Boleisa Misisa, mpe Bitape Ekokola
Bitape ya litatoli na bino ekokoma makasi uta na bondimi na bino ya mozindo na Tata na Lola mpe Mwana na Ye ya Bolingo.
Ndakonzambe ya Kala na Zwickau
Mobu 2024 ezali mobu moko ya ntina mingi mpo na ngai. Ekokisi mibu 75 uta nabatisamaki mpe nakotisamaki lokola mondimi ya Eklezia ya Yesu Klisto ya Basantu ba Mikolo mya Nsuka na Zwickau, Allemagne.
Kimondimii na ngai na Eklezia ya Yesu Klisto ezali na motuya mpo na ngai. Kotangama kati na bato ya boyokani ya Nzambe, elongo na bino, bandeko na ngai, ezali moko ya lokumu monene ya bomoi na ngai
Ntango nakanisaka na ntina ya mobembo na ngai moko ya bozali moyekoli, makanisi na ngai mbala mingi ezongaka nsima na ndako moko ya kala na Zwickau, epayi wapi nazalaki kosepelaki mingi na makundoli ya kokende na makita ya elambo ya Eklezia ya Yesu Klisto lokola mwana moke. Ezali kuna nde nkona ya litatoli na ngai ezwaki bilei na yango ya liboso.
Ndakonzambe oyo ezalaki na lindanda moko ya kala oyo ezalaki kotambwisama na mopepe. Mikolo nyonso ya eyenga elenge mobali moko azalaki na mokumba ya kotindika likolo mpe na nse pedale ya makasi oyo ezalaki kopesa mopepe mpo lindanda esala. Ntango mosusu nazalaki na libaku monene ya kosalisa na mosala wana ya motuya mingi
Ntango lisanga ezalaki koyemba nzembo na biso oyo tolingaki mingi, nazalaki kopusa na makasi na ngai nyonso mpo mopepe esila te na lindanda. Uta na kiti ya mofuli mopepe, nazalaki na botali monene ya mwa maninisa ya kokamwa ya bitalatala, moko ezalaki kolakisa Mobikisi Yesu Klisto mpe mosusu kolakisaka Joseph Smith na Zamba ya Bule.
Nakoki kino sikawa komikundola mayoki ya bule nazalaki na yango ntango natalaki maninisa wana oyo engengisamaki na moyi ntango nazalaki koyoka matatoli ya Basantu mpe koyemba nzembo ya Siona.
Na esika wana esantu, Molimo ya Nzambe atatolaki na makanisi mpe motema na ngai ete ezalaki ya solo: Yesu Klisto azali Mobikisi ya mokili. Oyo ezali Eklezia na Ye. Profeta Joseph Smith amonaki Nzambe Tata mpe Yesu Klisto mpe ayokaki mingongo na Bango.
Na ebandeli ya mobu oyo, ntango nazalaki na mosala na Poto, nazwaki libaku ya kozonga na Zwickau. Likambo ya mawa, ndakonzambe wana ya kala oyo tolingaki mingi ezalaka lisusu te. Babukaki yango mibu eleki mingi mpo na kotonga ndako monene ya kofanda.
Nini Ezali Seko, mpe Nini Ezali Seko Te?
Nandimi ete ezali mawa koyeba ete ndako oyo tolingaki uta bomwana na ngai ezali sikawa kaka bokundoli. Ezalaki etonga moko ya bule mpo na ngai. Kasi ezalaki kaka etonga.
Na bokeseni, litatoli ya molimo nazwaki uta na Molimo Mosantu mibu mingi wana eleki, ekufi te. Na bongo, yango ekoli makasi. Makambo nayekolaki na bolenge na ngai oyo etali moboko ya mibeko ya nsango malamu ya Yesu Klisto ezali moboko makasi na bomoi na ngai mobimba. Bokangani ya boyokani oyo nasalaki elongo na Tata na ngai na Lola mpe Mwana na Ye ya Bolingo etikalaki elongo na ngai—ntango molayi nsima ya kobukama ya ndakonzambe ya Zwickau mpe maninisa ya bitalatala ebungaki.
“Likolo mpe mabele ekoleka,” Yesu alobaki, “kasi maloba na ngai ekoleka te.”
“Bangomba ikokende, mpe ngomba patatalu ikolongwa; kasi boboto bwa ngai bokokende te uta na yo; mpe boyokani bwa kimia bwa ngai bokolongolama te, elobi Nkolo.”
Moko ya makambo ya motuya mingi koleka tokoki koyekola na bomoi oyo ezali bokeseni ya oyo ezali seko mpe oyo ezali seko te. Soki tososoli yango, makambo nyonso ebongwanaka —boyokani na biso, maponi tosalaka, lolenge tosalelaka bato.
Koyeba nini ezali ya seko mpe oyo ezali seko te ezali fungola mpo na kokolisa litatoli ya Yesu Klisto mpe ya Eklezia na Ye.
Kokanisa te ete Bitape ezali Misisa
Nsango malamu ezongisama ya Yesu Klisto, lokola Profeta Joseph Smith ateyaki, “eyamba[ka] nyonso, mpe eloko nyonso ya bosolo.” Kasi yango elingi koloba te ete solo nyonso ezali na motuya ndenge moko. Bosolo mosusu ezalaka moboko, ntina, na mosisa ya bondimi na biso. Misusu ezalaka bidiembeli to bitape—ya motuya, kasi kaka ntango ekangami na makambo ya moboko.
Profeta Joseph Smith alobaki lisusu, “Mabongisi ya ntina ya eyamba na biso ezalaki litatoli ya Bapostolo mpe Baprofeta, mpo na oyo etali Yesu Klisto, ete Ye akufaki, akundamaki, mpe asekwaki mokolo ya misato, mpe amataki na lola; mpe makambo manso oyo etali eyamba na biso ezali kaka eteni ya ndako se moko na yango.”
Na maloba mosusu, Yesu Klisto mpe mbeka na Ye ya bomikabi ezali mosisa ya litatoli na biso. Biloko mosusu nyonso ezali bitape.
Yango elingi koloba te ete bitape ezali motuya te. Nzete esengeli na bitape. Kasi lokola Mobikisi ayebisaki bayekoli na Ye, “Etape ekoki te kobota mbuma na ndenge na yango moko, esengeli ezala ya kokangama na nzete.” Kozanga mokangano na Mobikisi, na bilei oyo ezwami na misisa, etape ekawukaka mpe ekufaka.
Ntango etali mpo na koleisa matatoli na biso ya Yesu Klisto, namitunaka soki ntango mosusu tokanisaka bitape ezali misisa. Yango ezalaki libunga oyo Yesu amonaki epayi ya Bafalisai ya ntango na Ye. Batyaki bokebi mingi na makambo ya mwa mikemike ya mobeko ete basukaki na koboya oyo Mobikisi abengaki “makambo ya kilo”—mabongisi ya moboko lokola “bosembo mpe ngolu mpe bondimi.”
Soki olingi koleisa nzete, osopaka mayi na bitape te. Osopaka mayi na misisa. Ndenge moko mpe, soki olingi ete bitape ya litatoli na yo ekola mpe ebota mbuma, leisa misisa. Soki ozali na ntembe na ntina ya liteya to momesano moko boye to eloko moko ya lisolo ya Eklezia, luka pole na bondimi na Yesu Klisto. Luka ososola mbeka na Ye mpo na yo, bolingo na Ye mpo na yo, bolingi na Ye mpo na yo. Bolanda Ye na komikitisa. Bitape ya litatoli na bino ekokoma makasi uta na bondimi na bino ya mozindo na Tata na Lola mpe Mwana na Ye ya Bolingo.
Ndakisa, soki olingi litatoli ya makasi koleka ya Buku ya Mormon, tya likebi na litatoli na yango ya Yesu Klisto. Tala lolenge Buku ya Mormon etatoli Ye, nini eteyi na ntina na Ye, mpe boniboni ebengisaka mpe efulaka bino mpo na koya epayi na Ye.
Soki ozali koluka boyebi ya ntina mingi na makita ya Eklezia to na tempelo, meka koluka Mobikisi na makuli ya bule oyo tozwaka kuna. Luka Nkolo na ndako na Ye ya bule.
Soki mokolo moko oyoki bozito to kozindisama na libiangi na yo ya Eklezia, meka kozongisa makanisi na yo na mosala na yo na Yesu Klisto. Sala yango emoniseli ya bolingo na yo mpo na Ye.
Leisa Misisa, mpe bitape ekokola. Mpe na ntango esengeli, ekobota mbuma.
Pika misisa mpe Tongama kati na Ye
Kondima makasi kati na Yesu Klisto esalemaka butubutu te. Te, na mokili oyo ya kufa, yango ezali nzube mpe nsende ya ntembe nde ekolaka yango moko. Nzete ya kondima oyo ezali na nzoto kolongono, oyo ebotaka mbuma esengaka bokasi ya bolandeli. Mpe eteni ya ntina ya bokasi wana esalaka ete tozwa misisa makasi kati na Klisto.
Ndakisa: Na ebandeli, tokoki kongama na nsango malamu mpe Eklezia ya Mobikisi mpo ete tosepelaka na bandeko-baninga to na episkopo ya boboto to na botali ya peto ya ndakonzambe. Makambo oyo ezali mpenza motuya mpo na kokola Eklezia.
Atako bongo, soki misisa ya litatoli na biso ezali kokola atako moke te na mozindo koleka wana, nini ekosalama ntango tokokende na palwasi oyo ezali ndako ya kokamwa mingi te, elongo na bandimi oyo bazali na boninga mpenza te, mpe episikopo alobi likambo moko oyo ezali kotuka biso?
Ndakisa mosusu: Emonani te lokola ntina kolikya ete soki tobateli mitindo mpe tokangami na tempelo, tokopambolama na libota monene, ya esengo na bana ya kongenga, ya botosi, oyo banso batikali na mosala na Eklezia, basalaka misio, koyemba na korale ya palwasi, mpe kosala na kozanga lifuti mpo na kosalisa kosukola ndako ya makita mikolo nyonso ya poso na ntongo?
Nazali solo kolikya ete biso nyonso tokomona yango na bomoi na biso. Kasi nini soki esalami te? Tokotikala ya kokangama na Mobikisi kozanga kotala bozwi—kolikya na Ye mpe kozela ntango na Ye?
Tosengeli komituna: Litatoli na ngai etongami likolo na oyo nazali kolikya ete ekosalama na bomoi na ngai? Etaleli misala to bizaleli ya bato mosusu? To etongami makasi likolo ya Yesu Klisto, epikami misisa mpe etongami likolo na ye,” atako makambo ya bomoi oyo ezali kobongwana?
Bonkoko, Mimesano, mpe Bondimi
Buku ya Mormon elobeli bato oyo “bazalaki makasi na kotosa makuli ya Nzambe.” Kasi na nsima moto moko ya ntembe na nkombo Koliyolo ayaki, kotyola nsango malamu ya Mobikisi, kobenga yango “bozoba” mpe “bonkoko ya bozoba ya batata na bango.” Korihor akambaki “mosika mitema ya bato mingi, kotindaka bango batombola mito na bango na nkanda na bango.” Kasi basusu akokaki kokosa te, mpo na bango, nsango malamu ya Yesu Klisto ezalaki mingi koleka bonkoko.
Kondima ezali makasi ntango ezali na misisa ya mozindo na mayele ya moto ye moko, bomipesi ya moto ye moko epayi ya Yesu Klisto, nsomi na oyo bonkoko na biso ezali to nini basusu bakoki koloba to kosala.
Litatoli na biso ekosenginyama mpe ekomekama. Bondimi ezali bondimi te soki emekama naino te. Bondimi ezali bondimi te soki batelemela yango naino te. Na yango, kozanga elikya te soki ozali na mimekano na bondimi to mituna oyo ezwami biyano te.
Tosengeli te kozela kososola makambo nyonso yambo tosala likambo. Wna ezali bondimi te. Lokola Alma ateyaki, “Bondimi ezali te kozala na boyebi ya kokoka ya makambo.” Soki tozelaka kosala kino mituna na biso nyonso ekozwa biyano, tokataka ndelo mpenza na bolamu oyo tokoki kokokisa, mpe tokataka ndelo na nguya ya bondimi na biso.
Bondimi ezalaka kitoko mpo ete ewumelaka atako ntango mapamboli eyaka te ndenge tozalaki kolikya. Tokoki komona mikolo mizali koya te, toyebi biyano nyonso te, kasi tokoki kondimela Yesu Klisto ntango tozali kokoba kokende liboso mpe likolo mpo ete Ye azali Mobikisi mpe Mosikoli na biso.
Bondimi etelemelaka mimekano mpe bozangi bondimi ya bomoi mpo ekangami makasi na Klisto mpe na malongi na Ye. Yesu Klisto,mpe Tata na biso na Lola oyo atindaki Ye, elongo basalaka eloko moko ya koboya te, ya kotiela motema mpenza ya elikya na biso.
Litatoli ezali eloko te oyo okotonga mbala moko mpe etelemi libela. Ezali mingi lokola nzete oyo oleisaka ntango nyonso. Kolona liloba ya Nzambe na motema na yo ezali kaka litambe ya liboso. Ntango litatoli na yo ebandi kokola, nde mosala ya solo ebandi! Yango ezali ntango “oleisaka yango na bokebi mpenza, ete ezwa misisa, ete ekola, mpe ebota mbuma.” Esengaka “molende makasi” mpe “bompikiliki na liloba.” Kasi bilaka ya Nkolo ezalaka solo: “Bokobuka mbano ya bondimi bwa bino, mpe etingia ya bino, mpe bompikiliki, mpe motema molai, kozelaka nzete epesa mbuma epayi na bino.”
Bandeko ba bolingo, baninga na ngai ba bolingo, ezali na eteni moko ya ngai oyo ezangi ndakonzambe ya kala ya Zwickau mpe maninisa na yango ya bitalatala ya bilembo ya mbindo. Kasi na mibu 75 eleki, Yesu Klisto akambaki ngai na mobembo na bomoi oyo ezali na mimekano mingi koleka ndenge nakokaki kokanisa. Abondisaka ngai na bampasi na ngai, asalisaka ngai nayeba botawu na ngai, abikisaka bampota na ngai ya molimo, mpe aleisakaka ngai na bondimi na ngai oyo ezali kokola.
Ezali losambo mpe lipamboli na ngai ya solo ete tokoleisa ntango nyonso misisa ya bondimi na biso na Mobikisi, na mateya na Ye, mpe na Eklezia na Ye. Nayango Natatoli na nkombo mosantu ya Mobikisi na biiso, Mosikoli na biso, Nkolo a biso—na nkombo ya Yesu Klisto, amene.