Mataupu 15
O Le Olioli o se Feagaiga e Faavavau
I le faatuai ai ona o galuega a le Ekalesia i le Aai o Sate Leki, na tuai ai le taunuu o Peresitene Harold B. Lee i le konafesi aoao a le eria i le Aai o Mekisiko. Sa tulaueleele lana vaalele i le aoauli o le aso 26 o Aokuso, 1972, ma i le afiafi sa momoli atu ai o ia mai lea nofoaga i lea nofoaga e lauga i sauniga taitasi o le konafesi mo le Aualofa, o e umia le Perisitua Arona ma le Mekisateko, ma tamaitai talavou. O le taeao na sosoo ai, na lagolagoina ai o ia e le Au Paia i le konafesi e avea ma peresitene fou o le Ekalesia—o le uluai faapotopotoga i le lalolagi na faia ai lea tulaga.
Sa toe foi atu le perofeta i Iuta i ni nai aso mulimuli ane, ae na ia iloa ai o se tagata o se vaega ua liliuese na faia nifaamata’u o le oti e faasaga ia te ia.
Ina ia mautinoa le saogalemu o Peresitene Lee, na amata ona faatasi atu leoleo ma ia i soo se mea e alu i ai. Sa faafetai o ia mo la latou puipuiga, ae o lo latou i ai na faalavelave ia te ia. O peresitene lata mai nei o le Ekalesia sa masani lava ona leai ni leoleo patino. O lea la o taimi uma lava e alu atu ai Peresitene Lee, e le itiiti se faalavelaveina e tupu mai ana leoleo o le puipuiga.
E lei umi ae filifili o ia ma lona faletua, o Joan, e faatasi ma Elder Gordon B. Hinckley ma lona faletua, o Marjorie, i se malaga e asiasi i le Au Paia i Europa ma Isaraelu.
Peitai, o le malaga o le a i ai ona lava tulaga lamatia. O le a latou malaga e aunoa ma se puipuiga mo le saogalemu i se itulagi o le lalolagi e faatumulia i popolega. O se vaega o Palesitina sa faatoa maea atu ona latou ave faamalosi ma fasiotia tagata e toasefulutasi o le au o le Olemipeka a le atunuu o Isaraelu i Taaloga o le Taumafanafana i le 1972 i Munich, Siamani i Sisifo. O lea osofaiga matuia faafuasei, na tupu ai se aafiaga tuga i le lalolagi, ma sa popole Peresitene Lee ina nei tulai mai se feteenaiga faaauupegaina i Isaraelu. Ae, sa la malaga faatasi pea ma Sister Lee ma le au Hinckley e pei ona fuafuaina.
Na taunuu le vaega i le malaevaalele i Tel Aviv, Isaraelu, i le afiafi o le aso 19 o Setema. O David Galbraith, o se tagata o le Ekalesia mai Kanata o lē sa aotauina i le Iunivesite Eperu o Ierusalema, sa ia pikiina ma ave i latou i le fasefulu maila i sautesasae i Ierusalema. Sa pogisa le taimi na latou taunuu atu ai, ma sa le mafai ona latou vaaia ni mea se tele, ae sa i ai se mea matagofie e uiga i le malaga atu i le aai anamua, ma paia.
I le aluga o aso e tolu na sosoo ai, sa feiloai ai le au Lee ma le au Hinckley ma tagata iloga faaaloalogia o Isaraelu ma asiasi atu i nofoaga paia. Sa ta’u atu e Teddy Kollek, le pulenuu o Ierusalema, ia Peresitene Lee sa ia faalogo i le tala i le aposetolo o Orson Hyde o faia se tatalo i luga o le Mauga o Olive i le 1841. Sa ta’u atu e Peresitene Lee ia te ia, sa manao le Ekalesia i se aso e fausia se maa faamanatu po o se nofoaga autu mo tagata asiasi mai i le aai e faamanatu ai le tatalo.
“O loo matou taumafai e maua se fanua i luga o le Mauga o Olive e fatu ai se paka mo manatunatuga loloto,” o le tala lea a pulenuu Kollek. “Atonu e mafai ona i ai se maa faamanatu e i ai ma le upuvane lenei i le paka.”
I le afiafi o le aso 20 o Setema, sa feiloai ai David ma se vaega toalaiti o le Au Paia sa nonofo i Isaraelu ma le au Lee ma le au Hinckley i se tuugamau i le togalaau sa talitonu nisi atonu o le nofoaga lea na falelauasi ai Iesu ina ua mavae le Faasatauroga. Sa i ai se lagona o le paia i luga o le vaega. E mafai ona latou vaai faalemafaufau i le aveina atu o le tino maliu o le Faaola i le tuugamau, po o Maria le Makatala ua toe foi atu i le faatoaga i le aso tolu ma vaaia le Alii toetu.
I le tuugamau, sa faatulagaina ai e Peresitene Lee le Au Paia i se paranesi, faatasi ai ma David e avea ma o latou peresitene. E ui e lei silia ma le tolusefulu tagata tumau o le Ekalesia sa nonofo i le atunuu, ae e lei leva ona amata o mai ni vaega o tamaiti aoga o le BYU e suesue i le Nuu Paia mo ni nai masina mai lea taimi i lea taimi, e sili atu nai lo le faaluaina o le aofai o le Au Paia i sauniga. Sa talitonu Peresitene Lee o le a faataatia e le paranesi le faavae o se galuega tele i le eria.
“Pe a fesili atu tagata ia te outou po o ai oe,” na ia fautua atu ai, “aua nei fai atu i tagata o le Ekalesia Mamona po o le Ekalesia AAG, ae fai atu O Le Ekalesia a Iesu Keriso o le Au Paia o Aso e Gata Ai.”
Ina ua maea le sauniga, sa toe foi atu Peresitene Lee i lona potu i le faletalimalo ua vaivai. Sa ia lagonaina sina tiga matuia i le pito i lalo o lona tua mo ni nai aso, ma sa ia atiaeina se tale tiga ma le tau manava. O lenei, faatasi ai ma le amataga o le vaivai, sa popole o ia ua i ai se mea ua faaletonu.
Mulimuli ane i lena po, i le finafinau o Sister Lee, na sau ai Elder Hinckley i lo la potu o le faletalimalo ma tuuina atu ia Peresitene Lee se faamanuiaga. O le taeao na sosoo ai, sa tale ai e Peresitene Lee sina toto ma lagonaina ai le vave ona toomaga mai lona tau le mānava. E lei umi ae lava lona malosi e faatasi ai ma David ma le au Hinckley mo se maimoaga i Petania, Ieriko, Kapanaumi, Nasareta, ma isi nofoaga paia.
O le aso na sosoo ai, i le taumafataga o le taeao, sa ia tau atu ai ia Elder Hinckley sa ia oo i se vavega. Sa ia lagonaina e peiseai sa i ai o ia i le tulata o le oti, ae e ala i le faamanuiaga a Elder Hinckley, na toefuatai mai ai e le Alii lona soifua maloloina.
“Sa tatau ona tatou o mai i le laueleele o vavega e molimauina se vavega ia i tatou lava,” sa ia fai atu ai ma le agaga faafetai.
O le a latou tuua Ierusalema i lena afiafi, o lea sa latou faaaluina ai le taimi sa latou maua e savavali ai i le mea sa savali ai Iesu. Sa latou asiasi atu i Ketesemane, le tuugamau o Lasalo, Peteleema, ma toe vaega o le puipui o loo siomia ai le malumalu. Ona aveina atu lea o i latou e Tavita i le malaevaalele, ma malaga atu ai i le vaalele mo Roma, sa faafouina lo latou faatuatua mai mea uma na latou vaaia ma oo i ai i le Nuu Paia.
I le aso 7 o Novema, 1972, sa faalogo ai Ardeth Kapp i le tatagi o le telefoni a o ia ulufale atu i lona fale mautotogi i Bountiful, Iuta. O Francis Gibbons, le failautusi i le Au Peresitene Sili, sa i le laina telefoni. “E mafai e oe ma lou toalua ona feiloai ma Peresitene Harold B. Lee taeao i le taeao i lona ofisa i le 11:35?” na ia fesili ai.
I le manava loloa, sa fai atu ai Ardeth, “O le a ma i ai iina.” I le taimi lava lena, sa ia mafaufau ai pe aisea na manao ai Peresitene Lee e talanoa ia i laua.
O ia ma lona toalua, o Heber, o ni faiaoga, i a la galuega. E ui lava sa talavou lava i laua—ae sa fasefulu tasi ona tausaga—sa la auauna malosi i le Ekalesia mo le tele o tausaga. Sa avea o ia ma se tasi o le matagaluega faaleaoaoga o aoga i le Iunivesite o Polika Iaga ma sa auauna atu i le Komiti Faamaopoopo a le Autalavou a le Ekalesia. Sa avea o ia ma se epikopo ma ua avea nei ma se fesoasoani i le au peresitene o le siteki.
Ina ua sau Heber i le fale, sa ta’u atu e Ardeth ia te ia e uiga i le valaau mai le telefoni. Sa manatu o ia atonu e talosagaina o ia e Peresitene Lee e auauna atu o se peresitene o le misiona. Sa lei mafaufau i ai Heber, ae sa popole o ia ina nei tatau ona latou masii ese atu. Sa la i ai i le ogatotonu o le fausiaina o se fale ma e tatau ona lafoai le galuega faatino pe a valaauina i se misiona. Sa faia e Heber le tele o galuega faufale lava ia, ma e le mafai ona la totogia se tasi e faaumaina.
Sa le ma moe Ardeth i le gasologa o le po, ma tomanatu i lona olaga. Sa fesoasoani le Alii ia te ia i taimi uma i ona tofotofoga. A o teineitiiti sa nofo latalata i Cardston, Alberta, Kanata, sa le manuia ana taumafaiga i ni togi se lua i le aoga. E toaitiiti ni tagata na faamoemoe ia te ia e sili atu lona lelei i ana suesuega, ae faatasi ai ma le fesoasoani a le Atua, sa ia maua ai talu ai nei se faailoga o le matuaofaiva i le atinaega o mataupu aoaoina.
Ae e le o lana tauiviga sili lena. E ui lava sa manao o ia i taimi uma i se aiga toatele, ae sa lei mafai lava e i laua ma Heber ona maua ni fanau, e ui lava i tatalo faifai pea mo se vavega. Mo sina taimi, sa la mafaufau ai e uiga i le vaetamaina, ae o taimi uma lava la te sailia ai le taitaiga a le Alii e uiga i le mataupu, la te mauaina se “mafaufauga papa.” Sa la lagonaina le faamasinoina e tuaoi, uo, ma aiga o e na faaigoa i laua o ni e e manatu faapito mo le le mauaina o ni fanau. Ua na o se vaaiga e faavavau o le fuafuaga a le Atua na aumaia ai ia i laua le filemu ma le taliaina sa la manaomia e taulima ai o la tiga.
I le taeao o le latou feiloaiga ma Peresitene Lee, sa popole ai Ardeth ma Heber ina ua la taunuu atu i le Maota o le Pulega o le Ekalesia, ae sa la naunau e talia soo se tofiga mai le Alii. Sa faafeiloaia ma le alofa i laua e Peresitene Lee ma valaaulia i laua i totonu o lona ofisa. “Taumafai ina ia toamalie,” o lana tala lea. “Ou te mautinoa e te lua iloa e le na o se asiasiga faasamasamanoa.”
Ona ia saunoa lea e uiga i le manaomia o suiga faifai pea faalefaalapotopotoga i le Ekalesia ina ia tumau ai le saoasaoa o lona tuputupu ae vave. O le polokalama a le autalavou a le Ekalesia na faapitoa lava le popole ia te ia. Sa talitonu o ia e manaomia e le Ekalesia ona faia nisi mea se tele e faamalolosia ai tagata talavou ma saunia ai i latou e auauna atu i le malo o le Atua. Mo lenei mafuaaga, sa toe faatulagaina ai le Mutual Improvement Associations e tuu atu ai i lalo o le vaavaaiga tuusao a taitai Perisitua Arona ma le Mekisateko.
A o faalogologo atu o ia ia Peresitene Lee, sa mafaufau Ardeth po o le a le mea o le a ia fai atu ia Heber e fai. “Po o le a lava le mea e manao i ai o ia,” sa ia mafaufau ai, “Ou te mautinoa e mafai ona ia faia se galuega lelei, ma o le a ou naunau e lagolago o ia.”
Ona valaaulia lea e Peresitene Lee ia Ardeth e auauna atu, na faateia ai o ia. O ia le mafuaaga na ia valaauina ai i laua i lona ofisa?
Sa faamalamalama atu e Peresitene Lee e faapea, sa ioe talu ai nei Ruth Funk e auauna atu o se peresitene aoao o le Faalapotopotoga o le Faaleleia Faatasi o Tamaitai Talavou. O le galulue ai ma Ardeth i le Komiti Faamaopoopo, sa fautuaina ai o ia e Ruta e avea ma fesoasoani lua. O le au peresitene fou o le a i ai o latou ofisa i luga o le fogafale lona sefuluiva o le Maota o Ofisa o le Ekalesia, o se fale maualuga faatoa maea i le taulaga o le Aai o Sate Leki.
I le lofituina, na talia ai e Ardeth le valaauga, ma le faafetai mo le faatuatuaga na faatusa i ai. I se taimi puupuu mulimuli ane, sa faasilasila aloaia atu ai e le Ekalesia le toefaatulagaina o polokalama a le autalavou. A o lei oo i le taimi lea, sa faagaoioia le YWMIA i lalo o le vaavaaiga a le Au Peresitene Sili. I le taimi nei, i le avea ai ma se vaega o le faamaopoopoga o faalapotopotoga a le Ekalesia, o le a faamaopoopo ai e le YWMIA ma le YMMIA a latou taumafaiga i lalo o le taitaiga a le Au Epikopo Pulefaamalumalu ma taitai perisitua o uarota ma siteki. O le faatulagaga fou foi na maua ai ni eseesega i le va o le MIA o le Perisitua Mekisateko, po o le au matutua nofofua e matutua atu nai lo le sefuluvalu tausaga, ma le MIA o le Perisitua Arona, po o alii talavou ma tamaitai talavou i le vai tausaga o le sefulua ma le sefuluvalu.
E ui o le a vaavaaia le MIA o le Perisitua Arona e taitai perisitua, ae o le a faaauau pea ona ofoina atu e le polokalama ia vasega ma gaoioiga a le itupa ma tausaga mo tama ma teineiti. I le ogatusa ai ma tofi o le perisitua o le tiakono, aoao, ma le ositaulaga, o vasega a tamaitai talavou sa ta’ua o le Ofagapi (12–13 tausaga), Maea Meite (14–15 tausaga), ma le Lora (16–18 tausaga)—o igoa ua leva ona faaaoga e le YWMIA. I ni nai tausaga na muamua atu, sa talosagaina ai e taitai o le Ekalesia uarota uma e amata se aufono talavou a le epikopo, lea na maua ai e le autalavou ni avanoa fou e taitai ai. O lea la ua finagalo le Au Peresitene Sili i faalapotopotoga fou o le MIA e tuuina atu i le autalavou nisi avanoa faaletaitai.
Sa lagolagoina e Peresitene Funk lenei vaaiga mamao mo le polokalama. I le avea ai ma se faiaoga o le aoga maualuga, sa ia tuuina atu i ana tamaiti aoga le tele o avanoa i le aluga o tausaga e atiae ai o ni taitai, ma sa latou faia ni mea maoae. “E le avea oe ma se mea e ala i le faalogo e uiga i ai,” sa ia tautino atu ai. “E avea oe e ala i le faia o lena mea.”
O le mataupu faavae o se mea e mafai foi ona loto i ai Ardeth. E lei leva ona valaauina o ia, ae ia taliaina se tofiga e auai i ni nai konafesi faarisone i le Malo Aufaatasi o Peretania. Sa popole o ia i le malaga ona sa fou o ia i lona valaauga. Ae ona ia manatua lea o upu a Nifae i le Tusi a Mamona: “E lē tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou.”
“Ua ou iloaina lena mea i lo’u olaga atoa,” sa ia fai ifo ai ia te ia lava, “ae e tatau ona ou iloaina i le taimi nei.”
Ina ua uma o laua papatisoga, sa iloa e Helvécio ma Rudá Martins o isi Au Paia Pasila sa masani ona mananao e talanoaina le perisitua ma le tapulaa o le malumalu a le Ekalesia ma i laua. Sa taumanatunatu nisi tagata pe mafai faapefea ona tumau le faamaoni o le aiga i le Ekalesia pe afai e le mafai e Helvécio po o lo la’ua atalii, o Marcus, ona faauuina i le perisitua. O nisi, i le le fiafia i le tuuto o le au Martinse, na faitioina pe tauemuina i latou.
“Ana faapea ou te i ai i lou tulaga,” na fai atu ai se tasi alii ia Helvécio, “Ou te le talitonu o le a ou nofo i le Ekalesia.”
Ae, e toatele uso a Au Paia sa faamemelo i le au Martinse mo a latou molimau malolosi ma tautinoga i o latou valaauga. E fa masina talu ona latou auai i le Ekalesia, ae sau Elder Bruce R. McConkie—o le sui aupito fou o le Korama a Aposetolo e Toasefululua—i Rio de Janeiro e faatulaga le siteki lona lima i Pasila. I lena taimi, sa lei malamalama atoatoa Helvécio i le eseesega i le va o se itu ma se siteki, ae sa malie o ia e auauna atu o se fesoasoani i le au peresitene o le Aoga Sa a le siteki. I le taimi lea, na taliaina ai e Rudá se valaauga e auauna atu i le au peresitene o le Peraimeri a le siteki.
Sa aofia i le siteki fou se eria maoae, e aafia ai le faitau afe o maila faatafafa. O valaauga fou o Helvécio ma Rudá na tuuina atu ai ia i laua le avanoa e asiasi atu ai i le tele o uarota ma paranesi tumamao o le siteki. E tele taimi e piki ai e Helvécio ia Rudá i le fale faatali pasi i le leva o le po a o ia toe foi mai mai le faataunuuina o se tofiga. E ui ina sa faigata ia manaoga fou ia i laua, ae sa fiafia lava le au Martinse e auauna atu.
O le la papatisoga na suia ai foi le la sootaga ma le aiga. Sa lei mananao tagata o le aiga o Rudá e auai o ia i le Ekalesia, ma sa latou taumafai e tauanau o ia ma Helvécio e lafoai lo la faatuatuaga fou, ma valoia ai o le a oo mai se faalavelave i o la luga pe a la le lafoaia. Sa lapataia foi e nisi o lona aiga e faapea, atonu e ave e le Atua le ola o lo la atalii o Marcus.
Ae sa lagona e le au Martinse le toafimalie i le faatasi ai ma le Au Paia. Sa matua taliaina ma le mafanafana i latou e tagata o le paranesi ma sa mafaufau muamua Helvécio pe o maua e lona aiga le taulimaina faapitoa ona o lona tulaga iloga faalegaluega. Peitai, ina ua uma ona atofa atu ia te ia se galuega fai meaai i se gaoioiga a le paranesi, sa ia iloa ai e le o ese le taulimaina o lona aiga.
I se tasi aso, sa ta’u atu ai e se uo i le Ekalesia ia Helvécio, “O tagata faamaoni e pei o oe ua faaalia lau aia i le perisitua i le Alii. E leai sou masalosalo o le a i ai se aso o le a e maua ai le perisitua.”
Sa talisapaia e Helvécio ma Rudá le lagolagosua a a laua uo ma uso a tagata o le Ekalesia. Ae sa sili ia i laua le aua nei mafaufau i ia fesili pe o le a faapefea foi ona maua e le Au Paia Uli ia faamanuiaga o le perisitua. Sa laua faatuatua o le a faataunuuina e le Atua i se aso Ana folafolaga uma. Ae, sa tausia pea e le au Martinse i se tulaga itiiti o la faamoemoe ina ia puipuia ai i la’ua mai le le fiafia ma le lototiga. Sa la talitonu o faamanuiaga atoatoa o le perisitua ma le malumalu o le a oo mai ia i laua i le Meleniuma. Seia oo i lena taimi, sa na ona la tatalo lava mo le faatuatua sili atu ma le malosi e auauna atu ai i le Ekalesia.
Ina ua uma ona faatulagaina le Siteki o Rio de Janeiro, sa faia e Helvécio ma Rudá ni taimi faatulagaina e maua ai o la faamanuiaga faapeteriaka. Ina ua faamanuiaina e Walmir Silva, le peteriaka o le siteki, ia Helvécio ma Rudá, sa ia folafola atu ia i laua o le a la nonofo faatasi “i luga o le fogaeleele i le olioli mai se feagaiga e faavavau.’ Sa matagofie le folafolaga, ae na taunuu atu le aiga i le fale ma le lagona le mautonu. Ona o le tapulaa o le perisitua, sa le mafai ai e Helvécio ma Rudá ona ulu atu i le malumalu ma sa lei faamoemoe e osia feagaiga o le malumalu i le taimi o o laua olaga faaletino. Mata o le a le uiga o upu a le peteriaka?
I le fitu vaiaso mulimuli ane, na asiasi atu ai Marcus e sefulufa tausaga le matua i le fale o le peteriaka ina ia maua lona lava faamanuiaga. A o faamanuiaina o ia e le peteriaka, sa ia folafola atu ia Marcus o le a ia maua avanoa e talai atu ai le talalelei ma tuuina atu lana molimau o le upumoni. Sa faaliliuina e Helvécio ma Rudá lenei folafolaga o lona uiga o le a auauna atu Marcus i se misiona. Ae sa foliga mai foi e le mafai lena mea. Sa le mafai e Marcus ona auauna atu i se misiona sei vagana ua ia umia le perisitua.
Sa lei mananao le aiga o Martin i upu a le peteriaka e faanoanoa ai le lagona fimalie faifaipea o o latou olaga. Sa tonu ia i laua e faaauau pea ona ola e pei ona sa latou i ai muamua ma aua le mafaufau tele e uiga i le aafiaga.
Ae peitai, sa lei mananao Helvécio ma Rudá e le amanaiaina folafolaga na tuuina atu ia i laua. I le tulaga lava e tasi, sa la tatalaina ma le toamalie se teugatupe fou—o se tupe mo faifeautalai mo Marcus.
O le Aso Kerisimasi 1973 na faasolo atu ma le filemu mo Spencer W. Kimball. Sa faafesuiai e ia ma Camilla meaalofa o le tasi ma le isi ma faatasi ai ma le uso o Kamilla o Maria, o lē na fanau mai e logonoa ma o lea ua latou nonofo faatasi. Sa tuu e Camilla se pīpī i le ogaumu, ma sa ia fesoasoani ia te ia e faatulaga se laulau faaopoopo mo malo sa latou faamoemoeina mo le taumafataga o le afiafi.
Sa faaaluina e Elder Kimball le taimi atoa na totoe o le taeao i lana masini lomitusi a o ia taumafai e tali atu i le tele o tusi e lei taliina. O musika o le Kerisimasi na taina i luga o fonokalafi, ma sa ia faia se malologa mai lea taimi i lea taimi e liliu le pese.
A o suia le aso mai le taeao i le aoauli, sa taunuu mai nisi o fanau a le au Kimball, fanau a fanau, ma fanau a fanau a fanau mo le taumafataga o le afiafi o le Kerisimasi. Sa i ai faatasi ma malo faaaloalogia ia Mangal Dan Dipty, o se alii na papatisoina e Elder Kimball i le sefululua tausaga na muamua atu i Delhi, Initia, ma se teineitiiti laitiiti o Zuni e igoa ia Arlene, o lē sa nonofo faatasi ma le afafine o le au Kimball, o Olive Beth, o se vaega o le Polokalama o le Faaauai o Tamaiti Aoga Initia. Sa taumamafa ma usu pese le vaega, ma oo ina alu atu Elder Kimball e moe i le lagona o le gasologa fiafia ai o le aso.
O le afiafi na sosoo ai, i se taimi ina ua mavae le ta o le valu, sa tali atu ai Elder Kimball i le telefoni i lona fale. “O Arthur lenei,” o le tala lea a le tagata valaau. I lena lava taimi, sa iloa ai e Elder Kimball o Arthur Haycock, le failautusi a Peresitene Lee.
“Ia, Arthur,” na saunoa fiafia ai Elder Kimball, “o a mai oe i le po nei?”
“E le o lelei,” o le tala lea a Arthur. “O loo o’u i le faalemai faatasi ma Peresitene Lee, ma o loo ma’i tigaina o ia. Ou te manatu e tatau ona e sau i le taimi lenei.”
Sa tautau e Elder Kimball le telefoni ma tietie sa’o atu i le falemai, lea na ia feiloai ai ia Arthur i le alasavali. Sa faamatala e Arthur na sau Peresitene Lee i le falemai mo se malologa ma se siaki. Sa nofo o ia i luga o le moega ina ua faafuasei ona oo ise tulaga faigata o le fatu. Sa valaau atu Arthur mo se fesoasoani, ma i se taimi sa faatumulia le potu i fomai, tausimai, ma masini. Sa pisi lava le nofoaga i gaoioiga atuatuvale.
O Joan, le faletua o Peresitene Lee, na taunuu atu ma lona afafine o Helen ma lona atalii faaletulafono o Brent. Sa ta’u atu e Arthur ia i latou e tatau ona latou nonofo ese mai le potu o Peresitene Lee, o lea na latou maua ai se potu avanoa e le mamao tele mai e mafai ona latou faatali ai. Sa latou tatalo faatasi ma ole atu i le Alii e faasaoina le soifua o le perofeta. A o latou faatalitali, na taunuu mai Marion G. Romney, le fesoasoani lua o Peresitene Lee i le Au Peresitene Sili.
I le le mautinoa po o le a se isi mea e mafai ona latou faia, sa taitai ai e Peresitene Romney le vaega i se isi tatalo. Ona ulufale atu lea o se fomai i le potu.
“O loo matou faia mea uma matou te mafaia,” na ia fai atu ai, “ae e le foliga lelei.”
Sa faateia Elder Kimball. O Peresitene Lee, o le sa lagolagoina pea lava pea o ia e ala i ona lava gasegase, sa fitusefulufa tausaga le matua—e laitiiti ifo nai lo ia lava. Ma sa foliga mai ua sili atu lona maloloina. E toatele i latou i le Ekalesia sa manatu o le a i ai o ia i se taimi umi lava i tala atu o le maliu ai o Elder Kimball. Ma sa leai se tasi na tatalo malosi atu nai lo le au Kimball o le a faaauau pea le soifua maloloina lelei o Peresitene Lee.
Sefulu minute ua mavae atu. Sa tuua e Elder Kimball le potu ma savali atu i le alasavali agai i le potu o Peresitene Lee. A o latalata atu o ia, sa laa atu i fafo se fomai.