Edaresit ke Enɔ mme Ukpɔhɔde Itie-oku

Etop otode President Russell M. Nelson

President eke Ufok Abasi Jesus Christ eke mme Latter-day Saint.

Mme ukpɔhɔde itie-oku ekara nte edade itie-oku Abasi enam mme uduak Jehovah enyuŋ ediɔŋde kpukpru owo emi enyimede gospel emi ekefiakde emen edi.

Ndima nditɔ eka, mfin emi edi akpan usen ɔnɔ President Dallin H. Oaks ye ami. Ekedi isua 40 emi ekebede, ke April 7, 1984, ke ini ekedoride nnyin esin ke Eboho mme Apostle Duopeba. Nnyin iminem esit ibaŋa ofuri akwa mbono kiet kiet tɔŋɔ ke ini oro, ye enye emi. Efiak ediɔŋ nnyin ye ediwak edisana Spirit. Ami mekere ke mbufo eyekpep mme etop mbono emi ke ofuri mme ɔfiɔŋ emi edide mi.

Ke ini nkemanade, mme temple itokiet ekedu ke Ufɔk Abasi—kiet kiet ke St. George, Logan, Manti, ye Salt Lake City, Utah; ye ŋko ke Cardston, Alberta, Canada; ye Laie, Hawaii. Mme temple iba ema edu ke edem ke ibio ini ke Kirtland, Ohio, ye Nauvoo, Illinois. Nte Ufɔk Abasi akakade edem usop utin, ema efik Mbon Ufɔk Abasi ete efehe ekpɔŋ mme temple iba oro.

Edi ikaŋ ekim ikaŋ nta akata Nauvoo Temple. Edi President Gordon B. Hinckiey amafiak ɔbɔp ndien ekem ɔdiɔŋ enye. Mme asua Ufɔk Abasi ema esabade Kirtland Temple. Ekem Community Christ ema eda Kirtland Temple enyene, enye ekenyene enye ke ediwak isua.

Ke ɔfiɔŋ emi ebede mi nnyin ima isian ite ke Ufɔk Abasi Jesus Christ eke Ndisana Owo ke Ukperedem Usen edep Kirtland Temple, ye ediwak akpan itie mbuk eset ke Nauvoo. Nnyin imitim inemesit ibaŋa mme eti ye mme ufan-ufan nneme emi nnyin ikineyenede ye mme ada usuŋ ke Community Christ emi akadade ediyime emi edi.

Kirtland Temple enyene akpan idaha ke Edifiak-mmen Ikɔ Abasi Jesus Christ ndi. Ema etiŋ nte prophet enɔ millenium ebaŋa ediwak ŋkpɔ emi eketibede do ndien mmɔ ekedi akpan enɔ Ufɔk Abasi Ɔbɔŋ emi ekefiakde emen edi man anam utom esie ke ukperede usen.

Ata akpan edinam emi kiet eketibe ke Easter Sunday, April 3, 1836. Ke usen oro, Joseph Smith Oliver Cowdery ema enyene ediwak ŋwɔrɔ-nda isenowo. Akpa, Ɔbɔŋ Jesus Christ edi. Prophet ewet ete enyin Andinyaŋa “eketie nte edeme ikaŋ; idet ibuot esie ekedi afia nte edisana snow; ɔkpɔiso esie ayama akan unwana utin; ndien uyo esie eketie nte uyom mme akwa mmɔŋ emi efehede.”

Ke ini edidi emi, Jehovah ama anam efiɔk Enye. Enye ama ɔdɔhɔ ete, “Ami ndi akpa ye akpatre; Ami ndi enye emi odude uwem, Ami ndi enye emi ekewotde; Ami ndi etiŋ-ikɔ fo ye Ete.”

Jesus Christ ndien ɔdɔhɔ ete ke Enye ada temple oro nte ufɔk Esie onyuŋ anam eŋwɔŋɔ emi: “Ami nyowut ikɔt mi idem mi ke mbɔm ke ufɔk emi.”

Akpan eŋwɔŋɔ emi odu ɔnɔ kpukpru temple emi ediɔŋde mfin. Ami mokot mbufo nte ekere ebaŋa se eŋwɔŋɔ Jehovah ɔwɔrɔde enɔ mbufo kiet kiet.

Ke etienede edidi Andinyaŋa, Moses ama edi. Moses ama ɔnɔ Joseph Smith mme ukpɔhɔre nditaŋ Israel mbok ye edinyɔŋ ndi eke ubon duop.

Ke ini nkukut emi eketrede, “Elias ama edi, onyuŋ emen gospel eyo Abraham” ɔnɔ Joseph.

Ndien prophet Elijah edi. Edidi esie ama anam eŋwɔŋɔ Malachi osu ete ke mbemiso Udiana Edidi, Jehovah eyedɔŋ Elijah ete “ɔŋwɔŋɔre esit mme ete ɔnɔ nditɔ, ye esit nditɔ ɔnɔ ete mmɔ.” Elijah ɔnɔ Joseph Smith mme ukpɔhɔre odudu edidian.

Owo ikemeke nditiŋ mma akpan ufɔn mme ukpɔhɔre emi ndifiak ndi ererimbot nto isuŋ-utom heaven ita ke ndausuŋ Jehovah. Mme ukpɔhɔde itie-oku edi unen ye odudu eke presidency. Mme ukpɔhɔde itie-oku ekara nte edade itie-oku Abasi enam mme uduak Jehovah enyuŋ ediɔŋde kpukpru owo emi enyimede gospel Jesus Christ emi ekefiakde emen edi.

Edi akpan ndifiɔk nte ke mbemiso eketim Ufɔk Abasi, mme isuŋ utom heaven ema enɔ Prophet Joseph mme Itie-oku Aaron ye Melchizedek enyuŋ enɔ enye mme ukpɔhɔre itie-oku iba oro. Mme ukpɔhɔre emi ema enɔ Joseph Smith unen nditim Ufɔk Abasi ke 1830.

Ndien ke Kirtland Temple ke 1836, emi ekenɔde mme ukpɔhɔde itie-oku ita efen emi—ekotde, mme ukpɔhɔre ndibok Israel, mme ukpɔhɔre gospel Abraham, ye mme ukpɔhɔre odudu ndidian—ekedi akpan. Mme ukpɔhɔre emi enɔ Joseph Smith unen—ye kpukpru mme President Ufɔk Abasi Jehovah emi etienede enye—ndibok Israel ke nkan veil mbiba, ndidiɔŋ kpukpru nditɔ ediomi ye mme edidiɔŋ Abraham, ndinɔ mme edinam itie-oku ye mme ediomi unen, ye ndidian mme ufɔk emana ke nsinsi. Odudu mme ukpɔhɔde itie-oku inyeneke utit ndien okpon eti eti.

Kere baŋa nte uwem mbufo ekpetiede edieke mme ukpɔhɔde itie-oku mikpifiakke idi ererimbot. Mme ukpɔhɔde itie-oku miduhe, ukpunyeneke edidiɔŋ endowment ye odudu Abasi. Mme ukpɔhɔde itie-oku miduhe, Ufɔk Abasi okpodu ke ndinam akpan ukpep-ŋkpɔ ye ye ndinwam mme owo ikpɔŋ edi ikpikanke oro. Mme ukpɔhɔde itie-oku miduhe, owo nnyin ndomo kiet ikpinyeneke ufaŋ ke mme akpan edinam ye mme ediomi emi adiande nnyin ye mbon ima nnyin ke nsinsi ndien ayak nnyin idu ye Abasi ke akpatre.

Mme ukpɔhɔde itie-oku anamUfɔk Abasi Jesus Christ eke Ndisana Owo ke Ukperedem Usen enyene ukpuhɔre ye eboho efen ke ererimbot. Ediwak eboho efen ekeme enyuŋ enam uwem mbufo ɔfɔn mi ke uwem emi. Edi iduhe eboho efen emi ekemede onyuŋ enamde uwem mbufo ɔfɔn ke ema ekpa.

Mme ukpɔhɔde itie-oku enɔ nnyin unen ndimen kpukpru mme edidiɔŋ emi ekeŋwɔŋɔde enɔ Abraham nnɔ kpukpru eren ye iban emi enamde ediomi. Mme utom temple enam mme nti edidiɔŋ emi edu enɔ kpukpru nditɔ Abasi, isehe ebiet emi mme ini mmɔ ekeduŋde mme eduŋde idahaemi. Yak nnyin idaresit ite ke mme ukpɔhɔde itie-oku efiak edu ke ererimbot!

Ami mokot mbufo nte etim ekere mme ikɔ ita emi:

1. Ndibok Israel edi uwut-ŋkpɔ ete ke Abasi ama kpukpru nditɔ Esie ke ofuri ebiet.

2. Gospel Abraham edi uwut-ŋkpɔ efen ke Abasi ama kpukpru nditɔ Esie ke ofuri ebiet. Enye okot kpukpru owo ete edi etiene Enye— “afia ye obubit, ufin ye eyen isɔng, eren ye wan; … kpukpru edi ukem ukem enɔ Abasi.”

3. Odudu edidian edi mkpon-nkan uwut-ŋkpɔ nte Abasi amade kpukpru nditɔ Esie ke ofuri ebiet ndien oyom mmɔ kiet kiet emek ndniyɔŋ ndi ufɔk ntiene Enye.

Mme ukpɔhɔde itie-oku emi ekefiakde emen edi oto ke Prophet Joseph Smith anam enye odu ɔnɔ kpukpru iren ye iban emi enimde ediomi mmɔ ekop ke idem mme akamba ifet eke spirit. Mi ŋko, ediwak edu ndikpep nto edisana mbuk Kirtland Temple.

Akam Joseph Smith adade ɔdiɔŋ Kirtland Temple edi ukpep-ŋkpɔ abaŋa nte temple ɔnɔde afo ye ami ukeme ke spirit ndiyɔ mme mfina uwem ke mme akpatre usen emi. Ami mebeŋe mbufo nte ekpep akam oro emi ewetde ke Doctrine and Covenants section 109 Akam edidiɔŋ oro, emi ekebɔde ke ediyarare, ekpep ete ke temple edi “ufɔk ubɔŋ-akam, ufɔk utie utre-udia, ufɔk mbuɔtidem, ufɔk ukpep-ŋkpɔ, ufɔk ubɔŋ, ufɔk ntim-nnim, ufɔk Abasi.”

Mme udim edu emi iwakke ikem se temple edide. Edi eŋwɔŋɔ ɔnɔ se iditibe nnɔ enamde utom enyuŋ ekponode ke ufɔk Jehovah. Mmɔ ekeme ndidot enyin ndibɔ mme ibɔrɔ akam, ediyarare nnɔ idem, akamba mbuɔtidem, ukeme, ndɔŋesit, akamba ifiɔk, ye akamba odudu.

Ini ke temple eyeŋwam mbufo ndikere celestial nyuŋ nyene nkukut mbaŋa owo eke mbufo edide, owo eke oyomde ndidi, ye utɔ uwem emi emi mbufo ekemede ndidu ke nsinsi. Ndiki kpono ke temple ke ini ke ini eyeŋwam nte mbufo ekutde idem mbufo ye nte mbufo edukde ke ediye uduak Abasi. Ami meŋwɔŋɔ nnɔ mbufo nte.

Eŋwɔŋɔ ŋko ete ke temple imikeme “ndibɔ uyɔhɔ eke Edisana Spirit.” Kere baŋa se eŋwɔŋɔ oro ɔwɔrɔde ke ndinyene heaven eberede ɔnɔ mme owo kiet kiet emi eyomde nsinsi akpanikɔ.

Eteme nnyin ete ke kpukpru mbon emi ekponode ke temple enyenyene odudu Abasi ye mme angel “ndikpeme mmɔ.” Didie ke enye anam idorenyin mbufo ɔkɔri ke ndifiɔk ete ke, nte ŋwan mme eren emi ɔbɔde endowment emi enyenede odudu Abasi, unyeneke ndidu uwem ikpɔŋ. Nso uko ke enye ɔnɔ mbufo ndifiɔk ete ke mme angel eyeŋwam mbufo?

Ke akpatre, eŋwɔŋɔ enɔ nnyin ete ke “ediwak ibak ndomo kiet” ikemeke ndikan mbon emi ekponode ke ufɔk Jehovah.

Ndifiɔk mme ifet spirit emi edude ke temple edi akpan ɔnɔ nnyin kiet kiet mfin emi.

Ndima nditɔ eka mi, ndi mbufo emi edi eŋwɔŋɔ mi. Ŋkpɔ ndomo kiet idiŋwamke mbufo ikan ndisɔŋɔ mmum esaŋ ukwak oro ikan ndikpono ke temple ke ini ke ini nte idaha mbufo edide. Ŋkpɔ ndomo kiet idkpemeke mbufo ikan nte mbufo esobode mme ekim ke ererimbot. Ŋkpɔ ndomo kiet idimenekere ikɔ ntiense mbufo kabaŋa Jesus Christ ye Usio-isop Esie mme ndiŋwam mbufo efiɔk ediye uduak Abasi ikan. Ŋkpɔ ndomo kiet idinɔhɔ spirit mbufo emem ikan oro ke mme ini ubiak. Ŋkpɔ ndomo kiet idiberekede heaven ikan. Ŋkpɔ ndomo kiet!

Temple edi usuŋ ɔnɔ mme ikpɔ edidiɔŋ emi Abasi enyenede ɔnɔ nnyin kiet kiet, koro temple edi nkukure ebiet ke ererimbot emi nnyin ikemede ndibɔ ofuri mme edidiɔŋ emi ekeŋwɔŋɔde enɔ Abraham. Emi edi ntak emi nnyin idomode ofuri ukeme nnyin, ke ndausuŋ Jehovah, ndinam mme edidiɔŋ temple akan esim mbon Ufɔk Abasi. Ke ntre, enem nnyin esit ndisian ete ke nnyin imiduak ndibɔp temple kiet kiet ke mme itie 15 etienede mi:

• Uturoa, French Polynesia

• Chihuahua, Mexico

• Florianópolis, Brazil

• Rosario, Argentina

• Edinburgh, Scotland

• Brisbane, Australia south area

• Victoria, British Columbia

• Yuma, Arizona

• Houston, Texas south area

• Des Moines, Iowa

• Cincinnati, Ohio

• Honolulu, Hawaii

• West Jordan, Utah

• Lehi, Utah

• Maracaibo, Venezuela

Ndima nditɔ-eka irenowo ye iban, ami metie ntiense nte ke emi edi Ufɔk Abasi Jesus Christ eke mme Ndisana Owo ke Ukperedem Usen. Enye odu ke ibuot esie. Nyin idi mme isuŋutom Esie.

Yak nnyin idara ke edifiak mmen mme ukpɔhɔde itie-oku ndi emi ayakde ami ye mbufo idaresit ke kpukpru edidiɔŋ spirit emi nnyin iyomde inyuŋ idotde ndibɔ. Ami ntiŋ ikɔ ntiense emi ke edisana enyiŋ Jesus Christ, amen.

Mkpri nwed

1. Ami nkeduk Eboho Duopeba ke January 11, 1983, ndida itie emi Elder LeGrand Richards ekekpade ɔkpɔŋ. Elder Oaks ekeduk itie emi akanade ke ntak mkpa ke January 11, 1984 eke Mark E. Petersen.

2. September 9, 1924.

3. President Gordon B. Hinckley ɔkɔdiɔŋ Nauvoo Illinois Temple emi ekefiakde ebɔp ke June 27, 2002, ɔyɔhɔ 158 tɔŋɔ ke mkpa Joseph ye Hyrum Smith.

4. Ke uduak kiet kpɔt ke ini Prophet Joseph Smith ɔkɔdiɔŋde Kirtland Temple.

5. Doctrine and Covenants 110:3.

6. Doctrine and Covenants 110:4.

7. Doctrine and Covenants 110:7.

8. Se Doctrine and Covenants 110:11.

9. Doctrine ye Covenants 110:12. Emi ekedi nkaiso eŋwɔŋɔ emi Jehovah akanamde ɔnɔ Abraham ke mme tɔsln isua ke edem (se Genesis 18:18; 1 Nephi 15:18).

10. Se Malachi 4:5–6.

11. Se Doctrine ye Covenants 110:13–16.

12. Se Doctrine and Covenants 13; 27:7–8, 12.

13. Se Doctrine and Covenants 20:1–4.

14. Ke ini Jehovah ɔkɔdɔhɔde Joseph Smith ete ke eyo emi edi ini emi “owo midimumke ŋkpɔ ndomo kiet ikama” (Doctrine and Covenants 121:28), ekedi ke ntak emi ekefiakde emen mme ukpɔhɔde itie-oku edi isɔŋ.

15. Se Doctrine and Covenants 95:8; 109:22.

16. Se Doctrine and Covenants 132:45–46.

17. 2 Nephi 26:33; edian ikɔ.

18. Doctrine and Covenants 109:8.

19. Doctrine and Covenants 109:15.

20. Doctrine and Covenants 109:22.

21. Se Doctrine and Covenants 109:24–26.

22. Ɔwɔrɔde ikɔ Abasi.

23. Se Doctrine and Covenants 110:12; 132:29–30.