O Mataupu Tau i le Filemu o le Malo

Elder M. Russell Ballard

O Le Korama a Aposetolo e Toasefululua

O le filemu—le filemu moni lea e te iloa o le ituaiga filemu lena e mafai ona e lagonaina le moni i lou agaga atoa—e na o le faatuatua i le Alii o Iesu Keriso e mafai ona oo mai ai.

O’u uso e ma tuafafine, faataga mai au, e fai ma sui o i tatou uma lava, ou te faailoa atu ai le agaga faafetai ma le talisapaia i le au peresitene o le Aualofa ma lo latou au ofisa, lea ua faatoa faamalolo atu nei, i le maoae o la latou auaunaga mo i tatou

O lenei ua tatou tulalata atu foi i le faaiuina o se isi konafesi aoao faagaeetia ma le musuia. Ou te lagonaina pea le faamalosia ma le faamalamalamaina i le gasologa o nei aso ofoofogia o aoaoga ma molimau. Ou te iloa o le toatele o outou o loo faapena foi o outou lagona. Atonu o le mea tatou te faalogoina i le taimi o konafesi e tali tutusa i le lagona na oo i ai ia uluai soo o le Faaola a o latou mulimuli atu ia te Ia mai lea nofoaga i lea nofoaga e faalogologo ia te Ia o aoao atu le tala fiafia o Lana talalelei.

I le tele lava o tulaga, o aso faanoanoa na mo le fanauga a Isaraelu. O le pologa i puleaga a le Malo o Roma, sa latou augani atu ai mo le saolotoga ma le filemu. Sa latou faatalitali mo le Mesia; sa latou mautinoa o le a Ia afio mai e aveeseina i latou mai sauaga faaletino ma faaupufai. Ma sa tali atu nisi i le talalelei a le Faaola o le fiafia ma le filemu, e ui e le’i atoatoa ona latou talisapaia ona fuafuaga uma faaleagaga.

I se tasi aso patino lava i popofou o le galuega a le Alii i le faaletino, na mulimuli atu ai se motu o tagata e toatele ia te Ia i le Vai o Kalilaia, ma tautulei atu i Ona tafatafa a o Ia tutu ai i luga o le auvai. “O lea … na maliu ae ai o Ia i le vaa ua nofo ai i le vai; a o le motu o tagata uma sa i le auvai i latou.

“E tele mea ua ia aoao atu ai ia te i latou i faataoto” (Mareko 4:1–2).

E tele mea maoae ma le ofoofogia na aoaoina i lena aso, e aofia ai le faataoto i le tagata lulu saito (tagai Mareko 4:3–20). I le faaiuga o se aso na tumu i aoaoga ma faatonuga, na fautua atu ai le Alii i Ona soo ina ia latou sopoia atu le isi itu o le Sami o Kalilaia.

A o latou folau ai i lena po, “ona to mai ai lea o le afa, o le matagi tele lava, ona fati mai ai lea o peau i totonu o le vaa, ua tumu ai.

“A o ia sa i le taumuli, ua tofa i le aluga; ona latou fafagu lea ia te ia, ma fai mai ia te ia, Le aoao e, e te le manatu mai ea ia te i matou a fano?

“Ona tulai lea o ia, ma na vavao atu i le matagi, ua fetalai atu foi i le vai, Faalologo ia, ina malu ia. Ona mate lea o le matagi, i le ua matua malu” (Mareko 4:37–39).

Pe mafai ona outou manatunatu i mea sa mafaufau i ai le au Aposetolo a o latou vaavaai atu i nei lava elemene—o le matagi, o le timu ma le vai—o usiusitai i le poloaiga a lo latou Matai ina ia malu? E ui lava e le’i leva ona valaauina i latou i le tofi paia faaaposetolo, ae sa latou iloa o Ia ma alolofa ia te Ia ma talitonu ia te Ia. I sina taimi puupuu lava, sa latou faalogo atu ai ia te Ia o aoaoina atu ia mea ofoofogia, ma sa latou vaai ia te Ia o faia vavega silisili. Ae o nei mea sa sili atu nai lo le mea sa latou manatu i ai, ma o o latou foliga vaaia na faaalia ai.

“Ona fetalai atu lea o ia ia te i latou, Se a le mea tou te fefefe ai faapea? se a le mea tou te le faatuatua mai ai?

“Ona matua matatau lava lea o i latou, ma fetautalatalaa’i i latou, Po o ai lava lenei, ina ua faalogo lava le matagi ma le vai ia te ia?” (Mareko 4:40–41).

I taimi o faigata ma o nisi taimi e taufaamata’u ai, o le folafolaga a le Faaola i le filemu e le gata ma le faavavau e mafua ai ona tatou maua le lagona e taliaina nei mea ua oo mai, e pei lava o Lona mafaia ona faamalu ia galu fafati lea sa tatau ona matuai aafia ai i latou o e sa faatasi mai ia i le Vai o Kalilaia i lena po matagi i aso ua leva.

E pei o i latou o e sa ola ai i le taimi o Lana galuega i le faaletino, e i ai nisi o loo faatasi ma i tatou o e o loo sailia le filemu faaletino ma le uluola e avea ma faailoga o le ofoofogia o le mana o le Faaola. O nisi taimi tatou te toilalo ai ina ia malamalama o le filemu e faavavau na folafola mai e Iesu o se filemu lea i totonu, e tupu mai i le faatuatua, ae taula i le molimau, e faafaileleina e le alofa, ae faailoa atu e ala i le usiusitai faifaipea ma le salamo. O se filemu o le agaga lea e aafia ai le loto ma le agaga. Afai e iloa moni lava e se tasi ma oo i ai lenei filemu i totonu, ona leai lea o se fefe mai feeseeseaiga ma fevaevaeaiga faalelalolagi. E iloa e se tasi i lona loto o loo lelei mea uma e tusa ai ma mea ua sili ona taua.

E faapei ona aoao atu Peresitene Hinckley i le usoga a alii i le po anapo, e leai se filemu i le agasala. Atonu e i ai le faigofie, lauiloa, tautaua, ma le uluola; ae e leai se filemu. “O le amioleaga e le o le fiafia lea” (Alema 41:10). E le mafai e se tasi ona maua le filemu pe afai o loo ola i se olaga e le o ogatasi ma upu moni faaalia. E leai se filemu i le feaina’i ma le fefinaua’i. E leai se filemu i le amio mataga, o le le taupulea po o le le onosai. E leai se filemu i le faananau atu i fualaau oona, ava oona po o ata ma tusi mataga. E leai se filemu i le faasaua i isi i soo se auala, e tusa lava po o lagona, faaletino, po o feusuaiga, aua o i latou o e sauaina o le a tumau ai pea le le mautonu i le mafaufau ma le faaleagaga seia o latou o mai ia Keriso i le lotomaualalo atoatoa ma saili le faamagaloga e ala i le salamo a’ia’i.

O se tasi taimi po o se isi taimi ou te talitonu ai e augani uma lava tagata mo le “manuia o le Atua, o loo silisili lava i mea uma e manatu i ai” (Filipi 4:7). O lena filemu mo o tatou loto fesouaina e faatoa oo mai ia i tatou pe a tatou mulimuli i le malamalama o Keriso, lea e “tuuina atu i tagata uma ina ia iloa ai e i latou le lelei ma le leaga” (Moronae 7:16), a o taitaiina atu ai i tatou i le salamo mai agasala ma saili le faamagaloga. Mo i tatou uma lava e i ai le fia ‘ai ina ia iloa “mataupu tau le filemu o le malo” (MFF 36:2), ma ia tofo “i fua o le amiotonu,” lea e “luluina ma le filemu e i latou o e faatupuina le filemu” (Iakopo 3:18). I totonu o soo se fale, aai ma nuu e ao ona tatou taumafai mo le filemu, ae aua ne’i o tatou auai i le faatupuina o le feitagai po o le fevaevaea’i.

I le talafaasolopito atoa faatusipaia, na folafola atu ai e le Alii le filemu i Ona soo. Na tusia e le fai Salamo e faapea “e aumaia e le Alii le malosi i lona nuu; e faamanuia e le Alii lona nuu i le filemu” (Salamo 29:11). Na faatatau e Isaia le Faaola o le “Alii o le Filemu” (Isaia 9:6). Na muai vaaia e Nifae le aso e faapea o e e tupuga mai ia te ia “o le a faailoa atu ai le Alo o le amiotonu ia te i latou; na te faamaloloina i latou, latou te fifilemu ma ia” (2 Nifae 26:9).

I le toe o ni nai itula ona Ia amataina lea o lena faagasologa mamalu o le Togiola, na tuuina atu ai e le Alii o Iesu Keriso le folafolaga taua lenei i Ana aposetolo: “Ou te tuuina atu ia te outou le manuia, o lo’u manuia ou te avatu ai ia te outou” (Ioane 14:27).

Pe sa Ia folafola atu ea i Ona soo pele le ituaiga filemu lea e iloa e le lalolagi–le saogalemu, malupuipuia, ma le aunoa ma se fefinauai po o ni faigata? E mautinoa lava le faamaoniaina mai e faamaumauga o talafaasolopito. O na uluai aposetolo ua tele lo latou iloa i faigata ma sauaga i le taimi atoa na totoe o o latou olaga, atonu o le mafuaaga lea na faaopoopo atu ai e le Alii lenei manatu i Lana folafolaga o le filemu: “Ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).

“Ua ou fai atu nei mea ia te outou, ina ia outou maua le manuia ia te au; e maua foi outou e le puapuaga i le lalolagi, a ia outou loto tetele, ua ou manumalo i le lalolagi” (Ioane 16:33, faaopoopo le faamamafa).

O le filemu—le filemu moni lea e te iloa o le ituaiga filemu lena e mafai ona e lagonaina le moni i lou agaga atoa—e na o le faatuatua i le Alii o Iesu Keriso e mafai ona oo mai ai. Afai e mauaina lena upu moni taua, ma ua malamalama foi ia mataupu faavae o le talalelei ma faaaogaina, e mafai e le filemu sili ona tumau ai i totonu o loto ma agaga o fanau a le Tama Faalelagi. Na fetalai mai le Faaola e ala mai ia Iosefa Samita, “O le faia galuega o le amiotonu o le a maua ai lona taui, o le filemu lea i le lalolagi, ma le olaga faavavau i le lalolagi a sau” (MFF 59:23).

O nisi taimi e maofa ai i le vaai atu i le eseesega e mafai e lenei filemu ona i ai i olaga o i latou o e taliaina. A o o’u pulefaamalumalu ai i le Misiona a Toronto i Kanata i le tele o tausaga ua mavae, sa amata ai ona aoaoina e a matou faifeautalai se aiga sa matuai pogisa lava faaleagaga. Sa matitiva i latou ma e le’i aooga, ma o o latou foliga vaaia na atagia ai le leai o se talisapaia po o le popole i le tulaga o le tumama ma le ola maloloina. Ae o i latou o ni tagata lelei, ma le tauagafau—o nisi o “tagata loto faamaoni” lea e masani ona matou tatalo i ai ina ia mauaina e a matou faifeautalai—ma sa latou tali mai faaleagaga a o latou lagonaina mo le taimi muamua i o latou olaga le filemu o loo ofoina atu e le talalelei.

Ina ua matou iloa o le a papatisoina i latou, sa ma auai atu loa i ai ma Sister Ballard i le sauniga o le papatisoga. Na o’u tu e sosoo atu i le epikopo o le uarota ae taunuu atu loa le aiga. I le faamaoni a’ia’i, e tatau ona ou ta’u atu ia te outou faapea sa matuai tosina uma lava le vaai ia i latou. Sa foliga taugaeleelea ma auleaga i latou. Talu ai ona sa malaga ese o ia, e le’i feiloai atu lava le epikopo i tagata sili ona fou o lana uarota; o le lagona muamua lava la, e faapea atu, e matuai le manaia lava. A o latou savavali ese atu, na ou manatu sa mafai ona ou faalogoina lona tau pa’u i lalo.

Sa tuu lo’u lima i le ua o lenei epikopo lelei ma tuuina atu ia te ia la’u lagolago—i la le tino faapea foi ma le faaleagaga. Na uuna’ia a’u e faapea atu: “Epikopo, pe le o se mea matagofie ea lenei? O le a tatou liliuina i latou e avea o ni tagata lelei o le Au Paia o Aso e Gata Ai!”

Sa ia tilotilo mai ia te a’u, ona ia ataata lea. Sa toetoe a le mafai ona ou iloa pe o ataata o ia ona ua ia malie i la’u tala pe o loo manatu o ia o a’u ua na o se isi faifeautalai ua sili ona maelega.

Sa faagasolo le sauniga o le papatisoga, ma sa papatisoina le aiga. O le aso na sosoo ai, na matou fuafua ai e auai atu i lena uarota ina ia mautinoa o loo taliaina lelei le aiga pe a latou o atu i sauniga i le avea ai ma tagata fou o le Ekalesia.

Ina ua malaga atu i totonu le aiga i le falelotu mo le sauniga faamanatuga, sa ou nofo i luga o le tulaga e sosoo atu i le epikopo. Sa ofuina e le tama se ofutino mama pa’epa’e. E fai si laitiiti mo ia o lea sa le mafai ai ona faamau le ua o le ofu, ma sa ia faia foi se fusiua lea ou te manatuaina sa ou vaai i ai i se tasi o a’u faifeautalai. Ae na atagia mai i ona foliga le fiafia ma le filemu. O le tina ma le fanau teine na foliga mai ua liua i latou talu mai le aso ua mavae. O o latou ofu e le sitaili tele, ae sa mama ma manaia. Sa tulaga ese foi lo latou susulu. O tama laiti sa ofuina ni ofutino papae e eseese uma le lapopoa ma e lapopoa tele mo i latou, e tusa lava pe afe i luga ia lima. Ma sa latou faia ni fusiua lea e toeitiiti oo i lalo o o latou tuli. Na matuai manino mai lava le aveina atu e faifeautalai o o la’ua ofutino ma fusiua i nei tamaiti ina ia mafai ai ona latou o mai i le sauniga faamanatuga ae ua ofu lelei mai.

Sa latou nonofo faatasi ma a latou faifeautalai, ma sa vaaia lava le susulu mai o le malamalama faaleagaga mai ia i latou. Na faamatalaina e Alema lenei mea o le “mauaina o foliga o le [Atua] i o outou mata” (Alema 5:14). Sa ou soso atu i le epikopo ma ou faapea atu i ai, “Ua e vaai, Epikopo? O le a tatou faia i latou o ni Au Paia!”

E moni lava o le liuaina vave lea na i ai i le faaletino sa matuai maoae lava pe a faatusatusa atu i le lofituina sili ona taua lea na i ai i le liuaina faaleagaga lea na tupu i lena aiga a o ulufale atu atoatoa le talalelei i o latou loto ma olaga. O aoaoga a faifeautalai ma le faaaumea faifaipea a lo latou epikopo lelei ma tagata o le uarota, na faapea ai ona tulai ese mai lenei aiga mai le pogisa faaleagaga ae oo atu i le malamalama o le talalelei ma le upu moni. O le malamalama lena na faamafanafanaina ai le aiga, faafouina ma faamalosia e ala i le filemu lea e maua mai le iloaina o loo soifua le Alii o Iesu Keriso. O le malamalama o upu moni o le talalelei na toefuataiina mai i le lalolagi e ala mai i le Perofeta o Iosefa Samita na amata ona faaali atu ai i lenei aiga le ala i le malumalu, lea na latou mauaina ai i le tausaga na sosoo ai o latou faamanuiaga e faavavau.

Ou te toe fia sii maia ia upu a Isaia: “E aoaoina lau fanau uma lava e le Alii; e tele foi le manuia o lau fanau” (Isaia 54:13).

O le taimi lava tatou te tofo ai i le suamalie o le fua o le filemu a le Atua, tatou te naunau loa e fetufaai atu i isi. Sa lauiloa ia Falanisisi o Asisi o se tagata e “fiafia i foafoaga uma” o le sa tele lona olaga sa alu i le auauna atu i e matitiva ma le le tagolima sa i ona tafatafa—e aofia ai ma manu. O le filemu na ia maua i lana auaunaga na faamalosia ai o ia, ma mafua ai ona ia naunau ina ia fusia faatasi ai ma isi. Na ia tusia:

Le Alii e, ia avea au ma se meafaigaluega o lou filemu;
O le mea o i ai le feitaga’i, ia ou faaali atu i ai le alofa;
O le mea o i ai le manu’a, ia ou faaali atu le laveai;
O le mea o ia i le masalosalo, ia ou faaali atu le faatuatua;
O le mea o i ai le lotovaivai, ia ou faaali atu le faamoemoe;
O le mea o i ai le pouliuli, ia ou faaali atu le malamalama;
Ma le mea o i ai le faanoanoa, ia ou faaali atu le olioli.
Lo’u Matai Paia e, ia tuu mai ina ia aua ne’i o’u soona saili
Ina ia faafiafia a’u ae ia faafiafia i isi;
Ia latou malamalama e pei ona ou malamalama;
Ia alofagia i latou e pei ona alofagia o a’u.
Aua o le foai atu matou te talia ai;
O le faamagalo atu e faamagaloina ai i matou,
Ma o le oti lea matou te fananau ai i le ola e faavavau.

E tele taimi na uunaia ai e le Alii Ona soo ina ia “avea ma tagata faatupu filemu,” ma folafola atu faapea “e taua i latou o atalii o le Atua” (Mataio 5:9). O lena manatu o loo maua i totonu uma o tusitusiga paia, ma maua ai se faatulagaga o loo faamamafaina ai i faataoto ma folafolaga:

“Ia vave ona lelei ma le o loo lua masesei” (Mataio 5:25).
“Alofa i ou fili” (Mataio 5:44).
“Aua le faamasino atu” (Mataio 7:1).
“Alofa i lou tuaoi ia pei o oe lava ia te oe” (Mataio 22:39).
“Aua le faasala atu” (Luka 6:37).
“Ia faamagalo atu” (Luka 6:37).
“Ia fealofani” (Ioane 13:34).

O nisi na o nai aoaoga faaleagaga o loo matuai faailoa manino mai ai o le filemu o le Atua e le taofiofia na o i tatou. Ae ia faasafua atu i o tatou aiga, o a tatou uo, ma o tatou nuu. E ao ona fetufaai ai le Ekalesia e faapea foi ia i latou e le o ni tagata o la tatou Ekalesia. Atonu e le filifili i latou o loo siomia i tatou e tofo i le suamalie ma le filemu o le atoaga o le talalelei toefuataiina mo i latou lava, e mautinoa lava o le a faamanuiaina i latou e ala i le vaai mai i o tatou olaga ma lagonaina le filemu o le talalelei pe a tatou faatasi. O le a faatupulaia le savali o le filemu ma faalauteleina atu e ala i a tatou faataitaiga.

“Ia outou fifilemu,” o le saunoaga lea a le Aposetolo o Paulo, “ona ia te outou lea o le Atua e ona le alofa ma le manuia” (2 Korinito 13:11).

Ou te faafetai ona ua mafai ona ou molimau atu ia te outou faapea o Iesu Keriso o le Alo o le Atua, ma o le mulimuli atu ia te Ia, i le faatuatua ma le faalagolago, e mafai ai e tagata uma ona maua le filemu moni i totonu lea e ofoina mai e le talalelei ia i tatou, e pei ona matagofie naua le aoaoina ai o i tatou i lenei konafesi. Ou te molimau atu ai ma le lotomaualalo i nei mea i le suafa o Iesu Keriso, amene.