Ua Valaauina le Au Pulega Aoao ma Fitugafulu Pule Eria, ma le Au Peresitene Aoao o le Aualofa

O sui fou na faatoa valaauina o le Au Pulega Aoao, o Fitugafulu Pule Eria, ma le Au Peresitene Aoao o le Aualofa na lagolagoina i le aso 6 o Aperila i le Lona 172 o Konafesi Aoao Faaletausaga.

O Elder Gerald N. Lund ma Elder William R. Walker na valaauina e auauna atu i le Korama Lona Lua a Fitugafulu. O Bonnie D. Parkin na valaauina e avea ma peresitene aoao o le Aualofa, faatasi ai ma Kathleen H. Hughes e avea ma fesoasoani muamua ma Anne C. Pingree e avea ma fesoasoani lua.

E tolusefulu ia ni Fitugafulu Pule Eria fou na valaauina foi—e 13 e mai le Iunaite Setete, e toalua mai Brazil, toalua mai Iapani, ma le taitasi mai Atenitina, Ausetalia, Polevia, Chile, Ekuetoa, Egelani, Ghana, Hong Kong, Korea, Niu Sila, Paraguay, Peru, ma Uruguay.

I ana saunoaga amata i le faagasologa o le sauniga o le taeao o le Aso Toonai, na saunoa ai Peresitene Gordon B. Hinckley i le faaauauina o le faatupulaia o le Ekalesia. Na ia faatatau i lagona faagaeetia o le Ekalesia na mauaina e le fiaselau afe o tagata asiasi, o taitai o malo, ma le au faasalalau ina ua latou asiasi atu i le Aai o Sate Leki mo Taaloga a le Olimipeka o le Taumalulu. Na ia saunoa foi i le faamanuiaina o le Tupe Faaagaga mo Aoga na faasilasilaina ia Aperila talu ai, lea ua fesoasoani nei i le tusa o le 2,400 o autalavou o le Au Paia o Aso e Gata Ai i atunuu tau atiae ina ia maua se aoaoga.

I le gasologa o le sauniga perisitua, na saunoa malosi atu ai Peresitene Hinckley i le tetee atu i le faasaua i taitoalua, o e matutua, faapea ma le fanau. “O se mea e le mafai ona taliaina,” na ia saunoa ai.