Botalela Yesu Klisto mpe Nsango Malamu na Ye
Ntango tozali koboya makambo oyo ezali kopengwisa bokebi ya mokili mpe totaleli Klisto mpe nsango malamu na Ye, tozali na ndanga ya elonga.
Na 1996, ekipi ya ndembo ya mibali ya Nigeria elongaki wolo na masano ya Olimpiki oyo esalemaki na Atlanta, na Georgie, na Etazini. Ntango lisano ya nsuka esilaki, bato ya esengo mingi basopanaki na babalabala ya bingumba nyonso mpe ya bituka nyonso ya Nigeria; mboka oyo ya bato milio 200 ebongwanaki mbala moko na feti monene na ngonga ya mibale ya ntongo! Ezalaki na bosepeli, esengo, mpe nsai makasi bisika nyonso ntango bato bazalaki kolia, koyemba, mpe kobina. Na ngonga wana, ekolo Nigeria ezalaki na bomoko mpe moto nyonso azalaki kosepela kozalaka moto ya Nigeria.
Liboso ya lisano yango, ekipi ya Olimpiki ekutanaki na mikakatano mingi. Ntango lisano yango ebandaki, lisungi na bango ya mosolo esilaki. Ekipi yango ezalaki kozanga bisalelo elongobana, bisika ya kosala ngalasisi, bilei, to bisika ya kosukola bilamba.
Jerome Prevost/Getty Images
Na ntango moko, balingaki kolongola bango na lisano, kasi ekipi ya Nigeria elongaki liboso ya mikakatano nyonso. Ntango ya motuya oyo ebongolaki ndenge bazalaki komimona. Na elikia ya sika, mpe na mosala makasi ya moto na moto mpe ya ekipi mpe ekateli ya na bango, na bomoko baboyaki bokebi ya kobulunganisa mpe batyaki makanisi na bango na kolonga. Botaleli oyo elongisaki bango bamedayi ya wolo, mpe bato ya Nigeria bapesaki bango nkombo ya “Ekipi ya Ndoto.” Ekipi ya Ndoto ya Olimpiki ya 1996, ezali kokoba kolobelama na masano ya Nigeria.
David Cannon/Allsport/Getty Images
Ntango kaka ekipi ya mibali ya Nigeria ya ndembo ya makolo eyekolaki kobosana makambo mingi oyo ezalaki kopengwisa bokebi na bango mpe kotalela mokano na bango, balongaki koleka oyo bakanisaki mpe bazwaki esengo makasi. (Lokola mpe biso nyonso na Nigeria!)
Na lolenge moko, ntango tozali koboya makambo ya mokili mpe totaleli Yesu Klisto mpe nsango malamu na Ye, tozali na ndanga ya elonga koleka oyo tokoki kokanisa mobimba mpe koyoka esengo makasi. Mokambi Russell M. Nelson ateyaki: “Ntango likambo ya ntina ya bomoyi na biso ezali na … Yesu Klisto mpe nsango malamu na Ye, tokoki koyoka esengo kozanga kotala nini ezali kosalema—to ezali kosalama te—na bomoyi na biso.”
Nasambeli ete Molimo Mosantu akosalisa moko na moko na biso atosa libiangi ya Mokambi Nelson mpo na kotalela “Yesu Klisto mpe nsango malamu na Ye” mpo ete tokoka kozwa esengo na Klisto “kozanga kotala nini ezali kosalama—to ezali kosalama te—na bomoyi na biso.
Masolo mingi na Buku ya Mormon ya bato oyo babongolaki bomoyi na bango na kotiaka bokebi na Yesu Klisto mpe na nsango malamu na Ye.
Banza Alma ya Elenge Atombokelaki mpe abundisaki Eklezia. Tata na ye, Alma, asambelaki mpe akilaki bilei. Anzelu moko abimaki mpe abengaki Alma Elenge mpo na koyambola. Na ntango wana, Alma abandaki konyokwama “bampasi ya molimo elakelama mabe.” Na bangonga ya molili makasi, amikundolaki tata na ye koteyaka ete Klisto asengelaki koya komikaba mpo na masumu ya mokili. Ndenge makanisi na ye ekangamaki na likanisi oy, abondelaki Nzambe mpo na ayokela ye mawa. Esengo ezalaki eyano, esengo oyo alobelaki lokola ya kitoko mpenza! Ngolu mpe esengo eyaki epayi ya Alma mpo ete ye mpe tata na ye batyaki makanisi na bango epai ya Mobikisi.
Mpo na baboti oyo bazali na bana oyo babunga nzela, bozala mitema makasi! Na esika ya komituna mpo na nini anzelu ayei te mpo na kosalisa mwana na yo ayambola, yeba ete Nkolo atie anzelu moko ya nkufa na nzela na ye: episikopo to bakambi to mosalisi moko ya mobali to ya mwasi. Soki ozali kokoba kokila bilei mpe kosambela, soki otie manaka te to mokolo ya nsuka mpo na Nzambe, mpe soki otie motema ete Ye azali kosembola loboko na Ye mpo na kosunga, boye—noki to nsima—okokuta Nzambe asimbi motema ya mwana na yo ntango mwana na yo aponi koyoka. Yango ezali bongo mpo ete Klisto azali esengo—Klisto azali elikya; Azali elaka “ya makambo malamu oyo ekoya.” Na yango, tia motema na Yesu Klisto elongo na mwana na yo, mpo Azali makasi ya moboti nyonso, mpe mwana nyonso.
Ntango kaka akutanaki na esengo na Klisto, Alma ya Leki abikaki na esengo wana. Kasi lolenge nini abatelaki esengo yango ata kati na mikakatano mpe komekama? Alobi boye:
“Mpe uta na ntango wana kino sikawa, nasalaki mosala makasi kozanga kotika [mpo na] komema milimo na boyamboli; ete nakoka komema bango mpo ya komeka esengo eleki ndelo oyo namekaki. …
“… Mpe … Nkolo apesi ngai esengo monene mpenza na mbuma ya misala na ngai. …
“Mpe nasungami na nse ya mimekano mpe mikakatano ya lolenge nyonso.”
Esengo kati na Klisto ebandaki mpo na Alma ntango asalelaki bondimi na Ye mpe alelaki mpo na ngolu. Na nsima Alma amonisaki bondimi na ye kati na Klisto na kosalaka mpo na kosunga basusu bayoka esengo yango. Misala wana ya ntango nyonso epesaki Alma esengo mingi atako kati na na mimekano mpe mpasi ya ndenge na ndenge. Omoni, “Nkolo alingaka molende,” mpe molende oyo etiaka bokebi na Ye ememaka mapamboli. Ata komekama makasi ekoki “komelama na esengo ya Klisto.”
Etuluku mosusu ya bato na Buku ya Mormon oyo batalelaki Yesu Klisto mpe nsango malamu na Ye na bomoyi na bango mpe bazwaki esengo ezali baoyo batongaki engumba ya Helama—esika wapi bakokaki kobokola bana na bango mpe kosepela na mosala ya bonsomi ya eyamba na bango. Bato oyo ya sembo oyo bazali na bomoyi ya malamu bakomaki baombo ya etuluku moko ya bapunzi mpe balongolaki bango lotomo ya moboko ya bato ya kosalela losambo. Ntango mosusu makambo ya mabe ekomelaka bato malamu:
“Nkolo amoni malamu kopesa bato na ye etumbu; iyo, amekaka motema molai na bango mpe bondimi na bango.
“Nzokande—nyonso oyo akotia elikya na ye, ye kaka akotombolama likolo o mokolo mwa nsuka. Iyo, mpe boye ezalaki na bato oyo.”
Loleenge nini bato yango bayikaki mpiko na mikakatano mpe mpasi na bango? Na kotiaka bokebi na Klisto mpe nsango malamu na Ye. Mikakatano na bango ezalaki kolimbola bango te; kasi, mokomoko na bango abalukaki epayi ya Nzambe, komimonisaka lokola lokola mwana ya Nzambe, mwana ya liyokani, mpe moyekoli ya Yesu Klisto. Ntango bamikundolaki nani bazalaki mpe babengaki Nzambe, bazwaki kimia, makasi, mpe na nsuka esengo kati na Klisto:
“Mpe Alma na bato na ye … basopaki libanda mitema mya bango epayi ya [Nzambe]; mpe ayebaki makanisi ya mitema mya bango.
Mpe esalemaki ete mongongo mwa Nkolo moyaki na bango o matungisi ma bango, kolobaka: Tombolani mito mya bino mpe zalani na mpiko, mpo nayebi boyokani boye bosalaki epai ya ngai; mpe nakosala boyokani elongo na bato ba ngai mpe nakobikisa bango libanda lya bowumbu.”
Na eyano, Nkolo “alongolaki mikumba likolo ya mapeka [na bango]. iyo, Nkolo apesaki bango bokasi ete bakoka komeme mikumba mya bango na malamu, mpe batosaki na bosepeli mpe bompikiliki bolingi bwa Nkolo.” Boyeba ete Basantu oyo batikaka mikakatano, mpasi, mpe mimekano na bango eminamaki na esengo ya Klisto! Na nsima, na ntango esengelaki, Alakisaki Alma nzela mpo na kokima, mpe Alma—profeta moko ya Nzambe—akambaki bango na libateli.
Ntango tozali kotalela Klisto mpe kolanda profeta na Ye, biso mpe tokokambama epayi ya Klisto mpe esengo ya nsango malamu na Ye. Mokambi Nelson ateyaki: “Esengo ezali na nguya, mpe kotya makanisi na esengo ememaka nguya ya Nzambe kati na bomoyi na biso. Lokola na makambo nyonso, Yesu Klisto azali ndakisa na biso ya nsuka, ‘oyo mpo na esengo oyo etiamaki liboso na ye ayikaki mpiko na ekulusu’ [Baebele 12:2].”
Mama na ngai awutaki kokufa kala mingi te; esalaki mpasi makasi. Nalingaka mama na ngai mpe kanisaki te kobungisa ye na bolenge na ye. Kasi na nzela ya liwa na ye, ngai mpe libota na ngai toyokaki mawa mpe esengo. Nayebi, na ntina na Ye, mam na ngai akufi te—azali na bomoyi. Mpe nayebi ete na ntina ya Klisto mpe bafungola ya bonganganzambe ezongisama ya Profeta Joseph Smith, nakozala elongo na ye lisusu. Mawa ya kobungisa mama na ngai eminamaki na esengo ya Klisto! Nazali koyekola ete mpo na “kokanisa Lola” mpe “kotika Nzambe akonza” mpe lisusu kotalela esengo oyo ezali kati ya Klisto.
Na bolingo nyonso abengisi ete, “Boya epayi na ngai, bino nyonso oyo bozali kosala mosala makasi mpe bozali na mikumba ya kilo, mpe nakopemisa bino bopemi.” Na nkombo ya Yesu Klisto, amene.