Makomi ya Bule—Miboko ya Bondimi
Tokoki te kolekisa ntina ya makomi ya bule nyonso mibale na mbongwana mpe na kotikala sembo na nsango malamu.
Mwasi na ngai, Mary, mpe ngai kala mingi te tomonaki Polo moko na foto ya buku mpe nsango moko na liboso bakoma, “Mikanda: Apareyi ya ebandeli ya kosimba na loboko.”
Nakanisaki na ntina ya nsango oyo ya motuya mpe lolenge nini bapareyi ya maboko ya ntina ya ndenge na ndenge nyonso ekomi lelo. Ntango nakanisaki lisusu, nasosolaki ete apareyi to esalelo moko te ezali na mayele ya kosala ekozala ata moke te na ntina to na motuya lokola bokambi ya molimo oyo ewutaka na emoniseli ya bonzambe.
Ezala ya maboko to ya dijitale, Biblia Esantu mpe Buku ya Mormon: Litatoli Mosusu ya Yesu Klisto epesaka bokambi mpe mateya ya molimo uta na Yesu Klisto, Mobikisi ya mokili. Tozali kopesa motuya mingi na mikanda oyo mpo na mokumba na yango ya mozindo na nkoma ya bokambi ya Nzambe epayi ya baprofeta mpe bato ya kala mpe bokambi oyo epesaka mpo na bomoi na biso moko.
Esangisi na mateya ya baprofeta ya bomoi, makomi oyo ya bule epesaka bokambi ya malongi mpo na biso na mokili ya lelo. Makomi oyo ezali na nguya mingi koleka ntango ezali kopesa malako, bosemboli, bolendisi, mpe libondi na bato mpe mabota oyo ezali koluka bokambi uta na Nkolo.
Makomi, esangana na bofuli ya molimo uta na Molimo Mosantu, ezali kokoba kozala liziba ya yambo oyo ezali kopesa nzela na mbongwana ya baye bazali na mitema ebukana mpe milimo ya mawa mpe mposa ya kolanda Yesu Klisto. Makomi esalisaka kotonga moboko oyo ekoki kotelemela bokasi nyonso ya monguna mpo na kobebisa bondimi.
Babongwami ya sika bapambolamaki mpe bazalaki makila ya bomoi ya Eklezia na lisolo na yango mobimba. Ndakisa moko ezali mpenza na motuya mingi mpo na ngai. Ntango nazalaki elenge episikopo, bandeko basi mibale bamisionele ya kokamwa bazalaki koteya libota ya William Edward Mussman. Tata yango, avoka oyo azalaki na makoki mingi, azalaki avoka monene ya kompanyi moko monene. Mwasi na ye ya sembo, Janet, azalaki kosalisa libota esala makasi mpo na kobika bomoi lokola Klisto.
Mwana na bango ya mobali mpe ya mwasi ya kokamwa, bango mibale na ebandeli ya mibu 20, bazalaki mpe koteyama. Bango nyonso minei bateyamaki mpe bazalaki kokende eklezia. Bandeko basi bamisionele babetaki nsete likolo ya kotanga Buku ya Mormon mpe kosambela mpo na litatoli ya makomi wana ya bule. Likambo ya kokamwa, na nzela ya losambo libota etangaki Buku ya Mormon mobimba na ntango mokuse.
Bamisionele ya likonzi, oyo bango mibale bazalaki liboso bakambi ya Lingomba ya Bamama Basungi ya palwasi, bazalaki kokende elongo na bango na makita ya elambo.
Ntango libota ekomaki pene ya kozwa libatisi, bazwaki ebele ya mikanda oyo ezalaki kotyola Eklezia. Yango ezalaki liboso ya interneti, kasi bisalelo yango etondaki na sanduku moko monene.
Bandeko basi bamisionele babengisaki ngai lokola episikopo ya mibu 34 oyo abengamaki kala mingi te mpo na kosunga koyanola na mituna oyo etunamaki. Ntango tosanganaki na kisuku na bango, sanduku monene ya babuku oyo ezalaki kotyola Eklezia ezalaki na katikati ya ndako. Napusanaki na losambo na etinda oyo. Na ntango ya losambo ya bofungoli, Molimo alobelaki ngai na mongongo ya nse, “Ayebi yango ete ezali solo.” Yango ezalaki ntina mpenza. Bandeko basi bandimaki ete bato mosusu ya libota basilaki kozala na litatoli. Bazalaki na mua ntembe mpo na tata yango.
Nayebisaki ye mbala moko ete Molimo atindaki ngai ete asilaki kozala na litatoli. “Ezalaki ya solo?” Atalaki ngai na bokebi mpe alobaki ete Molimo andimisaki bosolo ya Buku ya Mormon mpe ya Eklezia epayi na ye.
Na nsima natunaki soki ekozala na ntina kotanga mikanda wana, soki basilaki kozwa kondimisa ya molimo.
Tata ayanolaki ete ekozala na ntina te. Bato mosusu ya libota bandimaki eyano na ye.
Alobaki ete azalaki mpenza na motuna moko ya ntina: Ntina moko oyo bazwaki mikanda mingi oyo ezalaki kotemela Eklezia ezalaki ete bazalaki bandimi ya eyamba mosusu. Na kobakisa, alakaki elaka monene ya kosalisa na kotonga ndako-nzambe ya sika mpo na eyamba wana. Ayebisaki ngai ete bandeko basi bamisionele bateyaki ye etali ntina ya moko na zomi, oyo andimaki na botondi, kasi amitunaki soki ekozala mabe kokokisa mpe elaka oyo asalaki liboso. Nandimisaki ye ete kofuta elaka ekozala na lokumu mpe ekozala malamu.
Ba Mussman na mwana na bango ya mobali, bokilo na bango ya mwasi, mpe mwana na bango ya mwasi.
Libota mobimba ebatisamaki. Mobu moko nsima bakangisamaki lokola libota na Tempelo ya Oakland California. Nazwaki libaku malamu ya kozala wana. Mwana mobali asilisaki kelasi ya mibeko, alekisaki Ekzame ya Avoka ya Californie, mpe mbala moko asalaki misio ya sembo na Japon. Natalaki na mibu ntango bankola elekaki batikalaki sembo na nsango malamu. Nazwaki libaku malamu ya kosala molulu ya bokangisi ya mwana moko ya bana ya basi.
Mbongwana oyo ezali kosalama na mikolo na biso ezali mpe ya kokamwa ndenge moko. Na Sanza ya motoba eleki Molakisi Andy Reid, molakisi-mokambi ya ndembo ya Kansas City Chiefs, mpe ngai, elongo na basusu oyo bamonisaki eyamba na biso mpe biyamba misusu, tolobaki na molulu ya mangomba mingi na Eklezia ya Riverside na engumba New York. Molakisi Reid abetaki nsete na mabaku malamu ya mibale mpe koyanola na mabengisi mpe mabaku, oyo ezali oyo nsango malamu ya Yesu Klisto ezali kolobela. Na ntongo elandi, elongo na basi na biso, Tammy Reid mpe Mary, tokendeki na likita ya elambo na Palwasi ya Mibale ya Manhattan. Ezalaki mosala ya molimo. Ezalaki na babongwani sika ebele na lingomba. Bandimi mitano oyo babatisamaki kala te, mibali minei mpe elenge mobali moko, bazalaki elongo na bandimi ya Bonganganzambe ya Alona oyo bazalaki kokabola elambo. Nazali na esengo ya koyebisa ete boyei ya ndenge moko ya bandimi ya sika ezali kosalema na Eklezia mobimba.
Tozali na botondi mpo na bokoli ya komonana ya baoyo bazali koyanola na mabiangi ya bule, babongoli bomoi na bango, mpe bandimaka libaku ya kolanda Yesu Klisto. Bakotaka na nzela ya liyokani na nzela ya bondimi, boyamboli, libatisi, mpe bondimi lokola eteyami na Biblia Esantu mpe na Buku ya Mormon.
Tokoki te kolekisa ntina ya makomi ya bule nyonso mibale na mbongwana mpe na kotikala sembo na nsango malamu. Baprofeta ya kala oyo balobelami na Buku ya Mormon bayebaki ntina ya etinda ya Yesu Klisto mpe bateyaki nsango malamu na Ye. Buku ya Mormon ememaka biso pene ya Nzambe ntango toyekolaka, tososolaka, mpe tosalelaka mateya na yango. Profeta Joseph Smith ateyaki ete “Mobali [to mwasi] akopusana pene ya Nzambe na kotosaka mibeko ya [buku], koleka buku mosusu.”
Mpo na koyeba ete Buku ya Mormon ezali liloba ya Nzambe, tosengeli kotanga yango, komanyola, mpe kosambela na ntina na yango mpe nsima kosala engebene na mibeko na yango. Profeta Moroni alakaki ete Nzambe akobimisa bosolo ya buku epayi na biso ntango tosambeli na motema moko, na likanisi ya sembo, mpe na bondimi na Klisto. Koyekola Buku ya Mormon ezali ntina mpo na koyika mpiko na mbongwana.
Ntango tozali komekola boyokani kati na Biblia mpe Buku ya Mormon lokola bapareyi ya maboko, moto moko akoki kotuna motuna. Okanisi ete mikanda mibale ekozala na ntina mpe ya kokokisa soki Nkolo asakolaki ete ekosangana mpe “ekokoma moko na loboko na yo”? Wana ezali oyo Nkolo asakolaki etali “lingenda ya Yuda,” Biblia, mpe “lingenda ya Yosefe,” Buku ya Mormon.
Na makambo mingi ya ntina, Buku ya Mormon epesi malongi ya moboko oyo ezali kotombola mpe kotonga likolo ya Biblia. Liteya ya Bomikabi ya Yesu Klisto ezali ndakisa moko ya mozindo.
Biblia epesaka lisolo ya sikisiki ya mosala ya kufa ya Yesu Klisto, bakisa mpe liwa mpe Lisekwa na Ye. Buku ya Mormon ezali polele mingi na ntina ya Bomikabi ya Yesu Klisto, likambo oyo baprofeta balimbolaki na bozindo yambo ya liwa na Ye.
Moto ya likambo na Alma mokapo 42 elakisi ntina ya malongi ya Bomikabi ya Yesu Klisto.
Etangami: “Bokufi bozali ntango ya momekano mpo ya kokokisa moto koyambola mpe kosalela Nzambe—Bokwei bwa Adama bomemeki liwa lya ntango mpe lya molimo likolo lya bato banso—Bosikoli bokoya o nzela ya boyamboli—Nzambe Yemei atumbolami mpo ya masumu ma mokili—Ngolu ezali mpo ya bango baye bayamboli—Banso basusu bayangelami na boyengebene bwa Nzambe—Ngolu ekoya na ntina ya Botumbolami—Bobele bayamboli ba solo bakobikisama.”
Mokambi Russell M. Nelson alobaki, “Nalaki ete ntango bozali koyekola na losambo Buku ya Mormon mikolo nyonso, bokozwa mikano ya malamu koleka—mikolo nyonso.” Alaki lisusu ete soki “bozali komizindisa bino moko mikolo nyonso na kati ya Buku ya Mormon bokoki komibatelema na mabe ya mokolo.”
Lokola nalobaki yango, nasepelaki mingi na likanisi ya liboso ya apareyi ya maboko—buku. Kasi, nayebi ntina ya kokamwa ya interneti na mokili lelo oyo. Apareyi oyo tosimbaka na loboko na mikolo na biso ekoki kopesa bansango oyo etondisaki ndako ya mikanda na kala. Tozali na botondi mingi ya kobika na eleko lokola oyo. Nazali na botondi mingi mingi ete epesaka nzela na mikanda ya bule mpe bisalelo ya Eklezia ezala na nzela ya dijitale. interneti ezali esalelo ya nguya mpo na boyekoli nsango malamu. Lelo oyo, bato mingi bakabolaka makomi elongo na baninga na nzela ya tekinoloji. Aplikasio ya Buku ya Mormon, ndakisa, ezali lolenge ya malamu ya kolakisa baninga Buku ya Mormon mpe ekoki kokabolama na pete na banzela ya momesano mpe na bisika nyonso oyo bokoki kozala.
Atako interneti epesaka mapamboli mingi, na mawa, lokola mikanda ekomami oyo ezali kotyola Eklezia nalimbolaki liboso, esalelami mpe mpo na kokela ntembe mpe kobebisa bondimi na mabongi ya nsango malamu ya motuya. Ekoki kozala eteni ya “mabe ya mokolo” oyo Mokambi Nelson alobelaki.
Monguna mpe baoyo basalisaka ye, na boyebi to na kozanga koyeba, basalaki na interneti oyo ekokani na sanduku oyo etondi na makambo makomami oyo ezali kotyola Eklezia oyo nalimbolaki liboso, na mokano ya kobenda bino mosika na bosolo ya Nzambe.
Makambo oyo ebimaki mpo na kobimisa ntembe na bowumeli ya mibu ekokani na ndenge ya kokamwa. Yango ezali mpenza solo soki tokokanisi mokolo na biso na bamibu ya 1960, ntango nazalaki na mibu 20.
Makomi eteyaka biso tosalela bosambisi mpe tozala na bwanya na makambo nyonso. Interneti ekoki kosalelama na ndenge ya malamu to na ndenge ya kobebisa.
Ezala bandimi ya ntango molai mpe baye bayekolaka sika nsango malamu basengeli kozala na ekenge na ntina ya oyo batalaka. Kosepela te na makambo ya mbindo, ya kozanga lokumu, to ya kozanga bosembo. Soki osali bongo, mibeko ya bosaleli ekoki komema yo na nzela oyo ebebisaka kondima mpe ebebisaka bokoli na yo ya seko. Bakoki kosala yo makambo ya malamu to ya mabe. Boluka bosembo mpe bokima mabulu ya molili ya mbindo ya interneti mpe kolekisaka ntango na apareyi Botondisa bomoi na bino na makanisi ya malamu; ya sembo, bozala na esengo; bosepela kasi bokima bozoba. Bokeseni ezali. Eteni ya bondimi ya 13 ezali bokambi malamu. Likolo ya nyonso, bomizindisa mbala na mbala na Buku ya Mormon, oyo ekobenda Molimo kati na bomoi na bino mpe ekosalisa bino bososola bosolo uta mabunga.
Toli na ngai mpo na baoyo bapengwi na lolenge moko to mosusu uta na nzela ya boyokani ezali ya kozonga na makomi ya bule, bokambi ya boprofeta, kokumisa lingomba na ndako, mpe miziki ya bondimi. Molimo nyonso ezali na ntalo mingi epayi ya Nkolo. Tosengeli na bino! Nkolo azali na mposa na bino, mpe bozali na mposa na Ye! Bokoyambama malamu ntango nyonso. Na bowumeli ya mibu mingi na ngai ya mosala ya Eklezia, nasepelaki na bato ya kokamwa oyo bazongaki na nzela ya boyokani mpe nsima basalelaki mpe bapambolaki moto nyonso oyo bango balingaki to oyo bakutanaki na ye.
Makomi ya bule mpe baprofeta ya bomoi ezali lolenge monene Tata ya Lola ya bolingo asalaka ete mwango na Ye ya esengo ezala na bana na Ye nyonso.
Napesi litatoli na ngai ya solo ya bonzambe ya Yesu Klisto mpe bosolo ya Bomikabi na Ye, na nkombo ya Yesu Klisto, amene.