11:8

Moto Oyo Asololaki na Yehova

Na mpaka Kyle S. McKay

Ya Bantuku Nsambo

Joseph Smith azalaki“yakopambolama mpo na kofungola eleko ya nsuka,” mpe topambolami ete asalaki yango.

Ntina na ngai lelo oyo mpe ntango nyonso ezali ya kotatola etali Yesu Klisto, ete Azali Mwana ya Nzambe, Mozalisi mpe Mobikisi ya mokili, Mopesi mpe Mosikoli na biso. Mpo “Mibeko ya ntina ya lingomba na biso ezali litatoli ya Bapostolo mpe Baprofeta etali Yesu Klisto,” lelo nazali kokabola elongo na bino boyebi mpe litatoli na ngai ya Mobikisi lokola elendisami mpe ekolisami na bomoi mpe mateya ya apostolo mpe profeta moko ya ntina.

Ebandeli ya Bwanya

Na ntongo ya mokolo moko kitoko ya moyi na ebandeli ya eleko ya molunge ya 1820, Joseph Smith ya mibu 14 akotaki na zamba ya banzete penepene na ndako ya libota na ye mpo na kosambela na ntina ya masumu na ye mpe mpo na kotuna eklezia nini asengelaki kokota. Losambo na ye ya motema oyo epesamaki na kondima ya kotengama te ezwaki likebi ya nguya oyo eleki nguya na molongo mobimba, bakisa Tata mpe Mwana. Mpe zabulu. Mokomoko na bango azalaki kosepela mingi na losambo yango mpe na mwana mobali yango.

Oyo tobengi sikawa Limoni ya Yambo elakisaki ebandeli ya Bozongisi ya makambo nyonso na eleko oyo ya nsuka. Kasi mpo na Joseph, likambo yango ezalaki mpe ya moto ye moko mpe ya komibongisa. Nyonso alingaki ezalaki bolimbisi mpe bokambi. Nkolo apesaki ye nyonso mibale. Toli ya “kokota na [eklezia] moko te” epesamaki. Maloba “Masumu na yo elimbisami” ezalaki ya kosikola.

Mpo na biso nyonso bosolo ya kitoko tokoki koyekola uta na Limoni wana ya Yambo, mbala mosusu eloko ya monene oyo Joseph azwaki ezalaki kaka, “Namonaki ete litatoli ya Yakobo ezali ya solo—ete moto oyo azangi bwanya akokaki kosenga na Nzambe, mpe kozwa.”

Lokola nganga-mayele moko alobaki: “Likambo ya solosolo ya Limoni ya Yambo lelo ezali ya koyeba ete ezali ezaleli ya Nzambe ya kopesa na baoyo bazangi bwanya. Nzambe oyo amimonisaka epayi ya Joseph Smith na zamba ya bule azali Nzambe oyo ayanolaka bilenge na ntango ya mpasi.”

Likambo oyo Joseph akutanaki na yango na zamba epesaki ye elikya ya kosenga bolimbisi mpe bokambi mpo na bomoi na ye mobimba. Boyebi na ye epesi ngai mpe elikya ya kosenga bolimbisi mpe bokambi mpo na bomoi na ngai mobimba.

I. Boyamboli Mbala na Mbala

Na mokolo ya Sanza ya libwa 21, 1823, Joseph asambelaki na molende mpo na bolimbisi, na elikya ete mpo na likambo oyo akutanaki na yango na zamba mbula misato liboso, lola ekoyanola lisusu. Mpe esalemaki bongo. Nkolo atindaki anzelu, Moroni, mpo na koteya Joseph mpe koyebisa ye likundoli moko ya kala oyo akobongola na nsima na nzela ya likabo mpe nguya ya Nzambe—Buku ya Mormon.

Penepene na mibu 13 nsima na yango, Joseph mpe Oliver Cowdery bafukamaki na losambo ya lokumu, ya nkuku na Tempelo ya Kirtland oyo ebulisamaki sika. Toyebi te nini basambelaki mpo na yango, kasi nsambo na bango mbala mosusu esangisi kosenga bolimbisi, mpo, lokola batelemaki, Mobikisi abimelaki bango mpe asakolaki, “Tala, masumu na bino elimbisami; bozali peto liboso na ngai.”

Na basanza mpe mibu nsima ya likambo oyo, Joseph mpe Oliver basalaki lisusu lisumu. Mpe lisusu. Kasi na ntango wana, mpo na ngonga wana, na eyano na losambo na bango mpe mpo na komilengela mpo na bozongisi ya nkembo ya bafungola ya bonganganzambe oyo elingaki kosalema, Yesu alongolaki masumu na bango.

Bomoi ya Joseph ya boyamboli mbala na mbala epesi ngai elikya ya “koya na mpiko na kiti ya bokonzi ya ngolu, ete [na]zwa ngolu.” Nayekoli ete Yesu Klisto azali mpenza “na ezaleli ya kolimbisa.” Ezali te mokumba na Ye mpo na kokata makambo. Ayaki mpo na kobikisa.

Kotuna na Nkolo

Lokola eteni ya elaka ya “bozongisi ya makambo manso,” Nkolo, na nzela ya Joseph Smith, abimisaki Buku ya Mormon mpe mamonisi misusu oyo ezali na litondi ya nsango malamu na Ye. Bosolo ya ntina epesamaki polele mpe mobimba lokola Joseph atunaki na Nkolo mpo na bokambi. Kanisa oyo elandi:

Tata na Mwana bazali na nzoto “lokola oyo ya moto.”
Yesu azwaki likolo na Ye moko kaka masumu na biso te kasi lisusu bokono, minyoko, mpe botau na biso.
Bomikabi na Ye ezalaki mpasi mingi mpe ememaki Ye na kotangisa makila na lidusu moko moko ya mposo.
Tobikisami na ngolu na Ye “nsima ya nyonso oyo tokoki kosala.”
Mawa ya Klisto ezali na masengami.
Lokola tozali koya epayi ya Klisto, Akolimbisa masumu na biso kaka te, kasi Akobongola mpe bomoto na biso mpenza na boye “ete tozala lisusu na likoki ya kosala mabe te.”
Klisto azali ntango nyonso kotinda bato na Ye batonga batempelo, epayi wapi Amimonisaka epayi ya bango mpe alatisaka bango na nguya oyo euti na likolo.

Natatoli ete makambo maye manso mazali ya solo mpe ya ntina. Ezali bobele ndambo ya litondi oyo Yesu Klisto azongisaki na nzela ya Joseph Smith mpo na koyanola na losambo ya mbala na mbala ya Joseph mpo na kozwa bokambi.

Kotambola na Bokonzi Oyo

Na 1842, Joseph akomaki na ntina ya makambo ya kokamwa oyo ekosalema na eleko oyo ya nsuka. Asakolaki ete na mikolo na biso, “Bonganganzambe ya lola ekosangana na Bonganganzambe ya mabele, mpo na kokokisa mikano minene wana; mpe wana tozali bongo na bomoko kati na mokano moko mpo na kotombola bokonzi ya Nzambe, Bonganganzambe ya lola ezali te bato oyo bazali kotala mpamba.”

Na moninga na ye Benjamin Johnson, Joseph alobaki, “Benjamin, [soki nakufi] [nakozala] mosika na yo te, mpe soki na ngambo mosusu ya elamba, [nakosala] ntango nyonso elongo na yo, mpe na nguya mingi, mpo na kokamba bokonzi oyo.”

Na mokolo ya 27 ya Sanza ya motoba 1844, Joseph Smith mpe ndeko na ye ya mobali Hyrum babomamaki. Nzoto ya Joseph ekundamaki, kasi litatoli na ye ezali kokoba koyokana na mokili mobimba mpe na molimo na ngai:

“Namonaki limoni; nayebaki yango, mpe nayebaki ete Nzambe ayebaki yango, mpe nakokaki kowangana yango te.”

“Natikala te koyebisa bino ete nabonga nie; kasi libunga moko te ezali kati na mabimisi oyo nateyaki.”

“Mabongisi ya ntina ya eyamba na biso ezalaki litatoli ya Bapostolo mpe Baprofeta, mpo na oyo etali Yesu Klisto, ete Ye akufaki, akundamaki, mpe asekwaki mokolo ya misato, mpe amataki na lola; mpe makambo manso oyo etali eyamba na biso ezali kaka eteni ya ndako se moko na yango.”

Oyo elobamaki mpo na Yoane Mobatisi ekoki mpe kolobama mpo na Joseph Smith: “Ezalaki na mobali moko oyo atindamaki na Nzambe, oyo nkombo na ye ezalaki [Joseph]. … Azalaki Pole wana te, kasi atindamaki mpo na kopesa litatoli ya Pole wana,” “ete bato banso na nzela na ye bakoka kondima.”

Nandimi. Nandimi mpe nazali na ntembe te ete Yesu azali Klisto, Mwana ya Nzambe na bomoi. Natatoli ete Nzambe ya bomoi azali Tata na biso ya bolingo. Nayebi yango mpo ete mongongo ya Nkolo elobaki yango epayi na ngai, ndenge moko mpe esali mongongo ya basaleli na Ye, bapostolo mpe baprofeta, kobanda na Joseph Smith.

Natatoli ete Joseph Smith azalaki mpe azali profeta ya Nzambe, motatoli mpe mosaleli ya Nkolo Yesu Klisto. “Apambolamaki mpo na kofungola eleko ya nsuka,” mpe topambolami ete asalaki yango.

Nkolo atindaki Oliver mpe biso banso, “Botelema pembeni ya mosali na ngai Joseph, na bosembo nyonso.” Natatoli ete Nkolo atelemi pembeni ya mosali na Ye Joseph mpe Bozongisi esalamaki na nzela na ye.

Joseph Smith azali sikawa eteni ya bonganganzambe wana ya lola oyo alobelaki. Lokola alakaki moninga na ye, azali mosika te na biso, mpe na ngambo mosusu ya elamba, azali naino kosala elongo na biso, mpe na nguya moko ebakisami mingi, mpo na kokamba bokonzi oyo. Na esengo mpe na botondi, natomboli mongongo na ngai mpo na “kokumisa moto oyo asololaki na Yehova.” Mpe koleka nyonso, lokumu epayi ya Yehova, oyo asololaki na moto yango! Na nkombo ya Yesu Klisto, amene.