O Bilenge ya Kibokulutu ya Lokumu
Nzambe andimelaka bino, bana ya boyokani, mpo na kosunga na mosala na Ye ya komemaka bana na Ye na bokengi epayi na Ye.
Mpaka Stevenson, oyo ezali likita moko ekoki kobosanama atako moke te.
Libota na biso ezalaki ntango nyonso kosepela na buku moko ya moke ebangami Mokanda ya Bana epayi ya Nzambe. Tala mwa mosusu:
“Nzambe ya motuya, na esika ya kotika bato bakufa mpe osala basusu ya sika, mpo na nini kaka te obomba baye ozali na bango sikoyo?”
“Esali boni ozali kaka na mibeko zomi, kasi eteyelo na biso ezali na yango ebele mingi?”
“Mpo na nini otie bambuma na mongongo soki okolongola yango lisusu?”
Lelo ngonga ezali te mpo na koyanola na mituna nyonso oyo, kasi ezali na motuna mosusu mingimingi oyo nayokaka epai ya bilenge oyo nalingi kolobela. Uta Ulaanbaatar, Mongoli, kino Thomas, Idaho, motuna ezali kaka moko: “Mpo na nini? Mpo na nini Bansantu ba Mikolo Mya nsuka bazaka ya kokesana mpenza na basusu?”
Nayebi ete ezali mpasi mpenza kozala ya kokesana—mingingi ntango bozali bilenge mpe bolingi na makasi ete bato mosusu basepela na bino. Moto nyonso alingi komikotisa na kati, mpe mposa yango emonisami na lolenge moko ya mabe na mokili ya lelo ya digital oyo etondisami na media ya bato banso mpe batumboli bato na nzela ya internet.
Boye, na bopusi yango nyonso, mpo na nini Bansantu Ba Mikolo Mya Nsuka bazalaka ya kokesana mpenza? Biyano ya malamu ezali minngi: Mpo ete yo ozali mwana ya Nzambe. Mpo ete obikisami mpo na mikolo ya nsuka. Mpo ete ozali moyekoli ya Yesu Klisto.
Kasi biyano yango etiaka yo ntango nyonso pembeni te. Moto nyonso azali mwana ya Nzambe. SMoto nyonso na mabele sikawa atindamaki awa na mikolo ya nsuka. Kasi bato nyonso te basalelaka Liloba ya Bwanya to mobeko ya bongondo lolenge bozali kosala makasi mpo na kosalela yango. Ezali na bayekoli ya mpiko mingi ya Klisto oyo bazali bandimi ya Eklezia oyo te. Kasi basalaka misio te mpe basalaka makuli te na bandako ya Nkolo mpo na bankoko na bango lokola bino bosalaka. Esengeli kozala mingi koleka yango—mpe ezali.
Lelo nalingi kotya makanisi na ntina mosusu ya kobakisa oyo etikala kozala na ndimbola monene kati na bomoi na ngai. Na mobu1988, Apostolo moko ya elenge na nkombo Russell M. Nelson apesaki liteya na Brigham Young University ebengamaki “Matondo mpo na Boyokani.” Kati na yango, kasi-Mpaka Nelson alimbolaki ete ntango tosalelaka boponi na biso ya bomoto mpo na kosala mpe kobomba mayokani na Nzambe, tokomi babulami ya liyokani ya seko oyo Nzambe asalaki na bankoko na biso na ekeke nyonso. Elobami na ndenge mosusu, tokomi “bana ya liyokani.” Yango etiaka biso pembeni. Yango epesi biso nzela ya kozua mapamboli ndenge moko na oyo batata mpe bamama na biso bazuaki, na kosangisa Ndingisa ya Kibokulutu.
Kibokulutu! Oyoka ntango mosusu liloba yango. Toyembaka kutu loyembo etali yango: “O youth of the noble birthright, carry on, carry on, carry on!” Ezali liloba moko oyo etindaka bato basala. Kasi nini ezali kolakisa?
Na bantango ya kondimana na Kala soki tata moko akufi, mwana na ye ya mobali ya kulutu azuaki mokumba ya kobatela mama na ye mpe bandeko na ye ya basi. Bandeko na ye ya mibali bazuaki libula na bango mpe balongwaki mpo na kosala nzela na bango na mokili, kasi mwana mobali ya kulutu akendaki esika moko te. Alingaki kobala mpe kozala na libota na ye moko, kasi atikalaki kino na nsuka ya mikolo na ye mpo na kotambwisa makambo ya libula ya tata na ye. Mpo na mokumba oyo ya kobakisama, apesamaki libula ya kobakisa. Kokamba mpe kobatela basusu ezalaki kosenga mingi? Te ntango otali libula ya kobakisa ye apesamelaki.
Lelo tozali kolobela te molongo ya kobotama na yo na mabota ya mabele to misala ya basi to mibali na Kondimana na kala. Tozali kolobela libula oyambi lokola mokitani libula elonglo na Klisto mpo na kiboninga ya liyokani oponaki mpo na kokota elongo na Ye mpe Tata na bino na Lola. Ezali kosenga ebele soki Nzambe azeli yo kozala ya kokesana na bana na Ye misusu mpo okoka kokamba bango mpe kosunga bango malamu koleka? te ntango otali mapamboli—nyonso mibale ya mosuni mpe ya molimo—oyo epesamelaki yo.
Kibokulutu na yo elakisi ete yo ozali malamu koleka basusu? Te, kasi elakisi ozelami mpo na kosunga basusu kozala malamu koleka. Kibokulutu elakisi ete oponami? Iyo, kasi oponami te mpo na okonza likolo ya basusu; oponami mpo na kosalela bango. Kibokulutu na yo ezali elembo ya bolingo ya Nzambe? Iyo, kasi ya motuya koleka, ezali elembo ya bondimeli na Ye.
Ezali eloko moko kolingama mpe eloko mosusu kondimama mobimba. Na kati ya motambwisi ya Mpo na Bokasi ya Bilenge totangi: “Tata na bino na Lola alikyaka na bino. Apesaki bino mapamboli minene, kobakisa botondi ya nsango malamu mpe makuli mpe mayokani ya bule oyo ekangisi bino na Ye mpe ememi nguya na Ye kati ya bomoi na bino. Elongo na mapamboli wana eyaka na mokumba ya kobakisama. Ayebi ete bokoki kosala bokesene na mokili, mpe yango esengaka, mingi na bisika ebele, kozala ya kokesana na mokili.”
Bomoi na biso ya suka ekoki kokokanisama na masuwa ya mobembo oyo Nzambe atindaki bana na Ye nyonso mpo na mobembo uta na ngambo moko ti na mosusu. Mobembo etondi na mabaku ya koyekola, kokola, kozala na esengo, mpe kokoba, kasi mpe etondi lisusu na makama. Nzambe alingaka bana na Ye nyonso mpe azali komitungisa mpo na bolamu na bango. Alingi kobungisa ata moko na bango te, yango wana Abengaka baoyo bazali na bolingi ya kokoma bato ya masuwa na Ye—elingi koloba bino. Mpo na boponi na bino ya kosala mpe kobomba mayokani, Apesi bino elikya na Ye. Andimelaka bino kozala ya kokesana, ya kokamwa, mpe ya botiami pembeni mpo na mosala ya motuya Ye andimelaka bino kosala.
Kanisa yango! Nzambe andimelaka bino—nyoso bato ya mabele, bana ya liyokani, bato ya lingoma na Ye—mpo na kosunga na mosala na Ye ya komemaka bana na Ye na bokengi epai na Ye. Ezali ya kokamwa te Mokambi Brigham Young alobaki mbala moko, “Banjelu nyonso na lola bazali kotalaka mwa eteni oyo ya bato.”
Soki botali nzinganzinga ya masuwa ebengami mokili, bokoki komona bato mosusu bafandi na bakiti ya bosepeli komelaka masanga, kosalaka masano ya mbongo na ba kazino, kolataka bilamba ekolakisaka nzoto, kotala ntango nyonso telefone, mpe kobebisaka bantango ebele na kosakana na masano ya elektronike. Kasi na esika ya komituna, “Mpo na nini ngai nakoki te kosala bongo?” okoki kokanisa ete ozali te mopaya ya ndenge nyonso. Ozali moko ya lisanga. Ozali na mikumba oyo bapaya mosusu bazali na yango te. Lokola Ndeko mwasi Ardeth Kapp alobaki mbala moko, “Okoki te kozala [mobateli] ya bomoi soki otali lokola babeti mayi nyonso na libongo.”
Mpe liboso olemba nzoto mpo na mikumba oyo ebakisami, nasengi bokundola ete bato ya lisanga bayambi eloko moko oyo bato mosusu bazui te: lifuti. Mpaka Neil L. Andersen alobaki, “Ezali na nguya moko ya molimo oyo ebongisaka makambo mpo na basembwi,” sangisaka “bokengi, kondimisama, mpe elikya minene koleka.” Lokola Abalayama na ntango ya kala, bozwi esengo mpe kimia mingi, bosembo mpe boyebi minene. Lifuti na bino ezali kaka te ndako moko na lola mpe banzela oyo esalami na wolo. Ekozala pete mpo na Tata ya Lola apesa bino nyonso oyo Azali na yango. Mposa na Ye ezali kosunga bino bokoma nyonso oyo Ye azali. Boye, bomipesi na bino ezali kosenga bino mingi mpo ete yango ezali lolenge Nzambe azali kokomisa bino bato minene koleka.
Ezali “kosenga mingi epayi ya moto nyonso, kasi ozali moto nyonso te”! Ozali elenge ya mbotama ya lokumu. Liyokani na yo ya kiboninga elongo na Nzambe mpe Yesu Klisto ezali kiboninga ya bolingo mpe kolikya na kati na yango opesami nzela ya kozwa ngolu na Bango monene—lisungi na Bango ya bonzambe, kopesama ya bokasi, mpe nguya ya kosunga. Nguya yango ezali kaka te bolembo moko ya motema, eloko ya bolamu kaka, to likambo oyo ekokisami na makanisi ya moto ye moko. Yango ezali solo.
Lokola bozali kokokisa mikumba na bino ya kibokulutu, bozali bino moko ata moke te. Nkolo ya elanga ya vinyo azali kosala elongo na bino. Bozali kosala loboko na loboko elongo na Yesu Klisto. Elongo na liyokani moko na moko ya sika—mpe lokola kiboninga na bino na Ye ezali kokola mozindo—bokosimba makasi moko na mosusu mpe kino bokangani makasi elongo. Na kati ya elembo wana ya bule ya ngolu na Ye, bokomona bosenga mpe makasi ya kozala mpenza lolenge Yesu Klisto azalaki—na lolenge ya kokesana mpenza na mokili. Bozui yango mpo ete Yesu Klisto azui bino!
Na 2 Nefi 2:6 totangi, “Yango wana, bosikoli bokoya o kati ya mpe na Masiya Mosantu; mpo atondi na boboto mpe bosolo.” Mpo atondi na bosolo, Azali komona yo ndenge ozali mpenza—na mabunga, bolembu, bamawa, mpe nyonso. Mpo ete atondisami na ngolu, Ye amonaka bino lokola bokoki mpenza kozala. Akutani na yo esika ozali mpe asalisi yo koyambola mpe kobonga, kolonga mpe kokoma.
“O youth of the noble birthright, carry on, carry on, carry on!” Natatoli ete bozali ya kolingama—mpe ya kondimama—lelo, na mibu 20 mpe libela. Koteka kibokulutu na yo te mpo na supu ya ndunda oyo ezanga ntina. Kosala mombongo te ya biloko nyonso mpo na eloko te. Kotika te mokili ebongola yo ntango obotamaki mpo na kobongola mokili. Na nkombo ya Yesu Klisto, amene.