Mataupu 33
O Le A Lenei Ekalesia?
Na olioli le au paia i matusasae o Mekisiko i le aso 28 o Aperila 2002, ina ua faapaiaina e Peresitene Hinckley se maota o le Alii i Monterrey, Nuevo Leon, Mekisiko. O le malumalu lona 110 lea a le Ekalesia o loo faagaoioia—ma o le lona sefulutasi o malumalu ua faapaiaina i Mekisiko i le tolu tausaga. E pei ona vaai faalemafaufauina e Peresitene Hinckley, o malumalu e limasefulu‑valu ua faapaia talu ona amata le faaaogaina o fausaga fou mo malumalu i le 1998, ua salalau atu ai faamanuiaga ma vavega i le mamao ma le lautele. O le au paia na malaga atu mo ni aso e auai i le malumalu ua mafai nei ona oo atu i se tasi ua nao ni nai itula po ni minute foi.
O nisi o uluai Au Paia ua manuia mai le faatupulaia o malumalu ua fausiaina o i latou i totonu o kolone o Mekisiko a le Ekalesia, o lo latou mamao ese na musuia ai le mamanu fou o malumalu. Na faapaiaina ia Mati 1999, o le Malumalu o Colonia Juárez Chihuahua na 6,800 futu faatafafa—e pito laitiiti i le Ekalesia—ae na vave lava ona avea ma malamalama i le afioaga.
Sa fiafia lava Bertha Chavez, o lē na auai i le ekalesia i Nuevo Casas Grandes lata ane, ina ua valaaulia o ia e se fesoasoani o le au peresitene o le malumalu e avea ma tagata faigaluega i sauniga o le malumalu fou. O se miti sa i ai pea ia Bertha e auauna i le maota o le Alii talu ona maua lona faaeega paia i le Malumalu o Mesa Arizona i le 1987. Ua taunuu nei lana miti.
“O se faateia maoae ma matagofie,” na ia toe manatua ai. “Sa ou oso i luga, ma tagi i le olioli, ma le faafetai i le Alii mo le tuuina mai ia te au o lenei avanoa maoae e auauna ai i Lona Maota.”
I le isi itu i Atalani, na malaga ai Marilena Kretly Pretel Busto mai lona aiga i Potukale i le Malumalu o Madrid Sepania lea na faatoa uma ona faapaiaina. I le tausaga na muamua atu, na maliu ai le tina o lona tina ua 101 tausaga. O lea na naunau lava Marilena e maua sauniga e fai ma sui o le tina o lona tina.
I le maota o le Alii, na faamoemoe Marilena na te lagonaina se mea faapitoa ina ua papatisoina o ia mo lona tinamatua, ae na te lei lagonaina. Na te lei lagonaina foi soo se mea i le aluga o le faamauga ma sauniga o le faaeega paia. I le taimi muamua, o lenei leai o se lagona na popole ai Marilena. Ae e oo ane i le taimi na ia tootuli ai i le fatafaitaulaga i le potu o faamauga, e sauni e faamau lona tinamatua i ona matua, sa na o lona fiafia ua ia faia galuega o le malumalu.
Ona amata lea ona tautala le fai faamauga, ma na lagona e Marilena se lagona pei e sipaka na sosolo atu i lona tino. Sa le mafai ona ia faamatalaina tonu le mea na ia lagonaina, ae na ia mautinoa sa olioli lona tinamatua le lalolagi o agaga.
I Polivia, i le taimi lea, o le toatele o le selau afe o le Au Paia i le atunuu na sauniuni i latou lava e auai i le Malumalu o Cochabamba i le maea ai o lona faapaiaga ia Aperila 2000. O le talitonuga o aiga malolosi ua saunia tagata o le Ekalesia e auai i le malumalu, na faatulagaina ai e Maria Mercau de Aquino, o le Peresitene o le Aualofa a le siteki i Cochabamba, se fonotaga na mamanuina e faamalolosia ai faaipoipoga ma tuu atu ai i tamaitai se lagona sili atu o lo latou taua.
I le siteki lava lea, ma mafai ona vaaia e Antonio ma Ayaviri le ala na faamalosia ai e le malumalu fou lo latou aiga. “O le tausia o fanau ua sili atu na faigofie nei ua i ai le talalelei ma faamanuiaga o le malumalu i o tatou olaga,” na molimau ai Antonio. “I lo matou aiga ua i ai nei se vaega o le lagi.”
O se maota o le Alii i Fukuoka, Iapani, ua suia ai foi olaga. Ua sili atu ma le tolusefulu tausaga ua tea talu ona auai Kazuhiko Yamashita, o le peresitene o le Siteki a Fukuoka, i le Ekalesia ina ua uma ona matamata i le Man’s Search for Happiness i le faaaliga a le lalolagi i Osaka Iapani. O lona talitonuga i le ata o le faaolataga na faaauau pea ona tuuina atu ia te ia le taitaiga. Na faamauina i laua ma lona faletua, o Tazuko, i le Malumalu o Tokyo i le 1980, ma e toaono le la fanau.
O le Malumalu o Fukuoka ua avea nei ma vaega ogatotonu o le Ekalesia i Iapani i saute Ao faagasolo le fale tatala, sa fiafia Kazuhiko i le vaaia o le toatele o le Au Paia na valaaulia ma le naunautai o latou aiga ma uo e maimoa i le maota o le Alii. E toatele le Au Paia na faapeapea atu mai le lafu ua latou toe foi mai, o lo latou faatuatua ua toe mumu e ala i le faatosinaga lemafaafitia o le malumalu. I le nofo ai i le potu selesitila i le taimi o le faapaiaga, na lagona e Kazuhiko le filemu atoatoa. Sa i ai sona lagona malosi sa i ai le Alii iina ma e alofa o Ia i le Au Paia i Iapani. Ina ua ia tepa atu ia Peresitene Hinckley, na vaaia e Kazuhiko loimata i fofoga o le perofeta.
O le malumalu fou i Monterrey, Mekisiko, na le umi ae aumaia foi ona lava faamanuiaga. Na auai Roman ma Norma Rodriguez i le Ekalesia ina ua uma ona auai i le fale tatala o le malumalu. I le taimi lea, sa laua mafaufau ai e faafou le la faaipoipoga ua sefululima tausaga i se sauniga mataina. Ae sa i ai se mea e uiga i lena fuafuaga sa i ai se lagona le sao, lea na musuia ai Norma e tatalo i le Atua mo se taitaiga.
O le tausaga na sosoo ai, na foi atu ai o ia ma Roman i le Malumalu o Monterrey ma le la fanau e toatolu. Na le toe mananao i se faaipoipoga soonafai. I folafolaga matagofie, ma faavavau o le mana o le faamauga, na la maua ai le sauniga o le faaipoipoga na la mananao lava i ai.
Ina ua valaauina Anne Pingree o se fesoasoani lua i le pulega aoao a le au peresitene o le Aualofa ia Aperila 2002, sa popole o ia e uiga i le faitau ma le tusitusi o tamaitai o le Au Paia o Aso e Gata Ai. Mai le 1995 i le 1998, na avea ai i laua ma lana tane o George, o ni taitai misiona i le Misiona a Nigeria Port Harcourt. O le toatele o tamaitai na ia feiloai i ai talu mai lena taimi sa le mafai ona faitau, na faigata ai ia i latou ona auauna atu i le Ekalesia.
Ao tuputupu ae le Ekalesia i atunuu tauatiae i le vaitaimi o le 1970 ma le 80, o le aoaoina o tagata e faitau na avea o se vaega o lana misiona. I le 1992, na faia ai e le peresitene aoao a le Aualofa o Elaine L. Jack le faitau ma le tusitusi o se taulaiga autu o lana au peresitene, ma taitai atu ai i le fatuina o se Taumafaiga o le Faitautusi ma le Tusitusi a le Talalelei e aoao ai le faitau ma faamalosiau ai tagata o le Ekalesia e aoao tusitusiga paia , ma aoao o latou aiga, ma faaalualu i luma i latou lava.
Na auauna atu Anne i le aufono a Peresitene Jack ao lei alu i lana misiona, ma ina ua ia taunuu atu i Nigeria, sa galue o ia ma faifeautalai ma le Au Paia i le lotoifale e faalauiloa le faitautusi ma le tusitusi a le talalelei. O le pulega aoao a le Aualofa ma se tusiata i Iuta na latou fesoasoani foi ia te ia e fatu ni pepa lautele o i ai ni aoaoga faamasani faigofie ma ni tamaitusi e lagolago ai tamaitai i le misiona o e sa faigata ona faitautusi. Ao ia faaaogaina nei anomea, na ia vaaia le tele ma tele o tamaitai o faataunuuina o latou valaauga ma le mautinoa ma le malamalama.
I le aluga o lana tausaga muamua i le au peresitene aoao a le Aualofa, na tofia ai Anne e taitaia poloketi o le faitau ma le tusitusi a le faalapotopotoga. Na faaalia i suesuega o tamaitai i le lalolagi tauatiae e laitiiti lo latou maua o aoaoga nai lo alii, ua iu ai i le maualalo o le fuafaatatau o le faitau ma le tusitusi. Ua fautuaina foi e faamaoniga o tagata o le Au Paia ua sili atu lo latou nonofo i le Ekalesia ma auai soo i fonotaga pe a latou iloa faitau. Faatasi ai ma Anne, na talitonu le peresitene aoao o le Aualofa o Bonnie D. Parking ma le fesoasoani muamua o Kathleen Hughes, o le fesoasoani i uso o le Aualofa e aoao e faitau o le a faamalosia ai i latou e auauna atu ma le mataalia i le Ekalesia, faamalolosia o latou aiga, maua ni galuega sili atu, ma maua ni molimau mautu atu e uiga ia Iesu Keriso.
I lalo o le taitaiga Peresitene Parkin, na faaauau ai e le aufono a le Aualofa ona faamamafa le Taumafaiga e Faitau ma Tusitusi o le Talalelei. Na latou faamalosia foi le Au Paia e faaaoga le Ye Shall Have My Words, o le tusi mo le faitau ma le tusitusi na muai saunia e le Polokalama o Aoga a le Ekalesia. E faapei o Anne, sa latou malamalama o le toatele o tagata o le Ekalesia, e ala i le leai o so latou lava sese, na tauivi i o latou lava valaauga ona o lo latou le mafai ona faitau pe malamalama i le tele o tusitaulima a le Ekalesia ma tusi lesona.
A o talanoaina e le au peresitene nei faafitauli, na talanoa ai Anne e uiga i le ala e mafai ona faaaogaina ai i le lalolagi atoa ia tamaitusi ua faafaigofieina o aoaoga faamasani e pei o ia na ia faaaogaina i Nigeria. Na manatu Peresitene Parkin o le pulega aoao a le Aualofa e tatau na faia ni tamaitusi talitutusa e fesoasoani i tagata i eria e maualalo le faitau ma le tusitusi.
Ina ia fesoasoani i lenei galuega, na fautuaina atu ai e le pulega aoao ia Florence Chukwurah, o se Au Paia o Aso e Gata Ai na fetaui i ai Anne i Nigeria, latou te galulue. Na asiasi atu Florence i le Aai o Sate Leki ae o lana tane, o le fitugafulu eria pulefaamalumalu o Christopher N. Chukwurah, na faia ana aoaoga faamasani i le laumua o le Ekalesia O se tausi soifua lana galuega, sa tuputupu ae Florence i le mativa ma sa malamalama i le ituaiga olaga i le nofoaga sa fou ai le Ekalesia.
Sa faamaonia e le Au Peresitene Sili le fautuaga, ma na tofia ai e Peresitene Parkin ia Florence e galulue ma le komiti faitau ma le tusitusi. E lei leva, ae galulue o ia ma isi tagata o le aufono e fausia ni tamaitusi faafaigofie o aoaoga faamasani.
Sa sili atu le olioli o Anne i le vaaia o le galuega o le faitau ma tusitusi ua agai i luma. “Ua tupu vave tele lenei mea,” na ia manatu ai. “E faigata ona ou taliaina.”
Toe foi i Filipaina, sa fiafia Seb Sollesta ua ia toe foi i le aiga. O lona alu ese na faigata tele i lana avā, o Maridan, ma o la atalii e toatolu. O le taimi nei ua mafuta faatasi le aiga i aso uma, ma sa lagona e Sep le faamanuiaina. Ua mafai ona ia talanoa atu faafesagai ma ona atalii, ma faamalosiau ia i latou ia toaga i le Ekalesia, ma fesoasoani ia i latou e saunia mo misiona.
Ina ua toe foi mai Seb, sa auauna atu Maridan o se faatonu o mataupu tau i le va i fafo a le Ekalesia mo siteki i le Aai o IIoilo. I lenei valaauga, sa fesoasoani ai o ia i nuu ma taitai o le malo e aoao e uiga i le Ekalesia. Sa ia tuu faatasi foi le Ekalesia ma lotu ma vaega o auaunaga e fesoasoani i le siakiina o mata, tuiga toto, ma isi poloketi. O Seb, i le taimi nei, ua avea ma fautua maualuga i le Siteki o Iloilo i Matu.
I le taimi lea, sa tumau pea le popole o le Au Peresitene Sili e uiga i le Au Paia i eria e maualalo le auai i le Lotu. I Filipaina na toeitiiti atoa le limaselau afe o le Au Paia, ae ua na o le 20 pasene na auai e le aunoa i sauniga. I le tali atu i lenei popolega, na valaau ai e Peresitene Hinckley ia Elder Dallin H. Oaks e auauna atu o se peresitene o le Eria a Filipaina ma Elder Jeffrey R. Holland e avea o se peresitene o le Eria o Chile, lea sa feagai ma luitau lava e tasi. Na amata e aposetolo uma e toalua a la auaunaga ia Aokuso 2002 ma s fuafuaga e nofoia ia tofiga mo le tasi le tausaga.
I Filipaina, na masani ona fono ai Elder Oaks ma ona fesoasoani ma taitai o siteki, misiona, ma eria. I le taimi o se fono o aoaoga faapitoa i Manila, na saunoa ai Elder Oaks e uiga i le taua o le opogi o se “aganuu o le talalelei” e faavae i luga o le ata o le faaolataga, poloaiga a le Atua, ma aoaoga a perofeta o aso nei. Na ia matauina o elemene o le aganuu a le talalelei o loo maua i aganuu i le lotoifale i soo se mea. Ae o loo i ai foi vaega o nei aganuu e le o ogatusa ma aoaoga a Iesu Keriso.
“O feagaiga tatou te osia i le papatisoga tatou te tuuto ai e ola i ni olaga ua suia,” na ia aoao mai ai. E tatau ona tatou suia elemene uma o le faiga o a tatou aganuu o i ai nei po o amioga o loo feteenai ma poloaiga o le talalelei, feagaiga, ma aganuu.”
Sa faamamafa mai e Elder Oaks o aganuu o le talalelei e faamalolosia aiga ma tagata taitoatasi e ala i le faalauiloaina o le ola mama, faaipoipoga i le malumalu, faamaoni, faalagolago o le tagata ia te ia lava, ma le paaga tutusa i le faaipoipoga. Na ia uunaia taitai ia ave le faamuamua i le Au Paia i le aoaoina atu o le aoaoga faavae o le Faaola ma le fausiaina o le faatuatua ia te Ia. Na ia fautuaina foi i latou e faamalosia a latou uarota e ala i le faapaleni o le galuega faafaifeautalai i taumafaiga sili atu o le toefaatoagaina mai ma le faia e le aunoa o gaoioiga a le autalavou laiti.
Ina ua maea le aoaoga, sa fesili atu Seb ma isi taitai o le Siteki a IIoilo i Matu i au epikopo a uarota e faailoa mai aiga e toe aumai i le lafu. Na latou talitonu afai e toe foi mai le tama ma le tina i le ekalesia, o le a latou aumaia foi a latou fanau mai latou. O le a avea le fanau o ni faifeautalai i le lumanai ma ni taitai i le Ekalesia.
I le avea ai ma se tamā o ni talavou, sa faapitoa le popole o Seb i le autalavou laiti. O le maualalo o le toaaga i korama a le Perisitua Arona ma vasega a Tamaitai Talavou sa o se faafitauli tele i la latou eria. E i lalo ifo o le 10 pasene o uarota ma paranesi i Filipaina na i ai uma korama e tolu o le Perisitua Arona o loo faagaoioia. Ma o le tele o iunite sa leai ni gaoioiga a le autalavou laiti i le ogatotonu o le vaiaso.
Na faailoa atu e le Siteki a IIoilo i Matu lenei faafitauli e ala i le faamalosiauina o uarota ia faia e le aunoa vasega a le autalavou laiti e tusa lava pe toatasi pe toalua tagata na i ai. Faatasi ai ma vasega ma korama o loo faagaoioia, e le afaina po o le a le laitiiti, e mafai e tamaitai ma alii talavou laiti ona valaaulia a latou uo i lotu i le Aso Sa ma gaoioiga i aso o le vaiaso.
E talitonu Seb e manaomia e talavou laiti ona auai i gaoioiga a le Ekalesia lea e mafai ai ona latou faia ni faauooga ma maua ai ni faataitaiga lelei. Ina ua faaalia e taitai o le lotoifale ni atugaluga e le o lava a latou paketi e totogi ai le tau o gaoioiga, sa tau atu e Seb ma isi taitai o le siteki e o e fuafua gaoioiga. Afai latou te manaomia ni tupe faaopoopo, e mafai e le siteki ona tuuina atu ia i latou.
Ao auauna atu Seb i le Au Paia i lana siteki, i le faaaogaina o mea na ia aoao mai ia Elder Oaks, na ia toe manatunatu i ana ia lava matafaioi i le ekalesia ma i lona aiga. Ina ua talanoa e uiga i le aganuu a le talalelei, na fautuaina e Elder Oaks le Au Paia Filipino e faasaga i le tuua o o latou aiga mo se taimi umi e faigaluega ai, e pei ona sa faia e Seb. O nisi tagata i Filipaina e le tele sa latou filifiliga ae ia faigaluega i fafo atu, ae na iloa e Seb o ia ma lona aiga e mafai lava na nonofo ma le fiafia ma maua mea mo i latou lava i le Aai o IIoilo.
Ma mo ia, e leai se aofai o mea faalelalolagi e maua e mafai ona sui ai le aluese atu ma le aiga i se taimi umi.
Ia Aperila 2003, na taunuu ai Blake McKeown e sefulufa tausaga le matua i le nofoaga autu o le siteki i Baulkham Hills, o se pitonuu i Sini, Ausetalia, ma lona uso e sefulufitu tausaga o, Wade. E masani lava, o le fale autu o le sieki sa o se nofoaga toafimalie ma filemu. Ae o nei, sa faatu ai se faleie tele i le vaega e paka ai taavale, ma sa tumu le fanua i talavolu aiti mai siteki i le salafa o New South Wales. Na latou o mai e auai i se konafesi Especially for Youth—lea ua taua nei i Ausetalia o le Time for Youth, po o le TFY.
Ina ua maea le manuia o le EFY i Brisbane, na faamalosiau atu le au peresitene o le eria i siteki i Ausetalia ma Niu Sila e faatulaga ni a latou lava gaoioiga. I le 2002, na faatulagaina ai e Mary McKenna ma lana komiti le TFY i Brisbane ma le tasi i Niu Sila i le 2003. O le TFY i Baulkham Hills o le mea muamua lea na faia i Ausetalia i fafo atu o Brisbane.
E ui lava o Blake na ola ae i le Ekalesia, na te lei vaai muamua lava i le toatele o talavou o le Au Paia o Aso e Gata Ai i se nofoaga e tasi. O i laua ma Wade na o mai mai Penrith, e tusa ma le fasefulu lima minute i le taavale mai le fale autu o le siteki a Baulkham Hills. Na i ai se latou vaega o talavou malolosi i la latou uarota, ae o le Au Paia o Aso e Gata Ai e na o le afa o le 1 le pasene o le faitau aofai o Ausetalia, o gaoioiga la a le autalavou—e oo lava i tulaga faalesiteki—e seāseā lava ona toatele ni tagata e auai ai. I le aoga maualuga a Blake, sa na o le toalua tagata o le Ekalesia e ese mai ia i laua ma lona uso.
Ina ua amata le TFY, sa seāseā ona la toe vaai ma Wade i le tasi ma le isi. I le mulimuli ai le faataitaiga a le EFY, o tagata uma na i ai i le gaoioiga na auai i se vaega laiti na taitaia e se faufautua talavou matua nofofua. I nei vaega, sa faataamilo ai le autalavou i gaoioiga. Sa latou auai foi i galuega auauna atu, faalogo i faigalotu ma lauga, aoaoina pese, suesue i tusitusiga paia, faamalosiau i le tasi ma le isi i se faaaliga taleni, ma auai i se siva.
O le autu o le konafesi o le “Matou Te Talitonu,” ma se tulimataiga i le kosi aoaoina o le seminare i lena tausaga, o le Mataupu Faavae ma Feagaiga. O failauga ma faufautua na aoao atu i le autu ao latou faasoa atu aafiaga faaleagaga ma faamalosia tagata auai e o mai ia Keriso, tatalo, tausia se api talaaga, ma ola i isi mataupu faavae autu o le talalelei. O le lotu molimau na tuuina atu ai foi i le autalavou le avanoa e faasoa ai a latou molimau e uiga i le Faaola ma Lana talalelei toefuataina i a latou tupulaga.
I le lotu, sa masani ona lelava Blake i sauniga, ae na ia sau i le TFY ma se faavae lelei o le faatuatua mai ona matua. O i laua ma Wade o le augatupulaga lona tolu o Au Paia o Aso e Gata Ai, ma o o la matua ma matua o matua sa avea i taimi uma o ni faataitaiga maoae o le faatuatua ma galuega.
O le polokalama a Alii Talavou sa faamalosia ai foi o ia. I le avea ai ma se tiakono, sa valaauina ai Blake o se peresitene o le korama. Sa fai atu lona epikopo e filifili ni ona fesoasoani se toalua ma se failautusi mai isi alii e toa sefulutasi i lana korama. Ina ua maea ona tatalo mo se taitaiga, na toe foi atu Blake i le epikopo i le vaiaso na sosoo ai ma igoa e tolu. Na faaali atu foi e le epikopo ia Blake lana ia lisi, lea na i ai foi ia alii lava e tasi. Na ia faatulagaina igoa i se faasologa ese, ae na ia toe fetuunai lana lisi ia tutusa ma le lisi a Blake. O le aafiaga na tuuina atu ai ia Blake le mautinoa i le tatalo ma lona tomai e taitai.
O Blake sa le o se tagata e faamasani gofie, ae sa ia fiafia e faia ni uo fou mai isi uarota ma siteki i le TFY. Ae i le faaiuga o aso taitasi, e foi atu ai i laua Wade i le fale e fai se malologa ae lei toe foi atu i le taeao po o le aso e sosoo ai.
E leai se tasi oi laua na matauina le ala na faia ai e aso e tolu o le TFY se aafiaga ia i laua, ae sa vaaia e lo la tina ia suiga. I le lotolotoi o mea malie ma taaloga, o le TFY na tuuina atu i le autalavou ni avanoa e lagona ai le Agaga i se siosiomaga fou. Ina ua toe foi mai Blake ma Wade, na sili atu lo la taulai atu i tusitusiga paia ma si mautinoa teisi atu i a la molimau.
I le aoauli o le aso 10 o Ianuari, 2004, na faatasi ai Georges A. Bonnet ma Peresitene Hinckley, Elder Russel M. Nelson, ma le afe o le Au Paia i Aferika i Sisifo i totonu o se faletaalo tele i Accra, Kana Na susū atu le perofeta i le aai e faapaia lona malumalu fou. Ae a o lei faia le faapaiga, na ia faiatu i tamaiti ma le autalavou o siteki ma itu o Kana e faamanatu le faamoemoe i se fiafiaga faaleaganuu e faaalia ai musika fiafia ma siva. Na talitonu o ia o le faia oi faafiafiaga faamanatu i faapaiaga o le malumalu o le a fesoasoani ai i tagata talavou e maua ni manatuaga le faagaloina ma fiafia ai i le Ekalesia.
Ina ua maea le tatalo amata, na oofu vaega i toniga felanulanuai i luga o le tulaga telē na teuteuina i ata tetele matagofie. O nisi o le au faafiafia na usuina pese. O isi na faia siva FaaKana, e pei o le Adowa ma le Kpanlogo, pe taina musika faaleaganuu i temupalau ma foafoa ofe.
O se mea taua o le aoauli na oo mai ina ua o atu faifeautalai i luga o le tulaga ma usuina le vii a faifeautalai “Tofia e Auauna.” E valuselau ma le limasefulu tamaiti Peraimeri, na ofu papae uma, na o atu foi i luga o le tulaga ma usuina le “O Au se Atalii o le Atua” faatasi ma faifeautalai.
O le taeao na sosoo ai, na ala ae George ma le agaga o le faafetai. Na iu ina oo mai le aso o le faapaiaga. I le ta o le iva, na ia faatasi atu ma Peresitene Hinckley ma Elder Nelson i le potu selesitila mo le sauniga muamua o le faapaiaga. Na amataina i le sauniga o le maatulimanu na taitaiina e Peresitene Hinckley. Ina ua maea, ona saunoa lea o le faatina ma le peresitene o le malumalu, na sosoo ai ma Elder Nelson ma Elder Emmanuel Kissi, ua avea nei ma fitugafulu eria pulefaamalumalu, o lē na ia taitaia le Au Paia i Kana i le taimi o le taofiga.
I lana lauga, na saafi ai Elder Kissi ia Joseph William Billy Johnson, o lē sa i ai i le faapotopotoga. Sa ia saunoa foi e uiga i isi Au Paia na muamua atu o e na mafai ai ona vave le tuputupu ae o le Ekalesia i Kana.
“Ua taunuu moni a tatou miti,” o lana tala lea.
I le latalata i le faaiuga o le sauniga, na saunoa ma le lotomaualalo Peresitene Hinckley e uiga i le fesoasoani a le Alii i le fausiaina o le malumalu. “Ua faafofogaina e le Alii a matou tatalo,” na ia molimau ai. “Ua Ia faafofogaina a outou tatalo. Na Ia faafofogaina tatalo a le tele o tagata, ma ua tu nei le malumalu ua maea.”
Ona faapaia lea e le perofeta le maota. “Matou te faafetai i Lau Afio mo le usoga o loo i ai ia i matou, lea e le mafai e le lanu o le pau po o le eleele na fanau ai ona tuueseeseina i matou o atalii ma afafine o Lau Afio ua tauave i o matou luga feagaiga paia ma faamauina,” na ia tatalo ai. “Talosia ia salalau atu le galuega a Lau Afio i lenei nuu ma malo tuaoi atunuu tuaoi.”
Mulimuli ane i lena aso, i le taimi o le sauniga lona tolu o le faapaiaga, na valaau atu ai Peresitene Hinckley ia George e lauga. I le tei, na oo atu ai George i le pulelaa. “Ou te manao ia tou iloa o lo tatou Atua o se Atua o vavega,” na ia molimau ai. “E tutupu vavega ona o le faatuatua, ma e toatele i latou na faaalia o latou faatuatua e ala i le tatalo ma isi ituaiga o tapuaiga ina ia tupu lenei aso maoae.”
“Ou te talitonu o le i ai o se malumalu ua faapaiaina i Aferika i Sisifo atonu o le tasi lea o mea sili ona taua ua tupu talu mai le Togiola a Iesu Keriso ma le toefuataiina o mea uma,” na ia faaauau ai. “E faitau miliona tagata Aferika ua maliliu ua olioli faatasi mai tatou i le asō.”
Ina ua maea le faapaiaga, na faatasi atu ia George ia Presitene Hinckley, Elder Nelson, Elder Kissi, ma isi e asiasi ia John Kufuor, o le tagata ua sui iaJerry Rawling o le peresitene o Kana. Talu mai le i ai i le ofisa i le amataga o le 2001, sa fesoasoani ma lagolago lava Peresitene Kufuor ma lana pulega i le taimi o le fausiaina o le malumalu. I le 2002, na ia asiasi atu ai i le Au Peresitene Sili i le Aai o Sate Leki e aoao atili e uiga i le Ekalesia ma faafetaia le Au Paia o Aso e Gata Ai mo la latou saofaga o fesoasoani alofa ma faalelotu i Kana. Na ia auai atu foi i le fale tatala talu ai nei o le malumalu o Accra ma maua ai se maimoaga i le fale. O le mea sa ia vaaia na faagaeetia ai o ia.
“Ua maua nei e le tou ekalesia,” na ia faiatu ai ia Peresitene Hinckley, “ua maua le sitiseni i Kana.”
Ia Iuni 2004, sa faatalitali Angela Peterson i lana taavale mo se suesuega ma le faaaluga o le kasa e lata i Uosigitone, DC. Na i ai ni taavale na tutu i ona luma atu, o le laina e taamilo pei se gata i le paka o taavale. Na ia iloaina, o lenei mea o le a alu ai se taimi.
Nai lo le faaolaola ai pea o lana taavale, sa ia tapeina le afi ma vili i lalo ia faamalama e fiafia ai i le savili o le aoauli o le taumafanafana. Ao ia faatali, sa ia uu mai se kopi “O Le Aiga: O Se Folafolaga i le Lalolagi,” lea sa ia aumaia. I nai vaiaso na muamua atu, na valaaulia ai e lana peresitene o le siteki tagata o lana uarota o talavou nofofua matutua e tauloto le folafolaga, ma folafola mai o le faia o lea mea o le a aumaia ai faamanuiaga ia i latou Sa talitonu Angela i lea folafolaga, o lea sa ia taumafai ai ma le filiga e tauloto le pepa o faamatalaga.
I le iva tausaga talu na fofogaina mai le folafolaga i le aiga i le fonotaga a le Aualofa aoao ia Setema 1995, na avea lea ma vaega tutotonu o savali a le Ekalesia e uiga i aiga. Na faatulagaina e matua o latou fale i ona mataupu faavae, sa faavaa e tagata o le Ekalesia ma tautau i luga o o puipui, ma na ofaina atu e le Iunivesite o Polika Iaga se kosi atoa i lona itulau e tasi o le tusitusiga. Sa talavou Angela i le taimi na faailoa mai ai e Peresitene Hinckley le folafolaga, ma na te le o manatua pe na ia faitauina muamua ao lei valaaulia ai e le peresitene o le siteki.
Ina ua uma lana aoga maualuga, na siitia atu Angela mai lona nuu laititi o Stirling, Alberta, Kanata, ina ia auai i le Iunivesite i Logan, Iuta. Ina ua uma le faauuga, sa ia maua se galuega faataitai i le Ofisa o Mataupo le Va i Fafo a le Ekalesia i le Aai o Sate Leki ao lei faamautuina se avanoa tumau i lona Ofisa Faavaomalo ma Mataupu Faalemalo i Uosigitone, DC. O magaala i le taulaga, na laina i fale mataaga ma maafaamanatu ma ofisa o le malo, sa matuai ese lava mai auala pefu o lona talavou.
Ina ua oo Angela i le pito i luma o le laina, sa alu atu o ia i le potu faatalitali ao siakiina e se inisinia lana taavale. Na umi se taimi o le suesuega nai lo le mea na ia mafaufauina, ma sa amata ona popole ao ia vaai atu i isi tagata o omai ma o ao faaauau pea ona faatali o ia. Pe na i ai se mea o faaletonu i lana taavale? E fia se totogi e toe faaleleia ai?
Mulimuli ane, ina ua mavae se taimi na foliga mai o ni itula, na sau le inisinia i totonu ma tau atu ia te ia na pasi le suesuega o lana taavale.
O le faafetai, na totogi e Angela ma aluese atu ma le fale, sa le mautonu lava pe aisea na umi tele ai. I lana taavale, na ia maua atu le inisinia o faatali mai mo ia.
“Tamaitai,” na ia fai atu ai, “Ou te fia faatoese atu mo le umi tele o le suesueina o lau taavale.”
Na ia tau atu ia Angela sa tosina atu o ia i le kopi o le folafolaga i le aiga sa i luga o le nofoa o le pasese. Na ia faitau ma toe faitau i ai, ma ootia i lana savali e uiga i aiga.
“O le a le ekalesia lea? O le a lenei pepa o faamatalaga i le aiga? E mafai ona omaua sau kopi?” na ia fesili atu ai ia te ia. “Fai mai na tusia e aposetolo. O lona uiga e te fai mai ia te au o loo i ai aposetolo i le fogaeleele i aso nei e pei foi ona i ai i taimi o Keriso? Faamolemole, e tatau ona ou iloa.”
I le tei, na aoao mai ai e Angela ona manatu. “O loo i ai aposetolo ma perofeta i le fogaeleele, e pei lava o le taimi o Iesu Keriso,” na ia fai atu ai, ma faamatala puupuu atu e uiga ia Iosefa Samita ma le Toefuataiga o le talalelei. Sa ia tuuina atu ia te ia lana kopi o le folafolaga i le aiga ma se Tusi a Mamona.
Ona ia tau atu lea ia te ia lona igoa ma le numera o le telefoni e faasoa atu i faifeautalai. Ao alu atu Angela i le fale mai le faleinisinia, na ia emoemo e taofi ai loimata, ma faafetai na ia tuua le folafolaga i luga o le nofoa o le pasese.