Hom Ndzi Dɛw wɔ Asɔfodzi Nsaafee ho Ntsi
Asɔfodzi nsaafee hwɛ mbrɛ Nyame n’asɔfodzi no wobotum dze edzi dwuma dze Ewuradze no botae horow aba na woehyira hɔn nyina a wɔgye asɛmpa a wɔdze asan ananmu aba no to mu no do.
Mo nuanom na nkyerɛbaa adɔfo, ndɛ yɛ abakɔsɛm da ma emi na President Dallin H. Oaks. Mfe 40 abasen kɔ no, wɔ Ebɔbira 7, 1984, no na wɔmaa hɛn tsĩpia baa Duebien no hɔn Quorum no mu. Yeedzi dɛw wɔ wiadze mfɛndzanan ehyiadzi kor biara fitsi dɛm aber no, a iyi so kã ho. Bio no wɔdze Sunsum a oruhue no krɔnkrɔn ehyira hɛn. Mowɔ enyidado dɛ hom besi do ara esũa ehyiadzi yi mu nsɛm no abosoom a ɔreba no mu.
Ber wɔwoo me no, nna temple esia na wodzi mu dwuma wɔ Asɔr no mu—kor biara wɔ St. George, Logan, Manti, na Salt Lake City, Utah; na wɔ Cardston, Alberta, Canada; na Laie, Hawaii. Temple ebien a woedzi kan edzi dwuma wɔ mu mber kakra wɔ Kirtland, Ohio, na Nauvoo, Illinois. Ber a Asɔrtɔw no tuii kɔɔr anee no, wɔhyɛɛ Ahotseweefo no ma wogyaa dɛm temple ebien no wɔ ekyir.
Dzesɛɛfo na ɔdze gya sɛɛ Nauvoo Temple no. Wosii no bio na nkyii President Gordon B. Hinckley tuii hyɛɛ Nyame nsa. Asɔr n’atamfo guu Kirtland Temple no no ho fĩ. Ekyir no Community of Christ gyee Kirtland Temple no, na ɔyɛɛ hɔn dze mfe pii.
Bosoom a abɛsen no yɛdze nkaabɔ too gua dɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo atɔ Kirtland Temple, na Nauvoo mbea horow a wɔayɛ atsenkã wɔ abakɔsɛm mu no. Hɛn enyi sɔ papaapa mpɛnsampɛnsamu a yɛnye Community of Christ baanodzifo yɛe a ɔkɔr do yie na wɔaboa hɛn beenu nyina na ogyaa nhyehyɛɛ yi.
Kirtland Temple no ho wɔ hia soronko wɔ Jesus Christ asɛmpa Nsanananmu no mu. Dza osisii hɔ no wɔahyɛ ho nkɔm mfe mpempem a ho wɔ hia tsitsir ma Ewuradze N’Asɔr no a wɔdze asan ananmu aba dze ahyɛ ne nda a odzi ekyir dwuma no mã.
Dza osii a ohia tsitsir no sii Easter Kwesida, Ebɔbira 3, 1836. Dɛm da no, Joseph Smith na Oliver Cowdery nyaa nsera ntoatoado nwanwa. Odzi kan, Ewuradze Jesus Christ puei. Nkɔnhyɛnyi no kyerɛɛw dɛ “n’enyiwa tse dɛ ogyaframee; tsirhwi a ɔwɔ ne tsir do no yɛ fitaa tse dɛ esukwankyɛba mapã; n’enyim hyerɛnee kyɛɛn ewia ne hyerɛn; na ne ndze tse dɛ esu akɛse a ɔrepem.”
Nsera yi mu, Ewuradze sii ne nyimpa ban pi. Ɔkãa dɛ “Emi nye ɔkandzifo nye okyidzifo no; emi nye nyia ɔtse ase no, emi nye nyia wokum no no; emi nye hom dzimafo wɔ Egya no nkyɛn.”
Nkyii Jesus Christ paa mu kãa dɛ wɔagye temple no ato mu dɛ Ne fie na Ɔbɔɔ anohoba nwanwa yi: “Mbɔbɔrhu mu na mibeyi moho akyerɛ mo nkorɔfo wɔ fi yi mu.
Anohoba tsitsir yi wɔ hɔ ma temple biara a woetu ahyɛ Nyame nsa ndɛ. Moto nsa frɛ hom ma hom adwendwen Ewuradze n’anohoba n’asekyerɛ ma hom ankorankor.
Agyenkwa ne nsera ekyir no, Moses puei. Moses dze nsaafee a wɔdze bɔboaboa Israel ano na ebusuakuw du hɔn nsanee no maa Joseph Smith.
Ber a wɔtoow enyido-adzehu yi mu no, “Elias puei, na ɔdze Abraham n’asɛmpa ne mberano no” maa Joseph.
Nkyii Elijah puei. No mpuei no hyɛɛ Malachi n’anohoba no mã dɛ ansaana Mbae a Otsĩa Ebien no bɛba no, Ewuradze bɔsoma Elijah dɛ “bɛdandan egyanom hɔn akoma aba mba no do, na mba hɔn akoma aba hɔn egyanom do.” Elijah dze nsɔwano nsaafee no maa Joseph Smith.
Nsaafee yinom a ɔsor abɔfo baasa dze asan aba wɔ Ewuradze no kwankyerɛ ase no ho hia a ohia no wonnkotum etsĩ mu akã. Asɔfodzi nsaafee nye president na n’apamfo hɔn tumdzi na tum. Asɔfodzi nsaafee hwɛ mbrɛ Nyame n’asɔfodzi no wobotum dze edzi dwuma dze Ewuradze no botae horow aba no do na woehyira hɔn nyina a wɔgye asɛmpa a wɔdze asan ananmu aba no to mu.
Ohia tsitsir dɛ yɛbɛhyɛ no nsew dɛ ansaana wɔrebɛkyekyer Asɔr yi, ɔsor abɔfo dze Aaron na Melchizedek Asɔfodzi no hyɛɛ Nkɔnhyɛnyi Joseph na wɔmaa no asɔfodzi ebien nyina ho nsaafee. Nsaafee yinom maa Joseph Smith tumdzi ma ɔdze kyekyeer Asɔr no afe 1830 mu.
Nkyii wɔ Kirtland Temple mu wɔ afe 1836 no, nsaafee ebiasa a wɔdze kãa ho mae no—ɔyɛ, nsaafee a wɔdze boaboa Israel ano, Abraham n’asɛmpa ne nsaafee, na nsɔwano tum nsaafee no— ho hia tsitsir. Nsaafee yinom maa Joseph Smith tumdzi—na Presidentfo a woedzi do wɔ Ewuradze N’Asɔr no—ma wɔboaboa Israel ano wɔ ntwamutam n’afã ebien nyina, dze Abraham nhyira ehyira ahyɛmu mba nyinara, dze nsɔwano ato asɔfodzi ayɛdze na ahyɛmudzi horow do na wɔasɔw ebusua ebusua ano afebɔɔ. Asɔfodzi nsaafee ebiasa yi hɔn tum mmbɔadze na ɔyɛ nwanwa kɛse noara.
Susu mbrɛ w’abrabɔ ɔbɔson ayɛ sɛ asɔfodzi nsaafee no wɔannfa annsan ananmu ammba asaase yi do a. Asɔfodzi nsaafee nnyi hɔ a, nkyɛ wonnkotum dze Nyame no tum akyɛ wo. Asɔfodzi nsaafee nnyi hɔ a, nkyɛ Asɔr no botum asom dɛ adzekyerɛ tsitsir na nyimpa ho mboa kuw a biribiara nnkã ho bio. Asɔfodzi nsaafee nnyi hɔ a, nkyɛ hɛn mu biara nsa nnkɛkã ayɛdze na ahyɛmu horow a ohia ankasa a ɔkyekyer hɛn fam hɛn adɔfo ho daapem na ɔma hɛn kwan ma ewiei no yɛatsena Nyankopɔn nkyɛn.
Asɔfodzi nsaafee no ma Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no da edzi soronko fi ekuwekuw biara a ɔwɔ asaase yi do. Ekuwekuw binom pii botum na wɔyɛ ma w’abrabɔ kɔ do yie wɔ ɔnnkyebo asetsena yi mu. Mbom kuw biara nnyi hɔ bio a obotum na obenya nhyɛdo wɔ wo owu ekyir abrabɔ do.
Asɔfodzi nsaafee ma hɛn tumdzi ma yɛtserɛw nhyira horow nyina a wɔdze bɔɔ Abraham anohoba no kɔ ahyɛmu-siefo ɔbarimba na ɔbaa biara do. Temple edwuma ma nhyira abɔso yinom no Nyankopɔn ne mba nyina hɔn nsa kã, a bea anaa ber a wɔtsenaa ase anaa afei wɔbɛtsena ase no mmfa ho. Hom mma yendzi ehurusi dɛ asɔfodzi nsaafee no wɔ asaase do bio!
Moto nsa frɛ hom ma ahwɛyie mu ara hom esusu nsɛm ebiasa a odzi do yinom:
-
Israel mboaboa ano no yɛ adanse dɛ Nyame dɔ Ne mba nyina a wɔwɔ beebiara.
-
Abraham n’asɛmpa no yɛ adanse a ɔkã ho dɛ Nyankopɔn dɔ Ne mba a wɔwɔ beebiara. Ɔto nsa frɛ obiara dɛ ɔmbra Ne nkyɛn—“bibinyi na borɔnyi, akowaa na fahodzinyi, ɔbarimba na ɔbaa hɔn; … nyinara yɛ adze kor ma Nyame.”
-
Nsɔwano tum no yɛ adanse krɔnkrɔn wɔ mbrɛ Nyankopɔn si dɔ Ne mba nyina beebiara wɔwɔ na Ɔpɛ dɛ hɔn mu kor biara san mu yi dɛ ɔbɛsan akɔ fie akɔ No hɔ.
Asɔfodzi nsaafee a woduaa Nkɔnhyɛnyi Josesph Smith do wɔdze saan ananmu baa no ma wotum ma ahyɛmu-siefo ɔbarimba anaa ɔbaa biara nya ankorankor sunsum mu ndzinoa nwanwa. Ha bio no, dodow wɔ hɔ a yebotum esũa efi Kirtland Temple n’abakɔsɛm krɔnkrɔn no.
Joseph Smith ne Kirtland Temple tu hyɛ Nyame nsa mpaabɔ no yɛ adzesũadze a ɔfa mbrɛ temple no hyɛ emi na ɔwo tum a yɛdze behyia abrabɔ mu ɔhaw wɔ nda a odzi ekyir yinom mu. Mehyɛ hom nkuran dɛ hom nsũa dɛm mpaabɔ no, wɔakyerɛw no wɔ Nkyerɛkyerɛ na Ahyɛmudzi ɔfã 109. Dɛm tu hyɛ Nyame nsa mpaabɔ no a wɔnam nyikyerɛ do nyae no, kyerɛkyerɛ dɛ temple yɛ “mpaabɔ fi, akɔnkye fi, gyedzi fi, nwomasũa fi, enyimnyam fi, na ofi a wɔyɛ ndzɛmba esiado esiado, Nyankopɔn ne fi.”
Su horow yi a wɔakyerɛw no nkorkor yi bor temple no ho nsɛm ara do. Ɔyɛ anohoba a ɔfa dza ɔbɛba hɔn a wɔsom na wɔsɔr wɔ Ewuradze ne fie no hɔn do. Wobotum enya enyidakwan dɛ wobenya mpaabɔ ho mbuae, ankorankor nyikyerɛ, gyedzi kɛse, ahoɔdzen, awerɛkyekye, nyimdzee ntowdo, na tum kɛse.
Mber wɔ temple mu no bɔboa wo ma adwen celestial adwen na enya enyido-adzehu wɔ wo nyimpa ban ankasa, nyia dabi ibotum abɛyɛ, na abrabɔ a ibotum enya no afebɔɔ. Itaa sɔr wɔ temple mu a, ɔbɔboa ma kwan a edze hu woho no na mbrɛ isi fata Nyankopɔn ne nhyehyɛɛ kɛse no atsew yie . Mobɔ hom ho anohoba.
Wɔbɔ hɛn anohoba so dɛ temple mu no yebotum enya “Sunsum Krɔnkrɔn no ne mãhyɛ no.” Susu ho dza dɛm anohoba n’asekyerɛ tse wɔ kwan dɛ hom benya ɔsorsor a woebue ama onnyiewiei nokwar hwehwɛfo nokwafo.
Wɔkyerɛkyerɛ hɛn dɛ hɔn a wɔsɔr wɔ temple mu nyina benya Nyame no tum na abɔfo a “wɔbɔhwɛ hɔn do.” Inyim dɛ, eyɛ ɔbaa anaa ɔbarimba a wɔakyɛ wo Nyame no tum dze ayɛ wo akontar no, nnhyia abrabɔ dɛ ankonam no, ɔtow w’awerɛhyɛmu mu ahɛn? Ebɛn akokodur na ɔdze ma wo dɛ ibohu dɛ abofo boa wo ampaara?
Ewiei no, wɔbɔ hɛn anohoba dɛ “emumuyɛdze fekuw” biara rinnnya tum nndzi konyim wɔ hɔn a wɔsɔr wɔ Ewuradze ne fie.
Yɛretse sunsum mu ndzinoa horow a temple ma otum ba no hia hɛn mu kor biara papaapa.
Mo nuanom na me nkyerɛbaa adɔfo, m’anohoba nye yi. Biribiara rommboa wo ma nsuo dadze poma no mu yie nnkyɛn eretaa akɔsɔr wɔ temple dɛ mbrɛ wo gyinabew bɛma ho kwan. Biribiara rommbɔ woho ban yie ber a ihyia wiadze yi mu sum ehubɔwhubɔw no. Biribiara rennkenyan wo dasegye wɔ Ewuradze Jesus Christ na No Werdambɔ ho anaa wɔaboa wo ma atse Nyankopɔn ne nhyehyɛɛ nwanwa no yie. Biribiara ronndwedwe wo sunsum yie yaw ber mu. Biribiara rummbue ɔsorsor yie. Hwee ara!
Temple no nye abobow kɛse kɔ nhyira kɛse a Nyame wɔ ma hɛn mu kor biara no, osiandɛ temple no nye bea wɔ asaase do nko a yebotum enya nhyira nyina a wɔdze bɔɔ Abraham anohoba no. Dɛm ntsi na yɛreyɛ dza yɛwɔ ho tum nyina, wɔ Ewuradze no kwankyerɛ ase, dze ama temple nhyira horow no Asɔrmba hɔn nsa akã no yie. Dɛm ntsi, ɔyɛ hɛn enyigye dɛ yɛbɔ hɛn nhyehyɛɛ dɛ yebesi temple fofor kor wɔ mbea 15 yinom a odzi do yi ho dawur:
-
Uturoa, French Polynesia
-
Chihuahua, Mexico
-
Florianópolis, Brazil
-
Rosario, Argentina
-
Edinburgh, Scotland
-
Brisbane, Australia anaafo apaamu
-
Victoria, British Columbia
-
Yuma, Arizona
-
Houston, Texas anaafo apaamu
-
Des Moines, Iowa
-
Cincinnati, Ohio
-
Honolulu, Hawaii
-
West Jordan, Utah
-
Lehi, Utah
-
Maracaibo, Venezuela
Enuanom na nkyerɛbaa adɔfo, megye dase dɛ iyi nye Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo. Ɔno na Ogyina ne tsir. Yɛyɛ N’esũafo.
Hom mma yendzi ehurusi wɔ asɔfodzi nsaafee ne nsanananmu, a ɔma emi na ɔwo yetum nya sunsum mu nhyira biara a yɛpɛ na yɛfata dɛ yenya. Megye ho dase wɔ Jesus Christ ne dzin krɔnkrɔn no mu, amen.