Ua Latou Saunoa Mai Ia i Tatou

O Se Lipoti mo Tamaiti o le Ekalesia mai le Lona 172 o Konafesi Aoao Faaletausaga, 6–7 Aperila 2002

Peresitene Gordon B. Hinckley: E pei o le fetu o le pole i matu, tusa lava pe o a mea e tutupu i le lumanai, ae o loo i ai le Faaola o le lalolagi … . Po o le fiafia po o le faanoanoa, tatou te vaavaai atu ia te Ia, ma o loo i ai o Ia iina e faamautinoa ma fesoasoani mai ia te i tatou. O Ia o le autu tupito tatou te tapuai i ai.

Peresitene Thomas S. Monson, Fesoasoani Muamua i le Au Peresitene Sili: I le tele o aiga, o loo i ai lagona tiga ma le musu e faamagalo atu. E le afaina po o le a le mea na mafua ai na lagona tiga. E le mafai ma e le tatau ona tuu ai pea ina ia maua ai le tiga. E na o le fefaamagaloa’i e faamaloloina ai.

Peresitene James E. Faust, Fesoasoani Lua i le au Peresitene Sili: Muamua, o le tatalo o se faailoa atu lea ma le lotomaualalo o le Atua o lo tatou Tama, ma o le Alii o Iesu Keriso o lo tatou Faaola ma lo tatou Togiola. Lona lua, o se ta’uta’u atu lea ma le loto faamaoni o agasala ma solitulafono, ma se talosaga mo se faamagaloga. Lona tolu, o iloaina lea tatou te manaomia se fesoasoani i luga atu o mea tatou te mafaia. Lona fa, o se avanoa e faailoa atu ai le faafetai ma le faamanu i lo tatou Foafoa.

Peresitene Boyd K. Packer, Sui Peresitene o le Korama a Aposetolo e Toasefululua: E leai se mea e faatusalia le taua o se tama o le ua i ai le matafaioi ma na te aoao atu foi i lana fanau. E leai se mea e faatusalia se tina e faatasi ma i latou e faamafanafana ia i latou ma tuuina atu le faamautinoaga.

Elder M. Russell Ballard o le Korama a Aposetolo e Toasefululua: O le filemu—le filemu moni lea e te iloa o le ituaiga filemu lena e mafai ona e lagonaina le moni i lou agaga atoa—e na o le faatuatua i le Alii o Iesu Keriso e mafai ona oo mai ai.

Elder Robert D. Hales o le Korama a Aposetolo e Toasefululua: E tuliese e le malamalama le pouliuli. A i ai le malamalama, ona sola ese ai lea o le pogisa. O le mea e sili ona taua, e le mafai e le pogisa ona faatoilalo le malamalama se i vagana ua leai se malamalama pe aveesea foi. A i ai le malamalama faaleagaga o le Agaga Paia, ona alu ese ai lea o le pouliuli o Satani.

Elder Jeffrey R. Holland o le Korama a Aposetolo e Toasefululua: E mafai ona tatou … amata ai lo tatou ala e toe foi atu ai i le Tama. E tatau ona tatou faia ma le faavavevave ma le lotomaualalo pe a valaauina ai i tatou. E mafai ona tatou faitauina i luga o le ala o tatou faamanuiaga ma e mafai ona tatou faamalo atu i taumafaiga a isi. O le auala sili lena e mafai ona tatou auauna atu ai i isi, o le gaoioiga sili lena e mafai ona tatou faia e fesoasoani ai ia i tatou e atinaeina le alofa mo isi.

Elder Henry B. Eyring o le Korama a Aposetolo e Toasefululua: O uso fou e tatau … ona latou filifili i le faatuatua ina ia papatiso, ia i ai lo latou faatuatuaga i la latou uo atoatoa, o le Faaola lea… . E tatau ona latou filifili e talia le meaalofa o le Agaga Paia… . Ma o lena filifiliga e le faatasi ona faia, ae o aso uma lava, o itula uma, ma minute uma. Tusa lava foi pe a sau le Agaga Paia e musuia i latou i le mea e ao ona latou fai, o le faia po o le le faia foi o se filifiliga lava lea.

Elder Earl C. Tingey o le Au Peresitene o le Au Fitugafulu: O le a oo mai se manuia faapitoa e silisili i mea uma e manatu i ai i lou aiga pe a outou totogi se sefuluai atoa… . O le a e iloa ai e alofa lou Tama Faalelagi ia te oe.

Sister Gayle M. Clegg, Fesoasoani Lua i le Au Peresitene Aoao o le Peraimeri: O se faamanuiaga le faatagaina o fanau e taufetuli i le mea e gata mai ai lo latou lava malosi, in aia atiina a’e ai se malosiaga mo a latou lava molimau.