Malongi ya Yesu Klisto Ezali Pete
Nazali kotatola mosala ya bule ya kotangisa bana ya Tata na Lola malongi ya pete ya Yesu Klisto.
Biso nyonso tozali na bandeko ya libota oyo tolingaka mpe oyo bazali komekama mpe kozwama na masenginia na nguya oyo emonani lokola ntango nyonso ya Satana, mobebisi, oyo alingi kokomisa bana nyonso ya Nzambe bato ya mawa. Mpo na mingi kati na biso, ebele bazangi pongi na butu. Tomekaki kozinga bato nyonso oyo bazalaki na likama na nguya nyonso ya bolamu. Tobondelaki mpo na bango. Tolingaki bango. Topesaki ndakisa ya malamu mingi koleka oyo tokokaki.
Alma, profeta moko ya bwania uta ntango ya kala, akutanaki na mimekano ya lolenge moko. Bato akambaki mpe alingaki bazalaki mbala mingi kobundisama na monguna moko ya nkanda makasi, nzokande bazalaki kaka komeka kobokola bana ya sembo na mokili ya mabe. Alma ayokaki elikya na ye se moko ya elonga ezalaki bokasi oyo na bantango mosusu komona mpamba mpe mbala mingi kosalela kaka moke. Abondelaki mpo na lisungi ya Nzambe.
Alma ayebaki ete mpo na lisungi ya Nkolo, boyamboli esengelamaki epai ya baye azali kokamba, lolenge se moko na banguna na ye. Na yango, aponaki lolenge mosusu ya kosala etumba.
Buku ya Mormon elimboli yango lolenge oyo: “Mpe sikawa, lokola liteya ya liloba ezalaka na bokasi monene ya kokamba bato na kosala eye eyengebeni—iyo, ezalaki … na mbano ya nguya mingi likolo ya mayele ya bato mingi koleka mopanga, to eloko mosusu, oyo ekomaki epayi na bango—yango wana Alma akanisaki elongobanaki ete bameka bokasi ya liloba ya Nzambe.”
Liloba ya Nzambe ezali malongi eteyami na Yesu Klisto mpe baprofeta na Ye. Alma ayebaki ete maloba ya malongi ezalaki na nguya monene.
Na eteni ya 18 ya Malongi mpe Mayokani, Nkolo amonisaki moboko ya malongi na Ye:
“Mpo, tala, natindi bato banso bipai binso bayambola. …
“Mpo, botala, Nkolo, Mosikoli na bino anyokwamaki na liwa na nzoto; na yango, ayokaki mpasi ya bato nyonso, mpo ete bato nyonso bakoka koyambola mpe baya epai na ye.”
“Mpe asekwi uta na bakufi, ete akoka komema bato banso epai na ye, na masengeli ya boyamboli.”
“Mpe bokokumbamela mpe kosambela Tata na nkombo na ngai.
“… Bosengeli koyambola mpe kobatisama, na nkombo ya Yesu Klisto.”
“Senga Tata na nkombo na ngai na bondimi, kolikiaka ete okozwa, mpe okozwa Molimo Mosantu.”
“Mpe sikawa, sima bozwi oyo, bosengeli kobatela mibeko na ngai na makambo nyonso.”
Kozwa likolo na bino nkombo ya Klisto, mpe koloba bosolo na bososoli nyonso.
“Mpe lokola mingi bayamboli mpe babatisami na nkombo na ngai, oyo ezali Yesu Klisto, mpe bayiki mpiko kino na nsuka, lolenge moko bakobika.”
Na mwa makomi mike oyo, Mobikisi apesi biso ndakisa ebongi nie ya lolenge nini tosengeli koteya malongi na Ye. Malongi na ye ezali ete bondimi na Nkolo Yesu Klisto, koyambola, kobatisama, kozwa likabo ya Molimo Mosantu, mpe koyika mpiko kino na nsuka epambolaka bana nyonso ya Nzambe.
Ntango toteyi mabongisi oyo na baye tolingaka, Molimo Mosantu akosalisa biso koyeba bosolo. Lokola tozali na mposa ya botindiki ya Molimo Mosantu, tosengeli koboya makanisi to bolimboli ya moto oyo ememaka mosika ya mateya ya malongi ya solo.
Yango ekoki kozala mpasi mpo na kosala ntango olingaka moto oyo ozali koluka kozala na bopusi. Ye akoki kobwakisa malongi oyo eteyamaki. Ezali komeka kosala eloko moko ya sika to ya kokamwa. Kasi Molimo Mosantu akomonisa molimo ya bosolo kaka soki tozali kosala keba mpe kozala ekenge ya koleka te likolo ya mateya ya malongi ya solo. Moko ya banzela ya solo ya kokima kopusana pene ya malongi ya lokuta ezali ya kopona kozala sembo na mateya na biso. Bobateli ezwami na bopete, mpe esengi mingi te.
Koteya na bopete epesaka biso nzela ya kokabola malongi ya lobiko banda na ebandeli, wana bana bazali kosimbama te na masenginya ya mokosi oyo bakokutana na yango na nsima, ntango molai liboso ete solo oyo basengeli koyekola ebunga na makelele ya barezo socio, baninga, mpe mikakatano na bango moko. Tosengeli kosalela mabaku nyonso mpo na kokabola mateya ya Yesu Klisto elongo na bana. Bangonga ya mateya oyo ezali motuya mpe eyaka mbala moke ntango tokokanisaka yango na milende makasi ya banguna. Mpo na ngonga nyonso elekisami na kokotisa malongi na bomoi ya mwana, ezali na bangonga ebele ya botelemeli etondisami na bansango mpe bilili oyo ezali kotelemela to koboya babosolo wana ya kobikisa.
Basusu kati na bino bakoki komituna soki ekoki kozala malamu kopusa bana na bino penepene na bino na nzela ya lisano, to bokoki kotuna soki mwana akoki kobanda koyoka ete mateya na bino ezali kotungisa ye. Na esika na yango, tosengeli kokanisa, “Na ntango moke mpe mabaku mingi te, maloba nini ya malongi ekoki ngai kokabola oyo ekolendisa bango liboso ya mikakatano oyo ekoki koboyama te mpo na bondimi na bango?” Maloba bokaboli lelo ekoki kozala oyo bakobomba kati na bango, mpe lelo ekoleka noki.
Nasepelaka ntango nyonso na molende ya kokabola malongi ya Yesu Klisto ya nkoko na ngai ya mwasi Mary Bommeli. Libota na bango eteyamaki epai ya bamisionele na Suisse ntango azalaki na mibu 24.
Nsima ya kobatisama, Mary azalaki na mposa ya kosangana na Basantu na Amerika, na bongo alongwaki uta Suisse kino Berlin mpe azwaki mosala epai ya mwasi moko oyo azwaki ye na mosala mpo na kotonga bilamba mpo na bilamba ya libota. Mary azalaki kofanda na ndako ya basali mpe abandaki kosala mosala na ye ya kotonga na kati ya kisuku ya monene.
Na ntango wana, koteya malongi ya Eklezia ya Yesu Klisto ya Basantu ba Mikolo mya Nsuka na Berlin epesamaki nzela te na mibeko. Kasi Mary amonaki ete akokaki te koboya kokabola makambo oyo ayekolaki. Mwasi nkolo ndako mpe baninga na ye basanganaki nzinganzinga ya masini ya kotonga bilamba mpo na koyoka liteya ya Mary. Alobelaki limonisi ya Tata na Lola mpe Yesu Klisto na Joseph Smith, botali ya banzelu, mpe Buku ya Mormon. Kokanisaka masolo ya Alma, ateyaki etali malongi ya Bosekwi. Atatolaki ete mabota ekoki kosangana lisusu na bokonzi ya selesitiale.
Esengo ya Mary mpo na kokabola malongi ya nsango malamu ezongisami ekotisaki mobulu. Ewumelaki te yambo bapulusu bakotisa Mary na boloko. Na nzela, atunaki pulusu nkombo ya zuzi oyo asengelaki kosamba liboso na ye na ntongo elandi. Atunaki lisusu na ntina ya libota na ye mpe soki azalaki tata mpe mobali malamu. Pulusu alimbolaki ete zuzi azalaki moto ya mokili.
Kati na boloko, Mary asengaki kreyo mpe na mwa papye. Alekisaki butu mobimba kokomela zuzi mokanda, kokabolaka litatoli ya lisekwa ya Yesu Klisto lolenge elimbolami na Buku ya Mormon, kolobelaka mokili ya milimo, mpe kolimbolaka boyamboli. Asengaki ete zuzi asengeli azwa ntango ya kokanisa na ntina ya bomoi na ye liboso ye akata etumbu ya nsuka. Akomaki ete ayebi zuzi azalaki na mingi ya koyambola, mingi oyo ekopesa libota na ye mawa mpe ekomemela ye mawa monene. Na ntongo, ntango asilisaki mokanda na ye, apesaki yango epayi ya pulusu mpe asengaki ye apesa yango na zuzi, mpe ye andimaki akosala yango.
Na nsima, zuzi abengaki pulusu yango na bilo na ye. Mokanda Mary akomaki ezalaki elembo ekoki koboyama te ete azalaki koteya malongi ya nsango malamu ezongisami mpe kosalaka bongo, abukaki mobeko. Kasi, ewumelaki te yambo pulusu azonga na kisuku ya boloko ya Mary. Ayebisaki ye ete mikumba na ye nyonso elongwaki mpe azalaki na bonsomi ya kokende. Liteya na ye ya malongi ya nsango malamu ezongisami ya Yesu Klisto etindaki ye akota boloko. Mpe kosakola na ye ya malongi ya boyamboli epai ya zuzi ebimisaki ye libanda ya boloko.
Mateya ya Mary Bommeli esukaki te na bobimi na ye ya boloko. Lisolo ya maloba na ye ememaki malongi ya solo na bankola oyo ebotamaki naino te. Kondima na ye ete ata moto oyo abongwani sika akoki koteya malongi ya Yesu Klisto endimisaki ete bakitani na ye bakolendisama kati na bitumba na bango moko.
Ntango tozali kosala nyonso tokoki mpo na koteya baye tolingaka na ntina ya malongi ya Yesu Klisto, basusu bakoki koyanola naino te. Ntembe ekoki kokota na makanisi na bino. Okoki kotuna soki oyebi malongi ya Mobikisi malamu mpenza mpo na koteya yango malamu. Mpe soki osila komeka mbala na mbala koteya yango, okoki komituna mpo na nini matomba malamu na yango ezali komonana mingi te. Komitika te na bantembe. Bobaluka epai ya Nzambe mpo na lisungi.
“Iyo, nganga epai na Nzambe mpo na lisungi na yo nyonso; … tika ete mayoki ma motema mwa yo matiama likolo lya Nkolo libela.”
Mpe sikawa nalingi ete bozala basawa, mpe bayangelami mpe boboto; petepete mpo ya kozalana; botonda na bompikiliki mpe motema molai; kozalaka na montei o makambo manso; kozalaka na etingia na kabombaka mitindo mya Nzambe o ntango inso; kosengeke mpo ya biloko kani binso bozali na mposa, bya molimo mpe bya ntango; ntango inso kozongisaka matondi epai ya Nzambe mpo ya biloko kani binso bozwi.”
Soki osambeli, soki osololi na Nzambe, mpe soki obondeli mpo na lisungi na Ye mpo na balingami na yo, mpe soki otondi Ye kaka mpo na lisungi te kasi mpo na motema molai mpe boboto oyo euti na kozanga kozwa mbala moko nyonso ozali na yango mposa na yango to mbala mosusu ata mokolo moko te, boye nazali kolaka yo ete okopusana penepene na Ye. Tokokoma na etingia mpe motema molai. Mpe na nsima okoki koyeba ete osali nyonso oyo okoki mpo na kosalisa bato oyo olingaka mpe baoyo ozali kosambela mpo ete batambola na komekama ya Satana mpo na kolongola bango na nzela.
“Kasi baoyo batalelaka Nkolo bakozongisa makasi na bango sika; bakopumbwa likolo na mapapu lokola mpongo; bakopota mbango nde bakolemba te; mpe bakotambola, nde bakosenzwa te.”
Bokoki kozwa elikya na makomi ya mabota. Totangi na ntina ya baoyo babalukaki mosika na oyo bateyamaki to oyo bazalaki kobunda na Nzambe mpo na bolimbisi, lokola Alma Elenge, bana mibali ya Mosiya, mpe Enosi. Na bantango na bango ya mpasi, bamikundolaki maloba ya baboti na bango, maloba ya malongi ya Yesu Klisto. Komikundola ebikisi bango. Mateya na bino ya malongi ya bule ekokundolama.
Natatoli mosala ya bule ya koteya bana ya Tata na Lola malongi ya pete ya Yesu Klisto, oyo epesi biso nzela ya kopetolama na molimo mpe na nsuka koyambama na miso ya Nzambe, mpo na kofanda elongo na Ye mpe Mwana na Ye na nkembo libela na mabota. Na nkombo ya Yesu Klisto, amene.