Ua Auauna Atu ia Elder Oaks ma Elder Holland i Au Paia i Alalafaga

E amata atu ia Aokuso, o Elder Dallin H. Oaks ma Elder Jeffrey R. Holland o le Korama a Aposetolo e Toasefululua o le a auauna atu i ni tofiga i fafo atu o le Iunaite Setete mo se vaitaimi e tasi le tausaga. O Elder Oaks o le a auauna atu e avea o se Peresitene o le Eria i Filipaina, ma Elder Holland o le a auauna atu e avea ma Peresitene o le Eria i Chile.

O nei tofiga e faailoga ai le uluai taimi i le fiasefulu o tausaga ua aumau ma pulefaamalumalu ai se sui o le Korama a le Toasefululua i fafo atu o le Iunaite Setete. O Elder Ezra Taft Benson (1899–1994) ma Elder Mark E. Petersen (1900–84) sa pulefaamalumalu o ni Aposetolo i Misiona a Europa ma Europa i Sisifo. O Elder David O. McKay (1873–1970) na auauna atu foi o se peresitene o le misiona a o avea ma se sui o le Korama a Aposetolo e Toasefululua, sa pulefaamalumalu ai i le Misiona a Peretania i le amataga o le 1920.

O le tofiga o Elder Oaks ma Elder Holland e avea o ni Peresitene o Eria o loo taulai i le faafetaiaia o se luitau sa feagai ma le Ekalesia mo le tele o ni tausaga i eria tau atia’e: saosaoa o le faatupulaia. “O le faatupulaia o lo tatou faafitauli silisili lea,” na saunoa ai Peresitene Gordon B. Hinckley i se faatalanoaga ma le Deseret News. ”Ma o se faafitauli matagofie.“

I o la tofiga fou, o le a fesoasoani ai ia Elder Oaks ma Elder Holland i le aoaoina o taitai fou o le Ekalesia ma fesoasoani i tagata fou ina ia malamalama i le Ekalesia ma auai i le malumalu. O tofiga fou o le a mafai ai foi e sui o le Korama a Aposetolo e Toasefululua ona maua se malamalama faaopoopo i le ausia o ia ituaiga manaoga.

O Chile ma Filipaina na maitauina ai le saoasaoa o le faatupulaiaina i tausaga ua mavae. I Filipaina, o le aofai o le Ekalesia ua faatupulaia i le latalata atu i le afa miliona, o le tele o lena faatupulaia o le sefulu tausaga ua tuanai. O le faitau aofai o tagata o le Ekalesia i Filipaina i le 1984 e 76,000, o le 1990 e 237,000, ma o le taimi nei ua toetoe lava 496,000. E silia ma le 1,200 faalapotopotoga, ua faatulagaina i ni siteki se 80 ma ni misiona se 13, o loo i ai nei i lenei atunuu. O le Malumalu o Manila Filipaina na faapaiaina i le 1984.

O Chile e silia ma le 520,000 le Au Paia o Aso e Gata Ai. Ina ua faapaiaina le Malumalu o Santiago Chile i le 1983, e tusa ma le 140,000 tagata o le Ekalesia sa i ai i le atunuu. O le 1988 na avea ai Chile ma atunuu lona fa i le lalolagi e ausia le 50 siteki. I le va o le 1983 ma le 1993, o le aofai o tagata Chile ua auai i le Ekalesia faapea ma siteki ua faaluaina, ma avea ai Chile ma atunuu sili ona vave faatupulaia le faitau aofai o tagata o le Ekalesia i Amerika i Saute. O le faaauauina o le faatupulaia, e aofia ai le foafoaina o ni siteki fou se 26 i le va o le 1994 ma le 1996, ma oo atu ai i le faavaeina o le Eria a Chile lava latou ia i le 1996.