O le Isi Atalii Faama’imau ‘Oa
Uso e ma tuafafine, ou te molimau atu e leai se tasi o i tatou e tau le faapelepeleina pe tau le alofagia e le Atua nai lo isi. Ou te molimau atu e alofa o Ia ia i tatou uma—, o e le atoatoa, o e popole, o e manatu na o i latou lava, ma tagata uma lava.
O se tasi o faataoto e le mafaagaloina a le Faaola na faamatalaina o le tala lea i se uso laitiiti ma le faavalevalea o le na alu atu i lona tama, ma talosaga atu i ai mo lona vaega o le ‘oa, ma tuua le aiga ina ia faama’imau lona tofi e pei ona ta’ua i le tusi paia, i se “olaga soonafai.”1 E le’i umi ae le toe vaaia ni ana tupe ma ni ana uo nai lo le mea na ia manatu i ai—e faapena lava i latou—ona oo mai ai lea o se aso ua le lelei mea uma—ma e faapea lava. I le faaletonu o nei mea uma na avea ai o ia ma se fagapuaa, sa matuai fia ‘ai lava, o lea na aveesea ai mea sa ia te ia ma le mitamita ae ua “tupu lona manao i atigi mea e ‘aina e puaa ia ma’ona ai o ia.” Ae le’i mafai e lena toomaga ona maua ai lona fiafia.
Ona faapea mai ai lea o le mau ma le faamalosiau “ona atamai ai lea o ia.” Na fuafua o ia e saili lona auala i le aiga, ma le faamoemoe ia tau lava ina ia talia o ia e avea ma se auauna a lona tama. O foliga lelei ma le naunautai ma le faamaoni o le tama o lenei tamaitiiti na tamo’e mai e faafetaia’i ia te ia ma sogi atu ia te ia o se tasi lea o vaaiga faamomoiloto i totonu o tusitusiga paia uma. O loo faamatala mai ai faapea o fanau uma lava a le Atua, o e amio faaletatau pe leai, le matuai pulunaunau o le Atua ina ia tatou toe foi atu i le puipuiga a Ona aao.
Ae afai tatou te matuai aafia lava i le tala a lenei atalii laitiiti, e mafai ona tatou misia, pe afai tatou te le faaeteete, ia le tala i le atalii matua, aua o le laina muamua lava o le tala a le Faaola e faitauina, “O le tasi tagata e toalua ona atalii”—ma atonu e mafai ona Ia faaopoopo atu faapea, “o i la’ua uma na se, ma o i la’ua uma foi na moomia ona toe foi mai i le fale.”
Na toe foi mai le atalii laitiiti, ma sa faaofu o ia i le ofu talaloa, ma tuu atu foi se mama i lona lima, ona sau ai lea o le atalii matua. Sa tele ona tiute, ma galue ma le faamaoni i le fanua ae o lea ua foi mai. O le manatu, o malaga uma nei ua toe foi mai i le fale, e ui e eseese mea na o mai ai, ae o le vaega sili lea ona taua i lenei tala.
Ina ua latalata atu o ia i le fale, sa ia faalogoina ia laaupese o ta ma le siva.
“Ua valaau atu ia i le tasi auauna, [ia maitau sa i ai ana auauna] ma fesili atu po o le a le uiga o nei mea.
“Ua fai atu [le auauna] ia te ia, Ua sau lou uso; ua fasi ai foi e lou tama le tamai povi peti, ina ua toe oo mai o ia o ola.
“Ona ita ai lea [o le uso matua], e le mafai ona ulufale i ai; ona alu atu ai lea o lona tama i fafo, ua faaoleole ia te ia.”
Ua outou iloa le talanoaga sa la faia. E mautinoa lava o lenei tama, o lona tiga ona o se fanau na alu ese mai le aiga ma mau faatasi ma puaa o lea ua faateteleina nei i le iloaina lea o lenei uso matua, ma le atamai, o se toamanumanu i le uso laitiiti e pei ona masani ai uso matutua, ua ita ina ua toe foi mai lona uso i le aiga.
E leai. Ou te faasa’oina lo’u tagata. O lenei atalii e le o ita tele o ia ona ua foi mai le isi a ua ita ona o loo fiafia i ai ona matua. O le lagonaina o le le talisapaiaina ma atonu faapea ma sina inoino, o lenei atalii usiusitai—ma e faapitoa lava lona usiusitai—ua galo mo sina taimi aua e le’i oo lava o ia i se tulaga o le taugaeleelea po o le faanoanoa, o le fefe po o le inoino ia te ia lava. Ua galo ia te ia mo sina taimi o tamai povi uma lava o loo i ai i le faatoaga o ana ia faapea ma ofu talaloa uma o loo teuina i le fale ma mama uma o loo i lona tama. Ua galo ia te ia mo sina taimi o le faamaoni o le a tauia pea.
Leai, o le tagata na toetoe a i ai mea uma ma o le tagata na galue malosi, i se auala manaia ina ia maua ai, sa le’i maua ia te ia le mea e tasi lea e mafai ai ona avea o ia ma se tagata atoatoa o le Alii na ia taulalata atu i ai. E le’i oo o ia i le alofa ma le alofa mutimutivale, o le lautele o le alofa moni o se vaaiga mamao, e iloa ai, o lenei toe foi mai e le o se faasagatau mai. O lona lava uso. E pei ona faaoleole atu lona tama ia te ina ina ia iloa, o ia lena na oti, a ua toe ola mai; na leiloa foi a ua maua.
E mautinoa lava o lenei uso laitiiti sa avea ma se pagota—o se pagota o le agasala, faavalevalea ma se sai puaa. Ae o le uso matua o loo ola foi i se tulaga saisaitia. E le’i mafaia foi e ia ona tatalaina o ia mai manatu o loo saisaitia ai o ia. Sa matuai lofituina o ia i le loto leaga.2 Na ia lagonaina le le amanaiaina o ia e lona tama ma le aveesea o lana aia e lona uso, e ui e le o aofia ai se tasi o ia mea. Na afaina o ia ona o mafaufauga. E pei lava o ia o le tala anamua ia Tanitalusi o Eleni—sa gata le vai i lona auvae ae sa fia inu pea o ia. O se tasi o loo taumate le matuai fiafia lava i lona olaga ma le faamalieina i lona tamaoaiga, ae faafuaseia ona lagonaina le le fiafia ona e mafua mai ona o se tasi ua i ai foi ni ona tamaoaiga lelei.
O ai lea e musumusu mai ma le atamai i o tatou taliga e faapea o se meaalofa e tuuina atu i se tasi e tuuitiitia ai ia faamanuiaga ua tatou mauaina? O ai lea na te tuuina mai le lagona ia i tatou faapea afai e soisoi le Atua i le isi tagata ona mautinoa lea o loo Ia faauu mai ia i tatou? Ua tatou taufai iloa uma le o loo faia lenei mea–o le tama o pepelo uma.3 O Lusifelo, o lo tatou fili e toatasi, o le na faapea mai talu mai le amataga ma o loo faapea mai i tagata uma, “Tuu mai ia ia te a’u le mamalu.”4
O loo faapea mai o le lotoleaga o le agasala lea e tasi e le saunia se tasi e ta’uta’u atu, ae o lona faasalalauina atu ma lona faanaunauga e mafai ona fautuaina mai i totonu o se alagaupu faaTenimaka anamua, “Afai o le lotoleaga o se fiva, semanu ua mama’i uma le lalolagi.” O le failotu o loo i totonu o le tusi a Chaucer o le Canterbury Tales [Talafatu a Kanepera] na tagitu’i i ai aua e tele ona aafiaga—e mafai ona ia faaleagaina soo se mea, e aofia ai mea mama uma ma taleni, ma e mafai ona faatiga e mea uma lava, e aofia ai soo se mea lelei ma fiafia.5 O nisi e foliga mai ua tutupu lapopoa i la tatou vaai, o lea tatou te manatu ai e tatau ona tatou tutupu laiti i tatou. O lea la, o le mea e leaga ai, ua tatou amio a’i faapea i nisi taimi.
E faapefea ona tupu lenei mea, aemaise lava pe a tatou matuai moomoo ina ia aua ne’i tupu? Ou te manatu o se tasi o mafuaaga ona o aso uma lava tatou te vaai ai i faaosoosoga lea e ta’u mai ai ia i tatou o mea ua tatou maua e le o lava lea. O loo i ai se tasi po o se mea foi o loo tauina mai pea lava ia i tatou faapea o loo manaomia ona tatou aulelei ia sili atu po o le matuai maumea foi, ia sili atu ona viia i tatou po o le sili atu ona taliaina nai lo lo tatou vaai ia i tatou o ni tagata. Ua ta’uina mai ia i tatou faapea e le o lava ni a tatou meatotino pe le o lava foi ni fiafiaga o loo tatou o i ai. O loo osofaia i tatou i le manatu e faapea o loo tatou faananau pea i mea o loo naunau i ai le lalolagi.6 O nisi aso e pei ai lava o loo lokaina i tatou i totonu o se potu o se fale tele ma le vateatea lea na o le pau le mea o loo sau ai i le TV o se ata faasolo e le muta e faaulutalaina “O Mafaufauga Faivavale.”7
Ae le faapea le auala e galue ai le Atua. O le tama o loo i lenei tala na te le’i ulagiaina lana fanau. E na te le’i faatusatusaina i la’ua i o latou tuaoi. Na te le’i faatusatusaina foi le tasi i le isi o i la’ua. O ana taga na faaali atu ai le alofa i le tasi e le’i faapea ua teenaina ai pe aveesea ai le alofa mo le tasi. E paia lona alofa i nei atalii uma. Na ia faaali atu le alofa moni i lana fanau uma. Ou te talitonu o loo faatasi le Atua ma i matou i le auala o loo faatasi mai ai lo’u toalua o Pat i la’u pesepesega. O ia o se tagata e tomai tele i musika, o se matuai atamai lava faamusika, ae le mafai ona ou mauaina se nota faamusika pe a a’oina. Ae peitai ou te iloa e alofa o ia ia te a’u i se auala faapitoa pe a ou taumafai ou te pese. Ou te iloaina aua e mafai ona ou iloaina i ona mata. O mata lava o le alofa.
Na tusia e se tasi tagata maitau lauulu: “I totonu o se lalolagi o loo fai ai pea le faatusatusaina o tagata, o le faatulagaina o i latou i le sili atu o le atamai po o le vaivai o le atamai, o le sili atu ona aulelei pe leai, o le sili atu ona faamanuiaina pe leai, e le faigofie ai ona talitonu moni i se alofa [faalelagi] lea e le faapea ona faia. Pe a ou faalogo i se tasi o faaviivii,” e faapea mai o ia, “e le faigata ona ou mafaufau ia te a’u lava ia i lo’u le agavaa; pe a ou faitau i le lelei ma le agalelei o isi tagata, e le faigata ona ou maofa pe lelei ma agalelei lo’u tagata e pei o i latou; afai ou te vaai i ipu, o taui, ma faailoga o tauaaoina atu i tagata faapitoa, e le mafai ona ou aloese mai lo’u fesiligia o a’u lava pe aisea na le oo ai lena mea ia te a’u.”8 Afai tatou te le teenaina e mafai ona tatou iloaina lenei tulaga e faatupuina e le lalolagi, o le a i’u ina oo mai ai se vaaiga ita ma le maasiasi i le Atua ma se vaaiga faatafuna o i tatou lava. O le tele o poloaiga o le “aua e te,” e faauiga lea i lo tatou tausia o i tatou mai le faaonoono i isi, ae ua ou talitonu o le poloaiga o le aua e te manao o lona uiga o le taofia lea o i tatou mai le faaonoono ia i tatou lava.
E mafai faapefea ona tatou faatoilaloina sea ituaiga lagona lea ua taatele e toetoe lava o totonu o i tatou uma? O le mea e tasi e mafai ona tatou faia e pei ona faia e nei atalii e toalua ma amata ai lo tatou ala e toe foi atu ai i le Tama. E tatau ona tatou faia ma le faavavevave ma le lotomaualalo pe a valaauina ai i tatou. E mafai ona tatou faitauina i luga o le ala o tatou faamanuiaga ma e mafai ona tatou faamalo atu i taumafaiga a isi. O le auala sili lena e mafai ona tatou auauna atu ai i isi, o le gaoioiga sili lena e mafai ona tatou faia e fesoasoani ai ia i tatou e atinaeina le alofa mo isi. Ae o le a le lava lea. Pe a tatou leiloloa e mafai ona “tatou atamamai ai lea,” ae o le a le mafai ona tatou “atamamai pea,” ma, o le faavavau, e le mafai ona “tatou laveaiina i tatou lava.” E na o le Tama ma Lona Alo Pele e Toatasi e mafai ona faia lena mea. E na o i laua ua i ai le faaolataga. O lea ia tatou tatalo ai ina ia La’ua fesoasoani mai ia i tatou, ina ia La’ua “o mai” e talia i tatou ma avatu i tatou i le tausamaaga ua La’ua saunia.
O le a la faia lenei mea! Ua tutumu ia tusitusiga paia i folafolaga e faapea ua lava le alofa tunoa o le Atua.9 O le mauaina o lea alofa tunoa o se tasi lea vaega e le mafai e se tasi ona tauivi pe tauva i ai. Na tautino mai e Nifae e faapea o le Alii e “alofa o ia i le lalolagi” ma ua ia tuusaolotoina mai le faaolataga.
“Po ua poloai atu ea o [Ia] i nisi ia le au i latou i lona agalelei?” na fesili ai Nifae. E leai! “O tagata uma … e tutusa lava ma ua le vaoia se tasi [i Lona aao].”
“O mai ia ia te a’u o outou tuluiga uma o le lalolagi,” na Ia aioi mai ai, ia outou faatau le suasusu ma le meli ae leai se tupe.10 E maua e tagata uma le avanoa e pei o isi. Ola fifilemu. Ola mautinoa. Ola e aunoa ma le fefe ma le lotoleaga. Ia mautinoa le tamaoaiga o le Tama Faalelagi o loo tuuina atu pea ia te oe e le aunoa.
A tatou faia lenei mea o le a mafai ona tatou fesoasoani atu i isi, ia tatalo faamaoni ina ia i ai faamanuiaga i o latou luga e pei foi ona latou tatalo mo i tatou. E mafai ona tatou faamalo atu i soo se taleni ma malosiaga, i soo se mea e tuuina atu i ai, ina ia taulalata atili atu ai le olaga nei i le lagi.
O le a fesoasoani ia i tatou pe a tatou manatua pea le matagofie o le faatulagaina e Paulo o mea e faatauaina—“A o lenei, o tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.”11 Ua ia faamanatu mai ia i tatou faapea o i tatou uma o le tino o Keriso, ma o tagata uma lava, e tusa pe malosi pe vaivai, e faapelepele, aoga, ma taua uma. Tatou te lagonaina le loloto o lana aioiga ina ia ‘aua ne’i i ai ni maseiga i tagata … a ia fetausiai. Ma [afai] e mafatia le isi tagata, ia mafatia faatasi uma ai tagata; pe [afai] e viia, ia olioli uma tagata… .”12 O lena fautuaga le mafaatusalia e fesoasoani ai ia i tatou ia manatua lena upu faaPeretania o le “generosity” e tutusa lava lona upu faavae ma le upu “genealogy,” e maua mai uma i le upu Latina, o le genus, o lona uiga o le ituaiga e tasi, o le aiga e tasi po o le ituaiga e tasi.13 O le a tatou iloaina pea le faigofie ona alofa atu pe a tatou manatua o lenei tagata ua alofagia o se tasi lava o lo tatou aiga.
Uso e ma tuafafine, ou te molimau atu e leai se tasi o i tatou e tau le faapelepeleina pe tau le alofagia e le Atua nai lo isi. Ou te molimau atu e alofa o Ia ia i tatou uma—, o e le atoatoa, o e popole, o e manatu na o i latou lava, ma tagata uma lava. Na te le fuaina a tatou taleni poo o tatou foliga, o a tatou galuega po o mea ua tatou maua. Na te faamalo i tagata taufetuli uma, ma tauvalavalaau mai i le taufetuliga ia tetee atu i le agasala, ae le o le faatautava o le tasi i le isi. Ou te iloa afai o le a tatou faamaoni, o le a i ai se ofu talaloa atoatoa o le amiotonu ua saunia ma faatalitali mai mo tagata uma,14 “o ofu … na taina … ma faasinasinaina i le toto o le Tamai Mamoe.”15 Ia tatou fefaamalosia’i i a tatou taumafaiga uma ina ia manumalo i lena taui, o la’u tatalo faatauanau lea, i le suafa o Iesu Keriso, amene.