya wusoɛr na wɔakɔ Ewuradze Jesus Christ N’Atsɛmbu a Odzi Ewiei. Hɔ no, hɛn Agyenkwa dɔfo, a, wɔakyerɛ hɛn dɛ, “ɔhyɛ Egya no enyimnyam, na ɔgye ne nsaano ndwuma nyina nkwa,”3 Ɔnye Nyankopɔn ne mba no nyina bɔkɔ enyimnyam ahenman yinom mu kor dɛ mbrɛ apɛdze a hɔn nsanmuyi ahorow no kyerɛe.
Asɔr no a wɔdze asan ananmu aba ne nkyerɛkyerɛ soronko na ntɔyɛɛ kor so nye mbrasɛm na ahyɛmudzi a wɔdaa no edzi a ɔma Nyankopɔn ne mba nyina ndzinoa krɔnkrɔn no dɛ wɔbɛfata celestial ahenman no ntwerba a ɔkrɔn kɛse no. Dɛm asoɛe bea a ɔkrɔn koraa no—nkwagye ntowdo wɔ celestial ahenman no mu—na Jesus Christ N’Asɔr a ɔwɔ hɔ ma Nda a Odzi Ekyir Ahotseweefo tsim do.
Fi ndɛ nyikyerɛ mu no, Latter-day Saintfo wɔ ntseasee soronko yi wɔ Nyankopɔn N’enyigye ho nhyehyɛɛ ma Ne mba ho. Dɛm nhyehyɛɛ yi ɔhyɛ ase wɔ hɛn abrabɔ dɛ esunsum ansaana wɔrowo hɛn, na ɔda hɛn honandua mu abrabɔ akwantu no botae na tsebew na bea a yɛpɛ dɛ yekodur wɔ owuekyir no edzi.
II.
Yenyim fi ndɛ nyikyerɛ mu dɛ “wɔama ahenman nyina ho mbra”4 na dɛ enyimnyam ahenman a yenya wɔ Atsɛmbu a Odzi Ewiei no gyina mbra a yɛsaan mu dzii do wɔ hɛn honandua mu abrabɔ akwantu mu. Dɛm ɔdɔ nhyehyɛɛ no mu no, yɛwɔ ahenman ahorow pii—tsenabew pii—ama Nyankopɔn ne mba nyina enya enyimnyam ahenman a ne mbra no yɛ ahotɔ ma hɔn tsenabea.
Ber a yɛkyerɛ Egya ne nhyehyɛɛ mu ahenman ebiasa kor biara no su na ahwehwɛdze no, yɛhyɛ ase wɔ dza ɔkrɔn koraa no do, a ɔno na ɔsor mbrasɛm na ayɛdze horow a Nyankopɔn eyi edua Jesus Christ N’Asɔr a ɔwɔ hɔ ma Nda a Odzi Ekyir Ahotseweefo akyerɛ no tsim do. “Celestial” enyimnyam mu no5 ntwerba ebiasa, na ɔwɔ hɔ6 a dza ɔkrɔn koraa no nye nkwagye ntowdo wɔ celestial ahenman mu. Ha nye tsenabea ma hɔn a “wɔagye ne mãhyɛ, na n’enyimnyam no,” dɛm ntsi, “wɔyɛ enyame, Nyankopɔn ne mbabanyin [na mbabaa] no mpo”7 na “wɔbɛtsena Nyame nye ne Christ no hɔn enyim afebɔɔ kesi afebɔɔ.”8 Nyankopɔn edua nyikyerɛ do eyi onnyiewiei mbrasɛm, ayɛdze horow, na ahyɛmudzi a otwar dɛ wodzi do dze tu Nyame su a ohia no mpon ama woeetum enya dɛm ɔsor nkrabea yi. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no tsim iyinom do osiandɛ Asɔr no a wɔdze asan ananmu aba ne nkyerɛkyerɛ na ahyɛdze no botae nye dɛ obesiesie Nyankopɔn ne mba ama nkwagye wɔ celestial ahenman no mu, na nkankara, ama ntowdo wɔ ne gyinabew a ɔkrɔn koraa no.
Nyankopɔn ne nhyehyɛɛ no, a ogyina onnyiewiei nokwar do no, hwehwɛ dɛ wotum nya nkwagye ntowdo wɔ onnyiewiei awar wɔ barimba na ɔbaa ntamu wɔ temple krɔnkrɔn mu ho ahyɛmudzi no nokwardzi nko do,9 awar a nokwafo nyina botum enya no dabi. Dɛm no ntsi na yɛkyerɛkyerɛ dɛ “eyɛ banyin anaa ɔbaa no yɛ ankorankor no bɔbea a ohia tsitsir ansaana ɔbɛba asaase do, no ɔnnkyebo asetsena ber, na ohia ma ne onnyiewiei su na botae.”10
Nkyerɛkyerɛ soronko a ɔsom bo a ɔbɔboa hɛn ma yɛayɛ onnyiewiei nkwa ho ahoboa no nye afe 1995 ebusua no ho dawurbɔ no.11 Ne mpaamukã no kyerɛkyerɛ ahwehwɛdze a ɔyɛ hɛn ahoboa ma yɛnye Nyame Egya no na Ne Ba, Jesus Christ akɛtsena. Hɔn a wɔnntse Egya nodɔ nhyehyɛɛ ma Ne mba nkyerɛkyerɛ ase yie no, bia wobosusu dɛ ebusua dawurbɔ yi yɛ nhyɛdo nsɛm ara a wotum sesã no. Naaso, yesi no pi dɛ ebusua dawurbɔ no tsim nkyerɛkyerɛ a wɔnnsesã do, ɔkyerɛ ebusua nkitahodzi a hɛn mpontu a ohia kɛse no botum edua aba.
Ɔsomafo Paul kã enyimnyam ntwerba ahorow ebiasa ho asɛm na ɔdze hɔn toto ewia, bosom, na nworaba enyimnyam ho.12 Ɔto dza ɔkrɔn koraa no “celestial” na dza otsĩa ebien no “terrestrial.”13 Ɔamma kumabaa koraa no dzin, mbom nyikyerɛ a wɔdze maa Joseph Smith mu dze ne dzin: “telestial” kãa ho.14 Nyikyerɛ kor so kyerɛ hɔn a wɔnye hɔn kɔ enyimnyam ahenman kor biara mu no hɔn nyimpa su. Hɔn a wɔannsan mu “enndzi celestial ahenman ne mbra do no”15 benya enyimnyam ahenman bi so, a onndu celestial dze mbom ɔfata mbra a wɔsaan mu yii na wotum “tsena” mu ahotɔ mu. Dɛm asɛmfua tsena no, a ɔnnyɛ na wɔ kyerɛwsɛm mu no, kyerɛ bambɔ tsenabew.16 Mfatoho, hɔn a wɔwɔ terrestrial ahenman—ɔtse dɛ ma dodow frɛ no heaven—”nye hɔn a wonya Ɔba no ne nkyɛn kwan no, na mbom nnyɛ Egya no ne mãhyɛ.”17 Nna “wɔyɛ enyimdzefo wɔ asaase do a ndabrabafo furaa hɔn enyi no,”18 mbom “hɔn dasegye a ɔwɔ Jesus ho no nnyɛ dzen.”19
Hɔn a wɔnye hɔn bɔkɔ enyimnyam ahenman kumabaa mu no, telestial, wɔkyerɛ no pefee dɛ ɔno nye “nyia … onnkotum atsena terrestrial enyimnyam no mu.”20 Ɔno kyerɛ hɔn a wɔpow Agyenkwa no na ɔammfa ɔsor ahyɛdze annhyɛ hɔn suban do. Iyi nye ahenman a emumuyɛfo no tsena mu, woehu amandze wɔ hɔn bɔn nyina ho ewie no. Iyinom ndɛ kyerɛwsɛm kyerɛ dɛ “woyinom nye hɔn a woennya Christ n’asɛmpa no, nye Jesus ho dasegye no. …
“Woyinom nye hɔn a wɔyɛ atorfo, na nkaberkyerfo, awartofo, na ndwaman, nye obiara a ɔpɛ na odzi ator.”21
Ɔdze no nkɔnhyɛ enyiwa rohwɛ rekasa fa enyimnyam ahenman ebiasa ho no, ndaansa yi President Russell M. Nelson kyerɛɛw dɛ: “Honandua mu abrabɔ mber nyina nndu sima ketseketseketseketse mpo sɛ wɔdze to onnyewiei ho a. Naaso mbrɛ sima ketseketseketseketse no si hia! Hom nsusu no ahwɛyie mu mbrɛ osi dzi dwuma: Honandua abrabɔ yi mu no yenya kwan san mu yi mbra a yɛpɛ dɛ yebedzi do—celestial, anaa telestial, anaa terrestrial ahenman dze no—na dɛm ntsi enyimnyam ahenman a ebɛtsena mu afebɔɔ. Nhyehyɛɛ bɛn nye yi! Ɔyɛ nhyehyɛɛ a ɔdze obu mapã ma wo nsanmuyi.”22
III.
Ɔsomafo Paul kyerɛkyerɛɛ dɛ Ewuradze ne nkyerɛkyerɛ na mbrasɛm wɔdze mae ama yeedu “Christ amayɛ esusudze no pɛn do.”23 Dɛm ndzeyɛɛ kwan no hia dza ɔbor irinya nyimdzee ara. Ɔnndɔɔ sõ mpo dɛ yɛbɛgye asɛmpa no edzi ara; otwar dɛ yedzi ho dwuma ama wɔaasakyer hɛn. Nsonsonee a ɔda binom nkyerɛkyerɛ, a wɔkyerɛ hɛn ma yehu biribi no, Jesus Christ N’asɛmpa to hɛn taferbanyinmbɔmu ma yɛbɛyɛ biribi.
Fi nkyerɛkyerɛ a ɔtse dɛm mu no yɛyɛ adwen dɛ Atsɛmbu a Odzi Ewiei no nnyɛ hɛn ndzeyɛɛ pa na ndzeyɛɛ bɔn ho nkontaabu ara—dza yɛayɛ no. Ogyina hɛn ndzeyɛɛ na adwendwen no ho nsunsuando—nyimpa ban a yɛabɛyɛ no do. Yɛnam nsakyer kwan do na yɛfata onnyiewiei nkwa. Dɛ ma wɔakã no ha yi, asɛmfua yi a ɔwɔ nkyerɛase pii yi no kyerɛ su nsesa kɛse. Ɔnndɔɔ sõ ma obiara dɛ ɔbɛyɛ biribi ara kɛkɛ. Mbrasɛm no, ayɛdze horow, na asɛmpa ho ahyɛmudzi nnyɛ dza wɔyɛ no nkorkor to ɔsor fotow bi mu. Jesus Christ asɛmpa no yɛ nhyehyɛɛ a ɔkyerɛ hɛn mbrɛ yebesi bɛyɛ dza hɛn Ɔsor Egya pɛ ma hɛn dɛ yɛbɛyɛ.24
IV.
Osian Jesus Christ na No Werdambɔ no, sɛ yɛtɔ sin wɔ abrabɔ yi mu a, yebotum enu hɛnho na yɛasan aba ahyɛmu anamɔn kwan no a ogya kɔ dza hɛn Ɔsor Egya pɛ ma hɛn no ho.
Mormon Nwoma no kyerɛkyerɛ dɛ “iyi nye mber a wɔdze ama [hɛn] dɛ yɛmfa nsiesie hɛnho nhyia Nyame kwan.”25 Mbom sintɔ a ɔhaw wɔ “abrabɔ yi mu” wɔmaa no enyidado gyinabew (annyɛ yie no kakra ara ma binom) wɔ dza Ewuradze yii kyerɛɛ President Joseph F. Smith a wɔakyerɛw no wɔ Nkyerɛkyerɛ na Ahyɛmudzi 138. Nkɔnhyɛnyi no kyerɛɛw dɛ, “Muhun dɛ elderfo agyedzifo a wɔwɔ mberano yi no mu no, sɛ wofi asetsena a ɔnnkye bo no mu a, wɔnam Nyame ne Ba a Wɔwoo no Kortoo no no werdambɔ no do sɔw hɔn edwuma do kã asɛmpa no a ɔfa nnuho na ɔpon ho no wɔ hɔn a wɔwɔ sum mu na wɔhyɛ bɔn nkowaasom ase wɔ ewufo esunsum wiadze kɛse no mu.
“Ewufo a wonu hɔnho no, wɔnam Nyankopɔn ne fie mu yɛdze ho setsie do wɔbɔpon hɔn,
“Na sɛ wotua hɔn mbrato ho kaw no wie, na wɔhohor hɔn ma hɔn ho tsew a, hɔn nsa bɛkã hɔn akatua dɛ mbrɛ hɔn ndwuma tse, osiandɛ wɔyɛ nkwagye mu adzedzifo.”26
Dza ɔkã ho no, yenyim dɛ Mfe Apem no, mfe apem no a obedzi Agyenkwa ne Mbae a Otsĩa Ebien ekyir no, bɛyɛ mber a wɔbɛyɛ ayɛdze horow ama hɔn a wɔanngye ayɛdze no wɔ hɔn honandua mu abrabɔ mu.27
Dodow pii na yennyim a ɔfa mber etsitsir ebiasa no a ɔwɔ nkwagye nhyehyɛɛ no mu na hɔn ntamu nkitahodzi ho: (1) sunsum wiadze ansaana yɛreba asaase do, (2) honandua mu abrabɔ, na (3) abrabɔ a ɔreba no. Mbom yenyim onnyiewiei nokwar yinom: “Nkwagye yɛ ankorankor asodzii, mbom nkwagye ntowdo yɛ ebusua asodzii.”28 Yɛwɔ Ɔsor Egya dɔfo a Ɔbɔhwɛ dɛ yenya nhyira biara na mfaso biara a hɛnankasa hɛn apɛdze na nsanmuyi bɛma ho kwan. Yenyim so dɛ Ɔrennhyɛ obiara ma ɔnkɛhyɛ nsɔwano nkitahodzi biara a otsĩa ne pɛ mu. Nkitahodzi a wɔasɔw ano no wɔ taduasi ma hɔn a wodzi hɔn ahyɛmudzi do no, mbom wɔnnhyɛ nsɔwano nkitahodzi wɔ obi do a ɔmmfata anaa ɔmmpɛ.
M’enuanom na nkyerɛbaa adɔfo, Megye ndzɛmba yinom ho nokwar ho dase. Megye dase wɔ hɛn Ewuradze, Jesus Chirst,hɛn gyedzi ne farbaa nye n’ewiei no ho,”29 Ɔno No Werdambɔ, a ɔwɔ hɛn Egya a ɔwɔ Sor ne nhyehyɛɛ ase, ma ne nyina tum ba mu, wɔ Jesus Christ ne dzin mu.