Nai le Pouliuli i Lona Lava Malamalama e Matua Ofo Ai
O faatusa o le Togiola a le Faaola, ua faamanatu mai ai ia te i tatou e le tatau ona tatou tautevateva i le pogisa. E mafai ona i ai pea ia i tatou Lona malamalama e le aunoa.
Sa folafola mai e Isaia, o se perofeta maoae o le Feagaiga Tuai, “O aso e gata ai, e oo ina faatumauina ai o le mauga o i ai le fale o Ieova i tumutumu o atumauga, … ona gasolo ane ai lea o nuu uma i ai.”1 Sa saunoa Peresitene Ioane Teila e faatatau i tagatanuu o na atunuu, “O le a latou o mai, ma faapea mai, matou te le iloaina lava se mea e uiga i mataupu autu o la outou lotu, ae ua matou vaaia o outou o se nuu faamaoni; tou te pulea ma le sa’o ma le amiotonu.”2
AUMAIA I FAFO “MAI LE POGISA”
A o talimalo le Aai o Sate Leki i Taaloga Faapitoa o le Taumalulu o le 2002, ua tatou vaaia ai se faataunuuga o le tele o valoaga. Ua taufai o mai atunuu o le lalolagi ma le tele o o latou taitai. Ua latou vaaia i tatou o galulue faatasi ma a tatou uo ma tuaoi mai isi faatuatuaga. Ua latou vaaia le malamalama i o tatou mata, ma tatou lululima faatasi. “O le mauga o le fale o le Atua,”3 ma ona tumutumu ua susulu matagofie, sa molimauina e le 3.5 piliona tagata o le lalolagi atoa. Ua faalogoina e atunuu leo matagofie o lenei Aufaipese a le Tapeneko. E fiaselau afe i latou na auai mai i se faaaliga tuusa’o na faaautu O Le Malamalama o le Lalolagi: O Se Faamanatuga o le Olaga—Agaga o le Tagata, Mamalu o le Atua, lea sa aofia ai ma se tautinoga o lo tatou talitonuga ia Iesu Keriso. Ou te faailoa atu ma lo’u lotomaualalo le faafetai tele, aua o nei mea atoa ma le tele o nisi auala, o loo faaauau ai pea ona “aumai i fafo nai le mealilo ma le pogisa” le Ekalesia a Iesu Keriso o le Au Paia o Aso e Gata Ai.”4
I le faagasologa o le Olimipeka, sa tele gaoioiga sa faaalia ai le malamalama, e pei o le afi o le sulu o le Olimipeka; le tamaitiiti o le malamalama; ma le autu o le “Ia Faamumu le Afi o i Totonu.”5 Atonu o le malamalama na aupito maoae, lea sa vaaia i mata o tagata tauva lava latou. Ae o le mea na sili ona faagaeetia ai i matou, e le o le tauvaga po o le vaaiga. O le upumoni e loloto atu na faatusa i ai nei mea—o le puna o le malamalama i totonu o i tatou taitasi.
Ou te tautala atu i lenei taeao ia i latou o loo tuufesili, “O le a lena malamalama na ou vaai i ai ma lagonaina? O fea na sau ai? Ma e mafai faapefea ona ou faaaogaina e le aunoa mo a’u lava ia ma i latou e pele ia te au?”
O LE MALAMALAMA O KERISO MA LE MEAALOFA O LE AGAGA PAIA
E tofu aumaia e i tatou taitoatasi i le lalolagi, le Malamalama o Keriso. “O a’u foi o le malamalama moni e faamalamalamaina ai tagata uma e o mai i le lalolagi,”6 na fetalai mai ai le Faaola.
“O le malamalama lea e i mea uma, na te avatu le ola i mea uma.”7
O lenei malamalama “e valaau atu ma faatosina ia faia pea mea lelei”8 ua “foaiina mai i tagata uma ina ia iloa ai e i latou le lelei mai le leaga.”9
O le faaaogaina o le Malamalama o Keriso e iloatino ai ma filifili le mea tonu, e mafai ai ona taitaiina atu i tatou i se malamalama e sili atu: o le meaalofa o le Agaga Paia. Ou te molimau atu, o le Toefuataiga o le talalelei ma le perisitua paia a le Atua, ua maua ai e soo o Iesu Keriso i nei aso e gata ai le mana e tuuina atu ai le meaalofa o le Agaga Paia. E tuuina atu i le faaee atu o lima o e o i ai le pule, ma e maua e i latou e mulimuli i mataupu autu o le faatuatua ma le salamo, ma ua mauaina sauniga o le papatisoga e ala i le faatofuina mo le faamagaloina o agasala.
O le Agaga Paia o le lona tolu lea o le Aigaatua, o se peresona o le agaga.10 O Ia o le Fesoasoani, o le Agaga o le Atua, o le Agaga Paia o Folafolaga. Na te molimau mai ia Iesu Keriso, i Lana galuega, ma le galuega a Ana auauna i luga o le fogaeleele. E galue o ia o se tasi e faamamaina ma faapaia i tatou mai a tatou agasala.11 O le aia tatau mo Lana mafutaga tumau, o se tasi lea o meaalofa aupito silisili e mafai ona tatou mauaina i le olaga nei, aua o le malamalama i Ana uunaiga, e mafai ai ona tatou toe foi atu i le afioaga o le Atua.12
POGISA MA LE MALAMALAMA
I le avea ai o ni tamaiti, tatou te aoao o le ala e aveesea ai le pogisa, o le ki lea o se moli. O nisi taimi, pe a malaga ese o tatou matua i le po, ona tatou kiina uma lea o moli i le fale! Tatou te malamalama i le tulafono faaletino, ma o se tulafono faaleagaga foi: e le mafai e le malamalama ma le pogisa ona i ai i le mea e tasi i le taimi e tasi.
E tuliese e le malamalama le pouliuli. A i ai le malamalama, ona sola ese ai lea o le pogisa. O le mea e sili ona taua, e le mafai e le pogisa ona faatoilalo le malamalama se i vagana ua leai se malamalama pe aveesea foi. A i ai le malamalama faaleagaga o le Agaga Paia, ona alu ese ai lea o le pouliuli o Satani.
Alii talavou e ma tamaitai talavou pele o le Ekalesia, o loo tatou feagai nei ma se taua i le va o le malamalama ma le pogisa. Pe ana leai le Malamalama o Iesu Keriso ma Lana talalelei, semanu ua faaumatia ai i tatou. Peitai ua fetalai mai le Faaola, “Ua ou sau o le malamalama i le lalolagi.”13 “O le mulimuli mai ia te au, e le savali o ia i le pouliuli, ae ia te ia le malamalama o le ola.”14
O le Alii o lo tatou malamalama ia, ma o ia moni foi o lo tatou faaolataga.15 E faapei o le afi paia sa siosiomia ai tamaiti i le 3 Nifae,16 o Lona malamalama foi o se faatusa o le ufifatafata mo le puipuiga i le va o oe ma le pogisa o le fili. E te manaomia lena malamalama. Tatou te manaomia lena malamalama. Ia suesue maeaea i le tamaitusi o le Mo Le Malosi o le Autalavou, ma faalogo i aoaoga a ou matua ma taitai. Ona e aoao ai lea e faaaoga le malamalama puipui o le talalelei e fai mou, e ala lea i le usiusitai i fautuaga poto.
Atonu e te tau manatunatu faapea, “E mafai faapefea ona ou faia lena mea?” E na o le tasi lava le ala: e tatau ona e aoao e faaolaola lena malamalama i aso taitasi e ala i le talitonu ia Iesu Keriso ma mulimuli ia Ana poloaiga.
O le taumalulu na te’a nei, sa ou maua ai le avanoa e aoao atili ai e uiga i o’u mama. Sa ou iloaina ai e le mafai ona tatou teuina le okesene. E le mafai ona tatou faasaoina le ea lea e tatau ona tatou manavaina, tusa lava pe o le a le malosi tatou te taumafai ai. O lea taimi i lea taimi, o lea manava ma lea manava, e aumai ai le ola mo i tatou, ma e faafouina. E faapena foi o tatou malamalama faaleagaga. E tatau lava ona faafou i totonu ia i tatou i se tulaga faifai pea. E ao ona faaolaola i lea aso ma lea aso, o lea mafaufauga ma lea mafaufauga, atoa ai ma faatinoga amiotonu i aso taitasi, pe afai tatou te mananao e aveese mai le pogisa o le fili.
A o ou laitiiti, e masani ona ou tietie mai la’u uila i le fale, pe a uma a’oga pasiketipolo i le po. Ou te tago faapipii se afi e pei o se foliga o se pea, i le pa’u o la’u uila. Afai la ou te viliina [le uila], ona vili lea e le pa’u o si tamai peapea e maua ai le eletise ma maua mai ai si sulu laitiiti o le malamalama. E faatauvaa, ae o se meafaigaluega lelei tele, peitai, e tatau ona ou viliina ina ia mafai ai ona aoga! Sa vave ona ou aoaoina afai e tuu lo’u viliina o la’u uila, ona pe foi lea o le sulu. Sa ou aoaoina ai foi afai ou te “galue ma le naunautai”17 i le viliina, ona atili ai lea ona malamamalama le sulu, ma aveesea ai le pogisa sa i o’u luma.
O le faaolaolaina o le malamalama faaleagaga, e maua mai i aso taitasi i taumafaiga faaleagaga. E maua mai i le tatalo, suesue i tusitusiga paia, anapogi, ma le auauna atu—e maua mai le ola ai i le talalelei ma le usitai i poloaiga. “O le e tausi ana poloaiga e maua le upumoni ma le malamalama,”18 na fetalai mai ai le Alii, “o le talia foi le malamalama, ma tumau pea i le Atua, e faateleina atu ai le malamalama; ma e tuputupu pea le pupula o lea malamalama seia oo mai le aso atoatoa ona lelei.”19 O’u uso e ma tuafafine, o le a i ai lena aso atoatoa ona lelei, pe a tatou tutu i luma o le Atua le Tama ma Iesu Keriso.
O nisi taimi e fesili ai tagata, “Aisea ou te alu ai i le sauniga faamanatuga?” po o le, “Aisea e tatau ai ona ou ola i le Upu o le Poto ma totogi sefuluai?” “E le mafai i se a ona tu le isi o’u vae i Papelonia?” E mafai lava ona ou faamatala atua le mafuaaga? Aua o le taumafaiga faaleagaga, e manaomia ai vae uma e lua! A e le gauai atu atoatoa e ola ai i le talalelei—ola ai ma lou “loto atoa, manatu, mafaufau ma le malosi atoa”20—e le mafai ona e faaolaolaina se malamalama faaleagaga ia lava e tulei ese ai le pogisa.
Ma o le lalolagi lenei, e le taitai ona mamao ese atu le pogisa. O le mea moni, e onoono mai lava i le tulimanu i taimi uma, e faatalitali ai mo se avanoa e oso mai ai i totonu. “Afai e te le amio lelei,” ua fetalai mai le Alii, “o loo taoto i le faitotoa le agasala.”21 Aua “o loo fealualuai [Satani] i le lalolagi, i le sailiga e faaumatia agaga o tagata.”
E manino lava e pei o soo se tulafono faaletino: afai tatou te tuu atu i le malamalama o le Agaga e emoemo mai pe mou atu foi ona o le le tausia o poloaiga, o le mea moni o le a ofi mai i totonu le pogisa o le tiapolo. “E oo mai lena amioleaga ma aveeesea le malamalama ma le upu moni, i le le usiusitai.”22
Ua tatou faitau i tusitusiga paia o nisi “e tautago i latou i le pouliuli” ma “faaseseina foi i latou pei o le ua ona.”23 O le tautevateva, e ono mafai ai ona tatou masani i le pogisa o o tatou siosiomaga, ma galo ai le matagofie o le savavali i le malamalama.
E i ai se ala e o ese mai ai i “puao o le pogisa”24 ma o atu ai i le ala e tau atu i le fiafia i lenei olaga ma le ola e faavavau i le lalolagi a sau. Na fetalai atu le Alii ia Isaia, “Ou te taitaiina e ua tauaso i le ala sa latou le iloa; ou te aumaia i latou i magaala sa latou le iloa: ou te liua le pouliuli i le malamalama i o latou luma.”25
Na otooto mai e le perofeta o Nifae le ala: “O lenei le au uso pele e, ua ou iloa afai tou te mulimuli atu i le Alo ma le loto atoa, ae le fai se mea pepelo po o se faa’ole’olega i luma o le Atua, a o le loto faamaoni ua salamo ai i a outou agasala, ma molimau atu i le Tama, ua outou loto ina ave i o outou luga le suafa o Keriso i le papatisoga … faauta, ona maua lea e outou le Agaga Paia; e moni, ona oo mai lea o le papatisoga i le afi ma le Agaga Paia.”26
O le feagaiga na tatou osia i le papatisoga ma faafou pe a tatou aai ma feinu i le faamanatuga—e ave i o tatou luga le suafa o Iesu Keriso, ma manatua pea o Ia, ma tausi Ana poloaiga—e aofia ai le folafolaga o le a tatou maua pea Lona Agaga e faatasi ma i tatou. 27 O faatusa o le Togiola a le Faaola, ua faamanatu mai ai ia te i tatou e le tatau ona tatou tautevateva i le pogisa. E mafai ona i ai pea ia i tatou Lona malamalama e le aunoa.
“IA PUPULA ATU LO OUTOU MALAMALAMA”
O lo’u ola ae i Long Island, i Niu Ioka, sa ou malamalama ai i le taua tele o le malamalama i tagata e faimalaga i le pogisa i le vasa. E ese le matautia pe a i ai se moli o le ava e le ola! E ese le faatauma’oi o se moli o le ava e le ola sona sulu!
O i tatou ua i ai le meaalofa o le Agaga Paia, e ao ona tatou faamaoni i ana uunaiga, ina ia mafai ai ona avea i tatou ma malamalama i isi.
“Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama i le lagi.”28
Tatou te le ma iloa pe o ai o faalagolago mai ia i tatou. Ma, e pei ona fetalai mai o le Faaola, tatou te “le iloa pe le liliu mai i latou ma le salamo, ma o mai ia te au ma le loto atoa, ma ou faamaloloina i latou, e fai foi outou ma ala e aumai ai le olataga ia te i latou.”29
O SE MOLIMAU FAAPITOA O LONA MALAMALAMA
O lenei o’u uso e ma tuafafine, o le feteenaiga tele mulimuli i le va o le malamalama ma le pouliuli, ou te faafetai ai lava mo le avanoa e “onosai ai i mea tiga, o se fitafita a Iesu Keriso.”30 Ou te tautino atu foi faatasi ma Paulo, “Ua leva le po, ua lata mai le ao: o lea ia tatou faatea ese ai galuega o le pogisa, a ia tatou oofu i ofu tau o le malamalama.31 Ou te tuuina atu la’u molimau faapitoa o Iesu Keriso o le malamalama ma le ola o le lalolagi; ioe, o le malamalama e leai sona iuga, e le mafaapouliuligia.”32
O Ia o le Malamalama o Ierusalema, na fanau mai ia Maria, o Lona tina faaletino, ma Lona Tama, o le Atua Silisiliese.
O Ia o le Malamalama sa papatiso i le faatofuina e Ioane le Papatiso, lea na faaali ifo ai le Agaga Paia i ona luga i se faatusa o le lupe.
O Ia o le Malamalama ua fiafia i ai Lona Tama.
O Ia o le Malamalama i le ao o le Ekalesia anamua, sa faatulagaina i Aposetolo e Toasefululua, o perofeta, ma fitugafulu.
O Ia o le Malamalama o le Togiola lea na faataunuuina i le Faatoaga o Ketesemane, faapea foi Kolokota, o le na tauaveina i Ona luga agasala a le lalolagi, ina ia maua ai e tagata uma le faaolataga e faavavau.
O Ia o le Malamalama o le tuugamau tuufua, o le Alii toetu ua i ai se tino mamalu o aano ma ivi, o le na motusia noanoaga ole oti, manumalo ai e faavavau i le tuugamau.
O Ia o le Malamalama na afio a’e i le lagi a o silamio Ona soo, faatasi ma se folafolaga o le auala lava lea o le a Ia toe afio mai ai.
O Ia o le Malamalama na faaali atu ma Lona Tama ma toefuataiina, e ala mai i le Perofeta o Iosefa Samita, le Ekalesia lava lea e tasi na Ia faatuina i le taimi o Lana galuega i le fogaeleele.
O Ia o le Malamalama o loo taitaia ma faatonutonu lenei Ekalesia i le taimi nei, e ala i faaaliga i se perofeta, o ona fesoasoani, ma Aposetolo e Toasefululua.
O Ia o lo’u Malamalama, o lo’u Togiola, o lo’u Faaola—ma lo outou foi.
Ou te iloa o loo soifua le Atua. Ua ou iloa ua Ia valaauina i tatou “nai le pouliuli i lona lava malamalama e matua ofo ai.”33 Ou te tatalo ia faaauau pea ona salalau atu le malamalama o Lana talalelei toefuataiina, ina ia mafai ai e tagata uma ona maua le avanoa e faalogo ai ma filifili, ma “ia oo mai nai le vaomatua [Lana Ekalesia], ma susulu mai … e pei o le masina, ae manino mai e pei o le la,” ina ia faatumuina le lalolagi i [Lona mamalu].”34
I le suafa o Iesu Keriso, amene.