Kathleen H. Hughes
Fesoasoani Muamua, Au Peresitene Aoao o le Aualofa

“Ua faaeeina mai e le Tama Faalelagi i tamaitai le tele o meaalofa matagofie ma malosiaga ma gafatiaga,” o le saunoaga lea a Kathleen H. Hughes, le fesoasoani muamua fou na faatoa valaauina i le au peresitene aoao o le Aualofa. “Faatasi ai ma Lana fesoasoani, faapea ma le fesoasoani mai ia te outou uma taitoatasi, o le a le mafai ona tatou toilalo.”

Na saunoa ia Sister Hughes e faapea o upu o tusitusiga paia, faatasi ma lona malamalama o ia o se afafine o le Atua, ua faamautuina ai o ia ma fesoasoani ia te ia ina ia maua le filemu, e oo lava i taimi sili ona faigata o le olaga. Mo se faataitaiga, sa i ai se tasi taimi, a o tauivi o ia ma faigata ina ua faatoa mavae ona ola i sana tama, sa la asiasi atu ai ma lana tane i le Falepuipui o Liperate i Misuri. Sa la manatunatu i mea na oo i ai le Perofeta o Iosefa Samita iina ma faitau i le faaaliga na ia mauaina, lea o loo tusia i le Mataupu Faavae ma Feagaiga e 121. Na iloa ai e Sister Hughes e pei lava ona lagolagoina e le Alii ia Iosefa Samita, o le a Ia fesoasoani foi ia te ia ina ia onosaia ona lava faigata. “O se tasi lena o taimi e te manatuaina—o se taimi taua na e lagonaina ai le faatasi atu o le Alii i lo’u olaga ma iloaina ai le mea e mafaia e tusitusiga paia ona fai ina ia aumaia ai le mafanafana ma le filemi,” o lana saunoaga lea.

Na soifua mai ia Sister Hughes i le aso 19 o Oketopa 1944 i Tooele, Iuta, i ona matua o William Daly ma Emma Johanson Hurst. Sa faaipoipo atu o ia i le tusitala o Dean T. Hughes i le aso 23 o Novema 1966 i totonu o le Malumalu o Sate Leki; e toatolu le la fanau ae toalima le fanau a le la fanau.

Na maua e Sister Hughes sona faailoga (bachelor) i le Igilisi i le Kolisi a le Setete o Weber i le 1966, ae sa ia maua lona faailoga (master) i aoaoga faapitoa i le Iunivesite a Misuri Tutotonu i le 1974. Sa ia faiaoga i aoga mo le tele o tausaga ma sa galue o ia o se tasi o le pulega a le Itumalo o Aoga a Provo (Iuta) talu mai le 1985.

Talu ai nei lava sa auauna atu ai ia Sister Hughes o le peresitene o Tamaitai Talavou a le uarota. Sa i ai foi ni ona valaauga i le Aualofa, Peraimeri, Aoga Sa ma sa auauna atu foi i le fono faatonu aoao a Tamaitai Talavou.

“O le faamoemoega o le Aualofa o le fesoasoani lea i uso ma o latou aiga, faatasi ai ma le fesoasoani a le perisitua, ia omai ia Keriso,” o lana saunoaga lea. “Ou te lagonaina le filemu e tusa ai ma lenei valaauga ma ua iloa o le a avea ma se avanoa matagofie e galulue ai faatasi ma nei tamaitai maoae i le au peresitene.”