Anne C. Pingree
Fesoasoani Lua, Au Peresitene Aoao o le Aualofa

O Anne C. Pingree e fiafia tele e faitau. Ae sili atu i lo lena, e fiafia o ia e fesoasoani i isi ina ia aoao ia iloa ona faitau.

A o auauna ai ma lana tane o George C. Pingree, a o pulefaamalumalu o ia i le Misiona a Nigeria Port Harcourt, sa taulai atu ai nisi o taumafaiga a Sister Pingree i le siitiaina o le iloa faitautusi ma iloa tusitusi, aemaise lava i nisi o taitai o ausilali. “O le a le mafai lava ona galo ia te a’u le fiafia o uso ina ua latou aoao e iloa ona faitau. Ina ua latou tutu i luga i fonotaga faaleaoaoga ma faitau ni nai fuaiupu faigofie e uiga i o latou tiutetauave faaletaitai, e patipati isi tamaitai mo i latou, sa latou matuai fiafia lava,” o le saunoaga lea a Sister Pingree. “Na tatalaina ai se isi lalolagi fou.”

Faatasi ai ma se faailoga (bachelor) i le Igilisi mai le Iunivesite o Iuta, sa avea ai ia Sister Pingree ma se tagata galue fua e aoaoina le faitautusi ma le tusitusi i aoga tulaga lua e tautatala tamaiti i le faaSipaniolo e ala i le “Polokalama e Mafai Ona Ou Faitau” ma sa avea ma faiaoga Igilisi mo tagata Laotia e autovaa atu e ala i Tagata Galulue Fua a Amerika mo le Iloa Tusitusi ma le Faitautusi.

“Ou te manatu e tuuina atu a le Alii ia te oe ia ni atamai i lou olaga lea e saunia ai oe mo mea e oo mai i le lumanai,” o le saunoaga lea a Sister Pingree, o le na te faamemelo i ona tomai i le iloa faitautusi ma le iloa tusitusi i le fesoasoani ai i le sauniaina o ia mo lona valaauga fou. I le avea ai ma fesoasoani lua i le au peresitene aoao o le Aualofa, o loo faamoemoe o ia e faaauau pea ona siitiaina i luga le iloa faitautusi ma le iloa tusitusi e avea o se faamamafa faifaipea a le Aualofa.

Na faaopoopo mai ia Sister Pingree e faapea o le galulue faatasi ai ma tagata mai isi atunuu na saunia ai foi o ia i ni auala faaopoopo. “O la’u vaai, o lo’u manatu, ma lo’u malamalama i tamaitai i le lalolagi atoa ua faateleina. Sa latou aoaoina mai ia te au ni mea se tele e uiga i le faatuatua ma le molimau nai lo mea na ou aoaoina atu ia i latou,” o lana saunoaga lea.

A o le’i auauna atu o ia i le aufono aoao a le Aualofa, o le avea ai ma se peresitene o le Aualofa i le siteki ma le uarota, o se fesoasoani i le au peresitene a Tamaitai Talavou o le siteki, ma se peresitene o le Peraimeri a le uarota na tuuina atu ai foi ia Sister Pingree se alofa tele ma le talisapaiaina o tamaitai o le Ekalesia. ”Ou te faamoemoe e aapa atu i tamaitai uma ma fesoasoani ia te i latou ina ia latou lagonaina le taua o i latou i fofoga o le Alii. Ua ta’uina mai e perofeta ia i tatou e faapea, o i tatou, o ni tamaitai o le feagaiga, e i ai so tatou sao taua e fai i le fausiaina o le malo i nei aso e gata ai. O lo tatou aafiaga amiotonu e mafai ona faia ai se eseesega i lenei lalolagi,” o lana saunoaga lea.

Na soifua mai ia Sister Pingree i le Aai o Sate Leki i le aso 11 o Iuni 1941 i ona matua o Ezra T. ma Maude Erickson Clark. Sa faaipoipoina o ia ma lana tane i totonu o le Malumalu o Sate Leki i le 1963. E toalima o la alo ae toafa le fanau a le la fanau.