O Le Faatuatua Ua Matou Savavali Ai

Peresitene Gordon B. Hinckley

Tatou te taunuu i le mea tatou te le iloa, peitai, e faamalamalama e le faatuatua le ala. Afai tatou te atinaeina lena faatuatua, o le a tatou le savavali lava i le pouliuli

O le mea lea matou te lauga atu ai, o se taeao matagofie o le Sapati ia Aperila. Ua taufai ola tulipe ma e le o toe mamao ona taufai fuga mai lea ma le matagofie. Sa foliga umi tele le taumalulu, ma sa taumate pe oo mai le tautotogo, a o lea ua oo mai. Na tatou iloa lava o le a oo mai. E faapena lo tatou faatuatua e faavae i mea na tatou oo i ai i tausaga ua mavae.

E faapena foi i mataupu o le agaga ma le loto. A o soifua alii po o tamaitai taitoatasi i le olaga, e oo mai taimi pogisa o le le mautonu, o le lotovaivai, ma le le fiafia. O ia tulaga, e toaitiiti e faalagolago i le mana o le faatuatua, ae toatele e tautoai i le pogisa ma oo ai lava ina leai se faamoemoe.

O la’u talosaga ia te outou i lenei taeao, o se talosaga o le faatuatua, ma o le faatuatua “o le faalagolago lea i mea ua faamoemoe i ai, o le mautinoa lea o mea e le o vaaia” (Eperu 11:1), e pei ona faamatala mai e Paulo.

I le faagasologa o le liua, e itiiti lava mea e faalogo ai le tagata sailiili i le Ekalesia. Atonu e itiiti foi ni nai mea e faitau ai e uiga i le Ekalesia. E le malamalama, e le mafai foi ona malamalama i le atoaga matagofie o le talalelei. Peitai, afai e faamaoni i lana sailiga, afai e naunau o ia e alu ifo i ona tulivae ma tatalo ai, e pa’i atu le Agaga i lona loto, atonu e matua mama lava lana pa’i atu. E faasinoina o ia i le itu sa’o. E itiiti sina mea e vaai i ai o mea na te le i vaaia lava muamua. Ma o le faatuatua, pe na te iloaina o se faatuatua pe leai foi, na te faia ai ni nai laa ma le faaeteete. Ona tatalaina ai lea mo ia o se isi malamalama sili atu.

O aso lava ia ua leva, sa ou faigaluega ai i se tasi o kamupani fai auala mo nofoaafi, o a latou nofoaafi ua iloga ai alatanu i nei atumauga o sisifo. E masani lava la ona ou tietie ai i nofoaafi. O le taimi sa i ai afi e alu i le ausa. O na nofoaafi saualii e ese le tetele ma saosaoa ma toe matautia. E masani ona ou mafaufau, pe mafai faapefea e le enisinia ona alu i se malaga umi i le po atoa. Ona ou iloa ai lea, e le o se malaga umi e tasi, a o le tasoo o malaga pupuuu. Sa i ai se sulu malosi o le afi, e faamalamalama ai le mamao e 400 i le 500 iata. Sa na o le pau lena o le mamao sa iloa e le enisinia, ma sa lava lena, aua sa i ai pea lava i ona luma i le po atoa seia tafa mai ata o se aso fou.

Sa fetalai le Alii e uiga i lea faiga. Na Ia fetalai mai: “O mea foi e le faamanuiaina e le mai le Atua, a o le pouliuli.

“O mea mai le Atua o le malamalama lava ia; o le talia foi le malamalama, ma tumau pea i le Atua, e faateleina atu i ai le malamalama; ma e tuputupu pea le pupula o lea malamalama seia oo mai le aso atoatoa ona lelei” (MFF 50:23-24).

Ma e faapena foi la tatou malaga i le faavavau. E taitasi a tatou laa i le taimi. A o tatou faia, tatou te taunuu i le mea tatou te le iloa, peitai, e faamalamalama e le faatuatua le ala. Afai tatou te atinaeina lena faatuatua, o le a tatou le savavali lava i le pouliuli.

Sei ou faamatalaina atu se tala i se tamaloa ou te iloa. O le a ou le ta’u atua lona igoa, nei tei ua ma. Sa lagona e lona toalua, e i ai se mea o loo misi i o la’ua olaga. Sa la talanoa ma se tasi o lona aiga e auai i le Ekalesia. Sa fautuaina e le tagata lea o lona aiga, ia telefoni i faifeautalai. Ma sa ia faia. Peitai, sa tausuai lana tane i faifeautalai ma sa ia fai atu ia te i la’ua e aua nei toe o atu.

Sa mavae ni masina. I se tasi aso, na maua e se tasi faifeautalai ni faamaumauga o lenei asiasiga, ona tonu lea o le a la toe taumafai i ai ma lana soa. O ia o se faifeau umi mai Kalefonia, e ese le mata ataata.

Sa tuitui i la’ua i le faitotoa, ma sa tatala e le tamaloa le faitotoa. E mafai ona ma ulufale atu mo sina minute? Sa la fesili ai. Sa ioe mai le tamaloa.

Sa fai atu le faifeautalai, “Ou te le iloa pe e te iloa tatalo.” Sa tali ane le alii, na te iloa le Tatalo a le Alii. Sa fai atu le faifeautalai, “E lelei, ae sei ou faamatalaina atu ia te oe le faiga o se tatalo patino.” Sa ia faamatala atu i ai, pe a tatou te tootutuli ma se uiga faaalia o le lotomaualalo i luma o le Atua o le lagi. Sa tootuli le tamaloa. Ona faapea atu lea o le faifeautalai, “Tatou te faalagi o Ia o lo tatou Tama i le lagi. Ona tatou faafetai atu lea ia te Ia mo le anoano o ana faamanuiaga, e pei o le soifua maloloina, o a tatou uo, o meaai. Ona tatou ole atu lea mo Ana faamanuiaga. Tatou te faaali atu o tatou faamoemoega ma manaoga mai le ta’ele o o tatou loto. Tatou te ole atu ia te Ia e faamanuia i latou e manaomia le fesoasoani. Tatou te faia uma nei mea i le suafa o Lona Alo Pele, o le Alii ia o Iesu Keriso, ae faaiu i le ‘amene.’”

O se aafiaga manaia i le tamaloa. Sa ia mauaina sina sulu itiiti ma se malamalama, o se pa’i atu o le faatuatua. Sa saunia o Ia e taumafai se isi laasaga.

Sa aoaoina o ia ma le onosai e faifeautalai i lea fuaiupu ma lea fuaiupu. Sa ia tali atu a o tuputupu ae lona faatuatua, ma avea o sina sulu mu itiiti o le malamalama. Sa potopoto ane uo mai lana paranesi e faamautinoa atu ia te ia, ma tali atu i ana fesili. Sa latou taaalo tenisi ma tamaloloa, ma sa valaaulia o ia ma lona aiga i o latou fale e fai taumafataga ai.

Sa papatisoina o ia, ma o se laasaga tele lena o le faatuatua. Sa talosagaina o ia e le peresitene o le paranesi e avea ma Taitai sikauti i tama e toafa. Na sosoo lena ma isi tiutetauave ma sa faamalosia le sulu o le faatuatua i lona olaga i avanoa fou taitasi ma ona aafiaga.

Ma o loo faaauau pea lava lena tulaga. O le taimi nei, o loo galue auauna o se peresitene agavaa ma le alofagia o le siteki, o se taitai o le tofa loloto ma le malamalama, ae o le sili o na mea uma, o ia o se tagata faatuatua tele.

O le luitau e feagai ma tagata uma o lenei Ekalesia, o le laa lea i se isi faasitepu, e talia lena tiutetauave ua tofia ai o ia, tusa lava pe na te lagona e le agavaa ai, ma faia i le faatuatua ma le faamoemoega atoa o le a faamalamalama e le Alii le ala i ona luma.

Se’i ou faamatalaina atu se tala i se fafine i Sāo Paulo, i Pasila. Sa faigaluega o ia ma alu i le aoga ina ia lava mea e tausi ai lona aiga. Ou te faaaogaina ana lava upu e faamatala ai lana tala. Sa fai mai o ia:

“O le iunivesite sa ou aoga ai, e i ai se tulafono e faasa ai tamaiti aoga sa nofo aitalafu, ona sue i suega. O le mafuaaga lea, a maua lo’u totogi, e muamua lava ona ou aveeseina le tupe mo le sefuluai ma taulaga, ma o le tupe e totoe, sa faasoasoa e totogi ai le aoga ma isi tupe faaalu.

“Ou te manatuaina se taimi sa ou … feagai ai ma faigata o mea tau tupe. O se Aso Tofi, ina ua maua mai lo’u totogi. Ina ua ou tago e faavasega la’u paketi faalemasina, sa ou vaaia o le a le lava se tupe e totogi ai la’u sefuluai ma la’u aoga. Sa tatau ona ou filifili i mea e lua. O suega e tailua masina ma fai, o le a amata i le vaiaso e sosoo ai, ma afai ou te le su’e ai o lona uiga, e le aoga atoa le tausaga o le aoga. Sa ou matua mafatia lava… . Sa tiga lo’u loto. O se faaiuga tiga lea ua taatia nei i o’u luma, ma sa ou le iloa pe o le a le tonu e fai. Sa ou mafaufau loloto i faaiuga e lua: pe totogi le sefuluai po o le faamata’uina o le avanoa e ono le maua ai togi manaomia e faamaonia ai lo’u nofo i le aoga.

“O lenei lagona sa mafatia ai lo’u agaga ma sa i ai pea ia te au seia oo i le Aso Toonai. O iina na ou manatua ai, ina ua ou papatiso, sa ou ioe ai ou te ola i le tulafono o le sefuluai. Sa ou tauveina i o’u luga se matafaioi, mai lo’u Tama Faalelagi, ae le o faifeautalai. O le taimi lena, sa amata ai ona mou atu le mafatia, ae avanoa ai le nofoaga mo se faalogona malie o le toafilemu ma le naunautai… .

“O le po lena ina ua ou tatalo, sa ou ole atu ai i le Alii e faamagalo mai au i lo’u le mautonu. I le Aso Sa, a o le i amataina le sauniga faamanatuga, sa ou faafesootaia le Epikopo, ma sa ou totogia la’u sefuluai ma taulaga ma lo’u fiafia tele. O se aso faapitoa lena. Sa na ona ou lagona lava o le fiafia ma le toafilemu ia te au lava ia ma le Tama Faalelagi.

“O le aso na sosoo ai, a o ou i ai i lo’u ofisa, sa ou taumafai e sue se auala e mafai ai ona fai a’u suega ia e amata i le Aso Lulu e sosoo ai. O le faatele ona ou mafaufau, o le mamao ese foi lena o le le maua o se faaiuga. O le taimi lena, sa ou faigaluega ai i se ofisa o se loia, ma o lo’u pule o se tagata e sili ona pau ma tautalatasi ua ou iloa.

“O le a uma le taimi faigaluega, ae sau lo’u pule e aumai faatonuga mulimuli o le aso. Ina ua maea, sa tago i lana ato ma faatofa mai, … E le i umi, ae tu ma tilotilo mai ia te au ma fesili mai: ‘O a mai lau aoga?’ Sa ou tei ma sa ou le talitonu i le mea lea na ou faalogo i ai!’ Na pau lava le mea sa mafai ona ou tali atu ai ma le gatete o le: ‘O loo lelei mea uma!’ Sa tilotilo mai ma le agalelei ia te au ona toe faatofa mai foi lea… .

“E le i leva ae ulufale mai le failautusi i le potu ma faapea mai, o au o se tagata laki tele. Ina ua ou fesili pe aisea ae sa na ona tali mai lava: ‘Faatoa uma nei ona fai mai le pule e amata atu i le aso, ona totogi atoa e le kamupani lau Aoga uma ma au tusi. Ae e te le i alu, sau i lo’u ofisa e ta’u mai le totogi, ina ia oo atu taeao ua mafai ona ou avatua le siaki.’

“Ina ua alu o ia, sa ou tagi ma le lagona lotomaualalo ma ou tootuli ifo i le mea tonu sa ou i ai, ma faafetai atu i le Alii mo Lona agalelei. Sa ou … fai atu i le Tama Faalelagi, na te le tau aumaia lenei faamanuiaga ua tele naua mo au. Sa na o le totogi lava o le masina e tasi, ma o le sefuluai sa ou totogiina i le Aso Sa, e laitiiti tele pe a faatusatusa i le aofaiga o le tupe ua ou maua! I le taimi o lena tatalo, sa ou manatua ai upu o loo tusia i le Malaki: “Ia outou tofotofo mai ia te au i lenei mea, ua fetalai mai ai Ieova o ‘au, pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele” (Malaki 3:10). E oo mai i lena taimi, ou te le i lagonaina lava le maoae o le folafolaga o loo i ai i lena mau, ma o lenei poloaiga o se molimau moni o le alofa e aumaia e lo tatou Tama Faalelagi i Lana fanau i lenei lalolagi.”

O le faatuatua o le mea muamua lena e aumaia ai le malosi i lenei galuega. Soo se mea lava e faatuina ai lenei Ekalesia, i le lalolagi lautele, e iloagofie lava. E le faatuaoia i se atunuu e tasi po o se malo e tasi po o se gagana e tasi po o se nuu foi e tasi. E maua lava i soo se mea. O i tatou o se nuu o le faatuatua. O le faatuatua ua tatou savavali ai. Tatou te fetaomi atu i luma i la tatou malaga o le faavavau, e taitasi laa i le taimi.

E tele folafolaga a le Alii i e e faamaoni i soo se mea: Na Ia fetalai mai:

“O a’u, le Alii, ou te alofa mutimutivale ma faapalepale i e matatau ia te au, ma fiafia lava e faamamalu i e auauna mai ia te au i le amiotonu ma le upu moni e oo i le iuga.

“E sili lo latou taui, e faavavau foi lo latou mamalu.

“Ou te faaalia foi ia te i latou mea lilo uma, ioe, o mea lilo uma sa natia o lo’u malo talu mai aso anamua, a o tausaga amuli, …

“Ioe, e oo lava i mea e ofo ai o le faavavau o le a latou iloa, …

“O le a sili foi lo latou poto, e oo foi i le lagi lo latou malamalama; ma e faaumatia i o latou luma le poto o e popoto, ma le malamalama o e ua faautauta e iu ina le aoga.

“Aua o lo’u Agaga o le a ou faamalamalamaina ai i latou, ma lo’u mana o le a ou faailoa ai ia te i latou mea lilo o lo’u loto—ioe, e oo lava i na mea e le i vaaia e mata, pe faalogoina e taliga, pe oo foi i le loto o le tagata” (MFF 76:5–10).

E mafai faapefea e se tagata ona ole atu mo nisi mea? E maeu le mamalu o lenei galuega o loo tatou galulue ai. E maeu le ofoofogia o ala o le Silisiliese pe a tatou savavali ma le faatuatua i Ona luma.

O le faatuatua o se tagata sailiili, e pei o se fasi laau mata, e togi atu i se afi mumusaesae. E faamafanafanaina i le mumu o le afi, ona mago ai lea ma amata ona mumu. Peitai, afai e toe aveeseina mai, e le mafai ona ola na o ia. O le a pe lona mumu. Ae afai e tuu ai pea i le afi, e amatamata malie lava ona ola ma mumu tele ai. Ona avea ai lea ma se vaega o le afi musaesae ma o le a faamumuina ai isi laau mata.

Ma e faapena lava, o’u uso e ma tuafafine, lenei galuega sili o le faatuatua, e sii a’e ai tagata o lenei atulaulau, ina ia faateleina le malamalama i auala o le Alii ma le fiafia e sili atu e mulimuli ai i ona mamanu.

Tau ina ia faaauau pea ona fiafia mai, lo tatou Tama e Faavavau, i lenei galuega tele o le faatuatua i Lona Malo, ma ia tupu olaola ai, o la’u tatalo lea ma le lotomaualalo i le suafa o le Alii o Iesu Keriso, amene.